‘Tapeho pemboʼe umi héntepe oiko hag̃ua chuguikuéra che disípulo’

1-6. Emombeʼu mbaʼéichapa umi testígo de Jehová opredika diferénte hendáicha.

PETEĨ ermaníta oikóva Ghánape, hérava Rebecca, heʼi ijeskuéla haʼeha iterritório personál. Upévare haʼe siémpre oraha heta puvlikasión imochílape opredika hag̃ua ikompañerokuérape rrekréo aja. Ha omoñepyrũma voi upépe heta kúrso bíblico.

² Áfricape, pe ísla de Madagascárpe, peteĩ matrimónio haʼéva prekursór oguata vaʼerã mombyry, amo 25 kilómetrorupi, og̃uahẽ hag̃ua peteĩ puevloʼípe. Upe lugárpe haʼekuéra oreko heta kúrso bíblico.

³ Paraguáipe katu, umi ermáno upepegua ha heta voluntário oúva 15 paísgui, oipytyvõ ojejapo hag̃ua peteĩ várko. Upéva ojeprepara ikatu hag̃uáicha ojepredika umi Rrío Paraguay ha Rrío Paraná oríllare. Ko várko oreko 45 toneláda, ha 12 persóna ikatu oiko pype. Ko várko rupive ojepredika umi lugár ndaikatuihápe oñeg̃uahẽ péicha péichante.

⁴ Pe Polo Nórtepe, peteĩ lugár héravape Alaska, umi testígo de Jehová oaprovecha pe veráno opredika hag̃ua umi turístape. Upe épokape oho jepi hetaiterei hénte de diferénte país ovisita hag̃ua upe lugár. Ha umi Testígo upepegua oaprovecha upéva ha oofrese puvlikasión oĩva diferénte idiómape. Upe lugárpe ojepuru avei peteĩ avionéta ojepredika hag̃ua umi lugár oĩvape mombyry. Por ehémplo ojeho oĩháme umi indíhena aleutiano, atabascano, chimesiano ha coluchano.

⁵ Larry, oikóva Téxaspe (Estados Unidos), oreko peteĩ território iporãitereíva: pe ogár de ansiáno haʼe oikoha. Larry oreko vaʼekue peteĩ aksidénte ha ou opyta sílla de rruédape, ¡péro lomímonte iguapoiterei! Haʼe siémpre opredika umi héntepe umi notísia porã, por ehémplo omombeʼu chupekuéra Ñandejára Rréino poguýpe haʼe ikatutaha oguata jey (Is. 35:5, 6).

⁶ Myanmárpe, unos kuánto testígo de Jehová ojupi peteĩ várkope Mandaláype, ha oviaha 3 díare pe nórte gotyo oho hag̃ua peteĩ aty guasuhápe. Haʼekuéra oraha heta puvlikasión opredika hag̃ua pe viáhe aja. Pe várko opyta jave peteĩ siuda térã puevloʼípe, haʼekuéra pyaʼe porã oguejy ha opredika umi hénte upepeguápe. Upe aja heta pasahéro oĩ vaʼekue upe várkope oguejýma ha ojupi ótro grúpo, upéicha koʼã Testígo ojupi jeývo pe várkope otopáma peteĩ território pyahu, ha oaprovecha jey hikuái opredika hag̃ua chupekuéra.

7. ¿Mbaʼéichapa opredika jepi umi testígo de Jehová, ha mbaʼépa oñehaʼã ojapo enterovéva?

⁷ Koʼã ehémplo ohechaukánte ermanokuéra iguapoitereiha oñeʼẽ hag̃ua Ñandejára Rréinore ha “opredika porã” hag̃ua (Hech. 28:23). Ha upéva ojapo hikuái diferénte hendáicha, por ehémplo opredika ogahárupi, umi kállere, oskrivi kárta ha oporohenói teléfono rupive. Avei opredika hikuái oikohárupi, tahaʼe kolektívope, plásape ha opytuʼu aja itravahohápe. Entéro Testígo oaprovecha oimeraẽ oportunida oñeʼẽ hag̃ua Ñandejára Rréinore. La opredika lája hikuái ikatu ovariaʼimi, péro enterovévante oñehaʼã opredika ikatúvape guive tahaʼe haʼéva lugárpe (Mat. 10:11).

8, 9. a) ¿Mbaʼérepa ikatu jaʼe pe predikasión haʼeha peteĩ milágro? b) ¿Mbaʼépa jajapo vaʼerã jaikuaa hag̃ua mbaʼérepa avave ndaikatúi ojoko pe predikasión?

