1, 2. ¿Mbaʼépa ohechakuaa umi superintendénte de sirkuíto heta kongregasiónpe?

PETEĨ superintendénte de sirkuíto ovisita peteĩ kongregasión, ha jepiveguáicha oreko peteĩ rreunión umi ansiánondi. Haʼe ohechakuaa koʼã ermáno ombaʼapo memeha ikongregasiónpe, ha oguerohoryeterei chupekuéra upévare. Hiʼarive ijapytepekuéra oĩ umi ansiáno ijedámava. Péro oĩ peteĩ mbaʼe oipyʼapýva pe superintendéntepe. Pe última visítape omokyreʼỹ kuri umi ansiánope odedika hag̃ua tiémpo ikatu hag̃uáicha ontrena térã ombokatupyry umi ermánope. Upévare, omohuʼã mbotaitévo pe rreunión, oporandu chupekuéra: “¿Mbaʼépa pejapo raʼe peipytyvõ hag̃ua umi kuimbaʼépe ikatu hag̃uáicha ohupyty priviléhio kongregasiónpe?”. Peteĩ ansiáno heʼi: “Ha mbaʼeveguasu ningo ndorojapói”. Ha umi ótro ansiáno orrekonose avei upeichaha.

² ¿Mbaʼépa rerrespondéta oñeporandúramo ndéve avei upéva peteĩ rreunión de ansiánope? Ikatu hína rehechakuaa tekotevẽha avei reipytyvõve umi ermánope. Koʼág̃arupi heta superintendénte ohechakuaa heta ansiáno ndodedikaguasuiha tiémpo ombokatupyry hag̃ua umi ermánope, tahaʼe imitãva térã ijedávape, ikatu hag̃uáicha oñangareko avei pe kongregasiónre. Jahechamína mbaʼérepa oiko upéva.

3. a) ¿Mbaʼe téxtopa ohechauka iñimportanteha ansianokuéra ombokatupyry umi ermánope? b) ¿Mbaʼérepa opavavépe ñaneinteresa vaʼerã ko téma? (Ehecha pe nóta.) c) ¿Mbaʼérepa heta ansiánope ijetuʼu jepi ombokatupyry hag̃ua ótrope?

³ Oimérõ nde peteĩ ansiáno, katuete reikuaa iñimportantetereiha rembokatupyry ótrope.a Avei reikuaa porã oñekotevẽtereiha ermáno ikatúva oipytyvõ kongregasiónpe koʼág̃ama voi, ha koʼýte oĩve vove kongregasión pyahu (elee Isaías 60:22). La Biblia heʼi voi ansianokuéra ‘omboʼe vaʼerãha ótrope’ (elee 2 Timoteo 2:2). Upéicharõ jepe, ikatu oime ijetuʼu ndéve reñemotiémpo rejapo hag̃ua upéva. ¿Mbaʼérepa? Pórke reñangareko vaʼerã ne famíliare ha rembaʼapo vaʼerã remantene hag̃ua chupekuéra. Hiʼarive rereko heta rresponsavilida kongregasiónpe ha oñepresenta jepi avei provléma tekotevẽva pyaʼe reñatende. Péro iñimportanteterei ningo reñemotiémpo rembokatupyry hag̃ua ótrope. Jahechamína mbaʼérepa.

KOʼÁG̃AMA REMBOKATUPYRY VAʼERÃ ÓTROPE

4. ¿Mbaʼérepa oĩ ansiáno ndodedikaguasúiva tiémpo oipytyvõ hag̃ua ótrope?

⁴ ¿Mbaʼérepa heta ansiánope ijetuʼu ojuhu hag̃ua tiémpo ikatu hag̃uáicha ombokatupyry ótro ermánope kongregasiónpe? Ikatu oime opensa: “Che aikuaa iñimportanteha ajapo upéva, péro areko heta rresponsavilida kongregasiónpe ha ndaikatúi ambotapykue umíva. Nombyaimoʼãi ningo kongregasiónpe ahaʼarõmie haguére ambokatupyry hag̃ua ótrope”. Péro, ¿siértopa upéva? Añetehápe ningo oñepresenta jepi umi situasión tekotevẽva pyaʼe oñeñatende, péro nereñehaʼãiramo koʼág̃ama voi rembokatupyry hag̃ua umi ermánope, ikatu hína tuichaiterei reperhudika kongregasiónpe.

5, 6. a) ¿Mbaʼépa ikatu oiko nde veíkulore nderejapóiramo chupe kámbio de aséite? b) ¿Mbaʼépa ikatu oiko umi ansiáno nombokatupyrýiramo umi ótro ermánope?

⁵ Epensamína ko ehémplore. ¿Mbaʼépa iñimportanteve peteĩ veíkulo siémpre oiko porã hag̃ua? ¿Tekotevẽpa jakargánte pype kombustívle, térãpa jajapo vaʼerã avei chupe pe kámbio de aséite? Ikatu repensa iñimportanteveha rekarga pe kombustívle, pórke upevaʼỹre ndohomoʼãi moõve. Péro nderejapóiramo chupe pe kámbio de aséite, tárde o tempráno oñembyaíta hína pe motór. Ha amo ipahápe hetave reikóta remyatyrõka hag̃ua ha hetaiteve regastáta. ¿Mbaʼépa ikatu ñaaprende ko ehémplogui?

