LEKSIÓN 38
Ñamombaʼékena ñande rekove
Jaikove rupi ningo ikatu jadisfruta heta mbaʼe iporãitereívagui. Sapyʼánte ñaneprovléma hetáramo jepe lomímonte ikatu jasegi javyʼa. Péro, ¿mbaʼéichapa ikatu jahechauka Jehovápe jaagradeseha ñande rekovére? ¿Ha mbaʼérepa iñimportantete jajapo upéva?
1. ¿Mbaʼérepa ñamombaʼe vaʼerã ñande rekove?
Ñande rekove ningo peteĩ rregálo iporãitereíva omeʼẽva ñandéve ñande Túa ñanderayhuetéva Jehová, upévare ñande ñamombaʼeterei. La Biblia heʼi voi: “Nde ningo remeʼẽ la vída enterovépe” (Salmo 36:9). “Haʼe hína upe omeʼẽva enterovépe hekove, pe áire jarrespira hag̃ua ha entéro mbaʼe” (Hechos 17:25, 28). Jehová ndahaʼéi omeʼẽnteva ñandéve opa mbaʼe ñaikotevẽva jaikove hag̃ua, síno jadisfruta hag̃ua voi ñande rekovégui (elee Hechos 14:17).
2. ¿Mbaʼéichapa ikatu jahechauka Jehovápe jaagradeseha pe rregálo omeʼẽva ñandéve?
Nde sy hyeguasumírentema voi Jehová nderecháma ha oñepyrũma oñeinteresa nderehe. Peteĩ isiérvo hérava David oñemboʼe vaʼekue chupe ha heʼi: “Nde ningo cherecháma kuri che sy retepýpe” (Salmo 139:16). Jehová ningo omombaʼeterei nde rekove (elee Mateo 10:29-31). Upévare hasyeterei anga chupe ohechávo oĩha hénte ojukáva hapichápe térã ojesuisidáva (Éxodo 20:13).a Hasyeterei avei chupe jajapeligra reíramo, térã nañañatendéigui jaapeligra ñande rekove térã ótro rekove. Jakuidáramo ñandejehe ha jarrespetáramo ñande rapicha rekove, upéicha jahechauka hína ñamombaʼeha pe rregálo porãite Jehová omeʼẽva ñandéve.
EJEPYʼAMONGETAMÍNA
Jahechavemína mbaʼéichapa ikatu jahechauka ñamombaʼeha ñande rekove, pe rregálo Ñandejára omeʼẽva ñandéve.
3. Ñañatendékena ñande salúre
Umi kristiáno ojevautisámava opromete Jehovápe ojapotaha siémpre haʼe oipotáva, upévare odedika hekove kompletoite oservi hag̃ua chupe. Haʼekuéra omeʼẽ hekove haʼeramoguáicha peteĩ ofrénda sagráda, Ñandejára oaseptátava. Elee Romanos 12:1, 2, ha upéi erresponde koʼã porandu:
¿Mbaʼérepa reñatende vaʼerã nde salúre?
¿Mbaʼéichapa ikatu rejapo upéva?
4. Aníkena jajapeligra ñandejupe voi ni ótrope
La Biblia ñaneakonseha ani hag̃ua jajapeligra rei. Ehecha pe VIDÉO reikuaa hag̃ua mbaʼépa ikatu rejapo reñatende hag̃ua ndejehe ha ótrore.
Elee Proverbios 22:3, ha ehecha mbaʼéichapa ikatu reñatende ndejehe ha avei umi ótrore koʼã situasiónpe:
reime jave nde rógape.
reime jave nde travahohápe.
rehuga jave.
remaneha jave térã reime jave de akompañánte.
5. Jarrespetákena umi mitãraʼy nonaséitiva rekove
Peteĩ poesía rupive, David omombeʼu Jehová oñeinteresaha umi mitã neʼĩravare onase ha ohechaha chupekuéra mbaʼéichapa okakuaa ohóvo hikuái isy retepýpe. Elee Salmo 139:13-17, ha upéi erresponde ko porandu:
Jehovápe g̃uarã, ¿arakaʼe guivépa peteĩ persóna oñepyrũ oexisti: onase rire ae térãpa oĩ guive isy retepýpe?
