Peteĩ lívro ijojahaʼỹva
Heta lívroma ojehai ko múndope péro ndaipóri ohupytýva la Bíbliape. Ymaite guive opaichagua tapicha oleévo ko lívro otopa ipype umi konsého iporãvéva ha ñanembopyʼaguapýva. Releémapa nde la Biblia? Heta ñande rapicha neʼĩra olee ha oĩ katu oikuaaséva mbaʼépa ñanemboʼe. Ko folléto katuete nepytyvõta reñepyrũ hag̃ua reikuaa mbaʼépa heʼi la Biblia.
REÑEPYRŨ mboyve rehesaʼỹijo la Biblia iporãta reikuaami koʼã mbaʼe nepytyvõtava reiporukuaa hag̃ua. Ko lívrope oñehenói avei Ñandejára Ñeʼẽ, ipype oĩ 66 kuatiañeʼẽ. Oñepyrũ Génesisgui ha opa Apocalipsis térã Revelaciónpe.
Heta oĩ oñeporandúva mávaguipa ou la Biblia. Ko lívro ohai 40 kuimbaʼe rupi 1610 áño pukukue. Péro koʼã karai ndeʼíri ohai hague ijeheguínte; peteĩva heʼi voi: ‘Opaichagua Ñeʼẽ ojehaika Ñandejára espíritu rupive’ (2 Timoteo 3:16, ÑÑB). Ha ambue katu heʼi: ‘Ñandejára espíritu oñeʼẽ che rupive ha iñeʼẽ oĩ che jurúpe’ (2 Samuel 23:2). Koʼã kuimbaʼe ohechauka la Biblia ouha Ñandejára Jehovágui. Jaleévo Ñandejára Ñeʼẽ jahecha haʼe omeʼẽ hague ñandéve oipotágui jaikuaa chupe.
Tekotevẽ avei jaikuaa mbaʼépa pe marandu iñimportantevéva oĩva la Bíbliape. Upéva hína Ñandejára oiporutaha igoviérno yvagapegua ohechauka hag̃ua haʼe añoite oisãmbyhyvaʼerãha yvyporakuérape. Ko follétope jahecháta mbaʼéichapa la Biblia oñeʼẽ Ñandejára goviérnore Génesis guive Apocalipsis peve.
Iporãta ñanemanduʼa upe mbaʼére ñahesaʼỹijóvo ko lívro ijojahaʼỹva, la Biblia.
a Ko follétope ojeporúta a.C (antes de Cristo) oñeñeʼẽ jave peteĩ mbaʼe oikovaʼekuére Jesús ou mboyve. Káda párte opakuévo oĩta umi fécha oiko hague pe oñemombeʼúva.