Salomón oñepyrũrõ guare ogoverna Israélpe, Jehová heʼi chupe: “Ejerure chéve la reipotáva ha ameʼẽta ndéve”. Ha Salomón heʼi chupe: “Che ningo chemitã ha ndaikuaái gueteri heta mbaʼe. Upévare chepytyvõmína chearandu hag̃ua agoverna porã hag̃ua nde puévlope”. Jehová heʼi chupe: “Ameʼẽta ndéve pe rejeruréva, ha ndahaʼéi upévante, nde haʼéta pe kuimbaʼe iñaranduvéva ko yvy ape ári. Avei nderríkota ha reikove aréta neñeʼẽrendúramo chéve”.

Salomón oñepyrũ omopuʼã pe témplo ha upearã oipuru umi óro, pláta, yvyra ha ita iporãvéva. Hetaiterei kuimbaʼe ha kuña ikatupyrýva oipytyvõ oñemopuʼã hag̃ua pe témplo, ha 7 áñope otermina hikuái. Upéi og̃uahẽ pe día odedika hag̃ua hikuái pe témplo Jehovápe, ha oprepara hikuái peteĩ ofrénda pe altár ári. Upéi Salomón oñesũ pe altár renondépe ha oñemboʼe Jehovápe: “Jehová, nde ningo remerese peteĩ témplo tuichavéva ha iporãvéva kóvagui, upéicharõ jepe, ehendumína ore ñemboʼe ha easepta ore adorasión”. ¿Mbaʼépa nde ere? ¿Ogustápa Jehovápe pe témplo ojejapo vaʼekue? ¿Ohendúpa Jehová Salomón orasión? Salomón oñemboʼepa riremínte, ou peteĩ tatarendy yvágagui ha ohapypaite pe ofrénda oĩ vaʼekue pe altár ári. Péicha Jehová ohechauka ogustaha chupe pe témplo ojapo vaʼekue hikuái, ha umi israelita ovyʼaiterei ohechávo upéva.

Salomón iñarandu ha ifamosoiterei vaʼekue. Israélpe ha umi tetã mombyryvehápe jepe ojekuaa vaʼekue chupe. Umi hénte ohómi hendápe osolusiona hag̃ua chupekuéra umi provléma orekóva. Pe rréina de Seba jepe oho vaʼekue oporandu chupe umi mbaʼe ijetuʼuvéva ohecha hag̃ua siértopa la Salomón iñaranduete. Ha ohendu rire Salomónpe, haʼe heʼi: “Che ndagueroviái kuri umi mbaʼe ojeʼéva chéve nderehe, péro koʼág̃a ahechakuaa nearanduveha katu pe ojeʼe vaʼekuégui chéve. Ojekuaa Jehová nevendesiha”. Israélpe ningo umi hénte oiko porã ha ovyʼa vaʼekue. Péro upéi tuichaiterei ou okambia la situasión.

Salomón oadora aja entéro Jehovápe, ojeiko vaʼekue pyʼaguapýpe Israélpe. Péro upéi haʼe ou kuri omenda heta kuña extranhéra oadorávare umi dios fálso raʼanga. Upéicha rupi mbeguekatúpe Salomón oñepyrũma avei oadora umi taʼanga. Jehová ipochyeterei upévare ha heʼi chupe: “Aipeʼáta ne familiarégui pe goviérno, ha adividíta mokõi hendápe, pe goviérno tuichavéva ameʼẽtã peteĩva umi ne sirviéntepe ha ne familiarépe ameʼẽta pe michĩvéva”.

Upéi Jehová ojapo peteĩ mbaʼe ikatu hag̃uáicha oñentende porã pe heʼi vaʼekue. Peteĩ día, Salomón sirviénte hérava Jeroboán osẽ Jerusaléngui, ha ohokuévo hína otopa tapére proféta Ahíyare. Ko proféta oreko kuri upérõ ijehe peteĩ mánto ha oipeʼa upéva ha omondoro 12 pedásope. Upéi heʼi Jeroboánpe: “Ejagarra 10 pedáso nembaʼerã, pórke Jehová oipeʼáta hína pe goviérno Salomón familiarégui ha odividíta mokõi hendápe. Ha omeʼẽta ndéve 10 trívu regoverna hag̃ua”. Rréi Salomón oikuaávo upe oiko vaʼekue, ojukase Jeroboánpe. Upémarõ Jeroboán oho okañy chugui Egíptope. Tiémpo rire Salomón omano ha itaʼýra Rehoboam ogoverna hendaguépe. Jeroboán oikuaávo Salomón omano hague, ou jey Israélpe openságui ndojepersegimoʼãveimaha chupe.

Upéi umi ansiáno Israelpegua heʼi Rehoboámpe: “Retrata porãramo pe puévlope, haʼekuéra siémpre ifiélta ndéve”. Péro umi iñamigokuéra ijavegua heʼi Rehoboámpe: “Ejopyve vaʼerã pe puévlondi ha emombaʼapo pohyive chupekuéra”. Rehoboam ojapo umi isosiokuéra heʼíva chupe ha otrata vaieterei umi héntepe. Upévare 10 trívu voi opuʼã hese ha omoĩ Jeroboánpe ogoverna hag̃ua chupekuéra, ha umi 10 trívupe oñehenói rréino de Israel. Umi ótro 2 trívupe katu oñehenói rréino de Judá, ha haʼekuéra osegi vaʼekue iñeʼẽrendu rréi Rehoboámpe. Péicha ojedividi vaʼekue umi 12 trívu oĩva Israélpe.

Jeroboán ndoipotái vaʼekue umi 10 trívu oĩva ipoguýpe oho Jerusalénpe oadora hag̃ua Jehovápe. ¿Mbaʼérepa? Pórke upépe ogoverna Rehoboam ha Jeroboán okyhyje umi hénte naiñeʼẽrenduvéirõ g̃uarã chupe ha ohasa jey rréi Rehoboam goviérno poguýpe. Upévare haʼe ojapo mokõi vaka raʼy raʼanga de óro ha heʼi pe puévlope: “Mombyryetereíma ningo opyta peẽme Jerusalén, mehorve ningo pepytánte koʼápe ha peadora koʼã vaka raʼy raʼanga”. Umi hénte ojapo haʼe heʼíva ha hesarái hikuái Jehovágui.