Rreferénsia ojepurútava rreunionhápe Mbaʼéichapa Jaiko ha Japredika vaʼerã
1-7 DE ABRIL
TESÓRO OĨVA ÑANDEJÁRA ÑEʼẼME | 1 CORINTIOS 7-9
“Umi soltéro oguereko peteĩ oportunida ijojahaʼỹva”
(1 Corintios 7:32) Añetehápe ndaipotái pejepyʼapy mbaʼevére. Pe kuimbaʼe soltéro ojepyʼapy ñande Ruvicha rembiapóre añónte, ombovyʼase rupi ñande Ruvichápe.
Umi nomendáiva ikatu oservi porã Ñandejárape
3 Umi nomendáiva itiempove jepi, upévare ikatu oñemoag̃uive Jehováre, ombaʼapove iservísiope ha iñamígo hetave (1 Cor. 7:32-35). Opa koʼã mbaʼére heta oĩ odesidíva opyta soltéro térã ohaʼarõve omenda hag̃ua. Péro oĩ avei nomendáiva ndahaʼéi katuete odesidígui upéva, ¿mbaʼépa oipytyvõ umi oĩvape ko situasiónpe? Haʼekuéra oñemboʼe, ojepyʼamongeta ha ohechakuaa Jehová ikatuha oipytyvõ chupekuéra ogueropuʼaka hag̃ua opa mbaʼe. Upéicha rupi odesidi ipyʼaite guive osegitanteha haʼeño (1 Cor. 7:37, 38).
(1 Corintios 7:33, 34) Pe kuimbaʼe omendáva katu ojepyʼapy umi mbaʼe ko mundopeguáre, oipotágui hembireko oguerohory chupe, 34 ha upévare ipyʼamokõi. Avei pe kuña omendaʼỹva ha pe vírhen ojepyʼapy ñande Ruvicha rembiapóre, imarangatu hag̃ua opensáva ha ojapóva. Péro pe kuña omendáva ojepyʼapy umi mbaʼe ko mundopeguáre, oipotágui iména oguerohory chupe.
Mbaʼe mbaʼépa ñanemboʼe Primera ha Segunda a los Corintios
7:33, 34, BNP. ¿Mbaʼépa “umi mbaʼe ko yvy arigua” oipyʼapýva umi omendávape? Koʼápe noñeñeʼẽi umi mbaʼe vai ojejapóvare ko múndope ha enterove ñamboyke vaʼerã. Oñeñeʼẽ guei umi mbaʼe ñaikotevẽvare jaikove hag̃ua: tembiʼu, ao ha óga (1 Juan 2:15-17).
(1 Corintios 7:37, 38) Ha oĩramo opensáva natekotevẽiha omenda, ojejokokuaa ha odesidi ipyʼaite guive nomendamoʼãiha, ojapo porã hína. 38 Upéicharõ pe omendáva ojapo porã, péro pe nomendáiva ojapo porãvéntema.
w96-S 15/10 12 párr. 14
Umi nomendáiva ikatu ojapo hetaiterei mbaʼe
14 Pe kristiáno soltéro térã soltéra oaprovecháramo isoltería ohupyty hag̃ua umi mbaʼe chupénte ogustáva, ndaikatúi jaʼe ‘ojapo porãveha’ pe omendávagui. ¿Mbaʼérepa? Pórke ndopytái hína soltéro térã soltéra “pe Rréino yvagapegua rehehápe”, síno openságui ijehénte (Mateo 19:12). Pe kuimbaʼe térã kuña nomendáiva ojepyʼapy vaʼerã “ojapo hag̃ua ñande Ruvicha oipotáva” ombovyʼaségui ñande Ruvichápe ha oserviségui ‘ipyʼaite guive ñande Ruvichápe, mbaʼeve ostorvaʼỹre’ chupe. Upearã oñekonsentra vaʼerã Jehová servísiore añónte ha avei ojapo hag̃ua Jesús omanda vaʼekue. Péicharõ añoite pe kristiáno soltéro térã soltéra ‘ojapo porãvéta’ hína umi omendávagui.
Mbaʼépa ñaaprende Ñandejára Ñeʼẽgui
(1 Corintios 7:11) Péro ohejáramo chupe topytánte omendaʼỹre, térã toiko porã jey iménandi; ha pe ména ndohejái vaʼerã hembirekópe.
lvs 251
Notakuéra entende porãve hag̃ua
Oĩ kristiáno odesidíva ojesepara hembireko térã iménagui oiméramo jepe ni peteĩva ndahekovaíri (1 Corintios 7:11). Peteĩ kristiáno ikatu hína odesidi ojesepara hembireko térã iménagui ohasáramo koʼã situasión:
• Pe ména nomanteneséiramo ifamíliape ha nomeʼẽséiramo chupekuéra umi mbaʼe oikotevẽva, térã ohejáramo chupekuéra mbaʼeveʼỹetére ha ndaikatuvéi ojogua hikuái hembiʼurã (1 Timoteo 5:8).
• Oinupã vaipáramo chupe hembireko térã iména, ha ohechakuaáramo ikatumaha operhudika chugui isalu térã ikatuha voi ojuka chupe (Gálatas 5:19-21).
