“Enterove henyhẽ espíritu sántogui”

1. Emombeʼu mbaʼépa oiko vaʼekue Jerusalénpe pe Pentekostés aja.

UPE díape ojevyʼapa joa hína Jerusalénpe.a Pe tatatĩ ojupi ohóvo yvágape ojejapo aja umi sakrifísio pe témplope. Umi levita katu opurahéi pe Hallel, upéva haʼe umi purahéi jatopáva Salmo 113-118-pe. Posívlemente oĩne raʼe mokõi grúpo opurahéiva koʼã salmo por túrno. Ehendúvo chupekuéra, haʼete voi peteĩ grúpo okontestáva pe ótrope opurahéi jave. Umi kálle katu henyhẽte, oĩ hénte oúva opáguio ládo, por ehémplo Elam, Mesopotamia, Capadocia, Ponto, Egipto ha Rómagui.b Péichami vaʼekue Jerusalénpe pe Pentekostés aja. Ko fiésta héra avei “Fiésta de la Kosécha” (Núm. 28:26). Ko fiésta ojejapóva káda áño, ohechauka oñembyatypáma hague pe seváda ha oñeñepyrũmaha oñembyaty pe trígo. Ndareíri la ojevyʼaite raʼe.

2. ¿Mbaʼe mbaʼépa oiko raʼe pe Pentekostés áño 33-pe?

² Upe díape, áño 33-pe, las 9 de la mañánarupi, oiko peteĩ milágro koʼag̃aite peve ñanemanduʼáva hese. “Oñehendu peteĩ tyapu guasu yvágagui, ku yvytu atã oipejurõguáicha”, haʼete “osunúva yvágagui” (Hech. 2:2; Tûpâ Ñandeyára 1913). Upe tyapu ningo oñehendu kuri pe koty oñembyaty haguépe umi 120 Jesús disípulo. Upéi oiko peteĩ mbaʼe oñeimoʼãʼỹva: káda uno umi disípulo akã ári oguejy peteĩ tatarendyʼi joguaha.c Upéi haʼekuéra “henyhẽ espíritu sántogui”, ¡ha oñepyrũ oñeʼẽ diferénte idiómape! Osẽvo hikuái upe ógagui, umi hénte ijurujaipa opytávo “pórke káda uno ohendu umi disípulope oñeʼẽha chupekuéra iñidióma teépe” (Hech. 2:1-6).

3. a) ¿Mbaʼérepa ikatu jaʼe la oiko vaʼekue Pentekostés áño 33-pe iñimportanteterei hague enterove kristiánope g̃uarã? b) ¿Mbaʼéichapa Pedro oipuru raʼe pe primera “lláve ojeike hag̃ua pe Rréino yvagapeguápe”?

³ Ko oiko vaʼekue iñimportanteterei umi kristianokuérape g̃uarã, pórke upérõ guare Ñandejára oñepyrũ oiporavo umi unhidokuérape, haʼéva “pe Israel Ñandejára mbaʼéva” (Gál. 6:16). Péro ndahaʼéi upévante, upérõ Pedro oipuru kuri avei peteĩva “umi lláve ojeike hag̃ua pe Rréino yvagapeguápe” (Mat. 16:18, 19). Ko primera lláve rupive, umi judío ha umi oikéva judío rrelihiónpe ikatútama oĩ pe Israel Ñandejára mbaʼévape.d Upe guive, haʼekuéra orekóma pe esperánsa ohóvo yvágape oservi hag̃ua rréi ha saserdóteramo Jesús ndive (Apoc. 5:9, 10). Tiémpo rire, ko oportunida oñemeʼẽta kuri avei umi samaritánope ha upéi katu umi ndahaʼéivape judío. Péro, ¿mbaʼépa ñande ikatu ñaaprende koʼág̃arupi upe mbaʼe iñimportantetéva oiko vaʼekuégui?

“Enterove umi disípulo oñembyaty peteĩ lugárpe” (Hechos 2:1-4)

4. ¿Osegípa okakuaa pe organisasión oñepyrũ vaʼekue áño 33-pe?

⁴ Pe kongregasión kristiána oñepyrũ vaʼekue umi 120 disípulo orresivírõ guare espíritu sánto, oĩ aja hikuái oñondivepa peteĩ koty yvateguápe (Hech. 2:1). Mbovymíramo jepe hikuái ñepyrũrã, upéi 3.000 persónarupima ojevautisa upe díape voi. Pe organisasión oñepyrũ vaʼekue upe tiémpope, koʼág̃a peve osegi okakuaa ha heta hetave ohóvo la oikéva pype. Ou mboyve pe fin, Jehová ojevale hína koʼã kristiáno ifiélvare ojepredika hag̃ua “umi notísia porã oñeʼẽva Ñandejára Rréinore” oparupiete ko yvy ape ári (Mat. 24:14).