⁶ ¿Iñimportantevépa ñamotenonde umi rresponsavilida jarekóva kongregasiónpe, térãpa ñambokatupyry umi ermánope? Oĩ ansiáno opensáva iñimportanteveha oñatende umi rresponsavilida orekóvare, pórke nokumplíriramo umíva ikatuha operhudika pe kongregasión. Ha añetehápe la Biblia heʼi voi tekotevẽha ñañatende jahechakuaa hag̃ua ñamotenondépa hína “umi mbaʼe iñimportantevéva” (Filip. 1:10). Péro umi ansiáno noñemotiémpoiramo oipytyvõ hag̃ua ótrope, tárde o tempráno ofaltapáta umi ermáno ikatupyrýva oñatende vaʼerã kongregasiónre.

7. ¿Mbaʼépa repensa umi ansiáno odedikávare tiémpo ombokatupyry hag̃ua umi kuimbaʼépe?

⁷ Aníkena repensa naiñimportanteguasuiha térã ndaiporiha apúro reipytyvõ hag̃ua umi ermánope ohupyty hag̃ua priviléhio. Umi ansiáno opensáva pe kongregasiónre, ohechakuaa koʼẽrõite oñekotevẽtaha ermáno ikatupyrývare, ha upévare oñemotiémpo oipytyvõ hag̃ua umi kuimbaʼépe. Péicha ohechauka hikuái okumpli porãha hembiapo, ha tuichaiterei oipytyvõ kongregasiónpe (elee 1 Pedro 4:10). ¿Mbaʼérepa ou porãta kongregasiónpe ansianokuéra ombokatupyrýramo umi ermánope?

ANÍKENA REPERDE TIÉMPO

8. a) ¿Mbaʼérepa tekotevẽ ansianokuéra ombokatupyry umi ótro ermánope? b) ¿Mbaʼe rresponsavilidápa oreko umi ansiáno ohóva oservi umi lugár oñekotevẽvehápe? (Ehecha pe rrekuádro heʼíva “Peteĩ tembiapo koʼág̃ama rejapo vaʼerã”.)

⁸ ¿Mbaʼérepa tekotevẽ umi ansiáno ombokatupyry umi ótro ermánope? Umi ansiáno iñexperiensiavéva ohechakuaa vaʼerã ijedavévo ohóvo, ndaikatumoʼãveimaha ojapo heta mbaʼe koʼag̃aguáicha (Miq. 6:8). Haʼekuéra orrekonose vaʼerã peichaháguinte ikatuha oñepresenta peteĩ provléma, ha ndaikatuvéi okumpli irresponsavilida (Ecl. 9:11, 12; Sant. 4:13, 14). Avei umi ansiáno ohayhueterei umi ermáno ikongregasionguápe, ha upévare oñehaʼãmbaite omboʼe ótrope umi mbaʼe haʼekuéra oaprendéma vaʼekue (elee Salmo 71:17, 18).

9. ¿Arakaʼépa ñaikotevẽvéta umi ermáno ikatupyrývare?

⁹ Umi ansiáno oñehaʼãva ombokatupyry ótrope, tuichaiterei oipytyvõ omombareteve hag̃ua pe kongregasión. ¿Mbaʼérepa? Pórke péicha oĩta hetave ermáno ikatupyrýva oipytyvõtava pe kongregasión oĩ hag̃ua unída ha oservi porã hag̃ua Jehovápe koʼã ára pahápe. Ha upéva koʼýte oñekotevẽvéta og̃uahẽ vove pe jehasa asy guasu (Ezeq. 38:10-12; Miq. 5:5, 6). Upévare ansianokuéra, oiméramo ndapededikái hína tiémpo peipytyvõ hag̃ua umi ermánope ohupyty hag̃ua priviléhio, pejapóma vaʼerã upéva koʼág̃a guive.

10. ¿Mbaʼépa tekotevẽta ojapo ansianokuéra ikatu hag̃uáicha itiémpo ombokatupyry hag̃ua ótrope?

¹⁰ Oime vaʼerã heta rembaʼapo kongregasiónpe ikatu hag̃uáicha rekumplipa umi ne rresponsavilida. Upéicharõ jepe, reipeʼaʼimímante vaʼerã tiémpo umívagui ikatu hag̃uáicha reipytyvõ ótrope ohupyty hag̃ua priviléhio (Ecl. 3:1). Rejapóramo upéicha, rehechauka hína ndereperdeiha tiémpo, ha umi ermáno rembokatupyrýva tuichaiterei oipytyvõta kongregasiónpe upe rire.

EPREPARA RAẼ PE YVY

11. a) ¿Mbaʼépa ohechauka umi suherénsia omeʼẽ vaʼekue heta ansiáno de diferénte país? b) Heʼiháicha Proverbios 15:22, ¿mbaʼérepa iporã jahecha umi suherénsia omeʼẽva umi ótro ansiáno?

