José ningo onase vaʼekue Jacob ituja riréma, upévare Jacob ohayhuetereive chupe umi ótro itaʼýragui. ¿Mbaʼéichapa oñeñandu iñermanokuéra upe haguére? Haʼekuéra iñenvidióso ha ndochaʼeiete voi Josére. Sapyʼánte José osoñámi vaʼerã heta kósa iñextráñova chupe ha omombeʼu jepi umíva iñermanokuérape. Haʼekuéra opensa José ontendekaseha chupekuéra algún día oñesũtaha hikuái henondépe. Upévare koʼytevéntema ndochaʼéi hese hikuái.

Peteĩ día José ermanokuéra oho ombopastea itúa ovechakuéra Siquem ypýpe. Jacob omondo Josépe hendapekuéra ohecha hag̃ua oĩ porãpa hína hikuái. Haʼekuéra mombyry guive ohecháma Josépe ha heʼi: “Napépe ou pe soñadór. Jajuka chupe”. Ha og̃uahẽvo hendapekuéra ojagarra chupe hikuái ha opoi chupe peteĩ póso hypa vaʼekuépe. Péro iñermáno Judá osẽ heʼi: “Anína pejuka chupe. Ñavendéntena chupe oiko hag̃ua chugui esklávo”. Ha ojapo hikuái upéva, 20 monéda de plátare ovende hikuái iñermánope umi komersiánte madianita ohóvape hína Egíptope.

Upéi iñermanokuéra ojagarra José ao, omonamba hese peteĩ kavara ruguykue ha orahaka itúape ha heʼika chupe: “¿Kóva piko ndahaʼéi nde raʼy mbaʼe?”. Ohechávo la itaʼýra aokue, Jacob opensa oiméne hague peteĩ animál salváhe ojuka raʼe chupe. Haʼe ombyasyeterei upéva ha ndaipóri okonsola vaʼerã chupe.

Og̃uahẽ rire Egíptope, umi komersiánte ovende Josépe peteĩ ofisiál héravape Potifar oiko hag̃ua chugui ijesklávo. Péro Jehová arakaʼeve ndohejái Josépe. Potifar ohechakuaa vaʼekue José rehe iguapoitereiha ha ikatuha okonfia hese. Upévare, tiémpo riremínte omoĩmbaite ikárgope opa mbaʼe orekóva.

Potifar rembireko ohecha vaʼekue José iporã ha ifísiko porãha ha káda día omboliga chupe oñeno hag̃ua hendive. ¿Mbaʼépa ojapo José? Haʼe nopenái hese ha heʼi chupe: “No, upéva naiporãi. Che patrón okonfia cherehe, ha ndéngo hembireko. Añenóramo nendive apekáta Ñandejára renondépe”.

Peteĩ día Potifar rembireko ojagarra Josépe ijaógui ha oitira chupe ha heʼi: “¡Ejúna eñeno chendive!”, péro José ojetyvyro chugui ha odipara. Upéi, Potifar og̃uahẽ rire, hembireko ijapu chupe ha heʼi José oviolase hague chupe. Potifar ipochyeterei ha omondo Josépe kárselpe. Péro Jehová ndahesaráiri Joségui.

José oĩ aja kárselpe, pe faraón haʼéva hína rréi de Egipto, osoña heta mbaʼe ha avavénte ndaikatúi vaʼekue oexplika chupe mbaʼépa osignifika umi mbaʼe osoñáva. Upéi peteĩ isirviénte osẽ heʼi faraónpe José ikatuha omombeʼu chupe mbaʼépa osignifika umíva. Upévare faraón pyaʼe porã omondo isirvientekuérape ogueru hag̃ua Josépe.

Pe faraón oporandu Josépe: “¿Nde piko ikatu remombeʼu chéve mbaʼépa osignifika umi mbaʼe asoña vaʼekue?”. José heʼi chupe: “Umi 7 áño oúvape Egíptope oĩta hetaiterei hiʼupy, péro upéi 7 áñore oikóta peteĩ ñembyahýi guasu. Upévare eheka vaʼerã peteĩ kuimbaʼe ivale ha iñarandúva oñenkarga vaʼerã ombyaty hag̃ua umi hiʼupy, péicha avave nomanomoʼãi ñembyahýigui”. Pe faraón heʼi Josépe: “Che roiporavo ndéve ha aheja nde kárgope. Che añoite amanda guasuvéta ndehegui Egíptope”. ¿Mbaʼéichapa José oikuaa kuri mbaʼépa osignifika umi mbaʼe faraón osoña vaʼekue? Pórke Jehová oipytyvõ chupe oikuaa hag̃ua upéva.

Siete áñore pe yvy oprodusi porãiterei ha José ombyaty heta hiʼupy. Upéi, haʼe heʼi hagueichaite ou peteĩ ñembyahýi guasu oparupiete ko yvy ape ári. Upéicha rupi umi hénte oparupigua ou José rendápe ojogua hag̃ua hiʼupy. José túa, Jacob, oikuaávo Egíptope oĩha hiʼupy, omondo 10 itaʼýrape ojogua hag̃ua upégui.

Jacob raʼykuéra oho José rendápe ha José ensegída voi orrekonose iñermanokuérape. Péro iñermanokuéra norrekonoséi chupe ha oñesũ José renondépe haʼe osoña haguéicha imitãvépe. José oikuaase iñermanokuérapa osegi gueteri ndochaʼéi hese, upévare heʼi chupekuéra: “¡Peẽ ningo espía! ¡Peẽ peju hína pehecha hag̃ua mbaʼépepa ikangy la ore país!”. Ha haʼekuéra heʼi chupe: “¡Nahániri! Ore roiko Canaánpe, ha roime éntre 12 ermáno. Pe ore ermáno imitãvéva oime opyta ore túandi ógape ha pe ótro ore ermáno katu omanóma”. José heʼi chupekuéra: “Tapeho pegueru pene ermáno imitãvéva ha agueroviáta siertoha la pejéva”. Upémarõ haʼekuéra oho jey itúa rendápe hógape.

Jacob rogayguakuéragui opa jey la hiʼupy, upévare haʼe omondo jey itaʼyrakuérape Egíptope. Péro ko vuéltape haʼekuéra oraháma hendive iñermáno pahague Benjamínpe. José oikuaase kuri iñermanokuérapa okambiáma, upévare omokañy ikópa de pláta Benjamín vosápe ha omboja hese omondase hague chugui. Iñermanokuéra ni ndoroviaséi José sirvientekuéra otopaha upe kópa Benjamín vosápe. Haʼekuéra ojerure asy Josépe okastiga hag̃ua chupekuéra, péro opoínte hag̃ua Benjamíngui.

Upépe José ohechakuaa iñermanokuéra okambiáma hague. Upéi ndojejokovéi ha oñepyrũ hasẽ ha heʼi: “Che ningo José, ¿oikove gueteri piko che túa?”. Iñermanokuéra tuichaiterei oñemondýi ha ndoikuaái mbaʼépa heʼíta, upémarõ José heʼi chupekuéra: “Ani peñeñandu vai la pejapo vaʼekuére cherehe, pórke Ñandejára voi chembou vaʼekue koʼápe ikatu hag̃uáicha poipytyvõ ha posalva. Tapeho katu pyaʼe porã pegueru che túape”.

José ermanokuéra oho omombeʼu itúape pe notísia porãite ha ogueraha chupe Egíptope. Péicha heta tiémpo rire, José ha itúa ojuecha jey sapyʼa.