KAPÍTULO 32

¿Mbaʼépa ikatu ajapo ajediverti hag̃ua?

Emarka oimépa verdadéro o fálso.

La Biblia heʼi...

... ivaiha jahuga umi depórte.

□ Verdadéro □ Fálso

... enterove umi pelíkula ha prográma osẽva télepe ivaiha.

□ Verdadéro □ Fálso

... opaichagua váile ivaiha kristianokuérape g̃uarã.

□ Verdadéro □ Fálso

HETA reñehaʼã kuri tóda la semána koléhiope, ha rejapopáma avei ne rembiapo ogapypegua. Péro nemitã rupi reguereko gueteri fuérsa rejapo hag̃ua avei ótra kósa (Proverbios 20:29). Upévare reaprovechase pe fin de semána ikatu hag̃uáicha rejedivertiʼimi.

Oiméne ne kompañerokuéra heʼi la Biblia ndohejaiha voi ni jajediverti, pórke oproivi jajapo hetaiterei mbaʼe. Péro, ¿siérto piko upéva? Ñambohovái hag̃ua ko porandu, jahechami mbaʼépa heʼi la Biblia umi mbaʼe remarka vaʼekuére verdadéro o fálso.

● Ivai jahuga umi depórte.

Fálso. La Biblia heʼi: “Pe ehersísio ojapóva peteĩ persóna omombarete hag̃ua hete, [...] ideprovécho” (1 Timoteo 4:8). Pe palávra griega ojetradusíva “ehersísio” oñeʼẽ umi mbaʼe ojapóvare umi atléta oñentrena hag̃ua. Ha oĩ hetaiterei depórte ikatúva jajapo, por ehémplo jatrota, jaiko visikléta ári, jahuga partído, vólei ha umícha. Koʼã depórte ñanepytyvõ jajapo hag̃ua ehersísio ha jajediverti hag̃ua.

Péro, ¿ikatúpa jaiporavo oimehaichagua depórte? Jahechamína mbaʼépa heʼive kuri apóstol Pablo ko témare. Haʼe heʼi kuri Timotéope: “Pe ehersísio ojapóva peteĩ persóna omombarete hag̃ua hete, saʼimínte ideprovécho. Péro ñandefiélramo Ñandejárape ñande pyʼaite guive ideprovécho entéro mbaʼépe, pórke ñanepytyvõ ñande rekovépe koʼág̃ama voi ha amo gotyove avei”. Koʼã mbaʼe ohechauka ñandéve g̃uarã iñimportanteve vaʼerãha siémpre jajapo umi mbaʼe Ñandejára oguerohorýva. Ha ikatu jareko enkuénta upéva jaiporavóta jave umi depórte jepe. Jahechamína 3 mbaʼe ñanepytyvõtava upearã.

1. ¿Ipeligrósopa pe depórte? Eikuaa porãkena opa mbaʼe pe depórtegui, ha ani rejegia la heʼívarente umi ogustáva chupe upéva. Por ehémplo ikatu repensa koʼã mbaʼére: ¿oĩpa heta añaksidentáva ko depórtepe? ¿Mbaʼéichapa ikatu ajeprotehe? ¿Mbaʼeichagua ekípo de segurida tekotevẽ ojepuru? ¿Tekotevẽpa añentrena raẽ? Añetehápe, opaichagua depórtepe oĩʼimínte voi la pelígro, péro oĩ umi ohasámava la rrája ha haʼete voi umi hénte ndokyhyjéiva oñelastima térã omanórõ g̃uarã.

Ñande rekove haʼe peteĩ rregálo oúva Ñandejáragui. Ha pe léi omeʼẽ vaʼekue umi israelítape heʼi ojekastiga vaʼerãha peteĩ persóna ojukáva hapichápe, oiméramo jepe oiko peteĩ aksidéntepe (Éxodo 21:29; Números 35:22-25). Upévare Ñandejára puévlope g̃uarã iñimportanteterei vaʼekue oñatende porã pe segurida rehe (Deuteronomio 22:8). Koʼág̃arupi ñande avei jareko pe rresponsavilida jahechaukávo jarrespetaha ñande rekove.

