Tuicha priviléhio ñaipytyvõ oñemopuʼã ha oñeñangareko hag̃ua umi lugár jaipurúvare ñamombaʼeguasu hag̃ua Jehovápe

Heta pláta ningo oñekotevẽ vaʼekue oñemopuʼã hag̃ua pe témplo Jerusalénpe ha avei heta oñembaʼapo vaʼekue hese. Péro umi isrraelíta ipyʼaite guive oipytyvõ ojejapo hag̃ua upéva (1Cr 29:2-9; 2Cr 6:7, 8). Umi osegíva oñangareko pe témplore, ohechauka kuri ohayhuha Jehovápe (2Re 22:3-6; 2Cr 28:24; 29:3). Koʼág̃arupi avei ñande jaipuru ñane tiémpo ha ñande fuérsa ikatu hag̃uáicha ñamopuʼã, ñamyatyrõ ha ñamopotĩ umi Salón del Reino ha Salón de Asambléa. Ha vyʼápe jajapo koʼã mbaʼe jaikuaágui upéicha ñamombaʼeguasuha hína Jehovápe (Sl 127:1; Apc 7:15).

¿MBAʼÉICHAPA IKATU ÑAIPYTYVÕ?

• 

  Káda rreunión rire, ñamopotĩ ha jaheja vaʼerã opa mbaʼe ilugárpe. Ha oimérõ ndaikatúi rejapo heta mbaʼe, pe ne asiénto jerére jepe ikatu remopotĩ ha remohendaʼimi.

• 

  Otoka jave ñandéve ñamopotĩ pe Salón, térã ojejapóta jave mantenimiénto, enterovete ñaipytyvõ vaʼerã. Ñanderetáramo ningo ñanekyreʼỹve ha pyaʼeve jajapopa umi traváho (lv páh. 93 párr. 18).

• 

  Ikatu avei ñameʼẽ ñane kontrivusión. Jehová ningo omombaʼeterei umi kontrivusión ñameʼẽva ñande pyʼaite guive, tahaʼe jepe raʼe ‘mokõi monedaʼínte’ (Mr 12:41-44).

• 

  Ikatúma guive, ñañekuaveʼẽ vaʼerã ñambaʼapo hag̃ua oñemopuʼã térã oñemyatyrõta jave umi lugár ojepurúva oñemombaʼeguasu hag̃ua Jehovápe. Natekotevẽi ningo ñandevale katuete konstruksiónpe ñaipytyvõ hag̃ua koʼã traváhope.