¹¹ Ndaʼaréi oñeporandu unos kuánto ansiáno iñexperiénsiavape mbaʼépa ojapo hikuái ombokatupyry hag̃ua umi kuimbaʼépe kongregasiónpe.b Koʼã ansiáno haʼéramo jepe de diferénte país, umi suherénsia omeʼẽva ojojogua lénto, jepe káda ermáno situasión idiferénte. Upéva ohechauka umi konsého vívliko oñemeʼẽva oñembokatupyry hag̃ua umi ermánope, ideprovechoha entéro kongregasión oĩvape ko yvy tuichakuére (1 Cor. 4:17). Upévare, ko artíkulo ha pe ótro oúvape, ñahesaʼỹijóta umi suherénsia omeʼẽ vaʼekue koʼã ansiáno (Prov. 15:22). Jahecháta mbaʼéichapa peteĩ ansiáno ikatu osegi koʼã konsého ombokatupyry hag̃ua umi ermánope.

12. ¿Mbaʼépa ojapo raẽ vaʼerã peteĩ ansiáno ombokatupyryséva ótro ermánope, ha mbaʼérepa?

¹² Ñepyrũrã, pe ansiáno oprepara vaʼerã pe ermáno korasõ, ikatu hag̃uáicha omboʼe chupe. ¿Mbaʼérepa? Jahechamína peteĩ ehémplo. Peteĩ chokokue ningo katuete oprepara raẽ pe yvy oñemitỹ hag̃ua. Upéicharõmante pe semílla heñói ha okakuaa porãta. Upéicha avei peteĩ ansiáno ombokatupyryséva ótro ermánope, primero oprepara raẽ vaʼerã pe ermáno korasõ. Péicha haʼe oĩtama oaprende hag̃uáicha. Ha ¿mbaʼéichapa ikatu oprepara pe ermáno korasõ? Upearã ikatu osegi proféta Samuel ehémplo.

13-15. a) ¿Mbaʼépa Jehová omanda Samuélpe? b) ¿Mbaʼépa ojapo Samuel oprepara hag̃ua Saúlpe oiko mboyve chugui rréi? (Ehecha pe taʼanga oĩva iñepyrũme.) c) ¿Mbaʼérepa iporã umi ansiáno ohecha mbaʼépa Samuel ojapo raʼe oprepara hag̃ua Saúlpe?

¹³ Ojapo tres mil áño rasa, Jehová heʼi hague Samuélpe: “Koʼẽrõ, kóva ko órape, amboúta ne rendápe peteĩ kuimbaʼe Benjamingua ha upéva [reiporavóta] chéve g̃uarã oisãmbyhy hag̃ua che retã Israel” (1 Sam. 9:15, 16). Upépe Samuel ohechakuaa haʼe nomoakãmoʼãveimaha Israélpe, ha Jehová oiporavomaha ótro kuimbaʼépe hekoviarã. Upémarõ Samuel opensa mbaʼépa ikatu ojapo oprepara hag̃ua upe kuimbaʼépe.

¹⁴ Al ótro día Saúl og̃uahẽ oúvo, ha Jehová heʼi Samuélpe: “Kóva hína upe kuimbaʼe añeʼẽ hague ndéve”. Ensegída Samuel ojapo pe opensa vaʼekue: oinvita Saúlpe okaru hag̃ua, omoĩ chupe pe lugár iporãvévape, oservi chupe pe soʼo iporãvéva ha heʼi voi orreserva hague chupe g̃uarã umi mbaʼe porãita. Upéi Samuel oinvita Saúlpe oho hag̃ua hógape ha heta oñemongeta hikuái ohokuévo. Og̃uahẽ rire, ojupi mokõivéva pe terrásape ha osegi oñemongeta pyhare peve. Upe koʼẽme, Samuel omoĩ Saúl akãre aséite ohechauka hag̃ua ojeporavoha chupe rreirã. Upéi ohetũ Saúlpe ha omeʼẽve chupe konsého. Upe rire Saúl oho hógape ha oĩma preparádo okumpli hag̃ua pe oñehaʼarõva chugui (1 Sam. 9:17-27; 10:1).

¹⁵ Añetehápe ningo Samuel onombra kuri Saúlpe ogoverna hag̃ua peteĩ tetã. Koʼág̃a katu umi ansiáno ombokatupyry vaʼerã umi ermánope ikatu hag̃uáicha oiko chuguikuéra ansiáno térã siérvo ministeriál. Idiferénteramo jepe pe kapasitasión omeʼẽva umi ansiáno, haʼekuéra ikatu ohecha mbaʼéichapa Samuel oprepara kuri Saúlpe oiko mboyve chugui rréi. Jahechamína mokõi mbaʼe ikatúva oaprende Samuélgui umi ansiáno.

MOKÕI KUALIDA IÑIMPORTANTETEREÍVA

16. a) ¿Mbaʼéichapa oñeñandu Samuel oikuaárõ guare umi isrraelíta oipotaha irreirã? b) ¿Mbaʼépa ojapo Samuel Jehová omandárõ guare chupe onombra hag̃ua Saúlpe rreirã?