⁸ Koʼág̃arupi ningo umi testígo de Jehová opredika mas de 235 paíspe. ¿Ndépa reime hína avei ijapytepekuéra? Oiméramo upéicha, ¡eikuaákena iporãitereiha la rejapóva hína! Jaʼétamante voi pe predikasión ojejapóva hína haʼeha peteĩ milágro. ¿Mbaʼérepa? Pórke umi goviérno ha hetave hénte oñehaʼãramo jepe oproivi ha ojoko, lomímonte oĩ Testígo osegíva oñeʼẽ hapichápe Ñandejára Rréinore, tahaʼe haʼéva lugárpe ko yvy ape ári.

⁹ Jahechaháicha, avave ni mbaʼeve ndaikatúi ojoko pe predikasión, ni Satanás jepe. ¿Mbaʼéicha rupi upéva? Jaikuaa hag̃ua, ñaanalisa vaʼerã mbaʼépa oiko vaʼekue umi apostolkuéra tiémpope. Pórke amo ipahápe, ñande testígo de Jehová jasegínte hína peteĩ traváho oñepyrũ vaʼekue upe tiémpope.

Peteĩ traváho tuichaitereíva

10. ¿Mbaʼépa la iñimportanteve vaʼekue Jesúspe g̃uarã, ha mbaʼépa haʼe oikuaa porã vaʼekue?

¹⁰ Jesucristo ningo omoñepyrũ vaʼekue pe kongregasión kristiána, ha chupe g̃uarã pe predikasión haʼe vaʼekue la iñimportantevéva. Haʼe ojededika vaʼekue komplétamente upévape. Upévare peteĩ vuéltape heʼi vaʼekue: “Aha vaʼerã ótro siudápe apredika hag̃ua umi notísia porã oñeʼẽva Ñandejára Rréinore, pórke upearã Ñandejára chembou vaʼekue” (Luc. 4:43). Jesús oikuaa porã vaʼekue haʼe omoñepyrũha peteĩ traváho ndaikatumoʼãiva otermina. Omano mboyvemi haʼe oprofetisa vaʼekue ojepredika vaʼerãha entéro paíspe (Mar. 13:10). ¿Mbaʼéichapa ojejapóta raʼe ko traváho tuichaitéva? ¿Ha mávapa ojapóta upéva?

11. ¿Mbaʼe traváho iñimportantetévapa Jesús onkarga vaʼekue idisipulokuérape, ha mbaʼéichapa oñepytyvõta kuri chupekuéra?

¹¹ Jesús orresusita rire, ojaparese vaʼekue idisipulokuérape ha onkarga chupekuéra peteĩ mbaʼe iñimportantetereíva. Haʼe heʼi chupekuéra: “Tapeho pemboʼe umi hénte entéro paisguápe oiko hag̃ua chuguikuéra che disípulo, ha pevautisa chupekuéra pe Túa, pe Taʼýra ha pe espíritu sánto rérape. Ha pemboʼe chupekuéra ojapo hag̃ua entéro mbaʼe amanda vaʼekue peẽme. Ha penemanduʼáke, che aĩta penendive káda día, og̃uahẽ meve pe fin” (Mat. 28:19, 20). Jahechaháicha, Jesús heʼi chupekuéra: “Che aĩta penendive”. Upéva ohechauka haʼe siémpre oapojataha chupekuéra okumpli porã hag̃ua ko traváho. Ha katuete haʼekuéra oikotevẽta kuri Jesús rehe, pórke haʼe oavisa vaʼekue voi chupekuéra umi hénte ‘ndochaʼemoʼãiha hesekuéra’ (Mat. 24:9). Péro ndahaʼéi Jesús añónte la oipytyvõtava kuri chupekuéra. Haʼe oho mboyve yvágape opromete vaʼekue pe espíritu sánto oipytyvõtaha chupekuéra opredika hag̃ua “umi lugár mombyryvehápe jepe ko yvy ape ári” (Hech. 1:8).

12. ¿Mbaʼe mbaʼépa ikatu hína ñañeporandu, ha mbaʼérepa iñimportánte ñande jaikuaa la rrespuésta?

¹² Ikatu voi ñañeporandu: ¿Ikatúpa jaʼe umi apóstol ha umi disípulo upe tiémpope guare ojagarra hague ensério ko tembiapo? ¿Opredika porãpa raʼe hikuái oĩramo jepe oñemoĩ mbaretéva hesekuéra ha ndahetáiramo jepe hikuái? ¿Oipytyvõpa raʼe añete chupekuéra Jesús ha pe espíritu sánto ikatu hag̃uáicha okumpli ko tembiapo? Koʼã pregúnta ningo oñekontestapaite lívro de Héchospe, ha iñimportanteterei hína ñande jaikuaa la rrespuésta. ¿Mbaʼérepa? Pórke Jesús opromete vaʼekue pe predikasión osegitaha “og̃uahẽ meve pe fin”. Upéicharõ, ñande jareko avei la rresponsavilida ñakumplívo ko tembiapo jaiko rupi umi ára pahápe. Upévare ñandéve ñaneinteresaiterei umi mbaʼe oñemombeʼúva lívro de Héchospe.

