¿MBAʼÉPA IKATU JAJAPO OJUPIPA JAVE UMI PRÉSIO?

Jaipurukuaa vaʼerã ñande pláta

Ojupipa jave umi présio enterovépe ijetuʼu la situasión. Péro ani epensa ndaikatumoʼãiha ejapo mbaʼevete voi. Katuete ningo oĩta umi mbaʼe ikatúva rejapo omehora hag̃ua la situasión.

MBAʼÉREPA IÑIMPORTÁNTE

Nañañehaʼãiramo jaipuru porã ñande pláta, ikatu hína jareko hetave kevránto ha provléma. Ndahaʼéiramo jepe ñande pláta hetáva, heta mbaʼe oĩ ikatúva jajapo ñamehora hag̃ua ñane situasión.

MBAʼÉPA IKATU JAJAPO

Ani jaikose más ke la ñande posivilida omeʼẽva. Jajapóramo péicha jaikuaa porãvéta mbaʼe rehepa jagasta ha ñanetrankilovéta. Avei ñaiméta preparádo oñepresentáramo algún gásto ñahaʼarõʼỹva.

Jaiko hag̃ua la ñande posivilida omeʼẽháicha, iporãta ñaanota mboýpa ñagana ha mboýpa jagastáta, upéva ñanepytyvõta ani hag̃ua jagastave la ñaganávagui. Péicha jakalkula rire, jajaseguráta jagastaha hína umi mbaʼe añetehápe ñaikotevẽvarente. Upéi ñañehaʼãmbaite ani hag̃ua ñasẽ umi gásto jakalkula vaʼekuégui, ha jajadapta umi présio térã la ñaganáva okambiáramo. Oiméramo ñamendáva, katuete mokõivéva ñaime vaʼerã peteĩ ñeʼẽme ha jadesidi oñondive la oñekotevẽtava.

Etanteamína ko mbaʼe: Jajogua hag̃ua umi mbaʼe ñaikotevẽva ikatu japaga en efektívo jaipuru rangue tarhéta de krédito. Umi ojapóva péicha ohechakuaa ifasilveha chupekuéra omaneha igásto okalkula vaʼekue, ha ndoikéi déudape. Avei ñañemotiémpo vaʼerã jarrevisa hag̃ua umi dokuménto orukáva ñandéve ñane vánko térã ñaanota mboýpa jagasta káda día ha un méspe. Péicha saʼive jaikóta jajepyʼapy, pórke jaikuaáta mboy plátapa jareko káda mes.

Ikatu ningo ijetuʼu hína ñandéve jaiko ñande posivilida omeʼẽháicha, péro tuichaiterei ñanepytyvõta jakalkulámaramo la ñande gásto. Péicha ndajaikomoʼãi avei ñañekevrantaiterei plátare.

‘Jakalkula mboýpa jagastáta’ (Lucas 14:28).

Ñanerakateʼỹkena ñande traváhore. ¿Mbaʼe mbaʼépa ikatu jajapo ani hag̃ua ñañemosẽ ñande travahohágui? Por ehémplo: Ñag̃uahẽ órape. Ñapensa umi ventáha omeʼẽvare ñandéve ñande traváho. Ñanekyreʼỹkena ha ñambaʼapo jejopy. Japororrespeta. Ñakumpli umi rrégla ha ñamehorave umi mbaʼe jajapokuaávape.

Ani jagastapa rei ñande pláta. Ñañeporandumína: “¿Ajepokuaápa agasta heta umi mbaʼe naikotevẽivare térã cheperhudikávare?”. Por ehémplo oĩ persóna omombóva ipláta dróga rapykuéri, oaposta, opita térã hoʼu rasa vevída alkoólika. Koʼã kostúmbre káusare ikatu ñandejagarra mbaʼasy ha japerde ñande traváho.

“Ovyʼa pe persóna oaprendéva arandu [...]. Iporãve ñakonsegi arandu ñakonsegi rangue pláta” (Proverbios 3:13, 14).

Jaaorra oikórõ g̃uarã peteĩ emerhénsia. Ikatúma guive, ñañongatu plataʼimi oñepresentárõ g̃uarã ñandéve gásto térã emerhénsia ñahaʼarõʼỹva. Upe pláta ikatu ñanepytyvõ, ani hag̃ua jajepyʼapyeterei jajúramo ñanderasy ñande térã peteĩ ñane família, ñañemosẽ mbaʼéramo ñande travahohágui, térã oikóramo álgo ñaimoʼãʼỹva.

