Leksión 13

Emyesakã mbaʼépepa ideprovécho pe informasión

Isaías 48:17

MBAʼÉPA HEʼISE: Eipytyvõ vaʼerã umi nerendúvape ohechakuaa hag̃ua mbaʼéichapa ideprovéchota chupekuéra umi mbaʼe eréva.

Epensa vaʼerã umi nerendúvare. Ejepyʼamongeta vaʼerã eikuaa hag̃ua mbaʼérepa umi nerendúva oikotevẽ upe informasión, ha eiporavo mbaʼépa ideprovechovéta chupekuéra.
Ejapo jave nde párte, umi nerendúva ontende vaʼerã mbaʼépa tekotevẽ ojapo. Oñepyrũ guive nde párte umi nerendúva opensa vaʼerã upe diskúrso haʼeha imbaʼerãite. Emboʼe jave umi mbaʼe iñimportánteva, ere mbaʼéichapa ikatu ojejapo umíva. Ha oñentende porã vaʼerã mbaʼépa remboʼese.

Mborayhúpe ehechauka chupekuéra mbaʼéichapa ikatu osegi umi konsého oĩva la Bíbliape. Eñehaʼã vaʼerã ani emoñeñandu vai umi nerendúvape, upéva rangue eipytyvõ chupekuéra omombarete hag̃ua ijerovia ha ohayhuve hag̃ua Jehovápe. Ejerovia umi nerendúva ipyʼaporãha ha ojaposeha umi mbaʼe iporãva.