2. ¿Mbaʼeichagua persónandi ajeheʼáta? Ndevaléramo peteĩ depórtepe, ne kompañerokuéra ikatu ndejopy reike hag̃ua pe ekípo orekóvape hikuái nde koléhiope, ha ikatu voi ndegusta pe idéa. Marcos heʼi: “Nantendéi mbaʼérepa che tuakuéra ndoipotái aike pe ekípo orekóvape che kompañerokuéra”. Heta mitãrusu ojapo oimeraẽ mbaʼe okonvense hag̃ua ituakuérape omeʼẽ hag̃ua chupekuéra permíso. Péro upéva rangue, iporãvéta erekórõ enkuénta mbaʼépa oikóta repraktikáramo pe depórte. Por ehémplo, umi práktika ojejapo jepi ndahaʼéi jave koléhio óra. Avei, ndevalérõ rehóvo haʼekuéra oipotáta rehasa hetave tiémpo hendivekuéra repraktikave hag̃ua, péro nosẽporãirõ ndéve, lomímonte oipotáta rehasa hetave tiémpo umi práktikape ndevaleve hag̃ua. Ha normálmente umi oĩva peteĩ ekípope ovyʼa oñondive ogana jave, ha osufri oñondive operde jave, upévare oiko chuguikuéra oñoamigoite.

Upévare, eñeporandumína koʼã mbaʼe: “Ahasárõ heta tiémpo che kompañerokuéra ndahaʼéivandi Testígo ha oiko chuguikuéra che amigoite, ¿chepytyvõtapa hikuái añemoag̃uive hag̃ua Jehováre?” (1 Corintios 15:33). “¿Mbaʼépa asakrifikáta hína aimeséguinte pe ekípope?”.

3. ¿Mboy tiémpo ha plátapa aikotevẽta? La Biblia heʼi tekotevẽtereiha jahechakuaa “mbaʼépa hína umi mbaʼe iñimportantevéva” ñandéve g̃uarã (Filipenses 1:10). Resegi hag̃ua upe konsého ikatu repensa koʼã mbaʼére: “¿Tekotevẽtapa aipuru pe tiémpo amboykéma vaʼekue ajapo hag̃ua che taréa térã umi tembiapo kongregasionpegua? ¿Mboýpa tekotevẽta agasta? ¿Arekótapa la pláta upearã?”. Koʼã porandu tuichaiterei nepytyvõta ikatu hag̃uáicha siémpre rehechakuaa mbaʼépa hína pe iñimportantevéva ndéve g̃uarã.

● Entéro pelíkula ha prográma osẽva télepe ivai.

Fálso. La Biblia heʼi kristianokuéra tekotevẽha ‘oñakarama hatã pe iporãvare’ ha ‘orrechasa opaichagua mbaʼe vai’ (1 Tesalonicenses 5:21, 22). Ha upearã natekotevẽi ñamboyke entéro pelíkula ha prográma osẽva télepe.a

Añetehápe, hetápe igústo oho iñamigokuérandi sinehápe. Por ehémplo, Leigh oikóva Sudáfricape heʼi: “Ahechasérõ peteĩ pelíkula, ahenói peteĩ che amígape ha upéi roavisa umi ótrope”. Haʼekuéra ojepokuaa oho sinehápe tardeterei mboyve. Ha opa rire pe pelíkula, ituakuéra oho oraha chupekuéra osena hag̃ua oñondivepa.

Umi pelíkula ha prográma osẽva télepe osegínte peteĩ kostúmbre ymaiterei guaréva: oñemombeʼu umi káso ha istória. Jesús ivaleterei vaʼekue omombeʼu hag̃ua umi istória, ha oipuru umíva og̃uahẽ hag̃ua la hénte korasõme. Por ehémplo, pe istória oñeʼẽva pe samaritano imbaʼeporã vaʼekuére ñanemboʼe japoroporiahuvereko vaʼerãha, ha avei ñanemboʼe heta mbaʼe iñimportantetereíva jareko enkuénta jatrata jave ñande rapichakuérandi (Lucas 10:29-37).

Koʼág̃arupi, umi ojapóva pelíkula avei oñehaʼã jepi omboʼe heta mbaʼe la héntepe umíva rupive. Haʼekuéra oipota umi ohecháva pe pelíkula ontende ha oapoja umi aktórpe, hiʼarive sapyʼánte pe “ivuénova” haʼe peteĩ persóna ojapóva heta mbaʼe vai pórke itaryrýi ha oipota oñembotuicha chupe. Upévare iñimportánte reñatende porã, pórke nderejapóiramo upéva, ikatu hína reju repensa ndaivairiha la ojapóva pe aktór oiméramo jepe hekovai térã ojapo heta mbaʼe operhudikáva ótrope. ¿Mbaʼépa ikatu rejapo ani hag̃ua oiko nderehe upéva?

Reiporavóta jave mbaʼépa rehecháta, reñeporandu vaʼerã: “¿Chepytyvõtapa aiporiahuvereko hag̃ua che rapichakuérape?” (Efesios 4:32). “¿Térãpa chemopensáta iporãha avyʼa oikóramo peteĩ mbaʼe vai ótrore?” (Proverbios 17:5). “¿Chepytyvõtapa ‘ndachaʼéi hag̃ua umi mbaʼe ivaívare’?” (Salmo 97:10). “¿Térãpa añepyrũta aapoja peteĩ iñañávape?” (Salmo 26:4, 5).

