Kárta omboúva Cuerpo Gobernante
Ore ermanokuéra pohayhuetéva:
Ajépa javyʼaite jaiko haguére ko tiémpo ijojahaʼỹvape! Rovyʼaiterei ningo pomoirũ haguére ha péicha oñondivepa ñamombeʼu ñande Ru yvagapegua marandu (Sof. 3:9; Juan 14:12).
Jaservíramo jepe vyʼapópe ñande Apohare Jehovápe, ñambohovái jepi opaichagua provléma. Pe áño de servísio ohasavaʼekuépe oĩ ermáno ombohováiva heta mbaʼe ijetuʼúva. Pór ehémplo y ojagarrapa hogakuéra, yvyryrýi, ama guasu ha hetave mbaʼe vai (Mat. 24:7). Heta oĩ avei hasykatu ha ijedámava, ha opavavénte voi ningo ‘jahasa asy’ ko múndo añáme (Mat. 24:8, NM). Heta tetãme katu ñane ermanokuéra oĩ kárselpe omombaʼeguasu haguére Jehovápe, umíva apytépe Armenia, Corea del Sur ha Eritréape (Mat. 24:9).
Péro, mbaʼépa ñanepytyvõraʼe jagueropuʼaka hag̃ua koʼã mbaʼe ijetuʼuetéva? Peteĩ mbaʼe iñimportantetereíva haʼe upe ojehaivaʼekue téysto dél áño 2010-pe: ‘Pe mborayhu oaguanta opa mbaʼe. Pe mborayhu ndopamoʼãi arakaʼeve’ (1 Cor. 13:7, 8, NM). Upeichaite ningo, jahayhu rupi Jehovápe ha ñane ermanokuérape jagueropuʼaka opa mbaʼe.
Heta hénte ohecharamoiterei mbaʼéichapa japredika opárupi ha pyʼỹi javisita chupekuéra. Ha umi ndostudiaséiva la Biblia jepe heʼi ñandéve: “Pe tembiapo peẽ pejapóva, ore rojapovaʼerã kuri”. Mbaʼérepa ñande testígo de Jehová japredika koʼẽ koʼẽre? Jaʼéma haguéicha japorohayhúgui. Jaikuaa ñande Ru yvagapegua ndoipotaiha avave oñehundi, ha ñande upéicha avei (2 Ped. 3:9). Ha jahupytyvaʼekuére pe áño de servísio ohasavaʼekuépe, ojekuaa jaipotaha enterove oservi Ñandejárape. Upérõ ojehupytýkuri 7.508.050 maranduhára. Ndaipóri voi ótra rrelihión péicha orekóva hetaite maranduhára ohayhu ha oipytyvõséva vyʼapópe hapichakuérape!
Tuicha ñanemombarete jahechávo mbaʼéichapa oñekumpli ohóvo ko profesía Isaías ohaivaʼekue: ‘Ára pahápe opaite tetãnguéra oujoavaʼerã pe montáña Ñandejára róga guasu oĩháme’ (Isa. 2:2-4, ÑÑB). Pe áño de servísio ohasavaʼekuépe ojevautisákuri 294.368, ha haʼekuéra oho avei ñanendive Jehová rógape. Ajépa javyʼaite ñanemoirũ haguére hikuái! Ha jahechauka hag̃ua jahayhuha koʼã ermáno pyahúpe, jasegivaʼerã ñaipytyvõ chupekuéra ojehekýi hag̃ua umi ñuhã Satanás omoĩvagui (1 Ped. 5:8, 9).
Upe martes 30 de marzo de 2010 ohókuri 18.706.895 tapicha Conmemoracionhápe. Neʼĩrava peichaite peve ojeho ko atýpe! Jahechakuaa oĩha gueteri hetaiterei ikatúva omombaʼeguasu ñanendive Ñandejárape, upévare javyʼa nohundírima hague ko múndo aña. Ha og̃uahẽ mboyve upe ára, jasegivaʼerã jagueropuʼaka opa mbaʼe jahayhúgui Ñandejárape (2 Tes. 3:5).
Umi aty guasu tres diagua ojejapovaʼekue oparupiete áño 2010-pe, hérava “Ñañemoag̃uíkena Jehováre”, omombareteve ñande jerovia. Upéicha rupi jaʼekuaa siertoiteha pe salmísta heʼivaʼekue: ‘Ovyʼavaʼerã umi oguerekóva Jehovápe Ijáraramo!’ (Sal. 144:15). Ñande ningo jajerovia Jehová oĩha ñande ykére, upévare ndajakyhyjéi mbaʼevégui ha jaikuaa porã haʼe ñanepytyvõtaha toiko la oikóva (Sal. 23:4). Koʼẽrõitéma Jehová, Itaʼýra rupive, ‘ombyaíta pe aña rembiapokue’ (1 Juan 3:8). Ajépa hiʼãitéma og̃uahẽ upe ára! Péro ñahaʼarõ aja upéva, ñambaʼapo jejopyvaʼerã (1 Cor. 15:58).
Aníkena penderesarái akóinte rojerureha Jehovápe penepytyvõ ha penderovasa hag̃ua (Rom. 1:9). Ha peñehaʼãmbaitékena ‘peiko Ñandejára mborayhúpe pehaʼarõ aja Jesucristo pendeporiahuvereko ha peikove hag̃ua opa ára g̃uarã’ (Jud. 21).
Penemanduʼákena pohayhuetereiha!
Pene ermanokuéra,
Cuerpo Gobernante de los Testigos de Jehová