• Nopermitíriramo chupe oservi Jehovápe, térã ojapóramo ikatúva guive omomombyry hag̃ua chupe Jehovágui (Hechos 5:29).
(1 Corintios 7:36) Péro oĩramo opensáva ndaikatumoʼãiha ojejoko, ha ndahaʼéi la imitãitereíva, upéicharõ haʼe ojapo vaʼerã ko mbaʼe: tomenda omendaséramo, upéva ndahaʼéi pekádo.
w00-S 15/7 31 párr. 2
Ikatu ñanderekopotĩ oĩramo jepe heta ndojapóiva upéva
Upéicharõ mitãrusu ha mitãkuñanguéra oñandúvo ojegustasemaha, ndojapurái vaʼerã omenda hag̃ua. Pe matrimónio ningo haʼe peteĩ kompromíso tuicháva ha ñaneakãguapy porã raẽ vaʼerã jajagarra hag̃ua upe kompromíso (Génesis 2:24). Iporãvéta nañamendái ñanemitãitereíre pórke umi edápe ikatu ñaneakãraku reínte ha nañapensaporãi pe jajapótavare (1 Corintios 7:36). Péro avei, peteĩ persóna okakuaapa porãmava ha omendaséva orekóramo rrelasión omendaʼỹre ndojuhúigui iména térã hembirekorã, ohechauka hína naiñaranduiha ha opeka tuichaiterei.
8-14 DE ABRIL
TESÓRO OĨVA ÑANDEJÁRA ÑEʼẼME | 1 CORINTIOS 10-13
“Ikatu pejerovia Ñandejárare”
(1 Corintios 10:13) Umi tentasión oúva pende ári ou avei entéro yvypóra ári. Péro ikatu pejerovia Ñandejárare, haʼe ndohejamoʼãi pehasa mbaʼeve ndaikatumoʼãiva pegueropuʼaka. Upéva rangue, pehasa jave peteĩ mbaʼe ijetuʼúva, ohechaukáta peẽme mbaʼéichapa pesẽta chugui, peaguanta hag̃ua.
Oñeporandúva jepi
Apóstol Pablo oskrivi vaʼekue: “[Ñandejára] ndohejamoʼãi pehasa mbaʼeve ndaikatumoʼãiva pegueropuʼaka” (1 Cor. 10:13). ¿Heʼisépa upéva Jehová ohechamaha mbaʼépa ikatúta ñaaguanta ha upéi odesidi mbaʼe provlémapa ñambohováita?
▪ Oiméramo siérto upéva, ñapensamíntena mbaʼeichaitépa ñandeafektáta. Por ehémplo, peteĩ ermáno raʼy ou ojesuisida. Pe túa opyta yvýre. Haʼe ha hembireko oñeporandu oimépa Jehová oikuaa haʼekuéra ogueropuʼakataha ko situasión, ha upévarente opermiti oiko hesekuéra. Ko múndope ningo jahasáta gueteri heta mbaʼe ijetuʼúva. Upévare, ¿ikatúpa jaʼe Jehová oikuaapamaha voi mbaʼe mbaʼépa ñambohováita?
Ñaanalisa porãramo mbaʼépa heʼi 1 Corintios 10:13, jahecháta la Biblia ndeʼiriha Jehová oikuaapamaha mbaʼe provlémapa ikatúta ñaaguanta, ha upéi odesidiha mbaʼe pruévapa jahasáta. Jahechamína 4 mbaʼe ohechaukáva upéva ndaikatuiha oiko.
Primero, Jehová omeʼẽ yvyporakuérape pe liverta odesidi hag̃ua. Haʼe oipota káda uno jadesidi mbaʼépa jajapóta (Deut. 30:19, 20; Jos. 24:15). Jadesidi jave umi mbaʼe Jehová oguerohorýva, ikatu jajerovia haʼe ñandegiataha (Prov. 16:9). Péro jadesidi vai jave, jasufri vaʼerã umi konsekuénsia (Gál. 6:7). Upéicharõ, ¿ajépa naisentidomoʼãi Jehová omeʼẽramo ñandéve liverta jadesidi hag̃ua, péro upéi haʼe jey odesidi mbaʼe provlémapa ñambohováita?
Segundo, Jehová nañandeprotehéi ani hag̃ua “ñanderupyty umi desgrásia ñahaʼarõʼỹve jave” (Ecl. 9:11). Peteĩ persóna ikatu ou oñeaksidenta vai pórke kavalete oĩ pe lugár oikohápe pe aksidénte ha ohupyty chupe pe desgrásia. Jesús oñeʼẽ vaʼekue peteĩ aksidéntere, omano haguépe 18 persóna hoʼárõ guare hiʼarikuéra peteĩ tórre. Haʼe oexplika kuri upéva ndoikói hague Ñandejára oipotágui (Luc. 13:1-5). Upévare naisentídoi ñapensa Ñandejára odesidimaha mávapa oikovéta ha mávapa omanóta oiko mboyve peteĩ aksidénte.