¹⁶ Reime vaʼerã dispuésto rembokatupyry hag̃ua ótrope, ha rejapo vaʼerã nde pyʼaite guive. Samuel oikuaárõ guare umi isrraelíta oipotaha peteĩ rréi ogoverna vaʼerã chupekuéra, ñepyrũrã oñembyasy ha oñandu oñemboykeha chupe (1 Sam. 8:4-8). Samuel nomoĩséi kuri chupekuéra peteĩ rréi, upéicha rupi Jehová tres vése voi heʼi chupe ohendu hag̃ua pe puévlope (1 Sam. 8:7, 9, 22). Péro haʼe ndaiselósoi ni ndaipochýi pe kuimbaʼe opytátavandi hekovia. Upévare, Jehová heʼírõ guare chupe onombra hag̃ua Saúlpe rreirã, haʼe iñeʼẽrendu ipyʼaite guive. Samuel ojapo Ñandejára omandáva chupe, ndahaʼéi por ovligasión, síno ohayhúgui chupe.

17. a) ¿Mbaʼéichapa heta ansiáno osegi Samuel ehémplo? b) ¿Mbaʼéichapa oñeñandu koʼã ansiáno?

¹⁷ Koʼág̃arupi heta ansiáno iñexperiénsiava osegi Samuel ehémplo ha mborayhúpe oipytyvõ umi ermánope ikatu hag̃uáicha ohupyty priviléhio kongregasiónpe (1 Ped. 5:2). Haʼekuéra ndokyhyjéi omeʼẽ hag̃ua rresponsavilida umi ermánope, pórke nahakateʼỹi umi priviléhiore. Avei ohecha hikuái mbaʼéichapa ideprovécho kongregasiónpe umi ermáno oñembokatupyrýva ohóvo (2 Cor. 1:24; Heb. 13:16). Hiʼarive, ansianokuéra oguerohory ohechávo umi ermáno oipuruha ikapasida oipytyvõ hag̃ua kongregasiónpe (Hech. 20:35).

18, 19. a) ¿Mbaʼéichapa ansianokuéra ikatu oprepara umi ermánope ombokatupyry mboyve chupekuéra? b) ¿Mbaʼérepa iñimportánte upéva?

¹⁸ Ani remboʼénte pe ermánope, síno reñemoamígo vaʼerã hese. Samuel ohecha ypýrõ guare Saúlpe, ikatu kuri omoĩntema iñakãre aséite onombra hag̃ua chupe. Ojapórire upéicha, oikótante avei Saúlgui rréi, péro noĩmoʼãi kuri preparádo. Upévare Samuel odedika tiémpo ikatu hag̃uáicha oprepara raẽ ko kuimbaʼépe. ¿Mbaʼéichapa ojapo raʼe upéva? Onombra mboyve Saúlpe rreirã, oinvita chupe okaru hag̃ua, ohasa tiémpo hendive ha heta oñemongeta hikuái. Jahechaháicha, Samuel oprepara porã raẽ Saúlpe onombra mboyve chupe rréi.

¹⁹ Nde avei rejapo vaʼerã upéicha. Rembokatupyry mboyve peteĩ ermánope, tekotevẽ reñemoamígo hese. Upéicha haʼe oñeñandu porãta ha notĩmoʼãi ndehegui. Tahaʼe haʼéva pene situasión, térã pende kultúra, ha jepe heta nerembiapo, rededika vaʼerã tiémpo pe ermánope. Péicha haʼe ohechakuaáta reñeinteresaha hese (elee Romanos 12:10). Katuete pe ermáno omombaʼe ha oagradeséta reipytyvõ haguére chupe.

20, 21. a) ¿Mbaʼépa ojapo peteĩ ansiáno okumpli porãva hembiapo? b) ¿Mbaʼépa jahecháta pe artíkulo oúvape?

²⁰ Peteĩ ansiáno okumpli porãva hembiapo oñehaʼã ombokatupyry ótrope ha oapresia voi upe ermánope (embojoja Juan 5:20 heʼívare). Pe ermáno ohecháramo añetehápe reipytyvõseha chupe, ikyreʼỹvéta ha oñehaʼãmbaitéta oprogresa hag̃ua. Upéicharõ ansianokuéra, ikatu hag̃uáicha pembokatupyry umi ermánope, peñemoamígo raẽ vaʼerã hesekuéra (Prov. 17:17; Juan 15:15).

²¹ Reprepara rire peteĩ ermánope, ikatúma reñepyrũ rembokatupyry chupe. ¿Mbaʼéichapa rejapokuaa upéva? Pe artíkulo oúvape jahecháta umi método ikatúva oipuru ansianokuéra ombokatupyry hag̃ua ótrope.

1. a) ¿Mbaʼépa ojapo Jehová siervokuéra ymaite guive? b) ¿Mbaʼérepa ñande avei tekotevẽ ñañembokatupyry koʼág̃arupi? c) ¿Mbaʼépa jahecháta ko artíkulope?

