Jesús ha idisipulokuéra tres díarema opyta opytuʼu pyharekue Betániape, ou rire Jericógui. Ikoʼẽvo pe lunes 10 de nisán oho jeýma hikuái Jerusalén gotyo. Jesús iñembyahýi ha upévare ohechávo peteĩ ígo máta oñemboja orrevisa ndahiʼáipa.

Pe yvyramáta ningo hoky itiempopeʼỹ, pórke umi ígo hiʼa jepi júniope ae, ha upérõ marzo ramo. Oiméne Jesús ohechávo pe yvyramáta hoguepamaha, opensa ikatuneha hiʼáma avei. Péro oñembojávo upépe ndotopái mbaʼeve. Upévare Jesús omaldesi pe ígo máta ha heʼi: “Arakaʼeve ndaiporimoʼãvéima hoʼúva ndehegui ni peteĩ yva” (Marcos 11:14). Upepete pe yvyramáta oñepyrũma ipiru, ha al día sigiénte umi disípulo ontende mbaʼérepa Jesús ojapo upéva.

Jesús ha umi disípulo osegi oguata, ha upe riremínte og̃uahẽma Jerusalénpe. Haʼe oike pe témplope, ojapo haguéicha pe ótro día. Péro ko árape ojapo peteĩ mbaʼe ojapóma vaʼekue voi tres áño atrás, pe Páskua áño 30-pe (Juan 2:14-16). Jesús omosẽ “umi ombaʼevende ha oñemúvape” pe témplope. “Avei oipetepa yvýre umi mesa kambistakuéra oiporúva, ha umi palóma vendehágui katu ivankokuéra.” (Marcos 11:15.) Oĩ avei hénte ohasáva pe témplo ryepýrupi oroja jave ikárga, ikatu hag̃uáicha omombykyve hape. Péro Jesús ndohejái ojejapo upéva.

Jesús okondena umi kambísta ha mymba vendehápe heʼívo: “¿Ndojehaíri piko Ñandejára Ñeʼẽme: ‘Che róga ningo peteĩ lugár opavave oñemboʼe hag̃ua’? Péro peẽ pejapo chugui mondaha raity” (Marcos 11:17). ¿Mbaʼérepa Jesús heʼi hesekuéra mondaha? Pórke haʼekuéra ojaprovecha umi oikotevẽvare animál sakrifisiorã, ha hepyeterei okovra chupekuéra. Upévare Jesús heʼi hesekuéra omondaha hína hapichakuérape.

Umi saserdóte ruvicha, mboʼehára leipegua ha poguasukuéra ohendúvo Jesús ojapo vaʼekue oñehaʼã jey ojuka chupe. Péro enterove umi hénte ijatypa Jesúsre ohenduségui chupe. Upévare umi líder rrelihióso ndaikatúi ojapo mbaʼeve.

Paskuarã ou avei heta persóna oike vaʼekue hudiokuéra rrelihiónpe. Koʼãva apytégui unos kuánto griégo oñemboja Felipe rendápe, ha ojerure oñeʼẽ hag̃ua Jesús ndive. Felipe réra ningo ou idióma griégogui, ha oiméne upévare oñemboja hese hikuái. Péro haʼe noĩri kuri segúro iporãtapa oñeʼẽ hikuái Jesúsndi, upévare oñeʼẽ raẽ Andrés ndive. Upéi mokõive oho oporandu Jesúspe mbaʼépa haʼe opensa. Amalisia upérõ haʼe oĩ gueteri pe témplope.

Jesús oikuaa saʼíma ofaltaha omano hag̃ua, ha ndaikatuiha operde rei itiémpo oñeʼẽ hag̃ua umi ohechasévape chupe kuriósogui reínte. Upévare omoĩ peteĩ ehémplo idisipulokuérape. Haʼe heʼi: “Og̃uahẽma pe óra oñembotuicha hag̃ua pe Yvypóra Raʼýpe. Añetehápe haʼe peẽme: Pe trígo raʼỹi hoʼáramo yvýpe ha omano, heñói ha hiʼa heta, péro ndoikóiramo upéva opyta peteĩ semílla reínte” (Juan 12:23, 24).

