Japredikákena Jesús ojapohaguéicha
1 Jesús ohechaukavaʼekue mbaʼéichapa japredikavaʼerã. Heta hendáicha ha opárupi Jesús ohechaukavaʼekue ohayhuetereiha Ñandejárape ha yvyporakuérape avei. Omboʼe Ñandejára Ñeʼẽ umi ipyʼaporãvape ha oipytyvõ umi oñembyasy ha ojejopy vaívape (Mat. 9:35).
2 Mbaʼépa ha mbaʼéichapa Jesús ñanemboʼe. Jesús ndoikeivaʼekue polítikape ha noñemoĩri oipytyvõ opavave oikotevẽvape. Haʼe ndohejaivaʼekue mbaʼeve omboyke chupe hembiapo iñimportantevévagui (Luc. 8:1). Jesús omombeʼu meme vaʼekue Ñandejára Goviérno añoite oipeʼaitetaha opa mbaʼe ñanembohasa asýva. Haʼe ouvaʼekue ojapo hag̃ua peteĩ mbaʼe ha pyaʼe ojapopa hag̃uáicha. Umi hénte oipotárõ guare Jesús opyta Capernáumpe, haʼe heʼi hembiguaikuérape: “Jaha katu amo gotyomie [...], ha che añemoñeʼẽta upérupi avei. Upearã ningo ajuvaʼekue” (Mar. 1:38, JMP).
3 Ohekomboʼe porã rire hemimboʼekuérape, Jesús omondo chupekuéra opredika hag̃ua. Ha heʼi chupekuéra: “Pemoherakuã pehóvo pe yvagapegua Rréino oñemoaguĩmaha” (Mat. 10:7, BNP). Haʼe omboʼevaʼekue hemimboʼekuérape omotenonde hag̃ua Ñandejára servísio opaite mbaʼépe (Mat. 6:33). Ko mbaʼe Jesús heʼivaʼekue chupekuéra oho mboyve yvágape, ohechauka porã mbaʼépa ojapovaʼerã hikuái: ‘Tapeho aipóramo opa tetãnguéra rupi ha pejapo ichuguikuéra che remimboʼe’ (Mat. 28:19, BNP).
4 Mbaʼérepa iñimportánte Ñandejára Goviérno. Jesús oñeʼẽ meme vaʼekue Ñandejára goviérnore ha omokyreʼỹ hemimboʼekuérape ojapo hag̃ua avei upéicha. Opa mbaʼe ojapóvante yvypóra oipeʼa hag̃ua umi provlemaita, nosẽporãmoʼãi (Jer. 10:23). Ñandejára Goviérno añoite oipeʼapáta opa mbaʼe ñanembohasa asýva ha upéicha omopotĩta héra (Mat. 6:9, 10). Ñamombeʼúramo koʼã mbaʼe “umi oñembyasýva ha ojepyʼapývape mbaʼe vaieta [...] oikóvare” ovyʼáta ha oikóta pyʼaguapýpe hikuái, oikuaágui mbaʼépa ñaneraʼarõ tenonderã gotyo (Eze. 9:4).
5 Koʼag̃aite peve Jesús omoakã hína ko marandu porã ñemosarambi, ha haʼe heʼi katuete ñanepytyvõtaha jajapo hag̃ua upéva (Mat. 28:20). Ñañehaʼãpañaína jajapo Jesús ojapohaguéicha? (1 Ped. 2:21.) Jajapókena ikatúva guive japredika hag̃ua koʼã ára pahápe. Ñañehaʼãkena jajapo Jesús ojapohaguéicha.