JEHOVÁ siervokuéra oikuaa porã tekotevẽha oñentrena ikatu hag̃uáicha osẽ porã chupekuéra opa mbaʼe. Por ehémplo, Abrahán oraha kuri hendive heta kuimbaʼe oñorairõkuaáva orreskata hag̃ua Lot ha ifamiliakuérape umi iñenemígogui, ha ogana kuri hikuái (Gén. 14:14-16). David tiémpope avei oĩ vaʼekue heta persóna oñensaja meméva opurahéi hag̃ua Jehovápe (1 Crón. 25:7). Jahechaháicha, koʼã persónape osẽ porã pe ojapóva, pórke oñembokatupyry raẽ vaʼekue hikuái. Ñande avei koʼág̃a tekotevẽ ñañembokatupyry. ¿Maʼerãpa? Primero, pórke ñañorairõ vaʼerã Satanás ha imúndo kóntrape (Efes. 6:11-13). Segundo, ñañembokatupyry vaʼerã ñamombaʼeguasu hag̃ua Jehovápe opa mbaʼe jajapóvape (Heb. 13:15, 16). Ñandejára siervokuéra yma guare ojapo haguéicha, ñande avei tekotevẽ ñañentrena osẽ porã hag̃ua ñandéve entéro mbaʼe. Ha Jehová oheja ansianokuéra kárgope ombokatupyry hag̃ua umi ermánope kongregasiónpe (2 Tim. 2:2). Ko artíkulope jahecháta umi método oipurúva heta ansiáno oipytyvõ hag̃ua umi kuimbaʼépe ohupyty hag̃ua priviléhio.

EIPYTYVÕ PE ERMÁNOPE OHAYHUVE HAG̃UA JEHOVÁPE

2. ¿Mbaʼépa ikatu ojapo peteĩ ansiáno ombokatupyrýtava peteĩ ermánope, ha mbaʼérepa?

² Ikatu ñakompara pe ansiánope peteĩ chokokuére. ¿Mbaʼérepa? Pe chokokue oikuaa porã oavona raẽramo pe yvy oñemitỹ hag̃ua, umi kóga heñói ha okakuaa porãveha. Upéicha avei, peteĩ ansiáno ombokatupyrýtava peteĩ ermánope, oprepara raẽ vaʼerã chupe. Upearã ikatu ohesaʼỹijo hendive unos kuánto téxto oipytyvõtava chupe ojapose hag̃ua opa mbaʼe oaprendétava (1 Tim. 4:6).

3. a) ¿Mbaʼéichapa Marcos 12:29, 30 ikatu oipytyvõ pe ansiánope omokyreʼỹ hag̃ua peteĩ ermánope? b) ¿Mbaʼéichapa oñeñandúta pe ermáno ohendúvo pe ansiáno oñemboʼeha hese?

³ Oiméramo nde peteĩ ansiáno, reikuaa vaʼerã mbaʼéichapa pe añetegua opoko pe ermáno korasõre. Reikuaa vaʼerã mbaʼéichapa oñeñandu ha mbaʼépa opensa pe servísio omeʼẽvare Jehovápe. Ikatu reporandu chupe: “¿Mbaʼéichapa reiporu nde rekove reñemeʼẽ guive Jehovápe?”. Ko porandu omeʼẽta ndéve oportunida remokyreʼỹ hag̃ua pe ermánope oservi hag̃ua Jehovápe ipyʼaite guive (elee Marcos 12:29, 30). Ikatu rejapo peteĩ orasión hendive ha ejerure Jehovápe toipytyvõmi pe ermánope ijespíritu sánto rupive okumpli porã hag̃ua umi traváho oñemeʼẽtava chupe. Haʼe ohendúvo reñemboʼeha hese, ikyreʼỹvéta ombaʼapove hag̃ua kongregasiónpe.

4. a) ¿Mbaʼe ehémplopa ikatu oipytyvõ umi ermánope oprogresa hag̃ua? b) ¿Mbaʼépa oñehaʼã vaʼerã ojapo umi ansiáno ombokatupyry jave ótrope?

⁴ Reñepyrũ vove rembokatupyry peteĩ ermánope, emombeʼu chupe umi ehémplo vívliko oipytyvõtava chupe iñumílde ha imbaʼeporã hag̃ua ótrondi, ha avei ohechauka hag̃ua ikatuha ojejerovia hese. Koʼãichagua ehémplo jatopa 1 Reyes 19:19-21, Nehemías 7:2, Nehemías 13:13 ha Hechos 18:24-26-pe. Umi kualida oñemensionáva koʼã téxtope haʼete hína pe avóno oipurúva pe chokokue. Umi téxto oipytyvõta pe ermánope okakuaa térã oprogresa pyaʼeve hag̃ua. Peteĩ ansiáno Franciagua omombeʼu mbaʼépa ojapo jepi ombokatupyry hag̃ua umi kuimbaʼépe. Haʼe heʼi oipytyvõha pe ermánope osegi hag̃ua umi konsého oĩva la Bíbliape odesidíta jave peteĩ mbaʼe. Avei omombeʼu ohekaha oportunida olee hag̃ua pe ermánope peteĩ téxto oipytyvõtava chupe ontende hag̃ua heta mbaʼe “iporãitereíva” oĩva la Bíbliape (Sal. 119:18, NM). ¿Mbaʼéichapa avei umi ansiáno ikatu oipytyvõ peteĩ ermánope ohayhuve hag̃ua Jehovápe?

ERE CHUPE MBAʼÉPA OJAPO VAʼERÃ HA MBAʼÉREPA

5. a) ¿Mbaʼérepa iporã reporandu pe ermánope mbaʼépa ohupytyse Jehová servísiope? b) ¿Mbaʼérepa iñimportánte ansianokuéra ombokatupyry umi ermánope imitã guive? (Ehecha pe nóta.)

