¿Mbaʼérepa ijetuʼuete jaiko hag̃ua trankílo?

“Ko ñane tiémpope pe teknolohía tuichaiterei oavansa, umi sientífiko oikuaa hetaitereive mbaʼe ha hetaiteve pláta oĩ [...]. Upéicharõ jepe amás día la situasión ivaipaite koʼág̃a”. (Informe Global de Riesgos 2018 del Foro Económico Mundial).

¿MBAʼÉREPA HETAITE PERSÓNA OJEPYʼAPY HENONDERÃRE HA LA OIKÓTAVARE ÑANE PLANÉTAGUI? JAHECHAMÍNA UNOS KUÁNTO SITUASIÓN OKEVRANTÁVA LA HÉNTEPE.

• 

  UMI PELÍGRO OĨVA INTERNÉTPE: Peteĩ diário hérava The Australian heʼi: “Koʼág̃arupi ipeligrosoiterei jaipuru pe Internet. Upépe henyhẽte umi oavusáva mitãre, umi oporoakosáva, oĩ umi omondóva mensáhe omoingo vaipa hag̃ua la héntepe ha avei oĩ umi estafadór. Hetaiterei avei oĩ omondáva ótrogui iñidentida ojapo hag̃ua ivaíva. [...] Umi hénte oaprovecha Internet ohechauka hag̃ua mbaʼeichaitépa ipyʼahatã ha iñaña”.

• 

  HETAITEREIVE OĨ IMBORIAHÚVA: Según peteĩ infórme oguenohẽva pe organisasión Oxfam International ko múndope oĩ 8 persóna irrikoitereíva ha ojekalkula voi ke oñesumárõ la orekóva koʼã 8 persóna, ohupytytaha la mísma kantida umi mbaʼe oguerekóva umi 3 millón 600 mil persóna imboriahuvéva oĩva ko múndope. Ko infórme heʼi avei “la oñemaneha lája pe ekonomía koʼág̃a ndoikoieteha, pórke umi persóna irríkomava voi amás día irrikove ha umi persóna imboriahúva katu amás día imboriahuve”. Upéicha rupi heta oĩ okyhyjéva oúrõ g̃uarã oiko peteĩ sarambi umi hénte opuʼãmba rupi ojuehe.

• 

  GÉRRA HA VIOLÉNSIA: Peteĩ infórme oguenohẽ vaʼekue 2018-pe, pe Agencia de las Naciones Unidas para los Refugiados heʼi: “Koʼág̃arupi hetaitereive oĩ la tekotevẽva oheja hóga. Ojekalkula voi káda dos segundo peteĩ persóna osẽha hína pe lugár oikohágui oiko rupi peteĩ sarambi”. Mas de 68 millón de persónama tekotevẽ kuri oheja hóga oikógui peteĩ gérra térã ojepersegi rupi chupekuéra.

• 

  PE NATURALÉSA OÑEMBYAIPA: Pe Informe Global de Riesgos 2018 heʼi: “Amás día hetaiterei animál ha plánta odesaparese ohóvo. Avei umi mar ha pe áire jarrespiráva káda día oñekontaminave ha upéva ikatu tuichaiterei operhudika la héntepe”. Unos kuánto paíspe ojehecha avei káda día saʼiveha umi vichoʼi ha upéva ningo ipeligrosoiterei, pórke umi vichoʼi oipytyvõ umi plántape omosarambi hag̃ua isemílla.

¿Oĩpa álgo ikatúva jajapo ñakambia hag̃ua umi mbaʼe vaiete oikóva hína? Oĩ opensáva pe edukasión rupive ikatuha ñakambia la situasión. Oiméramo upéva siérto, ¿mbaʼeichagua edukasiónpa hína upéva? Umi artíkulo oúvape ñarrespondéta koʼã porandu.