Tercero, káda uno jahechauka vaʼerã ñandefielha Jehovápe. Satanás heʼi vaʼekue yvyporakuéra oserviha Ñandejárape por interés. Avei heʼi avave ndosegimoʼãiha iñeʼẽrendu Jehovápe ohasáramo umi pruéva ijetuʼúvare (Job 1:9-11; 2:4; Apoc. 12:10). Péro ñapensamína: Jehová ñandeprotehéramo ani hag̃ua jahasa algúna pruévare, ndaikatumoʼãi jaʼe Satanás ijapuha.
Cuarto, Jehová odesidi ndoikuaamoʼãiha mbaʼépa oikóta ñanderehe amo gotyove. Añetehápe, Jehová oikuaaséramo ikatu oikuaa opa mbaʼe oikótava tenonde gotyove (Is. 46:10). Péro la Biblia ohechauka haʼe oelehiha mbaʼépa oikuaáta (Gén. 18:20, 21; 22:12). Jehová oporohayhu ha ihústo, upévare orrespeta pe derécho jarekóva jadesidi hag̃ua (Deut. 32:4; 2 Cor. 3:17).
Upéicharõ, ¿mbaʼépa ontendekase raʼe Pablo heʼírõ guare Jehová “ndohejamoʼãi pehasa mbaʼeve ndaikatumoʼãiva pegueropuʼaka”? Ko téxtope Pablo omombeʼu mbaʼépa Jehová ojapo jahasa jave peteĩ pruévare, ndahaʼéi jahasa mboyve. Jajeroviáramo Jehováre, haʼe siémpre ñanepytyvõta tahaʼe haʼéva pe provléma jahasáva (Sal. 55:22). Jahechamína mokõi mbaʼe ohechaukáva mbaʼérepa Pablo heʼi Jehová ñanepytyvõha jahasa jave peteĩ pruévare.
Primero, umi tentasión oúva ñande ári “ou avei entéro yvypóra ári”. Jaiko aja Satanás múndope, ñambohováita heta situasión ijetuʼúva, ha ikatu voi umi ijetuʼuetereíva. Péro ñakonfiáramo Jehováre, haʼe ñanepytyvõta jasegi hag̃ua ñaneñeʼẽrendu (1 Ped. 5:8, 9). Pablo omombeʼu kuri 1 Corintios kapítulo 10-pe umi mbaʼe ohasa vaʼekue umi israelita oĩrõ guare pe desiértope (1 Cor. 10:6-11). Entéro umi ojeroviáva Jehováre ogueropuʼaka kuri umi pruéva. Péro oĩ vaʼekue algúno naiñeʼẽrendúiva. Haʼekuéra nokonfiavéi rupi Jehováre, ou naiñeʼẽrenduvéi chupe.
Segundo, “ikatu [jajerovia] Ñandejárare”. ¿Mbaʼérepa jaʼe upéva? Pórke jahecháramo mbaʼéichapa haʼe ymaite guive oñangareko isiervokuérare, ñañemeʼẽta enkuénta haʼe ohayhuha “umi ohayhu ha okumplívape imandamientokuéra” (Deut. 7:9). Avei jahechakuaáta Ñandejára siémpre okumpliha la oprometéva (Jos. 23:14). Upévare ikatu ñaime segúro, 1) Jehová ndohejamoʼãiha jahasa mbaʼeve ndaikatumoʼãiva jagueropuʼaka, ha 2) haʼe ohechaukataha ñandéve mbaʼéichapa ñasẽta upe situasióngui.
¿Mbaʼéichapa Jehová ohechauka pe salída umi ojeroviávape hese? Jaikuaaháicha, haʼe ikatu oipeʼaite pe provléma. Péro ñanemanduʼa vaʼerã Pablo heʼi hague: “[Ñandejára] ohechaukáta peẽme mbaʼéichapa pesẽta chugui, peaguanta hag̃ua”. Upéicharõ, Jehová ohechauka ñandéve mbaʼéichapa ñasẽta peteĩ provlémagui, ñanemombaretévo jasegi hag̃ua ñandefiél. Jahechamína mbaʼéichapa haʼe ojapo upéva.
▪ Jehová “ñanekonsola opa umi ñande jehasa asýpe” (2 Cor. 1:3, 4). Haʼe ikatu ñanembopyʼaguapy térã ñanetrankilisa la Biblia, ijespíritu ha pe tembiguái jeroviaha rupive (Mat. 24:45; Juan 14:16; Rom. 15:4).
▪ Jehová ikatu ñandegia ijespíritu sánto rupive (Juan 14:26). Pe espíritu sánto ikatu ñanepytyvõ ñanemanduʼa hag̃ua peteĩ istória oĩvare la Bíbliape térã peteĩ téxto bíblicore ikatu hag̃uáicha jadesidi porã.
▪ Jehová ñanepytyvõkuaa umi ánhel rupive (Heb. 1:14).
▪ Jehová ikatu ojevale umi ermáno ha ermánare ñanepytyvõ hag̃ua. Haʼekuéra ikatu ñanemombarete umi mbaʼe heʼíva térã ojapóva rupive (Col. 4:11).