Peteĩ trígo raʼỹi ningo haʼetévaicha ndovaleguasúiva. Péro, ¿mbaʼépa oikóta chugui oñeñotỹramo? Ndahaʼevéima peteĩ semílla reínte, síno heñói ha tiémpo rire hakãgui osẽ hetaiterei trígo raʼỹi. Péicha avei Jesús peteĩ kuimbaʼe perfékto. Péro haʼe iñeʼẽrendu rupi Ñandejárape omano meve, umi osegíva iñehémplo ha ojesakrifikáva oservi hag̃ua Ñandejárape ikatúta ohupyty jeikove opaveʼỹva. Upévare Jesús heʼi: “Pe ohayhúva hekove, ohundíta; péro pe ndaijaʼéiva hekovére ko múndope, ohupytýta jeikove opaveʼỹva” (Juan 12:25).

Jesús noñeʼẽi hína ijehénte, upévare heʼi: “Oĩramo oikoséva che rembijokuáiramo tou tachemoirũ, ha che aĩháme, upépe avei oĩta che rembijokuái. Oĩramo oikoséva che rembijokuáiramo pe Túva omombaʼéta chupe” (Juan 12:26). ¡Ajépa iporãite pe rrekompénsa oñemeʼẽva Jesús segidorkuérape! Ha pe Túva omombaʼe rupi chupekuéra orekóta hikuái oportunida ogoverna hag̃ua Cristo ndive Irréinope.

Jesús oikuaa heta ohasa asytaha omano meve, upévare heʼi: “Che álma ruguaite guive ajepyʼapy, ¿ha mbaʼéiko haʼéta? Che Ru chesalvamína ko oikótavagui”. Péro Jesúspe g̃uarã iñimportanteve oñekumpli Ñandejára volunta, upévare heʼi avei: “Upéicharõ jepe, upearã voi che aju vaʼekue” (Juan 12:27). Ñandejára oipota Jesús omano yvyporakuéra rehehápe, ha Jesús ohechakuaa opa mbaʼe Jehová odesidíva oĩ porãha.

El 10 de nisán Jesús oĩ témplope ha oñeʼẽ hína imuértere. Haʼe ndoipotaieterei oñemongyʼa Ñandejára réra, ha upéva okevranta chupe. Jesús osẽ heʼi: “Che Ru, embotuicha nde réra”. Heʼipamíre upéva, yvágagui oñehendu peteĩ ñeʼẽ orretumbáva, ha heʼíva: “Ambotuicháma ha ambotuicha jeýta” (Juan 12:27, 28).

Umi hénte ohendúva oñemondyipa. Oĩ heʼíva osunu hague, ótro katu heʼi: “Peteĩ ánhel oñeʼẽ chupe” (Juan 12:29). ¿Mbaʼépa añetehápe la oikóva? Jehová oñeʼẽ yvága guive. Péro ndahaʼéi koʼág̃ante yvyporakuéra ohendúva Ñandejára oñeʼẽ jave, Jesús oñepyrũ guive opredika.

Ojapo tres áño imédio Jesús ojevautisa hague. Ha upérõ guare Juan el Bautista ohendu vaʼekue Ñandejára heʼiha: “Kóva hína che Raʼy ahayhuetéva ha aguerohorýva”. Upéi, ohasa rire pe Páskua áño 32-pe, Santiago, Juan ha Pedro ohecha vaʼekue peteĩ visiónpe Jesús rete omimbipárõ guare. Upérõ haʼekuéra ohendu avei Ñandejára heʼiha: “Kóva hína che Raʼy ahayhuetéva ha aguerohorýva, pehendúke chupe” (Mateo 3:17; 17:5). Koʼág̃a tres veseháma Jehová oñeʼẽ yvága guive, ha ko vuéltape oñeʼẽ voi heta hénte ohendu hag̃uáicha chupe.

Oñehendu rire pe vos yvágagui, Jesús heʼi: “Pe ñeʼẽ oñehendu penderehehápe, ndahaʼéi cherehehápe” (Juan 12:30). Upe oikóva ohechauka Jesús añetehápe haʼeha Ñandejára Raʼy, pe Mesías oñepromete vaʼekue.