⁵ Eporandu pe ermánope mbaʼépa ohupytyse Jehová servísiope. Ha oimérõ ndorekói gueteri peteĩ méta, eipytyvõ chupe odesidi hag̃ua peteĩ mbaʼe ikatútava ohupyty. Nde voi kyreʼỹme remombeʼu vaʼerã chupe mbaʼe métapa remoĩ vaʼekue, ha mbaʼeichaitépa revyʼa kuri rehupyty rire. Koʼã mbaʼe ningo ndahasyiete jajapo hag̃ua, ha katuete omokyreʼỹta pe ermánope. Peteĩ ansiáno Africagua oservíva avei de prekursór, hérava Víctor, omombeʼu mbaʼérepa iñimportánte ñaipytyvõ umi ermánope omoĩ hag̃ua peteĩ méta ikatútava ohupyty Jehová servísiope. Haʼe heʼi yma imitãrõ guare, peteĩ ansiáno oporandu hague chupe mbaʼe mbaʼépa ohupytyse tuichave vove. Upéva tuicha oipytyvõ chupe odesidi hag̃ua oservi Jehovápe ipyʼaite guive. Heta ansiáno iñexperiénsiava heʼi avei iñimportanteha oñentrena umi ermánope imitã guive, por ehémplo orekópe 13 térã 14 áño. Umívape ikatu oñemeʼẽ hembiaporã kongregasiónpe umi ikatu vaʼerãichagua okumpli a según ijeda. ¿Mbaʼérepa iñimportánte oñembokatupyry umi ermánope imitã guive? Pórke upéva oipytyvõta chupekuéra oñehaʼãmbaite hag̃ua ohupyty umi méta omoĩ vaʼekue Jehová servísiope, jepe okakuaa ohóvo ha oĩ heta mbaʼe odistraeséva chupekuéra (elee Salmo 71:5, 17).a

6. ¿Mbaʼépa Jesús ojapo ombokatupyrýrõ guare idisipulokuérape?

⁶ Reipytyvõ hag̃ua peteĩ ermánope oprogresa hag̃ua, ani erénte chupe mbaʼépa ojapo vaʼerã, síno avei mbaʼérepa iñimportánte ojapo upéva. Péicha ojapo vaʼekue Jesús ombokatupyrýrõ guare idisipulokuérape opredika hag̃ua. Haʼe omanda chupekuéra upe tembiapo, péro avei omombeʼu mbaʼérepa tekotevẽ ojejapo. Jesús heʼi kuri: “Opa mbaʼe oĩva yvágape ha yvy ape ári oñemoĩ che poguýpe. Upévare, tapeho pemboʼe umi hénte opa tetãyguápe oiko hag̃ua chuguikuéra che disípulo” (Mat. 28:18, 19). ¿Mbaʼéichapa nde ikatu resegi Jesús ehémplo?

7, 8. a) ¿Mbaʼéichapa umi ansiáno ikatu osegi Jesús ehémplo? b) ¿Mbaʼérepa iñimportánte refelisita pe ermánope? c) ¿Mbaʼe mbaʼépa ikatu ojapo umi ansiáno ombokatupyry hag̃ua ótrope? (Ehecha pe rrekuádro “Rembokatupyry hag̃ua umi ermánope”.)

⁷ Rejerure vove peteĩ ermánope ojapo hag̃ua peteĩ traváho, ehechauka chupe la Biblia rupive mbaʼérepa iñimportánte upe tembiapo. Péicha remboʼéta hína chupe okumpli hag̃ua itraváho la Biblia voi ohechaukágui iñimportanteha ojapo upéva, ha ndahaʼéi peteĩ ansiáno heʼi haguérente chupe. Por ehémplo, renkargátaramo peteĩ ermánope omopotĩ ha omokã hag̃ua jepi pe Salón entráda, ikatu relee chupe Tito 2:10 heʼíva. Upéicha pe ermáno ohechakuaáta iñimportanteha okumpli upe traváho ikatu hag̃uáicha umi persóna og̃uahẽva Salón del Réinope oñeʼẽ porã ñanderehe ha oguerohory “Ñandejára omboʼéva”. Ikatu avei ere chupe umi ermáno ijedáva ikatuha ojapeligra pe entráda hykuepáramo ha upévare iñimportanteha avei ojapo upe traváho. Péicha reñeʼẽramo pe ermánope, haʼe opensáta mbaʼéichapa pe itraváho ovenefisia ótrope, ha ndojapomoʼãi okumpli hag̃uánte. Avei katuete ovyʼáta ikatu haguére oipytyvõ ótrope.

⁸ Efelisitákena pe ermánope osegi jave umi konsého remeʼẽva chupe. ¿Mbaʼérepa iñimportánte rejapo upéva? Pórke péicha remokyreʼỹ ha reipytyvõta hína chupe oprogresa hag̃ua, haʼetéta ku plánta ojerrega porãva. Refelisitáramo pe ermánope, katuete ojapo porãitereíta hese (embojoja Mateo 3:17 heʼívare).

PETEĨ PROVLÉMA OÑEPRESENTÁVA JEPI

9. a) ¿Mbaʼe provlémapa oñepresenta jepi heta tetãme? b) ¿Mbaʼérepa Jehová servísio naiñimportanteguasúi heta mitãrusúpe g̃uarã?