Reikuaa hag̃ua mbaʼérepa oñeʼẽ peteĩ pelíkula ikatu rehecha pe propagánda orekóva, ha mbaʼépa heʼi hese umi ohecháma vaʼekue. Péro ani ‘reguerovia ojeʼéva guive’ (Proverbios 14:15). Pórke haʼekuéra normálmente heʼínte mbaʼépa opensa hese. Ha umi propagándape heta vése ndojehechaukái voi umi párte naiporãiva. Claudia heʼi: “Oikoite ikatúramo jahecháma máva mávapa umi aktór prinsipál, pórke ñanepytyvõ avei jaikuaa hag̃ua mbaʼe rehepa oñeʼẽta pe pelíkula”.

Oĩ ermáno ha ermána imitãva ikatúva nepytyvõ reikuaa hag̃ua iporãpa peteĩ pelíkula. Péro nemanduʼákena normálmente haʼekuéra heʼitaha ndéve umi mbaʼe ogustávante chupekuéra. Upévare ikatu reporandu orekópa violénsia, hekovaíva térã espiritísmo. Nde tuakuéra ikatu avei nepytyvõ. Vanesa heʼi: “Che aporandu jepi che tuakuérape mbaʼépa opensa, ha haʼekuéra heʼíramo iporãha pe pelíkula, upéicharõ aha ahecha”.

Ani repensa vyroreiha umi pelíkula térã prográma reiporavóva rehecha hag̃ua, pórke umíva ohechaukáta hína mbaʼépa añetehápe oĩ ne korasõme, ha mbaʼe mbaʼépa añetehápe nde remombaʼe (Lucas 6:45). Umíva ohechaukáta mbaʼeichagua persónapa reipota ne amigorã, mbaʼépa repensa umi iñeʼẽ kyʼávare, ha mbaʼépa añetehápe repensa la Biblia heʼívare umi rrelasión sexuál rehe. Upévare, eiporavo porãkena.

● Opaichagua váile ivai kristianokuérape g̃uarã.

Fálso. Umi israelita ojesalvárõ guare umi egípciogui ha ohasa pe Mar Rojo, Míriam ha heta kuña israelita oñepyrũ ojeroky ofesteha hag̃ua (Éxodo 15:20). Ha Jesús oñeʼẽrõ guare pe taʼýra ofalla vaʼekuére, heʼi oĩ hague ‘músika pu ha ojerokýva’ haʼe oho jeýrõ guare hógape (Lucas 15:25).

Ha upeichaite avei koʼág̃arupi. Hetaiterei lugárpe umi imitãva ha avei umi kakuaa ovyʼa oñembyaty jave oñondive, ha ojeroky jepi upéicha jave. Upéicharõ jepe, tekotevẽ avei ñañatende porã. La Biblia ndeʼíri ivaiha ñañembyaty jahasa porã hag̃ua oñondive, péro si heʼi ivaiha ‘jafarrea itarovávaicha’ (Gálatas 5:19-21). Proféta Isaías heʼi vaʼekue: “Oĩ umi opuʼãva pyharevete hoʼu hag̃ua víno ha osegíva pyharepyte peve, ha tuichaiterei okaʼu hikuái. Cháke umívape oho vaíta. Haʼekuéra ofarrea jave ndofaltái la víno. Oreko hikuái panderéta, fláuta, árpa ha hetave instruménto musikál, péro ndojepyʼamongetái hikuái umi mbaʼe Jehová ojapóvare” (Isaías 5:11, 12).

Umi fiésta ojapóvape hikuái ndofaltái víno ha umi músika naiporãiva. Oñepyrũ voi hikuái pyharevete ha osegi pyharepyte peve ha oiko lájare ojekuaa haʼekuéra opensaha Ñandejára ndoexistiriha. Upévare ndajahecharamói Ñandejára odesidi hague okastiga chupekuéra.

Ha nde reñeinvitárõ reho hag̃ua peteĩ fiésta ojejerokytahápe, ikatu reñeporandu: ¿máva mávapa ohóta? ¿Mbaʼeichagua kristiánopa hína hikuái? ¿Mávapa pe oorganisáva ha okontrolátava upe fiésta? ¿Mbaʼépa heʼíne che tuakuéra ahárõ? ¿Mbaʼeichagua músikapa ojejerokýta? Heta músika ojejapo voi ikatu hag̃uáicha umi hénte oreko umi deséo sexuál. ¿Ndépa repensa koʼãichagua músika nepytyvõtaha ejehekýi hag̃ua ‘oimeraẽ mbaʼe ikatúvagui ndegueraha tekovaípe’? (1 Corintios 6:18).