Jesús siémpre iñeʼẽrendu, ha péicha ohechauka ñandéve mbaʼéichapa jaiko vaʼerã. Avei ohechauka ko múndo ruvicha, haʼéva Satanás, oñehundi vaʼerãha. Jesús heʼi: “Koʼág̃a ojehusga hína ko múndope; koʼág̃a ko múndo ruvicha oñemosẽta”. Añetehápe ningo Jesús omanóta, péro upéva ndeʼiséi Satanás oganaha. Upéva rangue, ojehupytýta heta mbaʼe porã Jesús sakrifísio rupive. Haʼe voi heʼi: “Ág̃a che añemosaingo rire, aguerúta che rendápe opaichagua héntepe” (Juan 12:31, 32). Jesús omano rupi, heta persóna ikatu oñemoag̃ui hese ha oreko oportunida oikovévo opa ára g̃uarã.

Umi hénte ohendu rire Jesús oñemosaingotaha, osẽ heʼi: “Ore rohendu pe Léipe heʼiha pe Cristo opytataha opa ára g̃uarã. ¿Mbaʼére piko upéicharõ nde ere pe Yvypóra Raʼy oñemosaingo vaʼerãha? ¿Máva piko hína pe Yvypóra Raʼy?” (Juan 12:34). Umi hénte ohecháramo jepe heta pruéva Jesús haʼeha pe Yvypóra Raʼy, ha ohendu Ñandejára oñeʼẽ jave yvága guive, la majoría ndoroviái haʼeha pe Mesías oñepromete vaʼekue.

Koʼág̃a Jesús heʼi jey ijehe haʼeha pe “mbaʼerendy”, heʼíma haguéicha kuri ótra vuéltape (Juan 8:12; 9:5). Heʼi umi héntepe: “Pe mbaʼerendy oĩta gueteri pende apytépe sapyʼami. Peguatákena oĩ aja pe mbaʼerendy, ani hag̃ua pe pytũmby ipuʼaka penderehe. [...] Pereko aja pe mbaʼerendy pejerovia hese, ikatu hag̃uáicha peiko pe mbaʼerendýpe” (Juan 12:35, 36). Heʼipa rire koʼã mbaʼe, Jesús oho upégui pórke upérõ el 10 de nisán ha neʼĩra og̃uahẽ pe tiémpo omano hag̃ua. El 14 de nisán ae, pe Páskuape, ojeklaváta chupe peteĩ yvyráre ha oñemosaingóta (Gálatas 3:13).

Proféta Isaías heʼíma vaʼekue umi hénte isiegotaha. Upéva heʼise nontendemoʼãiha hikuái mbaʼépa ojapo vaʼerã ha oñemohatãtaha haʼekuéra heʼívapente. Upe tiémpope g̃uarã Jesús ojapóma hetaiterei mbaʼe ha hetáma opredika, péro jahechakuaa oñekumpliha pe profesía heʼiháicha pórke umi hénte ndojeroviái hese (Isaías 6:10; Juan 12:40). La majoría orrechasa umi pruéva ohechaukáva Jesús haʼeha pe Livertadór, oipytyvõtava chupekuéra oreko hag̃ua vída etérna.

Nicodemo, José de Arimatea ha hetave mburuvicha ‘ojerovia Jesús rehe’. ¿Ojapótapa hikuái la oñehaʼarõva chuguikuéra? ¿Térãpa okirirĩtante okyhyjégui oñemosẽrõ g̃uarã sinagógagui? ¿Oipotavétapa hikuái “hapicha yvypóra omombaʼe chupekuéra”? (Juan 12:42, 43.)

Jesús heʼi: “Pe ojeroviáva cherehe, ndahaʼéi cherehénte ojeroviáva, síno ojerovia avei upe chembou vaʼekuére. Ha pe chéve cherecháva, ohecha avei upe chembou vaʼekuépe”. Umi mbaʼe Ñandejára oipotáva Jesús omombeʼu yvyporakuérape ningo iñimportanteterei. Upévare Jesús heʼi: “Pe nopenáiva cherehe ha nohendúiva pe che haʼéva, orekóma mávapa ohusgáta chupe. Pe che haʼe vaʼekue ohusgáta chupe pe ára pahápe” (Juan 12:44, 45, 48).

Ha omohuʼã hag̃ua, Jesús heʼi: “Che nañeʼẽi chejehegui rei, síno pe Túva chembou vaʼekue omanda chéve mbaʼépa haʼéta ha amboʼéta. Ha aikuaa porã iñeʼẽ omeʼẽha jeikove opaveʼỹva” (Juan 12:49, 50). Jesús oikuaa ofaltaha unos kuánto díantema omeʼẽ hag̃ua hekove yvyporakuéra rehehápe (Romanos 5:8, 9).