⁹ Heta tetãme ijetuʼu jepi umi ansiánope omokyreʼỹ hag̃ua umi ermáno orekóvape éntre 20 a 30 áño ombaʼapove hag̃ua kongregasiónpe. Ndaʼareguasúi, 20 paíspe oñeporandu unos kuánto ansiánope mbaʼérepa oĩ upe provléma. Ha enterove lénto heʼi umi tuvakuéra voi nomokyreʼỹi hague ifamíliape imitã guive ombaʼapove hag̃ua Jehová servísiope. Ha oĩramo jepe umi imitã reheve oservi porãseve vaʼekue Jehovápe, ituvakuéra omboliga chupekuéra osegi hag̃ua umi estúdio ipukúva ikatu hag̃uáicha ogana porã upe rire. Péicha rupi, umi mbaʼe ojejapóva Jehová servísiope naiñimportanteguasúi chupekuéra g̃uarã (Mat. 10:24).

10, 11. a) ¿Mbaʼéichapa peteĩ ansiáno ikatu saʼi saʼípe oipytyvõ peteĩ ermánope okambia hag̃ua opensa lája? b) ¿Mbaʼe téxtopa ikatu opoko pe ermáno korasõre, ha mbaʼérepa? (Ehecha pe nóta.)

¹⁰ ¿Mbaʼéichapa peteĩ ansiáno ikatu oipytyvõ peteĩ ermáno nombaʼaposeguasúivape kongregasiónpe? Tekotevẽ ningo ipasiénsia ha oñehaʼã meme hese. Ñanemanduʼami jeýna pe chokokuére. ¿Mbaʼépa haʼe ojapo ikarẽramo chugui peteĩ plánta? Omoĩ chupe peteĩ estáka ha mbeguekatúpe oenderesa ohóvo. Upéicha avei, nde ikatu saʼi saʼípe reipytyvõ peteĩ ermánope okambia hag̃ua opensa lája ha ombaʼaposeve hag̃ua kongregasiónpe. ¿Mbaʼéichapa ikatu rejapo upéva?

¹¹ Reñemotiémpo vaʼerã ikatu hag̃uáicha reñemoamígo pe ermánore. Ere chupe pe kongregasión oikotevẽha hese ha elee hendive umi téxto oipytyvõtava chupe opensa hag̃ua mbaʼérepa oñemeʼẽ vaʼekue Jehovápe (Ecl. 5:4; Is. 6:8; Mat. 6:24, 33; Luc 9:57-62; 1 Cor. 15:58; 2 Cor. 5:15; 13:5). Eporandu vaʼerã chupe umi mbaʼe opokótava ikorasõre, por ehémplo: “¿Mbaʼépa repromete raʼe Jehovápe reñemeʼẽrõ guare chupe? ¿Mbaʼéichapa oiméne oñeñandu haʼe rejevautisárõ guare?” (Prov. 27:11). “Ha, ¿mbaʼéichapa oñeñandúne raʼe Satanás?” (1 Ped. 5:8.) Reiporavo porãramo umi téxto releétava pe ermánondi, katuete repokóta ikorasõre ha reipytyvõta chupe ojepyʼamongeta hag̃ua isituasiónre (elee Hebreos 4:12).b

ERMÁNO, EÑEHAʼÃKENA EJAPO OJEʼÉVA NDÉVE

12, 13. a) ¿Mbaʼéichapa Eliseo ohechauka omombaʼeha iservísio? b) ¿Mbaʼéichapa Jehová orrekompensa Eliséope?

¹² Peẽ mitãrusu, pe kongregasión ningo oikotevẽterei penderehe. ¿Mbaʼépa ikatu rejapo reservi porãve hag̃ua Jehovápe? Jahechamína Eliseo ehémplo.

¹³ Ojapo 3.000 áñorupi, pe proféta Elías oinvita hague peteĩ mitãrusúpe, hérava Eliseo, oipytyvõ hag̃ua chupe iservísiope. Eliseo pyaʼe voi oasepta pe invitasión. Haʼe ningo heta oipytyvõ pe profétape, ha ipyʼaite guive ojapo umi traváho mimi omandáva chupe (2 Rey. 3:11). Elías omboʼe Eliséope seis áñore. Upéi, Elías omohuʼã mbotaitévo iservísio Israélpe, heʼi Eliséope natekotevẽveimaha oservi chupe. Péro Eliseo tres vése voi heʼi Elíaspe: “Che ndorohejamoʼãi”. Haʼe oĩ desidído osegitaha omoirũ Elíaspe. Ha Jehová orrekompensa Eliséope upévare, ha opermiti chupe ohecha mbaʼéichapa Elías ojupi yvate “peteĩ yvytu [...] atãme” (2 Rey. 2:1-12).

14. a) ¿Mbaʼéichapa umi mitãrusu ikatu osegi Eliseo ehémplo? b) ¿Mbaʼérepa iñimportánte umi mitãrusu ojapo umi tembiapo oñemeʼẽva chupekuéra?