¿Mbaʼe rehepa oñeñeʼẽ lívro de Héchospe?

13, 14. a) ¿Mávapa oskrivi vaʼekue lívro de Hechos, ha moõguipa onohẽ umi mbaʼe omombeʼúva? b) ¿Mbaʼe rehepa oñeñeʼẽ lívro de Héchospe?

¹³ ¿Mávapa oskrivi raʼe lívro de Hechos? La Bíbliape noñemombeʼúi mávapa la oskrivi vaʼekue. Péro jalee porãramo umi mbaʼe heʼíva oñepyrũre ko lívro, japilláta Lucas oskrivi hague (Luc. 1:1-4; Hech. 1:1, 2). Ha yma guivéma oĩ opensáva upéicha. La Biblia omombeʼu Lucas haʼe hague doktór, ha oinvestiga porã hague oskrivi mboyve ko lívro (Col. 4:14). Héchospe oñemombeʼu umi mbaʼe oiko vaʼekue amo 28 áño pukukuére, Jesús oho guive yvágape áño 33-pe, apóstol Pablo oho peve kárselpe Rómape áño 61-pe. Primerorã Lucas omombeʼúnte la ojapo vaʼekue umi ótro Jesús segidorkuéra, péro upéi okambia la okasea lája. Haʼe oñepyrũma heʼi: “Ore”. Upéva ohechauka haʼe voi opartisipáma hague umi mbaʼe oñemombeʼúvape upe rire (Hech. 16:8-10; 20:5; 27:1). Jaʼéma haguéicha, Lucas oinvestiga porã vaʼekue oskrivi mboyve ko lívro. Ha oikuaa porã hag̃ua umi mbaʼe oiko vaʼekue, katuete oporandúne raʼe apóstol Páblope voi, avei Bernabépe, Felípepe, ha umi ótro oñemensionávape avei ko lívrope.

¹⁴ ¿Mbaʼe rehepa oñeñeʼẽ lívro de Héchospe? Primerorã, pe lívro de Lúcaspe, oñemombeʼu kuri ñandéve mbaʼe mbaʼépa Jesús heʼi ha ojapo vaʼekue. Upéi, pe lívro de Héchospe, Lucas oñeʼẽ ñandéve Jesús segidorkuérare ha umi mbaʼe porã heʼi ha ojapo vaʼekuére hikuái. Omombeʼu avei umi hénte nomombaʼéi hague chupekuéra ha ojeʼe hague hesekuéra “ilápi mbykyha” (Hech. 4:13). Ko lívrope oñemombeʼu avei mbaʼéichapa oñepyrũ vaʼekue pe kongregasión kristiána, mbaʼéichapa upéi okakuaa ohóvo, ha mbaʼéichapa umi kristiáno yma guare kyreʼỹme opredika diferénte hendáicha (Hech. 4:31; 5:42). Ohechauka avei ñandéve mbaʼeichaitépa pe espíritu sánto oipytyvõ chupekuéra upearã (Hech. 8:29, 39, 40; 13:1-3; 16:6; 18:24, 25). Lívro de Héchospe oñeñeʼẽ avei pe téma prinsipál orekóvare la Biblia. Upépe pyʼỹi oñeñeʼẽ Ñandejára Rréinore ha mbaʼéichapa oñemopotĩta Ñandejára réra ogoverna vove Jesucristo. Ha ohechauka avei umi kristiáno ypykue opredika hague opárupi, oĩramo jepe oñemoĩ mbaretéva hesekuéra (Hech. 8:12; 19:8; 28:30, 31).

15. ¿Mbaʼéichapa ñanepytyvõta ñaanalisáramo lívro de Hechos?

¹⁵ Tuichaiterei ojapo porãta ñanderehe ñaanalisáramo lívro de Hechos. Jaikuaávo mbaʼeichaitépa ikyreʼỹ vaʼekue Jesús segidorkuéra opokoitereíta ñanderehe, jajoguaséta chupekuéra ha ñanekyreʼỹvéta ñaipytyvõ hag̃ua la héntepe oiko hag̃ua chugui Jesús disípulo. Ko puvlikasión releétava hína nepytyvõta restudia ha rentende porã hag̃ua pe lívro de Hechos.

¿Mbaʼéichapa ñanepytyvõta ko lívro?

16. ¿Mbaʼépa umi mbohapy mbaʼe jahupytýtava jastudiávo ko lívro?

