LEKSIÓN 28
Ehechaukákena reagradeseha Jehová ha Jesús ojapo vaʼekue nderehehápe
¿Mbaʼéichapa reñeñandúta ne amígo omeʼẽramo ndéve peteĩ rregálo iporãitereíva? Katuete ningo revyʼaitereíta ha rehechaukáta ne amígope reagradeseha la ojapóva. Jehová ha Jesús ningo omeʼẽ vaʼekue ñandéve pe rregálo iporãvéva ikatúva jarresivi. ¿Mbaʼépa hína upéva? ¿Ha mbaʼéichapa ikatu jahechauka jaagradeseha chupekuéra?
1. ¿Mbaʼéichapa ikatu jahechauka jaagradeseha Jehová ha Jesús ojapo vaʼekue ñanderehehápe?
La Bíbliape oñepromete ñandéve “entéro umi ohechaukáva ojeroviaha” Jesús rehe ikatutaha oikove pára siémpre (Juan 3:16). ¿Mbaʼéichapa jajapo upéva? Ndahaʼéi jagueroviánteva Jesús oexistiha. Tekotevẽ avei jahechauka jajeroviaha umi mbaʼe jadesidíva ha jajapóva rupive (Santiago 2:17). Jahechaukáramo jajeroviaha umi mbaʼe jaʼe ha jajapóva rupive, ñamombaretevéta ñane amista Jesús ha Itúa Jehovándi (elee Juan 14:21).
2. ¿Mbaʼéicha javépa ikatu koʼýte jahechauka jaagradeseha Jehová ha Jesús ojapo vaʼekue?
Pe pyhare omano mboyve, Jesús heʼi vaʼekue isegidorkuérape mbaʼépa ojapo vaʼerã avei ohechauka hag̃ua oagradeseha isakrifísio. Haʼe heʼi chupekuéra oñembyaty vaʼerãha ogueromanduʼa hag̃ua pe “Séna del Señór”, oñehenóiva avei Konmemorasión (1 Corintios 11:20, nóta). Jesús oipota vaʼekue ijapostolkuéra ogueromanduʼa pe sakrifísio haʼe ojapo vaʼekue. Ha upéi entéro umi kristiáno tee ojapo vaʼerã avei upéva. Upévare Jesús omanda vaʼekue: “Pesegíkena pejapo ko mbaʼe penemanduʼa hag̃ua cherehe” (Lucas 22:19). Jaha jave pe Konmemorasionhápe jahechauka hína jaagradesetereiha Jehová ha Jesús ojapo vaʼekue ñanderehehápe ñanderayhueterei rupi.
EJEPYʼAMONGETAMÍNA
Jahechamína hetave mbaʼe ikatúva jajapo jahechauka hag̃ua jaagradeseha Jehová ha Jesús ojapo vaʼekue ñanderehehápe ñanderayhúgui. Jahechamína avei mbaʼérepa iñimportantete jagueromanduʼa Jesús omano hague ára térã Konmemorasión.
3. Jahechaukákena ñandeagradesidoha
Eñeimahinamína rejahoga potaitemaha, péro peteĩ persóna ou ndesalva, ¿mbaʼépa rejapóta? ¿Nderesaráitapa pe persóna ojapo vaʼekuégui? ¿Térãpa reñehaʼãmbaitéta rehechauka reagradeseha chupe?
Jehová ñanderayhúgui ñandesalva. Elee 1 Juan 4:8-10, ha upéi erresponde koʼã porandu:
¿Mbaʼérepa Jesús sakrifísio haʼe peteĩ rregálo iporãitereíva?
¿Mbaʼéichapa reñeñandu reikuaávo la Jehová ha Jesús ojapo vaʼekue nderehehápe?
¿Mbaʼéichapa ikatu jahechauka jaagradeseha Jehová ha Jesús ojapo vaʼekue ñanderehehápe? Elee 2 Corintios 5:15; 1 Juan 4:11 ha 5:3. Elee rire káda téxto erresponde ko porandu:
Según ko téxto, ¿mbaʼéichapa ikatu jahechauka ñamombaʼeha Jesús sakrifísio?
4. Jasegíkena Jesús ehémplo
Jasegívo Jesús ehémplo jahechauka avei ñandeagradesidoha. Elee 1 Pedro 2:21, ha upéi erresponde ko porandu:
¿Mbaʼéichapa ikatu nde avei ejapo umi mbaʼe Jesús ojapo vaʼekue?
Jesús ohayhu vaʼekue Ñandejára Ñeʼẽ, opredika umi notísia porã ha oipytyvõ umi ótrope
5. Ehókena pe Konmemorasionhápe
Ehecha hag̃ua mbaʼéichapa ojejapo vaʼekue pe primera Séna del Señór, elee Lucas 22:14, 19, 20. Upéi erresponde koʼã porandu:
¿Mbaʼéichapa ojejapo vaʼekue pe Séna del Señór?
¿Mbaʼépa orrepresenta pe pan ha pe víno? (Ehecha jey versíkulo 19 ha 20).
Jesús oipota vaʼekue idisipulokuéra ogueromanduʼa haʼe omano hague ára, térã pe Séna del Señór, una ves al áño. Upévare ore testígo de Jehová rojapo upéva káda áño, ha rojapo Jesús omanda hagueichaite. Eikuaa hag̃ua mbaʼérepa iñimportantete ko rreunión, ehecha pe VIDÉO. Upéi erresponde ko porandu:
¿Mbaʼéichapa ojejapo pe Konmemorasión?
Pe pan ojepurúva Konmemorasionhápe orrepresenta Jesús rete perfékto osakrifika vaʼekue ñanderehehápe, ha pe víno katu orrepresenta huguy
OĨRAMO HEʼÍVA: “Ndéngo ejeroviánte vaʼerã Jesúsre ha ejesalvátama”.
¿Mbaʼéichapa ikatu reipuru Juan 3:16 ha Santiago 2:17 heʼíva rehechauka hag̃ua jajapo vaʼerãha hetave mbaʼe?
RRESÚMEN
Jaagradese hag̃ua Jesús sakrifísio jahechauka vaʼerã jajeroviaha hese, ha jaha pe Konmemorasionhápe.
Rrepáso
¿Mbaʼéichapa ikatu jahechauka jajeroviaha Jesúsre?
¿Mbaʼépa nde rejapose rehechauka hag̃ua reagradeseha Jehová ha Jesús ojapo vaʼekue nderehehápe?
¿Mbaʼérepa iñimportantete jaha pe Konmemorasionhápe?
EINVESTIGA HAG̃UA
¿Mbaʼépa jajedesidi jajapotaha jaikuaávo Jesús ojesakrifika hague ñanderehehápe?
Ehecha mbaʼépa heʼise jajeroviaha ha mbaʼéichapa jahechauka upéva.
“¿Mbaʼéichapa jahechauka jajeroviaha Jehová promesakuérare?” (Ñemañaha octubre de 2016)
Pe experiénsia héravape “Koʼág̃a añandu chepotĩha Ñandejára renondépe”, ehecha mbaʼéichapa Jesús sakrifísio oipytyvõ vaʼekue peteĩ kuñakaraípe.
“La Biblia okambia chupekuéra” (La Atalaya 1 de agosto de 2011)
Ehecha mbaʼérepa algúnonte hoʼu pe pan ha pe víno Konmemorasionhápe.