Lívro número 61 2 Pedro
Ohai: Pedro
Moõpa ojehai: Babilonia (?)
Arakaʼépa ojehaipa: áño 64 rupi Jesús ou rire
PEDRO ohaírõ guare ikuatiañeʼẽ mokõiha, oikuaáma ojejukapotaitemaha chupe. Upévare omomanduʼaseterei iñermanokuérape tekotevẽha oikuaa porã Ñandejára heʼíva ikyreʼỹ hag̃ua predikasiónpe. Ikatúnepa jaʼe apóstol Pedro ndohairihague ko kuatiañeʼẽ? Nahániri. Ko kárta ningo ohechauka porãiterei máva rembiapokuépa. Ijapohare voi heʼi: “Che Simón Pedro, Jesucristo rembiguái ha apóstol” (2 Ped. 1:1). Heʼi avei: “Kóva niko mokõiháma hína kuatia amondóva peẽme” (3:1). Pedro omombeʼu oĩhague Santiago ha Juan ndive Jesucristo omimbipárõ guare. Haʼe omombaʼeterei upéva, haʼete ku ipirĩmbáva omombeʼúvo pe ohechavaʼekue (1:16-21). Pedro imanduʼa Jesús heʼimahague voi chupe omanotaha (2 Ped. 1:14; Juan 21:18, 19).
2 Upéicharamo jepe oĩ heʼíva ko kuatiañeʼẽ ojehai lája ndojoguaiha 1 Pédrope ha upévare ndahaʼeiha Pedro rembiapokue. Péro ko kárta oñeʼẽ ambue mbaʼére. Avei Pedro ohaivaʼekue ikuatiañeʼẽ peteĩha “Silvano rupi”, ha upévare ikatu Silvano omoĩ ambue hendáicha umi mbaʼe oñemombeʼúva (1 Ped. 5:12). Oĩ avei umi heʼíva ndahaʼeiha Ñandejára Ñeʼẽ “umi Paʼi ymaguare naimanduʼaihaguére hese”. Péro pe Tercer Concilio de Cartago oiko mboyve oĩmavaʼekue heta karai arandu heʼíva 2 Pedro oĩvaʼerãha la Bíbliape.
3 Arakaʼépa ojehai ko kuatiañeʼẽ? Oiméne ojehai áño 64 rupi, Babilóniape térã ijypýpe, ojehaipa riremínte pe kuatiañeʼẽ peteĩha. Péro ndaikatúi ojekuaa porã moõitépa ojehai. Upérõ Pablo kuatiañeʼẽnguéra ojereko meméma kongregasionkuéra rupi ha Pedro oikuaa avei. Haʼe heʼi umíva ouha Ñandejáragui ha ‘Ñandejára Ñeʼẽha’. Pedro ohai ko kuatiañeʼẽ umi ojeroviávape haʼe ojeroviahaguéicha. Koʼãva apytépe umi tapicha orresivivaʼekue ikuatiañeʼẽ peteĩha ha umi haʼe opredikavaʼekuépe. Pe kuatiañeʼẽ peteĩha isarambihaguéicha opárupi, upéicha avei pe mokõiha og̃uahẽ heta henda rupi (2 Ped. 3:15, 16; 1:1; 3:1; 1 Ped. 1:1).
MBAʼÉICHAPA ÑANEPYTYVÕ
8 Enterove jaikuaa porã vaʼerã Ñandejára Ñeʼẽ. Pedro omyesakã heta mbaʼe oikuaáva Evréo Kuatiañeʼẽgui. Haʼe heʼi upéva ojejapohague espíritu sánto rupi: ‘Profetakuéra niko noñeʼẽivaʼekue ijehegui reínte. Nahániri. Ñandejára rérape guei oñeʼẽ, espíritu sánto ohechaukaháicha chupekuéra’. Avei heʼi Ñandejára omoaranduhague Páblope (1:21; 3:15). Tuicha ñanepytyvõta jaikuaa ha jajapóramo la Biblia heʼíva. Upéicha ndajajoguamoʼãi umi oikóvape iñakãrente ha heʼíva: “Ko yvy katu oĩ iñepyrũmby guive guaréicha” (3:4). Avei nañanembotavymoʼãi umi mboʼehára japu kapítulo 2-pe oñeñeʼẽha. Upéva rangue iporãvéta ñahesaʼỹijo heʼíva Pedro ha umi ohaivaʼekue Ñandejára Ñeʼẽ. Koʼã mbaʼe ñanepytyvõta ‘jajerovia añete hag̃ua’, ‘jaikuaa porãvéta Jesucrístope ha jaikuaavéta imborayhu’ (1:12; 3:18).
9 Jaikuaa porãve hag̃ua Ñandejára ha Jesucrístope, ñañehaʼãvaʼerã jajapopaite umi mbaʼe porã Pedro heʼíva kapítulo 1, versíkulo 5-7-pe. Upéi versíkulo 8-pe heʼi: ‘Peẽ perekopáramo koʼã mbaʼe ha péicha peikóramo, ndapeikoreimoʼãi ha Jesucrístope ndapeikuaareimoʼãi’. Ko mbaʼe ñanemokyreʼỹ ñambaʼapo meme hag̃ua Jehovápe g̃uarã koʼã ára ijetuʼúvape (1:2).
10 Iñimportánte ñañehaʼãmbaite jahupyty ‘umi mbaʼe tuichaite ha iporãitéva Ñandejára heʼivaʼekue omeʼẽtaha’. Upévare Pedro heʼi umi ohótava yvágape ojesareko meme hag̃ua Ñandejára Rréinore. Haʼe heʼi: ‘Peñehaʼãkena koʼã mbaʼe pembohapo porã pende pype, ani hag̃ua peʼa arakaʼeve. Upéicharõ Ñandejára oipeʼáta peẽme yvága rokẽ, Jesucristo ñandepeʼáva jejopy vaígui oporosãmbyhyhápe opa ára g̃uarã’. Upéi Pedro heʼi ohechahague Jesús omimbipárõ guare ha upéva ohechaukaha igoviérno iporãitereiha. Haʼe heʼi: ‘Péicha ore rohecha, hekoitépe ojehuha umi mbaʼe profetakuéra heʼivaʼekue’. Opa mbaʼe ojeʼevaʼekue Jehová Rréinore oñekumplíta katuete. Upévare jajerovia Isaías heʼivaʼekuére ha Pedro oiporúva: ‘Ñande katu ñahaʼarõ peteĩ yvága ha yvy ipyahúva, Ñandejára heʼivaʼekue omeʼẽtaha. Ha upépe opaite mbaʼe oikóta Ñandejára oipotaháicha’ (2 Ped. 1:4, 10, 11, 19; 3:13; Isa. 65:17, 18).