5. ¿Mbaʼéichapa pe kongregasión oipytyvõ umi kristiáno yma guarépe ha umi koʼag̃aguápe?

⁵ Ko kongregasión rupive umi kristianokuéra ikatúta kuri oñomokyreʼỹ oñondivepa, tahaʼe umi unhidokuéra térã umi “ótro ovechakuéra” (Juan 10:16). Pablo ohechakuaa vaʼekue upe kyreʼỹ iñimportantetereiha, upévare heʼi umi kristiáno Romaguápe: “Hiʼãite chéve pohechami, ikatu hag̃uáicha pomokyreʼỹ ha péicha pemombarete pene amista Ñandejárandi. Añetehápe pohechase ikatu hag̃uáicha káda uno ñañomokyreʼỹ ñande jerovia rupive, peẽ ha che avei” (Rom. 1:11, 12).

6, 7. ¿Mbaʼéichapa koʼág̃arupi Jehová organisasión okumpli hína la Jesús omanda vaʼekue?

⁶ Koʼág̃arupi Jehová puévlo oñehaʼã avei ojapo la ojapo vaʼekue umi kristiáno yma guare. Jesús onkarga vaʼekue idisipulokuérape peteĩ mbaʼe ombovyʼaitereítava chupekuéra, jepe sapyʼánte ijetuʼúta okumpli hag̃ua. Jesús heʼi vaʼekue: “Pemboʼe umi hénte entéro paisguápe oiko hag̃ua chuguikuéra che disípulo, ha pevautisa chupekuéra pe Túa, pe Taʼýra ha pe espíritu sánto rérape. Ha pemboʼe chupekuéra ojapo hag̃ua entéro mbaʼe amanda vaʼekue peẽme” (Mat. 28:19, 20).

⁷ Koʼág̃arupi Jehová ojevale umi testígo de Jehováre ojepredika hag̃ua oparupiete. Legálmente ndahaʼéi la ifasilpáva ojepredika hag̃ua diferénte idiómape. Upéicharõ jepe, umi testígo de Jehová oguenohẽ informasión bíblica mas de 1.000 idiómape. Oiméramo nde reho meme rreunionhápe, repredika meme ha reipytyvõ umi héntepe oiko hag̃ua chuguikuéra Jesús disípulo, upéicharõ evyʼa vaʼerã, pórke ndahetái hína la orekóva pe oportunida oñeʼẽvo Jehová rérare.

8. ¿Mbaʼéichapa ñanepytyvõ umi rreunionkuéra?

⁸ Ikatu hag̃uáicha ñaaguanta ha javyʼa ijetuʼu jave la situasión, Jehová omeʼẽ ñandéve ñane ermáno ha ermanakuéra. Pablo heʼi vaʼekue umi hebréope: “Ñañeinteresákena ojuehe ñande pyʼaite guive, ha ñañomokyreʼỹ japorohayhu hag̃ua ha jajapo hag̃ua iporãva. Oĩramo jepe ojepokuaáva ofalta meme rreunionhápe, ani ñande jaiko jafalta, síno ñañomokyreʼỹ vaʼerã. Jajapo vaʼerã koʼã mbaʼe koʼýte koʼág̃a jahechávo Ñandejára día hiʼag̃uimbaitemaha” (Heb. 10:24, 25). Pe kongregasión ningo haʼe peteĩ rregálo iporãitereíva oúva Jehovágui, ikatu hag̃uáicha ñañomokyreʼỹ ñane ermanokuérandi. Upévare, aníkena eñemomombyry ne ermanokuéragui, ha eñehaʼãmbaitékena pono refalta rreunionhápe.

“Káda uno ohendu umi disípulope oñeʼẽha chupekuéra iñidióma teépe” (Hechos 2:5-13)

9, 10. ¿Mbaʼépa ojapo jepi heta ermáno ikatu hag̃uáicha opredika umi oñeʼẽvape ótro idióma?

⁹ ¡Mbaʼeichaitéiko oiméne ovyʼa raʼe umi judío ha umi oikéva judío rrelihiónpe pe Pentekostés del áño 33-pe! Haʼekuéra ningo la majoría extranhéro vaʼekue, ha posívlemente oñeʼẽʼimi griego térã hebreo, péro ko vuéltape “káda uno ohendu umi disípulope oñeʼẽha chupekuéra iñidióma teépe” (Hech. 2:6). Katueténgo oiméne opokoiterei raʼe hesekuéra ohendúvo umi notísia porã iñeʼẽtépe voi. Jaikuaaháicha, koʼág̃arupi Jehová ndojapovéima peichagua milágro isiervokuéra oñeʼẽ hag̃ua diferénte idiómape. Upéicharõ jepe, lomímonte oĩ hetaiterei oñehaʼãva opredika umi oñeʼẽvape ótro idióma. Por ehémplo, oĩ umi odesidíva oapoja peteĩ kongregasión oĩva ótro idiómape térã katu ova voi pe lugár oñeñeʼẽhápe upe idióma. Pyʼỹinte koʼã ermáno ohechakuaa umi hénte ohecharamoitereiha haʼekuéra oñehaʼã haguére oaprende iñidióma.