¿Ha reñeinvitárõ reho hag̃ua diskotékape? Ikatu rejepyʼamongeta Rubén heʼívare, haʼe ohómi vaʼekue umichagua lugárpe ostudia mboyve la Biblia: “Upérupi umi músika ha váile itieʼỹ ha la hénte ohóva upépe oho jepi oheka hag̃ua mávandipa ikatu oreko rrelasión sexuál”. Rubén okambia ostudia rire la Biblia ha heʼi: “Koʼã lugár ndahaʼeiete peteĩ kristiánope g̃uarã”.

¿Mbaʼérepa reñatende porã vaʼerã?

¿Mbaʼéicha javépa ifasilve ojeataka hag̃ua peteĩ soldádope? ¿Oñorairõ aja térã opytuʼu jave? Katuete ifasilvéta opytuʼu aja oĩ rupi trankílo. Upéicha avei, reime rupi alérta nde eskuéla térã nde travahohápe, siémpre reĩ redefende hag̃uáicha nde jerovia ha umi mbaʼe nde reikuaáva oĩ porãha. Péro oĩ hetave pelígro rejediverti aja ne amigokuérandi, pórke péicha jave ikatu nereiméi preparádo reñedefende hag̃ua.

Ikatu oĩ mitãrusu oñembohorýva nderehe resegígui umi konsého bíblico rejedivertíta jave. Ikatu umíva apytépe oĩ mitãrusu ituakuéra haʼéva Testígo, péro ojapo upéva ikonsiénsia iperepáma rupi nopenáigui hese (1 Timoteo 4:2). Ikatu avei heʼi rehasamaha la rrája térã repensaha ndevaleveha chuguikuéra. Péro aníkena upévarente ejapo haʼekuéra oipotáva, upéva rangue eñehaʼã vaʼerã ‘siémpre nekonsiénsia potĩ’ (1 Pedro 3:16).

Ndéve g̃uarã pe iñimportantevéva haʼe vaʼerã Jehová opensáva, ha ne amigokuérape ndogustáirõ repena ne konsiénsiare, ikatu hína oime tekotevẽma rekambia umi amista reguerekóva (Proverbios 13:20). Aníkena nderesarái amo ipahápe nde añoite redefende ha reñangareko vaʼerãha nde jeroviáre, tahaʼe jepe rejediverti jave (Proverbios 4:23).

RETOPAVÉTA INFORMASIÓN VOLÚMEN 1, KAPÍTULO 37-PE

[Nóta]

TÉXTO OĨVA LA BÍBLIAPE

“Nde nemitãva, edisfruta vaʼerã nemitã aja. Revyʼa vaʼerã nde pyʼaite guive upe tiémpope. Esegi pe tape ohechaukáva ndéve ne korasõ, ha eho umi lugár nde resa oipotahápe reho. Péro nemanduʼa vaʼerã Ñandejára ndehusgataha entéro mbaʼe rejapóvare” (Eclesiastés 11:9).

PETEĨ KONSÉHO

Eporandu nde tuakuérape ikatúpa pejapo arréglo ani hag̃ua pehecha téle ha upéva rangue una ves al mes pejapo álgo pekomparti hag̃ua oñondive.

¿REIKUAÁPA RAʼE?

Yma umi israelita oadora hag̃ua Ñandejárape oipuru meme vaʼekue pe músika ha pe váile (Salmo 150:4).

UMI MBAʼE AJAPÓTAVA

¿Mbaʼépa ikatu haʼe che kompañerokuérape cheinvitáramo aike hag̃ua peteĩ ekípo haʼekuéra orekóvape? ․․․․․

¿Mbaʼépa ikatu ajapo apilláramo peteĩ pelíkula ahecháva che amigokuérandi ndahaʼeiha la iporãitereíva? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa umi kristianokuéra ndovaléi opartisipa umi depórte ipeligrósovape?

● ¿Mbaʼépa nepytyvõta reikuaa hag̃ua mbaʼeichagua pelíkulapa ikatu rehecha?

● ¿Mbaʼeichagua váilepa nde ere iporãha peteĩ kristiánope g̃uarã?

[Komentário oĩva páhina 269-pe]

“Chéve ningo chegustaiterei pe váile, péro che tuakuéra chepytyvõ antende hag̃ua upéva ndahaʼeiha pe iñimportantevéva che rekovépe, ha ikonsehokuéra siémpre ideprovécho chéve” (Tina).

[Taʼanga oĩva páhina 268-pe]

Peteĩ soldádope ifasilve ojeataka opytuʼu jave oĩgui trankílo, upéicha avei oĩ hetave pelígro rejediverti aja ne amigokuérandi