“Enterovéva ikatu ohasa peteĩ tiémpo ijetuʼúvare, térã ohupyty chupe umi desgrásia ohaʼarõʼỹve jave” (Eclesiastés 9:11).

Konsého jaaorra hag̃ua

Ñandete voi ñañekosina ñande rógape.

Ñasẽ meméramo jaʼu hag̃ua álgo térã jajoguáramo tembiʼu ha vevída ojejapopa pyrémava, ikatu hína jagasta hetave. Péro heta jaaorráta ñañehaʼãramo ha ñañemotiémpo jajapo hag̃ua la jaʼu vaʼerã ñande rógape. Avei ñaimevéta segúro mbaʼeichagua tembiʼúpa jaʼu hína.

Ñañatendékena jajogua hag̃ua umi mbaʼe ñaikotevẽvante.

Ñaanota mbaʼépa la jajoguaséva ha ani ñasẽ upévagui. Ñañehaʼãmbaite ani jajogua la jahechávante.
Jaheka oférta ha jajogua en kantida o al por majór ikatúma guive. Jajaseguránte vaʼerã ñañongatu porã hag̃ua umi prodúkto ikatúva pyaʼe oñembyai.
Ñañehaʼã jajogua umi negósio varatovehágui, iporãma guive la iprodúkto.
Jajoguáramo por Internet ikatu ñanepytyvõ jatopa hag̃ua umi oférta porã térã ani hag̃ua jagasta rasa. Oiméramo pe lugár jaikohápe ikatu jajogua por Internet, ¿ñatanteámavapa jajapo upéva?
Jaheka umi oférta, promosión térã deskuénto. Ñakompara umi présio, tahaʼe mboýpa jagasta elektrisidáre, y ha umi ótra kósare.

Ñapensa porã jajogua mboyve umi mbaʼe ipyahúva.

Umi ofavrikáva selulár ha ótro prodúkto, pyʼỹinte onohẽ umi modélo ipyahuvéva oganave hag̃ua. Upévare iporãta ñapensa ha ñañeporandu: “¿Añetehápe piko aikotevẽ peteĩ ipyahúva? Oimérõ upéicha, ¿koʼag̃aitéma vaʼerã voi piko? ¿Aikotevẽta piko pe modélo osẽ ramovéva voi?”.

Ñamyatyrõ térã jajogua umi prodúkto usádo.

Ñañangareko porãkena ñane elektrodomestikokuérare oiko areve hag̃ua, ha ndahepýiramo, ikatu ñamyatyrõnte oñembyai jave. Ikatu avei jaaorra jajoguáramo heta mbaʼe usádova.

Ñañemitỹ.

¿Ikatúpa ñañemitỹ peteĩ pártepe? Péicha menove jagastáta hiʼupýre ha iporãveha katu, ikatúta jareko álgo ñakambia vaʼerã, ñavende térã ñakomparti hag̃ua ñande rapichakuérandi.

“Umi oplanea porãva la ojapótava, katuete osẽ porã chupekuéra la ojaposéva” (Proverbios 21:5).

“Siémpre che rembirekóndi roñatende mbaʼetekópa hína umi prodúkto rojogua meméva présio. Ha rokuida mboy vésemapa roipuru hína ore tarhéta de krédito” (Miles, Inglaterra).

“Roho mboyve rombaʼejogua che familiakuérandi, roanota peteĩ lístape mbaʼe mbaʼépa tekotevẽta rojogua” (Jeremy, Estados Unidos).

“Ore siémpre rojasegura rorekópa hína rojogua hag̃ua la roipotáva, ha roñongatu plataʼimi oĩramo g̃uarã umi gásto rohaʼarõʼỹva” (Yael, Israel).

“Che rembirekóndi romboʼe ore familiakuérape omyatyrõ hag̃ua la oñembyai vaʼekue, roiko rangue rojogua ipyahúva. Umíva apytépe ore veíkulo ha heta mbaʼe ogapypegua. Roñehaʼã avei ani hag̃ua rojogua umi mbaʼe pyahu osẽ ramovéva” (Jeffrey, Estados Unidos).

“Che ningo saʼive la che gásto añemitỹ rupi ha avei arekógui ryguasu. Inklúso ikatu akomparti la añemitỹ vaʼekue che rapichakuérandi” (Hono, Myanmar).

Peteĩ karai ombyaty hína diferénte verdúra uértagui.