¹⁶ Ko lívro rupive ikatúta jahupyty mbohapy mbaʼe: 1) Ñaiméta segúro Jehová oipuruha ijespíritu sánto oapoja hag̃ua pe predikasión. 2) Ñanekyreʼỹvéta japredika hag̃ua, pórke ñaanalisáta pe ehémplo omoĩ vaʼekue Jesús segidorkuéra. Ha 3) jarrespetavéta Jehová organisasión ha umi ñandegiávape predikasiónpe ha kongregasiónpe.

17, 18. ¿Mbaʼéichapa oñeorganisa pe informasión oĩva ko lívrope, ha mbaʼe mbaʼépa oreko avei ideprovechoitereíva?

¹⁷ ¿Mbaʼéichapa oñeorganisa pe informasión oĩva ko lívrope? Emañávo hese, ehechakuaáta orekoha en totál 8 seksión. Ha káda seksiónpe oñeanalisa peteĩ párte oĩva lívro de Héchospe. Ko lívro ningo ndahaʼéi ku ojepreparáva ñaanalisa hag̃ua versíkulo por versíkulo pe lívro de Hechos, síno ñanepytyvõ jahechakuaa hag̃ua mbaʼépa ikatu ñaaprende umi mbaʼe oñemombeʼúvagui upépe, ha mbaʼéichapa ikatu jajapo umi mbaʼe ñaaprendéva. Oñepyrũre voi káda kapítulo oñemombeʼúma ñandéve pe téma prinsipál ñaanalisátava, ha avei oĩ peteĩ téxto omopyendáva pe kapítulo.

¹⁸ Ko lívro oguereko avei hetave mbaʼe ñandegustaitereítava. Por ehémplo oĩ umi divúho porã porã eñeimahina hag̃ua mbaʼépa la oikopáva hína. Oĩ kapítulo oguerekóva avei umi rrekuádro oĩháme hetave informasión ideprovechoitereíva. Por ehémplo, oĩ umi oñeʼẽva peteĩ Jehová siérvore ha omombeʼúva ñandéve heta mbaʼe chugui. Oĩ avei umi oñeʼẽva umi lugár rehe, umi mbaʼe oiko vaʼekuére, umi kostúmbre rehe ha umi hénte upe tiempopeguáre.

19. ¿Mbaʼe mbaʼe rehepa iporã jajepyʼamongeta káda tánto?

¹⁹ Ko lívro ñanepytyvõta avei káda únope ikatu hag̃uáicha jajepyʼamongeta ha jahecha mbaʼetekópa ñaime hína. Oiméramo jepe aréma jaservi hague Jehovápe térã ramoiténte, lomímonte enterovéva káda tánto ñapensa vaʼerã mbaʼépa la iñimportantevéva ñandéve g̃uarã (2 Cor. 13:5). Eñeporandumína: “¿Asegípa chekyreʼỹ predikasiónpe anteve guaréicha?” (1 Cor. 7:29-31). “¿Ojekuaápa cherehe aimeha segúro che esperánsare apredika jave?” (1 Tes. 1:5, 6). “¿Añehaʼãpa hína ajapo ikatúva guive apredika hag̃ua?” (Col. 3:23).

20, 21. ¿Mbaʼérepa iñimportantete koʼág̃arupi ñane predikasión, ha mbaʼépa jajedesidi vaʼerã jajapotaha?

²⁰ Aníkena ñanderesarái ñandéve oñenkarga hague peteĩ tembiapo iñimportantetereíva. ¿Mbaʼépa upéva? Japredika ha jajapo hag̃ua la héntegui Jesús disípulo. Káda día ohasávo ningo saʼivéntema hemby la tiémpo, pórke ko múndo aña koʼẽrõitéma oñehundíta. Oĩ ningo hetaiterei persóna ikatúitiva ojesalva, ha ñande ndajaikuaái máva mávapa hína umíva. Upévare jasegi vaʼerã jaheka umi ipyʼaporãva ha oserviséva Jehovápe (Hech. 13:48). Ñande jareko hína la rresponsavilida ñaipytyvõvo chupekuéra tardeterei mboyve (1 Tim. 4:16).

²¹ Upévare iñimportanteterei jasegi umi kristiáno yma guare ehémplo, pórke haʼekuéra ikyreʼỹeterei vaʼekue predikasiónpe. Estudia porãkena ko lívro, upéva nepytyvõta nde avei nekyreʼỹ ha ndepyʼaguasu hag̃ua haʼekuéraicha. Péicha ikatúta esegi eservi porã Jehovápe, ha epredika porãta umi notísia oñeʼẽva Irréinore (Hech. 28:23).