Upéicharõ, ¿mbaʼépa ikatu ñaaprende umi mbaʼe Pablo heʼi vaʼekuégui 1 Corintios 10:13-pe? Jehová ndodesidiriha mbaʼeichagua pruévarupipa jahasáta. Péro jahasárõ peteĩ provlémare ikatu ñaĩ segúro haʼe ñanepytyvõtaha ñaaguanta hag̃ua. Jaikuaa porã Jehová siémpre ohechaukataha ñandéve mbaʼéichapa ñasẽta peteĩ situasióngui jasegi hag̃ua ñaneñeʼẽrendu chupe.
(1 Corintios 10:13) Umi tentasión oúva pende ári ou avei entéro yvypóra ári. Péro ikatu pejerovia Ñandejárare, haʼe ndohejamoʼãi pehasa mbaʼeve ndaikatumoʼãiva pegueropuʼaka. Upéva rangue, pehasa jave peteĩ mbaʼe ijetuʼúva, ohechaukáta peẽme mbaʼéichapa pesẽta chugui, peaguanta hag̃ua.
(1 Corintios 10:13) Umi tentasión oúva pende ári ou avei entéro yvypóra ári. Péro ikatu pejerovia Ñandejárare, haʼe ndohejamoʼãi pehasa mbaʼeve ndaikatumoʼãiva pegueropuʼaka. Upéva rangue, pehasa jave peteĩ mbaʼe ijetuʼúva, ohechaukáta peẽme mbaʼéichapa pesẽta chugui, peaguanta hag̃ua.
Mbaʼépa ñaaprende Ñandejára Ñeʼẽgui
(1 Corintios 10:8) Ha ani ñanderekovai, oĩ haguéicha ijapytepekuéra umi hekovaíva, ha omano hikuái veintitrés mil un díape.
w04-S 1/4 29
Oñeporandúva jepi
¿Mbaʼérepa 1 Corintios 10:8-pe heʼi 23.000 israelita omano hague un díape hekovai rupi ha Números 25:9-pe katu heʼi omano hague 24.000?
Heta hendáicha ikatu ojeexplika mbaʼérepa ojoavy pe kantida oñemensionáva koʼã mokõi téxtope. Ikatu jaʼe omano hague éntre 23.000 ha 24.000 persónarupi ha oñerredondea hag̃ua ojeʼéntema 23.000 térã 24.000.
Ñanemanduʼa vaʼerã avei apóstol Pablo oñeʼẽ hague pe oiko vaʼekuére umi israelítare Sitímpe oñemoñeʼẽ hag̃ua umi Corintoguápe, upe tiémpope upépe heta oĩ vaʼekue umi hénte oikóva iñakãre ha hekovaíva. Pablo heʼi chupekuéra: “Ha ani ñanderekovai, oĩ haguéicha ijapytepekuéra umi hekovaíva, ha omano hikuái veintitrés mil un díape”. Pablo upérõ oñeʼẽ kuri umi persóna Jehová voi ohundi vaʼekuére hekovai rupi ha heʼi 23.000 omano hague (1 Corintios 10:8).
Número kapítulo 25 katu omombeʼu umi israelita oadora hague Baal de Peórpe, ha Jehová ipochyeterei hague hendivekuéra. Upémarõ Jehová heʼi Moiséspe: “Ejagarra umi omoakãvape koʼã héntepe, ejuka ha emosaingo chupekuéra”. Upéi Moisés omanda umi hués de Israélpe ojapo hag̃ua la Jehová omanda vaʼekue. Oikórõ guare upéva, Finehás pyʼaguasúpe ojuka kuri peteĩ kuimbaʼe israelita ogueru vaʼekuépe hendive pe kampaméntope peteĩ kuña madianítape, ha upépe “opa pe mbaʼasy ohundíva hína kuri umi israelítape”. Oñemohuʼãvo ko rreláto heʼi: “Ha ojekastiga haguére chupekuéra omano 24.000” (Números 25:1-9).
Ojehecha lájape, pe lívro de Números heʼívo 24.000 omano hague, upévape oike hína kompletoite umi kuimbaʼe oporomoakãva ojejuka vaʼekue ha umi Israelita Jehová voi ohundi vaʼekue. Umi kuimbaʼe oporomoakãva ojuka vaʼekue umi hués oiméne ohupyty voi kuri mil ha upéicha rupi ikatu ojeʼe 24.000 voi omano hague en totál. Umi kuimbaʼe omoakãvape umi héntepe ojejuka kuri oadora haguére “Baal de Peórpe”. Ikatu oime haʼekuéra voi hekovai raʼe, opartisipa umi fiésta ojejapóvape Baálpe g̃uarã térã opermiti ojejapo koʼã mbaʼe.
Peteĩ lívro heʼi pe palávra hebrea ojetradusíva “oadora” ikatuha avei heʼise “jajeheʼa peteĩ persónare”. Umi israelita ningo haʼe vaʼekue Jehová puévlo, péro haʼekuéra oñemomombyry kuri chugui oúrõ guare oadora “Baal de Peórpe”. Setecientos áñorupi upe rire, proféta Oseas rupive Jehová heʼi umi israelítare: “Haʼekuéra oho Baal de Peor rendápe, haʼekuéra oservi upe mbaʼe oporomotĩvape. Ha oiko chuguikuéra peteĩ mbaʼe oporombojeguarúva, ha péicha ojogua hikuái upe mbaʼe ohayhúvape” (Oseas 9:10). Enterove umi ojapo vaʼekue upe mbaʼe omerese voi kuri Ñandejára ohusga mbarete chupekuéra. Moisés heʼi voi umi israelítape: “Peẽ pehecháma vaʼekue pende resa teérupi mbaʼépa Jehová ojapo Baal de Peor káusare. Jehová pende Jára ohundipaite enterove umi oho vaʼekuépe oadora Baal de Peórpe” (Deuteronomio 4:3).