¹⁰ Christine experiénsia ohechauka porã upéva upeichaha. Haʼe ha ótro 7 ermáno ha ermána oike kuri peteĩ kúrsope oaprende hag̃ua gujarati. Upévare haʼe ojotopárõ guare peteĩ ikompañéra de traváhondi oñeʼẽva gujarati, haʼe osaluda chupe upe idiómape. Pe kuñataĩ ohecharamoiterei upéva, ha oikuaase mbaʼérepa Christine oñehaʼã oaprende upe idióma ijetuʼuetéva. Upépe haʼe oaprovecha opredika hag̃ua chupe, ha upéi pe kuñataĩ heʼi Christínepe: “Oime vaʼerã iñimportánte la pemombeʼuséva, ajeve la peñehaʼã pejapo upéva”.

11. ¿Mbaʼéichapa ikatu jajeprepara japredika hag̃ua umi oñeʼẽvape ótro idióma?

¹¹ Naentéroi ningo ikatu oaprende ótro idióma, péro ñande lomímonte ikatu hína japredika umi persóna de diferénte paíspe. ¿Mbaʼéichapa ikatu jajapo upéva? Por ehémplo, ikatu jaipuru pe aplikasión JW Language^® ñaaprende hag̃ua mbaʼéichapa ikatu jasaluda umi oñeʼẽvape ótro idióma, koʼýte oimérõ pe jaikoha ládo oĩ umichagua persóna. Ikatu avei ñaaprende mbaʼéichapa ikatu jaʼe peteĩ mbaʼe ointeresátava chupekuéra. Ñamombeʼukuaa avei chupekuéra ikatuha oike jw.org-pe, ha ikatu voi jahechauka chupe unos kuánto vidéo ha puvlikasión oĩva iñidiómape. Jajapóramo koʼã mbaʼe, ikatúta javyʼa ovyʼa haguéicha umi kristiáno yma guare opredikárõ guare la héntepe “iñidióma teépe”.

“Pedro oñemboʼy” (Hechos 2:14-37)

12. a) ¿Mbaʼéichapa oñekumpli rakaʼe pe profesía Joel omeʼẽ vaʼekue? b) ¿Mbaʼérepa Jesús disipulokuéra ohaʼarõma voi hína raʼe oñekumpli upe profesía?

¹² Upéi, “Pedro oñemboʼy” ha oñeʼẽ pe henteitápe (Hech. 2:14). Haʼe oexplika chupekuéra Ñandejára rupive haʼekuéra orekoha pe kapasida oñeʼẽ hag̃ua diferénte idiómape, ha upéva okumpliha la heʼíva Joel 2:28-pe: “Ameʼẽta che espíritu entéro persónape”. Ha Jesús oho mboyve yvágape, opromete vaʼekue avei idisipulokuérape: “Ajeruréta pe Túape omeʼẽ hag̃ua peẽme ótro ajudánte”, upéva haʼe kuri “pe espíritu sánto” (Juan 14:16, 17).

13, 14. ¿Mbaʼéichapa Pedro oñeʼẽ vaʼekue la héntepe, ha mbaʼéichapa ñande ikatu jasegi iñehémplo?

¹³ Opakuévo la idiskúrso, Pedro heʼi umi héntepe: “Peikuaa porãke enterove peẽ Israel rogaygua, Ñandejára omoĩ hague Governánte ha Crístoramo ko Jesús peẽ pejuka vaʼekuépe peteĩ yvyráre” (Hech. 2:36). La majoría umi ohendúva Pédrope ningo noĩri kuri pépe ojejukárõ guare Jesúspe. Upéicharõ jepe, haʼekuéra haʼéma kuri rresponsávle upe oiko vaʼekuére pórke haʼekuéra judíonte avei. Péro, ¿Pedro piko okondenáma raʼe chupekuéra upe haguére? Nahániri. Jahecha haʼe oñeʼẽ porãnte hague umi ótro judíope oipotágui oñarrepenti hikuái. Upéicha rupi umi hénte ndaipochýi Pédrondi, upéva rangue “oñembyasy ha oñeñandu vaieterei” hikuái. Upévare oporandu: “¿Mbaʼe piko rojapo vaʼerã?”. Pedro oikekuaa rupi umi héntepe, haʼekuéra ndojagarravaíri la ojeʼéva chupekuéra, síno oñarrepentiete (Hech. 2:37).

