¿Ndépa reikuaa peteĩ testígo de Jehovápe? Ikatu oime ne vesíno, ne kompañéro de traváho térã de eskuéla. Ikatu voi oñemongetáma raʼe nendive la Bíbliare. Péro, ¿mávapa añetehápe umi Testígo? ¿Ha mbaʼérepa okomparti la héntendi umi mbaʼe ogueroviáva?

Umi Testígo ojogua umi ótro héntepe avei. Haʼekuéra diferénte paisgua, ijapytepekuéra oĩ imboriahúva ha iplátava. Oĩ oreko vaʼekue ótro rrelihión ha ótro katu ndogueroviái vaʼekue Ñandejára oexistiha. Péro oiko mboyve chuguikuéra Testígo, enterovéva oipuru itiémpo ostudia porã hag̃ua umi enseñánsa oĩva la Bíbliape (Hechos 17:11). Haʼekuéra oguerovia umi mbaʼe oaprende vaʼekue, ha upéi odesidi oadora Ñandejára Jehovápe.

La Biblia oipytyvõ chupekuéra. Umi Testígo iprovléma avei ha ojavy entéroicha. Péro oñehaʼã rupi ojapo hikuái la Biblia heʼíva, oiko porãve ha ovyʼa (Salmo 128:1, 2). Upévare omombeʼu hapichakuérape umi mbaʼe oaprendéva la Bíbliagui.

Oiko hikuái la Biblia heʼiháicha. Umi enseñánsa oĩva la Bíbliape oipytyvõ umi Testígope oiko porãve hag̃ua ha orrespeta hag̃ua hapichápe. Omokyreʼỹ avei chupekuéra iñonrrádo ha imbaʼeporã hag̃ua. Umi mbaʼe oaprendéva oipytyvõ chupekuéra hesãi hag̃ua ha ojapo hag̃ua iporãva ivesinokuérare. Umi enseñánsa rupive iñunído ifamíliandi ha hekopotĩ hikuái. ‘Ñandejára otrata enterovépe peteĩchante’, upévare umi Testígo tahaʼe haʼéva ipaís ha ipire kolór, oiko porãmba oñondive. Haʼekuéra ningo ojogua umi ótro héntepe avei, péro oadora rupi Jehovápe ndaipóri ótra organisasión ojoguáva chupekuéra (Hechos 4:13; 10:34, 35).

• ¿Mbaʼépepa ojojogua umi testígo de Jehová ha umi ótro hénte?

• ¿Mbaʼe iporãvapa oaprende hikuái la Bíbliagui?

Heta hénte opensa umi testígo de Jehová haʼeha peteĩ rrelihión pyahu. Péro ojapóma mas de 2.700 áño la Biblia ohenói hague Ñandejára siervokuérape “testígo” (Isaías 43:10-12). Áño 1931 peve oñehenói hikuái Estudiánte de la Biblia, ¿mbaʼérepa okambia upéi?

Pe téra ohechauka mávapa Idiós. Umi manuskríto yma guare ohechauka Ñandejára réra Jehová oĩha la Bíbliape 7.000 véserupi. Heta traduksióngui ojepeʼa upe téra ha ivése oñemoĩ título reínte, por ehémplo: Señór térã Ñandejára. Péro Ñandejára omombeʼu vaʼekue Moiséspe héra tee haʼeha Jehová. Haʼe heʼi: “Péicha hína che réra opa árare” (Éxodo 3:15). Heʼívo péicha ohechauka idiferenteha entéro umi dios fálsogui.

Pe téra ohechauka mbaʼe rresponsavilidápa oreko hikuái. Abel haʼe vaʼekue pe primer testígo pórke ohechauka ojeroviaha Ñandejárare. Upe tiémpo guive oĩ hetaiterei ojapóva avei upéva, por ehémplo Noé, Abrahán, Sara, Moisés, David ha hetave. Haʼekuéra haʼe vaʼekue testígo, ha ojogua ‘peteĩ arai tuichaitereívape’ (Hebreos 11:4–12:1). Ñapensamína peteĩ persóna inosénte ojeakusa reiha peteĩ trivunálpe, katuete oĩta testígo oñeʼẽva ifavórpe. Péicha avei umi testígo de Jehová oĩ desidído odefendévo Ñandejárape heʼívo la verda.

Osegi hikuái Jesús ehémplo. La Biblia heʼi Jesús haʼeha “pe testígo fiél ha isinsérova” (Apocalipsis 3:14). Jesús heʼi vaʼekue: “Che aikuaauka chupekuéra nde réra ha asegíta aikuaauka”. Ha heʼi avei ou hague ‘oikuaauka hag̃ua la verda’ (Juan 17:26; 18:37). Umi kristiáno verdadéro oikuaauka vaʼerã Jehová réra umi héntepe ha mbaʼeichaguápa haʼe. Umi testígo de Jehová oñehaʼãmbaite ojapo upéva.

• ¿Mbaʼérepa umi Estudiánte de la Biblia upéi oñehenói testígo de Jehová?

• ¿Arakaʼe guivépa Jehová oreko itestígo ko yvy ape ári?

• ¿Mávapa pe testígo de Jehová iñimportantevéva oiko vaʼekue?

La Biblia heʼi vaʼekue Cristo omano rire opuʼãtaha umi kristiáno apytépe mboʼehára guaʼu omboʼéva umi enseñánsa noĩriva la Bíbliape (Hechos 20:29, 30). Tiémpo rire, upeichaite oiko. Umi mboʼehára guaʼu ombojeheʼapa Jesús enseñánsa umi rrelihión japu omboʼévare. Péicha oñepyrũ peteĩ rrelihión kristiána guaʼu (2 Timoteo 4:3, 4). ¿Mbaʼéichapa ikatu ñaĩ segúro ñantende porãha hína umi mbaʼe la Biblia omboʼéva?