(1 Corintios 11:5, 6) Péro peteĩ kuña nomoĩriva iñakã rehegua oñemboʼe térã oprofetisa jave, omotĩ iñakãme; haʼete voi oñemoakã perõva chupe. 6 Pe kuña nomoĩmoʼãirõ iñakã rehegua, toikytĩ iñakãrangue; péro haʼe otĩramo iñakãrangue mbyky térã iñakã perõ hag̃ua, tomoĩ iñakã rehegua.
(1 Corintios 11:10) Upévare, pe kuña oguereko vaʼerã iñakã rehegua, ohechauka hag̃ua oñemoĩha iména poguýpe, ha ojapo vaʼerã avei upéva umi ánhel rehehápe.
Oñeporandúva jepi
Peteĩ puvlikadóra ojapóramo estúdio bíblico ha omoirũ chupe peteĩ puvlikadór neʼĩrava ojevautisa, ¿omoĩ vaʼerãpa iñakã rehegua?
▪ Ñande rrevísta La Atalaya 15 de julio de 2002 oñeʼẽ vaʼekue ko témare pe artíkulo héravape “Preguntas de los lectores”, upe artíkulo ohechauka kuri peteĩ ermána omoĩ vaʼerãha iñakã rehegua ojapórõ estúdio bíblico ha omoirũ chupe peteĩ puvlikadór, tahaʼe vautisádo térã nahániri. Péro oñeanalisa porãve rire ko téma ojehecha iporãveha oñekambiaʼimi upe instruksión.
Peteĩ ermána ojapórõ peteĩ estúdio bíblico ha omoirũ chupe peteĩ ermáno vautisádo, omoĩ vaʼerã iñakã rehegua. ¿Mbaʼérepa? Ojapo rupi peteĩ tembiapo okorrespondéva peteĩ kuimbaʼépe. Omoĩvo iñakã rehegua ohechauka orrespetaha pe arréglo oĩva kongregasiónpe (1 Cor. 11:5, 6, 10). Pe ermána ikatu avei ojerure pe ermánope okondusi hag̃ua, oiméramo haʼe ikatu ha oĩ kapasitádo ojapo hag̃ua upe estúdio.
Péro oimérõ pe omoirũva pe ermánape neʼĩra ojevautisa ha ndahaʼéi iména, natekotevẽi omoĩ iñakã rehegua. Ndaipóri ni peteĩ téxto bíblico ohechaukáva upéicha vaʼerãha. Upéicharõ jepe, ikatu oĩ ermána odesidíva lomímonte omoĩ iñakã rehegua, ikonsiénsia heʼi rupi chupe ojapo vaʼerãha.
22-28 DE ABRIL
TESÓRO OĨVA ÑANDEJÁRA ÑEʼẼME | 1 CORINTIOS 14-16
“Ñandejára añoite omoakãta opa mbaʼe”
(1 Corintios 15:24, 25) Upe rire ipahaitépe haʼe omeʼẽta pe Rréino Itúa Ñandejárape, ohundipaite rire entéro goviérno, autorida ha podér. 25 Haʼe ogoverna vaʼerã Ñandejára omoĩ meve ipy guýpe entéro iñenemigokuérape.
w98-S 1/7 21 párr. 10
‘Oñehundíta pe ñemano’
10 “Ipahaitépe” térã og̃uahẽ vove huʼãme pe goviérno de mil áño, Jesús ohechaukáta iñumílde ha ifielha ha ontrega jeýta pe goviérno Itúa Jehovápe (Apocalipsis 20:4). Upévo oñekumplítama avei pe tiémpo Jehová omoĩ vaʼekue “ombyatypa jey hag̃ua opa mbaʼe oĩva yvágape ha yvy ape ári, ha omoĩ hag̃ua umíva Cristo poguýpe” (Efesios 1:9, 10). Péro primero Cristo ohundipaitéta “entéro goviérno, autorida ha podér” oñemoĩva Jehováre. Upévape oike hína umi mbaʼe ojapótava Armagedón rire (Apocalipsis 16:16; 19:11-21). Pablo heʼi: “Haʼe [Cristo] ogoverna vaʼerã Ñandejára omoĩ meve ipy guýpe entéro iñenemigokuérape. Ha ñane enemígo ipahaite oñehundítava haʼe pe ñemano” (1 Corintios 15:25, 26). Upépe opaitétama pe pekádo ha ñemano ñanderupyty vaʼekue Adán káusare. Upe tiémpope avei opuʼãmbátama “opavave umi oĩva pe sepultúrape”, térã oñemoingove jeýtama chupekuéra (Juan 5:28).
(1 Corintios 15:26) Ha ñane enemígo ipahaite oñehundítava haʼe pe ñemano.
