Mbaʼe rresponsavilidápa oreko Jesús disipulokuéra

Jesús omboʼe kuri heta mbaʼe iñimportánteva okarúrõ guare peteĩ fariséo rógape. Upéi osẽ upégui ha oho Jerusalén gotyo, ha heta hénte omoirũ chupe. ¿Mbaʼérepa oho hikuái hendive? ¿Oikosépa idisípuloramo? ¿Oĩpa dispuésto ojapóvo sakrifísio?

Oviaha aja hikuái, Jesús heʼi peteĩ mbaʼe osorprendéva hetápe. Haʼe heʼi: “Oĩrõ oúva che rendápe ha ohayhuve itúva ha isy, hembireko ha taʼyrakuérape; iñermáno ha iñermánape; térã ohayhuve hekove jepe, péva ndaikatúi oiko che disípuloramo” (Lucas 14:26). Péro, ¿mbaʼére piko haʼe heʼi upéicha?

Upérõ Jesús ndeʼiséi kuri umi disípulo ndohayhúi vaʼerãha ihentekuéra. Upéva rangue, ohechaukánte ohayhuve térã omotenonde vaʼerãha chupe, ha upéi ae ihentekuérape. Ndojoguái vaʼerã hikuái pe kuimbaʼe oñeinvita vaʼekuépe peteĩ senarã, ha orrechasa pe invitasión iñimportantetéva pórke omenda ramo (Lucas 14:20). Por ehémplo, la Biblia heʼi Jacob ‘ndohayhuguasúi hague Léape’, péro upéva ndeʼiséi ndochaʼeiha hese, síno heʼisénte Jacob ohayhuve hague Raquélpe (Génesis 29:31, NM).

Jesús avei ohechauka peteĩ persóna ohayhuvéva “hekove” ohayhu rangue chupe, ndaikatumoʼãiha oiko idisípuloramo. Upéva heʼise peteĩ kristiáno ohayhuve vaʼerãha Jesúspe, ha tekotevẽramo, oĩ vaʼerãha dispuésto omeʼẽvo hekove hesehápe. Jahechaháicha, Cristo disipulokuéra oreko peteĩ rresponsavilida tuicháva, ha tekotevẽ ojepyʼamongeta porã hikuái umi mbaʼe oñehaʼarõvare chuguikuéra.

Jesús disipulokuéra heta vése ombohovái vaʼerã heta provléma ha jehasa asy. Upévare haʼe heʼi kuri: “Pe ndogueraháiva ijyvyra pohýi ha chemoirũ, péva ndaikatúi oiko che disípuloramo” (Lucas 14:27). Jesús ningo heta ohasa asy, ha heʼi voi iñenemigokuéra ojukataha chupe. Upévare haʼe oavisa idisipulokuérape oĩ vaʼerãha dispuésto ohasávo avei koʼã mbaʼe osegiséramo chupe.

Umi hénte omoirũva Jesúspe iviáhepe, tekotevẽ opensa porã pe rresponsavilida orekótavare oikóramo chuguikuéra idisípulo. Upévare Jesús omombeʼu chupekuéra peteĩ ehémplo. Haʼe heʼi: “¿Mávapa pende apytépe omopuʼãsérõ peteĩ tórre ndoguapyraẽi okalkula mboýpa ogastáta, ohecha hag̃ua ikatútapa ojapopa? Upeichaʼỹrõ, omoĩta pe simiénto ha ndaikatumoʼãi ojapopa” (Lucas 14:28, 29). Upéicha avei, umi hénte oviaháva hína Jesúsndi Jerusalén gotyo ha osegiséva chupe, odesidíma vaʼerã okumplítapa umi mbaʼe oñehaʼarõva chuguikuéra. Upe rire Jesús omyesakãve upéva omombeʼúvo ótro ehémplo.

Haʼe heʼi: “Peteĩ rréi ohótaramo ñorairõhápe, ¿ndoguapyraẽipa oñemongeta iñirũnguérandi, ohecha hag̃ua ikatútapa oho diez mil soldádorente ombohovái pe ótro rréipe oúva hína chupe veinte mil soldádo reheve? Ha ndaikatumoʼãiramo, pe ótro oĩ aja gueteri mombyry, omondóta umi hembijokuáipe ojerurévo oiko porã jey hag̃ua oñondive”. Upéi heʼi avei: “Ni peteĩva pende apytépe ndaikatúi oiko che disípuloramo, ndohejáirõ opa mbaʼe orekóva” (Lucas 14:31-33).

Upéicharõ, Jesús ndeʼíri kuri koʼã mbaʼe umi hénte oĩvape hendive upe okasiónpente, síno entéro oikosévape idisípuloramo. Haʼe ohechauka oĩ vaʼerãha hikuái dispuésto ojapo hag̃ua opa mbaʼe haʼe heʼíva. Upéva heʼise entéro idisípulo oĩ vaʼerãha osakrifika hag̃uáicha umi mbaʼe orekóva, térã hekove jepe. Upévare, entéro umi omoirũséva Jesúspe opensa ha oñemboʼe vaʼerã koʼã mbaʼére.

Upe rire Jesús oñeʼẽ jey peteĩ mbaʼe heʼi vaʼekuére pe Sermón del Móntepe. Upérõ guare haʼe heʼi kuri idisipulokuérape: “Peẽ ningo jukýicha ko yvy ape ári” (Mateo 5:13). Pe juky ningo ojepuru jepi oñekonserva hag̃ua umi hiʼupy. Ha oiméne Jesús okompara idisipulokuérape pe jukýre, pórke haʼekuéra ikatúta oipytyvõ umi héntepe ani hag̃ua hoʼa mbaʼe vaípe térã oñemomombyry Jehovágui. Koʼág̃a Jesús oikuaa saʼipaitemaha itiémpo ko yvy ape ári, upévare heʼi: “Pe juky ningo iporãiterei, péro naheʼẽvéiramo, ¿mbaʼépepa ñamoheʼẽ jeýta?” (Lucas 14:34). Umi ohendúva chupe oikuaa oĩha juky naiporãiva, pórke ojeheʼa yvýre ha ndaideprovechoguasuvéima.

Jesús heʼívo koʼã mbaʼe, ohechauka umi omoirũmava chupe heta tiémpore jepe, osegi vaʼerãha omombarete ijerovia. ¿Mbaʼérepa? Pórke ojedeskuidáramo hikuái ojoguáta pe juky ndovalevéivape, ha umi hénte oñembohorypáta hesekuéra. Hiʼarive ndopytaporãmoʼãi hikuái Ñandejára renondépe ha omotĩta chupe. Jesús ohechauka iñimportanteha oñeñangareko hikuái, heʼívo: “Pe ikatúva ohendu, tojapysaka porã” (Lucas 14:35).