Job arakaʼeve ndohejái Jehovápe

IKATÚPA Ñandejára siervokuéra iñeʼẽrendu chupe ojejopy vaíramo jepe? Jaikuaa hag̃ua upéva jahechamína mbaʼépa oiko peteĩ karaíre hérava Job.

Job ningo Abrahán hénte ha oikovaʼekue koʼág̃a opytahápe Arabia. Upérõ umi Israelgua oiko Egíptope. Peteĩ jey umi anhelkuéra oñembyatypa yvágape Jehová renondépe ha ijapytepekuéra oĩ avei Satanás. Enterove rovake Jehová oguerohoryeterei Jóbpe hekoporã haguére ha heʼi ojeroviaha hese. Upépe Satanás osẽ heʼi Job oserviha Jehovápe omeʼẽgui chupe heta mbaʼe porã ha oñangareko haguére hese. Heʼi avei oipeʼapáramo chugui orekóva opuʼãtaha hese.

Ñandejára oheja Satanáspe oipeʼapa Jóbgui opa mbaʼe orekóva, ojukapa ifamiliakuéra ha ipahápe ombou chupe peteĩ mbaʼasy vai. Job ningo ndoikuaái Satanás káusare oikoha hese umi mbaʼe vai ha nontendéi mbaʼérepa Ñandejára peichaite peve oheja chupe ohasa asy. Upéicharamo jepe arakaʼeve ndohejái Jehovápe.

Upéi ou hendápe mbohapy iñamígo guaʼu ha oñepyrũ oñemoñeʼẽ chupe. La Bíbliape Job kuatiañeʼẽme jatopa koʼã kuimbaʼe heʼivaʼekue. Haʼekuéra heʼi Ñandejára okastigaha Jóbpe umi mbaʼe vai ojapóvare. Heʼi voi aipo Ñandejára ndoikuaaseiha mbaʼeve isiervokuéragui ha ndojeroviaiha hesekuéra. Péro tuichaiterei ojavy hikuái! Job katu nopenái umi vyroreíre ha heʼi chupekuéra omanoite peve iñeʼerendutaha Jehovápe.

Peteĩ mitãkariaʼy hérava Elihú ojapysaka hesekuéra ha omongavajuʼimi Jóbpe ojepyʼapyeterei haguére ijehe. Heʼi chupe iñimportanteveha omombaʼe Jehová réra ha iñeʼẽrendu chupe. Avei kangue omongavaju umi mbohapy iñamígo guaʼúpe.

Ipahápe Jehová oñemoñeʼẽ avei Jóbpe. Ohechauka chupe yvyporakuéra michĩetereiha ñambojojáramo umi mbaʼe porãita haʼe ojapovaʼekuére. Job oñemomirĩ ha ohechakuaa ojavy hague. Jehová “ipyʼaporãgui oiporiahuvereko” Jóbpe, ha omeʼẽ joʼa joʼa chupe umi mbaʼeta orekovaʼekue. Upéi haʼe okuera ha 10 jey ifamília (Santiago 5:​11, ÑÑB). Job ojapovaʼekue ojurumboty Satanáspe ha ohechauka yvyporakuéra ikatuha iñeʼẽrendu Ñandejárape ojejopy vaíramo jepe.

(Oñeguenohẽ Job kuatiañeʼẽgui.)