Og̃uahẽ pe tiémpo Jehová oikuaauka hag̃ua la verda. Ñandejára heʼi ‘umi ára pahápe, umi enseñánsa verdadéra heta hetavetaha’ (Daniel 12:4). Áño 1870-pe peteĩ grúpo michĩva oñehaʼã ontende mbaʼépa añetehápe omboʼe la Biblia. Haʼekuéra ohechakuaa noĩriha la Bíbliape heta mbaʼe umi rrelihión omboʼéva. Upéicha rupi oñepyrũ oinvestiga umi enseñánsa oĩva la Bíbliape, ha Ñandejára oipytyvõ chupekuéra ontende hag̃ua Iñeʼẽ.

Umi kuimbaʼe isinsérova ostudia porã la Biblia. Umi testígo de Jehová upérõ oñehenói Estudiánte de la Biblia, ha haʼekuéra ostudia lája la Biblia ñande jasegi koʼág̃a peve. Haʼekuéra ostudia vaʼekue la Biblia por téma. Otopa jave peteĩ téxto de la Biblia ijetuʼúva, oheka ótro téxto oexplikáva upéva. Hesakãvo pe téma ha oho porãrõ umi ótra párte de la Bíbliare, oanota hikuái. Haʼekuéra oheja la Biblia voi oexplika umi párte hasyvéva, péicha ontende porãve umi mbaʼe omboʼéva la Biblia koʼã témare: Ñandejára réra ha Irréino, mbaʼépa Ñandejára volunta umi hénte ha ko yvýpe g̃uarã, mbaʼépa oiko umi omano vaʼekuégui ha oikove jeýtapa hikuái. Umi mbaʼe ostudia vaʼekue oipytyvõ chupekuéra omboyke hag̃ua umi mbaʼe ojapóva ha omboʼéva umi rrelihión japu (Juan 8:31, 32).

Áño 1879 rupi umi Estudiánte de la Biblia ohechakuaa og̃uahẽmaha pe tiémpo ojekuaa hag̃ua opárupi la verda. Upévare upe áñope haʼekuéra oñepyrũ onohẽ pe rrevísta hérava Ñemañaha oanunsia Jehová goviérno, koʼág̃a peve osegi ojejapo pe rrevísta. Koʼág̃a ojekuaauka umi mbaʼe la Biblia omboʼéva 240 paíspe ha mas de 900 idiómape. Núnka noñemombeʼúiva peichaite peve umi enseñánsa verdadéra.

• ¿Mbaʼépa oiko Cristo omano rire?

• ¿Mbaʼépa ñanepytyvõ ñantende porã hag̃ua Ñandejára Ñeʼẽ?

Heta tiémpore umi testígo de Jehová oipuru, oimprimi ha orreparti heta traduksión de la Biblia. Péro upéi ojehechakuaa tekotevẽha ojejapo peteĩ traduksión oipytyvõtava umi héntepe ‘oikuaa porãve hag̃ua pe añetegua’, pórke upéva hína Ñandejára volunta (1 Timoteo 2:3, 4). Upévare áño 1950-pe oñeguenohẽ en párte pe Biblia Traducción del Nuevo Mundo ingléspe, oipurúva palávra ifásilva oñentende hag̃ua. Ko Biblia ojetradusíma mas de 160 idiómape ha ojejapo oĩ haguéicha umi idióma orihinálpe.

Oñekotevẽ peteĩ Biblia ifásilva oñentende hag̃ua. Umi idióma okambia ohóvo ohasávo pe tiémpo, ha heta traduksión de la Biblia oreko umi palávra ndojepuruvéimava térã ndojekuaavéimava, ha upévare ijetuʼu oñentende hag̃ua. Avei ojetopa umi manuskríto yma guare ijexaktovéva ha ojoguavéva umi orihinálpe, upéicha rupi oñentende porãve umi idióma ojepuru vaʼekue ojeskrivi hag̃ua la Biblia, koʼãva hína hebreo, arameo ha griego.

Oñekotevẽ peteĩ traduksión orrespetáva Ñandejára Ñeʼẽ. Umi otradusíva oiko rangue okambia Ñandejára Ñeʼẽ heʼíva, omoĩ vaʼerã oĩ hagueichaite pe téxto orihinálpe. Péro hetaiterei Bíbliagui ojepeʼa Ñandejára réra Jehová.

Oñekotevẽ peteĩ traduksión omombaʼeguasúva Ijapoharépe (2 Samuel 23:2). Pe Traducción del Nuevo Múndope oñemoĩ Ñandejára réra 7.000 véserupi oĩ haguéicha umi manuskríto orihinálpe. Pe fóto oĩva iguýpe ohechauka upéva (Salmo 83:18). Ojejapo hag̃ua ko traduksión oñeinvestiga ha ojestudia heta áñore, upévare igustoiterei jalee ha ifásil ñantende hag̃ua Ñandejára opensáva. Oimérõ rereko térã ndereguerekói ko Traducción del Nuevo Mundo ne idiómape, iporãitereíta releéramo káda día Jehová Ñeʼẽ (Josué 1:8; Salmo 1:2, 3).

• ¿Mbaʼérepa oñekotevẽ kuri peteĩ traduksión pyahu?

• ¿Mbaʼépa ojapo vaʼerã káda día peteĩ persóna oikuaaséva Ñandejára volunta?