Pe Rréino ojapo Ñandejára rembipota ko yvy ape ári
21 Ñande jaikuaa oĩha hetaiterei mbaʼasy ñandejukáva. ¿Mbaʼéichapa oñesolusionáta upéva? Pe ñemano ningo “ñane enemígo” katuete ñanderupytýva enterovépe (1 Cor. 15:26). Péro, ¿ikatúpa jaʼe ko enemígo ipoderosoitereimaha Jehovápe g̃uarã? Jahechami Isaías heʼi vaʼekue: “Haʼe omokõta pe ñemano opa ára g̃uarã, ha ñande Ruvicha Ijojahaʼỹva Jehová omokãta enterove resay” (Is. 25:8). Epensami mbaʼéichatapa upérõ. Ndaiporimoʼãvéima omanóva, sementério ni hénte ojaheʼóva oñembyasýgui. Upéva rangue katu ñanerasẽta vyʼágui jahecha vove mbaʼéichapa Jehová omoingove jey umi omano vaʼekuépe (elee Isaías 26:19). Péicha hasypeve oñeñandu porãta hetaite ñande rapicha oñembyasýva hína omanógui chugui peteĩ ihénte térã iñamígo.
(1 Corintios 15:27, 28) Ñandejára “omoĩ Cristo py guýpe opa mbaʼe”. Péro haʼe heʼívo ‘oñemoĩ hague opa mbaʼe ipy guýpe’, hesakã porã noñeñeʼẽiha hína Ñandejárare, upe omoĩ vaʼekue Cristo py guýpe opa mbaʼe. 28 Ha oñemoĩ vove ipoguýpe opa mbaʼe, upévo pe Taʼýra oñemoĩta avei Ñandejára poguýpe, haʼe ningo Upe omoĩ vaʼekue opa mbaʼe Cristo poguýpe. Upéicha Ñandejára añoite omoakãta opa mbaʼe.
Oĩta pyʼaguapy opa árare
17 Pablo ohechauka mbaʼéichapa oñemohuʼãta Cristo goviérno, heʼívo “Ñandejára añoite omoakãta opa mbaʼe”. ¿Mbaʼépa heʼise upéva? Adán ha Eva opeka mboyve haʼe vaʼekue Jehová família ha opavavénte oiko pyʼaguapýpe ha peteĩ ñeʼẽme. Jehová voi ogoverna vaʼekue opa mbaʼe ojapo vaʼekue, tahaʼe ánhel térã yvypóra. Haʼekuéra ikatu omombaʼeguasu chupe ha oñeʼẽ hendivete voi, ha Jehová ovendesi chupekuéra. Pe Mburuvicha Tuichavéva añoite ‘omoakã vaʼekue opa mbaʼe’.
Mbaʼépa ñaaprende Ñandejára Ñeʼẽgui
(1 Corintios 14:34, 35) umi kuña tokirirĩ umi kongregasiónpe, ndorekói hikuái permíso oñeʼẽ hag̃ua, síno oñemoĩ vaʼerã umi kuimbaʼe poguýpe, pe Léi heʼiháicha avei. 35 Haʼekuéra oikuaaséramo peteĩ mbaʼe, oporandu vaʼerã iménape hógape. Ñemotĩ ningo pe kuñáme g̃uarã oñeʼẽramo kongregasiónpe.
w12 1/10 9, rrekuádro
¿Oproivípa rakaʼe apóstol Pablo kuñanguéragui oñeʼẽ?
Apóstol Pablo ohai: “Umi kuña tokirirĩ kongregasiónpe” (1 Corintios 14:34). ¿Mbaʼépa heʼise raʼe koʼápe? ¿Opensápa kuñanguéra ndaikatupyryiha oporomboʼe hag̃ua? Ndaikatúi jaʼe opensa hague upéva, haʼe ningo pyʼỹinte omombaʼe ha oguerohory kuñanguéra ojapóva Jehová servísiope (2 Timoteo 1:5; Tito 2:3-5). Pe kárta ohai vaʼekuépe umi Corintoguápe, Pablo omeʼẽ konsého umi kuñáme okirirĩ hag̃ua ambue tapicha oñeʼẽ jave, péro ndahaʼéi chupekuéra añónte heʼíva upéva, síno umi oñeʼẽvape avei ótro idióma ha oprofetisávape (1 Corintios 14:26-30, 33). Oiméne oĩ raʼe kuña ogustaitereíva chupe umi mbaʼe oaprendéva, upévare oñeʼẽ joko pe ojapóvape diskúrso ombaʼeporandu hag̃ua. Upépe ojejepokuaa vaʼekue ojejapo upéicha, ha Pablo oipotágui ojejapo hekópe opa mbaʼe, heʼi kuñanguérape oikuaaséramo peteĩ mbaʼe “oporandu hag̃ua iménape hógape” (1 Corintios 14:35).
