Leksión 10

Ekambia mimi reñeʼẽ lája

Proverbios 8:4, 7

MBAʼÉPA HEʼISE: Reñeʼẽ vaʼerã hatãve, mbegueve térã pyaʼeve ikatu hag̃uáicha oñentende porã umi mbaʼe remboʼeséva ha remokyreʼỹ hag̃ua umi nerendúvape.

MBAʼÉICHAPA IKATU REJAPO

Reñeʼẽ hatãve térã mbegueve. Ikatu eñeʼẽ hatãmie emboʼéta jave umi mbaʼe iñimportantevéva térã remokyreʼỹta jave umi nerendúvape. Ejapo avei upéicha elee jave la Bíbliagui peteĩ mensáhe ipohýiva. Ha ere mboyve peteĩ mbaʼe ohechaukáva oĩ hague okyhyjéva térã ojepyʼapýva, natekotevẽi elee térã eñeʼẽ hatãiterei.

Siémpre reñeʼẽramo hatãiterei, umi nerendúva opensáta rejaʼoha chupekuéra. Ndovaléi avei reexaheraiterei elee térã eñeʼẽ lája, ani hag̃ua umi nerendúva oñekonsentraiterei upévare.
Ikatu avei reñeʼẽ hatãmie eréta jave peteĩ fráse ohechaukáva revyʼaha térã remombeʼúta jave peteĩ mbaʼe oĩha mombyryeterei térã tuichaitereíva. Péro ehechauka hag̃ua reñembyasy térã rejepyʼapyha ikatu eñeʼẽ mbegueve.
Eñeʼẽ pyaʼeve. Ikatu reñeʼẽ jepi pyaʼeve rehechauka hag̃ua nekyreʼỹha. Ha anínte reñeʼẽ pyaʼeterei eréta jave peteĩ mbaʼe iñimportánteva.

Ani de gólpe reñeʼẽ hatãiterei térã pyaʼeterei, rejapóramo upéicha ikatu remondýi umi nerendúvape. Ha oiméramo pyaʼeve reñeʼẽta, lomímonte repronunsia porã vaʼerã umi palávra.