¹⁴ ¿Mbaʼéichapa ikatu resegi Eliseo ehémplo? Reasepta vaʼerã nde pyʼaite guive oimeraẽ tembiapo oñemeʼẽva ndéve, haʼetéramo jepe naiñimportanteguasúiva. Ani nderesarái pe ansiáno nembokatupyrýva haʼeha ne amígo. Ere chupe remombaʼeha opa mbaʼe ojapóva nemboʼe hag̃ua ha reaprendeseveha chugui. Reñehaʼãmbaite vaʼerã neñeʼẽrendu ha rekumpli umi tembiapo oñemeʼẽva ndéve. ¿Mbaʼérepa iñimportánte upéva? Péicha umi ansiáno ohechakuaáta Jehová oipotaha rerresivi hetave rresponsavilida pe kongregasiónpe (Sal. 101:6; elee 2 Timoteo 2:2).

RERRESPETA VAʼERÃ UMI ANSIÁNOPE

15, 16. a) ¿Mbaʼéichapa Eliseo ohechauka orrespetaha imboʼehárape? (Ehecha pe taʼanga oĩva iñepyrũme.) b) ¿Mbaʼérepa umi ótro proféta okonfia Eliséore?

¹⁵ Eliseo rembiasakue ohechauka avei iñimportanteha rerrespeta umi ansiánope. Peteĩ jey Elías ha Eliseo oho ovisita unos kuánto profétape Jericópe ha upe rire oho hikuái rrío Jordán gotyo. Upépe “Elías oipeʼa ijao joʼaha, oinupã pype pe y, ha pe rrío ojeavri mbytépe”, ha oñeforma peteĩ tape iséko asýva pe y mbytérupi ha mokõivéva okrusa. Oguatávo hikuái ohóvo, Eliseo oñatende porã opa mbaʼe heʼívare chupe Elías. Haʼe núnka nopensái oikuaapamaha opa mbaʼe. Upéi, Jehová oguerahárõ guare Elíaspe yvate “peteĩ yvytu [...] atãme”, Eliseo ou jey pe rrío gotyo. Ojagarra Elías aokue, oinupã pe y ha oñemboʼe Jehovápe. Upépe pe rrío ojeavri jey (2 Rey. 2:8-14).

¹⁶ Oiméne rehechakuaa pe primer milágro Eliseo ojapóva ojoguaha pe último milágro Elías ojapo vaʼekuépe. ¿Mbaʼépa nemboʼe upéva? Añetehápe ningo Eliséope oñemeʼẽma avei autorida oservi hag̃ua kómo proféta. Upéicharõ jepe haʼe nopensái ikatumaha ojapo umi mbaʼe haʼe oipotaháicha, síno ojapo jey Elías omboʼe hagueichaite chupe. Péicha ohechauka orrespetaha imboʼehárape, ha umi ótro proféta okonfia avei Eliseo rehe (2 Rey. 2:15). Eliseo oservi kómo proféta 60 áño pukukue, ha Jehová omeʼẽ chupe podér ojapo hag̃ua hetaiteve milágro Elíasgui. ¿Mbaʼépa ikatu oaprende umi mitãrusu ko ehémplogui?

17. a) ¿Mbaʼéichapa umi mitãrusu ikatu osegi Eliseo ehémplo? b) ¿Mbaʼépa ikatu ohupyty umi mitãrusu ohasávo pe tiémpo?

¹⁷ Oñemeʼẽvéramo ndéve rresponsavilida kongregasiónpe, ani repensa ikatumaha rekambia ojejapo lája heta mbaʼe. Nemanduʼákena ikatutaha rejapo kámbio pe kongregasión oikotevẽramo añoite, térã Jehová organisasión heʼíramo ojejapo vaʼerãha. Aníkena rekambiase mbaʼeve rejaposégui reínte. Nemanduʼa vaʼerã Eliseo ohechauka hague orrespetaha imboʼehára Elíaspe, osegi rupi ojapo opa mbaʼe haʼe omboʼe haguéicha chupe. Upéicha rupi umi ótro proféta okonfia Eliséore. Nde avei reñehaʼãramo resegi umi instruksión omeʼẽ vaʼekue ndéve umi ansiáno nembokatupyry vaʼekue, rehechaukáta rerrespetaha chupekuéra, ha umi ótro ermáno okonfiáta avei nderehe (elee 1 Corintios 4:17). Ág̃a neexperiensiave vove, ikatútama rejapo umi kámbio oúva Jehová organisasióngui ikatu hag̃uáicha pe kongregasión oho tenonde gotyo. Ohasávo pe tiémpo, rehecháta Jehová nepytyvõha Eliséope oipytyvõ haguéicha. Ha ikatu voi hína rejapo hetave mbaʼe umi ansiáno nemboʼe vaʼekuégui (Juan 14:12).

18. ¿Mbaʼérepa tekotevẽterei koʼág̃a oñembokatupyry umi ermánope entéro kongregasiónpe?

¹⁸ Hiʼãite ningo oréve umi konsého oñemeʼẽva koʼã mokõi artíkulope omokyreʼỹ umi ansiánope odedikave hag̃ua tiémpo ombokatupyry hag̃ua umi ermánope. Roipota avei ko artíkulo omokyreʼỹ entéro kuimbaʼépe ombaʼapove hag̃ua kongregasiónpe. Péicha katuete imbaretevéta umi kongregasión oĩva ko múndo tuichakuére, ha avei ñanepytyvõta káda únope jasegi hag̃ua jaservi Jehovápe ñande pyʼaite guive, koʼýte og̃uahẽ vove umi mbaʼe iñimportantetéva oikótava koʼẽrõite.