Umi léi Jehová omeʼẽ vaʼekue umi israelítape oprotehe vaʼekue umi kuña hyeguasúvape ha avei imembýpe, jepe neʼĩra gueteri onase. Elee Éxodo 21:22, 23, ha upéi erresponde koʼã porandu:
¿Mbaʼéichapa oñeñandu vaʼekue Jehová ojejukáramo peteĩ mitãme isy retepýpe, ojapóramo jepe upéva ojaposeʼỹre kuri?
¿Mbaʼéichapa oñeñandúne upéicharõ oĩramo ojapóva upéva a propósito voi?b
¿Ndépa ere oĩ porãha la Jehová opensáva ko témare? ¿Mbaʼérepa repensa upéicha?
Peteĩ kuña omombaʼetereíramo jepe imemby rekove, sapyʼánte ikatu opensa oitykámante vaʼerãha, ndorekoiha ótra opsión. Elee Isaías 41:10, ha upéi erresponde koʼã porandu:
Peteĩ kuña hyeguasúvape ojeʼéramo oitykámante vaʼerãha imemby, ¿mávapa oipytyvõ porãvéta chupe odesidi hag̃ua mbaʼépa ojapóta? ¿Mbaʼérepa repensa upéicha?
OĨRAMO HEʼÍVA: “Oiménengo ndailadovéiguinte oityka la imemby, ¡mbaʼe anga piko ojapóta!”.
¿Ndépa ere Jehová omombaʼeha pe mitãraʼy nonaséitiva ha isy rekove? ¿Mbaʼérepa reime segúro upeichaha?
RRESÚMEN
La Biblia ñanemboʼe jahayhu, jarrespeta ha japrotehe vaʼerãha ñande rekove ha umi ótro rekove, pórke upéva haʼe peteĩ rregálo Jehová omeʼẽva enterovépe.
Rrepáso
¿Mbaʼérepa jaʼekuaa Jehová omombaʼeha ñande rekove?
¿Mbaʼéichapa Jehová oñeñandu ohechávo oĩha ojukáva hapichápe térã ojesuisidáva?
¿Mbaʼépa nde remombaʼeve ko rregálo porãitégui?
EINVESTIGA HAG̃UA
¿Mbaʼéichapa ikatu jahechauka Jehovápe jaagradeseha chupe ñande rekovére?
¿Ikatúnepa Jehová operdona peteĩ oityka vaʼekuépe imemby?
“¿Mbaʼépa heʼi la Biblia pe avórtore?” (Artíkulo oĩva jw-pe)
Ehecha mbaʼérepa iporã jareko enkuénta Jehová opensáva ñande rekovére jaelehi mboyve peteĩ depórte.
“¿Mbaʼépa heʼi la Biblia umi depórte ipeligrósovare?” (¡Despertad! 8 de octubre de 2000)
Ehecha mbaʼéichapa la Biblia ikatu oipytyvõ umi opensávape ojesuisidávo.
“¡Amanose! ¿Ikatúpa la Biblia chepytyvõ?” (Artíkulo oĩva jw-pe)
a Jehová ombyasy ohechávo oĩha osufríva ha oñeñandúva yvýre, ha ojepyʼapyeterei hesekuéra (Salmo 34:18). Sapyʼánte oĩ oñeñandu vaietereíva ha omanoséntemava voi, Jehová ontende umichagua persónape ha oipytyvõse chupekuéra. Reikuaa hag̃ua mbaʼéichapa haʼe ikatu ojapo upéva, elee pe artíkulo hérava “¡Amanose! ¿Ikatúpa la Biblia chepytyvõ?”, oñemensionáva opakuévo ko leksión, pe seksión héravape “Einvestiga hag̃ua”.
b Umi oityka vaʼekue imemby sapyʼánte oñeñandu vaieterei upe haguére, péro Jehová ikatu operdona chupekuéra. ¿Mbaʼérepa jaʼekuaa upéva? Elee pe artíkulo hérava “¿Mbaʼépa heʼi la Biblia pe avórtore?”, oñemensionáva opakuévo ko leksión, pe seksión héravape “Einvestiga hag̃ua”.