(1 Corintios 15:53) Pe oñembyaívagui oiko vaʼerã peteĩ mbaʼe oñembyaiʼỹva ha pe omanóvagui oiko vaʼerã peteĩ ikatuʼỹva omano.
it-1-S 1221
Ikatuʼỹva oñembyai
Jesúspe oñemoingove jey haguéicha, umi ogovernátavape hendive irréinope oñemoingove jeýta espírituicha oikove hag̃ua opa árare, ha ndahaʼéi voi upévante, haʼekuéra nomanomoʼãvéima ha hetekuéra ndaikatumoʼãvéima ni oñembyai. Umi unhído ningo oservi Ñandejárape ipyʼaite guive ha omano térã oñehundívo pe hete ikatúva oñembyai, oñemoingove jey chupekuéra yvágape umi espírituicha ha orresivi peteĩ kuérpo ndaikatúiva oñembyai heʼi haguéicha Pablo 1 Corintios 15:42-54-pe. Upéicharõ, heʼívo umi unhído orresivitaha peteĩ kuérpo ikatuʼỹva omano heʼise hína haʼekuéra oikotaha opa árare ha nomanomoʼãvéima voi, ha heʼívo orresivitaha peteĩ kuérpo ikatuʼỹva oñembyai heʼise hína pe kuérpo Ñandejára omeʼẽva chupekuéra ndaikatuiha oñehundi. Upéicharõ ikatu jaʼe Ñandejára omeʼẽha chupekuéra podér pono odepende ambue mbaʼére oikove hag̃ua, ndahaʼéi umi ánhel térã yvypóraicha. Jahechakuaa Ñandejára okonfiaitereiha hesekuéra. Péro haʼekuéra ndaikatúi haguére oñehundi térã nodependéi haguére mbaʼevére oikove hag̃ua, ndeʼiséi noñemoĩvéima vaʼerãha Ñandejára poguýpe. Haʼekuéra Jesucrístoicha avei ohechakuaa oñemoĩ vaʼerãha Jehová poguýpe ha ojapo vaʼerãha hembipota (1Co 15:23-28; ehecha alma; inmortalidad).
29 DE ABRIL AL 5 DE MAYO
TESÓRO OĨVA ÑANDEJÁRA ÑEʼẼME | 2 CORINTIOS 1-3
“Jehová hína ‘Ñandejára omeʼẽva opaichagua konsuélo’”
(2 Corintios 1:3) Toñembotuicha Ñandejárape, ñande Ruvicha Jesucristo Túa, haʼe ningo peteĩ Túa oporoporiahuverekóva ha Ñandejára omeʼẽva opaichagua konsuélo.
“Penerasẽ umi hasẽva ndive”
4 Ñande “Túa oporoporiahuverekóva” oikuaa porã mbaʼépa heʼise omanoha ñandehegui peteĩ jahayhúva. Chugui ningo omanóma heta isiérvo, por ehémplo Abrahán, Isaac, Jacob, Moisés ha rréi David (Núm. 12:6-8; Mat. 22:31, 32; Hech. 13:22). La Biblia heʼi hiʼãitereimaha Jehovápe omoingove jey chupekuéra (Job 14:14, 15). Og̃uahẽ vove upe tiémpo ovyʼaitereíta hikuái ha hesãita. Jehovágui ningo omano avei Itaʼýra peteĩete. La Biblia heʼi haʼe ohayhueterei hague chupe ha ojepokuaaiterei hague hese (Prov. 8:22, 30). Añetehápe ndaikatumoʼãi ñantende mbaʼeichaite pevépa Jehová oñeñandu vaíne rakaʼe ohechárõ guare Itaʼýra ohayhuetéva hetaite osufri hague omano hag̃ua (Juan 5:20; 10:17).
(2 Corintios 1:4) Haʼe ñanekonsola opa umi ñande jehasa asýpe, ikatu hag̃uáicha pe konsuélo Ñandejára omeʼẽva ñandéve rupive, ñande avei ñakonsola umi ohasávape opaichagua jehasa asýre.
“Penerasẽ umi hasẽva ndive”
14 Sapyʼánte ijetuʼu jaikuaa hag̃ua mbaʼépa jaʼéta peteĩ oñembyasývape. La Biblia heʼi: “Umi iñarandúva heʼíva haʼete peteĩ pohã ñanemongueráva” (Prov. 12:18). Pe folléto hérava Omano vove peteĩ jahayhúva ñanepytyvõ ikatu hag̃uáicha jaikuaa mbaʼépa jaʼéta péicha jave. Upéicharõ jepe, heta vése iporãve jasegi ko konsého bíblico: “Penerasẽ umi hasẽva ndive” (Rom. 12:15). Gaby, peteĩ ermána omano vaʼekue chugui iména, omombeʼu: “Che ningo cherasẽ ajedesaoga hag̃ua. Upévare chepytyvõiterei che amigokuéra hasẽ jave chendive, péicha nañeñandúi cheaño”.
Mbaʼépa ñaaprende Ñandejára Ñeʼẽgui
(2 Corintios 1:22) Haʼe omoĩ avei iséllo ñanderehe, pe séllo hína pe espíritu sánto oĩva ñane korasõme. Péva peteĩ garantía haʼe okumplitaha umi mbaʼe porã opromete vaʼekue.
Oñeporandúva jepi
¿Mbaʼépa heʼise pe “garantía” ha “séllo” Ñandejára omeʼẽva umi kristiáno unhídope? (2 Cor. 1:21, 22).
