Doce mbaʼe ohechaukáva mbaʼérepa japredika

Ñande japredika ogahárupi ha jajapo estúdio vívliko, péro ¿jajapópa upéva jaipotáguinte umi hénte ojesalva? (Mat. 7:14.) Jaikuaa ningo upéva iñimportanteha, ha puntaitépe voi oñemoĩ pe lísta jahechátavape, péro ndahaʼéi upéva pe iñimportantevéva. Koʼág̃a jahecháta doce mbaʼe ohechaukáva mbaʼérepa japredika, péro ¿mávapa koʼã apytégui pe iñimportantevéva?

1. Ñaipytyvõ hag̃ua ñande rapichakuérape ojesalva hag̃ua (Juan 17:3).

2. Jaavisa hag̃ua umi hénte añáme (Eze. 3:18, 19).

3. Oñekumpli hag̃ua peteĩ profesía oĩva la Bíbliape (Mat. 24:14).

4. Ojekuaa hag̃ua Ñandejára hekojojaha. Upéicharõ, Jehová ohundi vove umi hénte añáme, avave ndaikatumoʼãi heʼi ndorekói hague oportunida oñembyasy hag̃ua hembiapo vaikuégui (Hech. 17:30, 31; 1 Tim. 2:3, 4).

5. Ñaipytyvõ hag̃ua umi tapichápe oikuaa hag̃ua Ñandejárape. Haʼe ningo omeʼẽvaʼekue Itaʼýra rekove opavave rehehápe (Rom. 1:14, 15).

6. Oĩramo ndojesalváiva ndahaʼemoʼãi ñande káusare (Hech. 20:26, 27).

7. Ñande voi jajesalva hag̃ua (Eze. 3:19; Rom. 10:9, 10).

8. Jahechauka hag̃ua jahayhuha ñande rapichakuérape (Mat. 22:39).

9. Jahechauka hag̃ua ñaneñeʼẽrenduha Ñandejára ha Itaʼýrape (Mat. 28:19, 20).

10. Ñamombaʼeguasu hag̃ua Ñandejárape (Heb. 13:15).

11. Jahechauka hag̃ua jahayhuha Jehovápe (1 Juan 5:3).

12. Oñemomarangatu hag̃ua Ñandejára réra (Isa. 43:10-12; Mat. 6:9).

Ndahaʼéi ningo koʼã mbaʼérente japredikáva, avei omombarete ñande jerovia ha ñamoirũñaína Ñandejárape hembiapópe (1 Cor. 3:9). Péro pe número 12-pe oĩva, upéva hína pe mbaʼe iñimportantevéva ñanemomýiva japredika hag̃ua. Ñande ningo jajapo ko tembiapo ñamomarangatu hag̃ua Ñandejára réra, oĩramo jepe nañanerenduséiva. Avei ñaipytyvõ Jehovápe ombohovái hag̃ua upe otakývape hese (Pro. 27:11). Jahechaháicha, jareko heta mbaʼe ohechaukáva ñandéve mbaʼérepa akóinte “ñamboʼe ha jaikuaauka pe marandu porã” (Hech. 5:42, NM).