¹⁴ Ñande avei jaikekuaa vaʼerã la héntepe ojapo haguéicha Pedro. Japredika jave ótrope, natekotevẽi katuete jakorrehi pe ogajárape heʼíramo ñandéve álgo noĩporãiva. Upéva rangue, ikuentave jahecha mbaʼe témapepa ikatu ñaĩ de akuérdo hendive, ha ñañepyrũ ñañeʼẽ chupe upévare. Jajapóramo upéicha, trankiloite ikatúta ñañeʼẽ la Bíbliare pe ogajárandi ha katuete ñanerendu porãta. Umi ipyʼaporãvape ñañeʼẽramo péicha, ojapo haguéicha Pedro, katuete ñag̃uahẽta ikorasõme.

“Pejevautisa káda uno” (Hechos 2:38-47)

15. a) ¿Mbaʼépa Pedro heʼi vaʼekue umi judíope ha umi oikévape judío rrelihiónpe, ha mbaʼépa oiko upe rire? b) ¿Mbaʼérepa haʼekuéra ojevautisa raʼe upe díape?

¹⁵ Pe Pentekostés áño 33-pe, Pedro heʼi kuri avei umi judío ha umi oikévape judío rrelihiónpe: “Peñarrepenti ha pejevautisa káda uno” (Hech. 2:38). Upéicha rupi 3.000 persónarupi ojevautisa upe díape, posívlemente algún lagúna oĩvape Jerusalénpe térã ijypýrupi.e Péro, ¿haʼekuérapa ojapo upéva pyaʼe pyaʼénte oñeemosionágui rei? ¡Nahániri! Ko rreláto ndeʼiséi umi estudiánte térã umi kristianokuéra família ojevautisa vaʼerãha pyaʼe pyaʼénte oĩʼỹre preparádo. ¿Mbaʼérepa? Pórke umi judío ha umi oikéva judío rrelihiónpe oikuaa porãma voi kuri Ñandejára Ñeʼẽ, ha oĩma voi avei hikuái Jehová puévlope, upévarente ojevautisa upe díape. Hiʼarive, káda áño haʼekuéra ohechauka vaʼekue ohayhuha Jehovápe oúvo mombyrýgui Jerusalénpe oadora hag̃ua chupe hikuái upépe. Peteĩ mbaʼéntema la ofalta vaʼekue chupekuéra: tekotevẽ oasepta hikuái Jehová ojevaleha hína Jesúsre okumpli hag̃ua ivolunta. Upévare, oasepta rire hikuái upéva, ikatúma kuri ojevautisa ha oiko chuguikuéra Cristo segidór.

16. ¿Mbaʼéichapa umi kristiáno yma guare oipytyvõ vaʼekue iñermanokuérape?

¹⁶ Ojekuaa porãiterei kuri Jehová ovendesiha chupekuéra, pórke upéi la Biblia omombeʼu: “Entéro umi ojerovia ramóva oñembyaty oñondivepa ha okomparti entéro mbaʼe oguerekóva. Ha ovende hikuái umi mbaʼe orekóva ha ijyvy, ha hepykue orreparti enterovépe, asegún pe oikotevẽva káda uno” (Hech. 2:44, 45).f Ñande avei ñaipytyvõ vaʼerã péicha ñane ermanokuérape, ha ñaĩ vaʼerã jajapo hag̃uáicha oimeraẽ mbaʼe hesehapekuéra.

17. ¿Mbaʼe mbaʼépa ojapo vaʼerã peteĩ persóna ojevautisaséva?

¹⁷ Peteĩ persóna oñemeʼẽséva Jehovápe ha ojevautisa, ojapo raẽ vaʼerã heta mbaʼe upe mboyve. Upe persóna oikuaa porã vaʼerã Ñandejára Ñeʼẽ (Juan 17:3). Ojerovia vaʼerã Jehováre ha ohechauka vaʼerã ombyasyha umi mbaʼe vai ojapo vaʼekue (Hech. 3:19). Upéi oñepyrũ vaʼerã avei ojapo iporãva ha okumpli Jehová volunta (Rom. 12:2; Efes. 4:23, 24). Ojapopa rire koʼã mbaʼe, ikatúma oñemboʼe Jehovápe oñemeʼẽ hag̃ua chupe ha upéi ojevautisa (Mat. 16:24; 1 Ped. 3:21).

18. ¿Mbaʼe oportunida porãitépa oreko enterove ojevautisáva?

¹⁸ ¿Ndépa rejevautisáma ha oikóma ndehegui Jesús segidór? Oiméramo upéicha, emombaʼékena ko oportunida porãite oñemeʼẽva ndéve. Oiko haguéicha yma umi disipulokuéra kásope, ndéve avei Jehová ikatu omeʼẽ ijespíritu sánto, ikatu hag̃uáicha ekumpli ivolunta ha epredika porã umi notísia porã.