▪ Garantía. Peteĩ lívro heʼi pe palávra griega oĩva 2 Corintios 1:22-pe ojetradusíva “garantía”, haʼeha “peteĩ palávra ojepurúva umi asúnto legálpe térã ojejapo jave negósio”. Heʼise “adelánto, entréga, peteĩ kompromíso ohechaukáva ojepagataha katuete pe ojeʼe vaʼekue. Avei ko palávra oservi ikatu hag̃uáicha ovale peteĩ kontráto, oñemeʼẽ peteĩ entréga ojejogua jave álgo, ha ojejapo hag̃ua rreklámo legál”. Segunda a los Corintios 5:1-5 ohechauka umi unhído orresivipaiteha ipágo térã irrekompénsa oho vove yvágape, ha upépe orresivi peteĩ kuérpo espirituál ikatuʼỹva oñehundi (1 Cor. 15:48-54).
Idióma griego modérnope, ojepuru jave pe palávra garantía, ojepuru peteĩ palávra orekóva el mísmo signifikádo oñeñeʼẽ jave pe kuãirũ de kompromísore. Upéva ningo opyta porã umi unhídore, pórke chuguikuéra oikóta Cristo rembireko (2 Cor. 11:2; Apoc. 21:2, 9).
▪ Séllo. Ymave ojepuru vaʼekue pe séllo ojehechauka hag̃ua ovaleha peteĩ dokuménto de propieda térã umi kontráto ojejapóva por eskríto. Ñandejára ‘osella’ vove ijespíritu sánto rupive peteĩ kristiánope, haʼete ku omarkáva upe persónape ohechauka hag̃ua opertenesemaha chupe (Efes. 1:13, 14). Umi unhído osegíva iñeʼẽrendu, orresivíta pe último séllo omano mboyvemi térã oñepyrũ mboyvemi pe jehasa asy guasu (Efes. 4:30; Apoc. 7:2-4).
(2 Corintios 2:14-16) Péro aagradese Ñandejárape; haʼe ningo akóinte ñandegueraha Cristo ndive umi soldádoicha oúva hína ogana rire peteĩ gérra. Haʼe ojevale ñanderehe opárupi iñasãi hag̃ua peteĩ mbaʼe hyakuã asývaicha umi marandu oñeʼẽva hese. 15 Ñandejárape g̃uarã hyakuã asy pe notísia oñeʼẽva Crístore ha ñande avei ñaneryakuã porã. Umi ojesalvátava ha umi oñehundítava ohetũ avei ko mbaʼe. 16 Umi oñehundítavape g̃uarã hyakuã vai ha ohechauka chupekuéra omanotaha. Umi ojesalvátavape g̃uarã katu hyakuã porã ha ohechauka chupekuéra oikovetaha. ¿Ha mávapa ikatupyry ojapo hag̃ua koʼã mbaʼe?
w10-S 1/8 23
Jaikuaave hag̃ua
¿Mbaʼe rehepa Pablo opensa kuri oñeʼẽrõ guare umi soldádo oúvare hína ogana rire peteĩ gérra?
▪ Apóstol Pablo oskrivi: ‘Ñandejára [...] ñandegueraha Cristo ndive umi soldádoicha oúva hína ogana rire peteĩ gérra. Haʼe ojevale ñanderehe opárupi iñasãi hag̃ua peteĩ mbaʼe hyakuã asývaicha umi marandu oñeʼẽva hese’. Ha upéi heʼive: “Ñandejárape g̃uarã hyakuã asy pe notísia oñeʼẽva Crístore ha ñande avei ñaneryakuã porã. Umi ojesalvátava ha umi oñehundítava ohetũ avei ko mbaʼe. Umi oñehundítavape g̃uarã hyakuã vai ha ohechauka chupekuéra omanotaha. Umi ojesalvátavape g̃uarã katu hyakuã porã ha ohechauka chupekuéra oikovetaha” (2 Corintios 2:14-16).
¿Mbaʼérepa Pablo omoĩ kuri upe komparasión? Yma ningo umi rrománo ojepokuaámi voi ojapo defíle omombaʼe hag̃ua umi militárpe ogana haguére peteĩ gérra. Pe defílepe ojehechauka umi mbaʼe oipeʼa vaʼekue hikuái ikontrariokuéragui ha avei umi prisionéro oguerúva, ha umi hénte omboʼúrra joa pe henerál ha ijehérsitope. Umi tóro entéro voi ombodefila vaʼekue hikuái ha opávo pe defíle ojejuka umi tóro ha sapyʼánte ojejuka avei umi prisionérope.
¿Ha mbaʼe rehepa Pablo oñeʼẽ heʼívo pe marandu hyakuã asýva oñeʼẽva Crístore algúnope g̃uarã heʼiseha ñemano ha ótrope g̃uarã katu jeikove? Peteĩ enciclopedia heʼi upe ehémplo oimeneha oñeʼẽ umi mbaʼe ojapóvare jepi umi rrománo pe defíle jave. Haʼekuéra upéicha jave ohapy insiénso ha umi oganávape g̃uarã pe insiénso ryakuã heʼise viktória ha umi prisionérope g̃uarã katu ohetũvo pe insiénso ryakuã omomanduʼa chupekuéra ikatuha hína ojejuka.