Umi testígo de Jehová ndopagái umi odirihívape pe organisasión. Upéva rangue, onombra hikuái umi kuimbaʼe ijerovia mbaretévape ‘oñangareko hag̃ua Ñandejára kongregasiónre’, péicha ojapo vaʼekue avei umi kristiáno yma guare (Hechos 20:28). Umi ansiáno ojerovia mbarete Jehováre, ogia pe kongregasiónpe ha okuida Ñandejára ovechakuérare. Haʼekuéra ndojapói upéva ‘oĩgui oovligáva chupekuéra ni ndoikói oheka tarovaite umi mbaʼe chupekuérante okonveníva iplatarayhúgui, síno ojapo hembiapo vyʼápe ha kyreʼỹme Ñandejára renondépe’ (1 Pedro 5:1-3). ¿Mbaʼépa haʼekuéra ojapo kongregasión rehehápe?

Haʼekuéra ojepyʼapy ha oñangareko ñanderehe. Umi ansiáno ñandegia la Biblia rupive ha ñanepytyvõ ñañemoag̃uive hag̃ua Ñandejárare. Haʼekuéra oikuaa porã Ñandejára onkarga hague chupekuéra upe traváho iñimportantetéva, upévare ndoikói odominase ipuévlope, síno oipytyvõ chupekuéra ovyʼa ha oĩ porã hag̃ua (2 Corintios 1:24). Umi pastór oñatende porã káda ovecháre, péicha avei umi ansiáno oñehaʼã oikuaa porã káda uno umi oĩvape kongregasiónpe (Proverbios 27:23).

Ñanemboʼe mbaʼéichapa ikatu jajapo Ñandejára volunta. Káda semána umi ansiáno odirihi umi rreunión ojejapóva kongregasiónpe omombarete hag̃ua ñande jerovia (Hechos 15:32). Koʼã ermáno ombaʼapo jejopýva omoakã avei pe predikasión. Oho opredika umi ermánondi ha oipytyvõ chupekuéra opredika hag̃ua heta hendáicha.

Ñanemokyreʼỹ káda únope. Ñañemoag̃uive hag̃ua Jehováre, umi ansiáno ñandevisita jepi ñande rógape térã oñeʼẽ jepi ñanendive rreunionhápe. Péicha ñanepytyvõ ha ñanekonsola la Biblia rupive (Santiago 5:14, 15).

Haʼekuéra heta hembiapo kongregasiónpe, péro ndahaʼéi upévante. La majoría koʼã ansiáno oreko ótra rresponsavilida, por ehémplo oreko itraváho ha ifamiliakuéra oikotevẽva hesekuéra. Umi ansiáno ombaʼapo jejopy, upévare jarrespeta vaʼerã chupekuéra (1 Tesalonicenses 5:12, 13).

• ¿Mbaʼe mbaʼépa ojapo umi ansiáno kongregasiónpe?

• ¿Mbaʼéichapa ohechauka umi ansiáno ojepyʼapyha káda únore?

La Biblia oñeʼẽ mokõi grúpo ojapóvare umi traváho oĩva kongregasiónpe, umíva hína umi ‘ansiáno ha siérvo ministeriál’ (Filipenses 1:1). Oĩ jepi heta ansiáno ha siérvo ministeriál káda kongregasiónpe. ¿Mbaʼépa ojapo umi siérvo ministeriál kongregasión rehehápe?

Haʼekuéra oipytyvõ umi ansiánope. Umi siérvo ministeriál ningo kuimbaʼe de konfiánsa, itravahadór ha ojerovia mbarete Jehováre. Oĩ imitãva ha ijedáva. Haʼekuéra oipytyvõ oñeorganisa porã hag̃ua umi traváho ojejapóva pe kongregasiónpe ha pe Salón del Réinope. Upéicha rupi umi ansiáno ikatu itiempove oporomboʼe ha oñatende porã hag̃ua pe kongregasiónre.

Ojapo umi traváho oñekotevẽva kongregasiónpe. Oĩ siérvo ministeriál oñeasignáva oĩ hag̃ua de akomodadór ha orresivi porã hag̃ua umi ohóvape rreunionhápe. Oĩ avei umi oñatendéva sonídore, literatúrare, umi kuéntare, ha oasignáva umi território. Haʼekuéra oipytyvõ avei ojejapo jave mantenimiénto pe Salónpe. Umi ansiáno ojerure jepi avei chupekuéra oipytyvõ hag̃ua umi ijedavévape. Umi siérvo ministeriál iguapoiterei ha ikyreʼỹ ojapo hag̃ua entéro traváho oñemeʼẽva chupekuéra, ha upévare jarrespeta vaʼerã koʼã ermánope (1 Timoteo 3:13).

Haʼekuéra omoĩ peteĩ ehémplo iporãva. Umi siérvo ministeriál ojeporavo pórke haʼekuéra kristiáno oñehaʼãva okumpli porã entéro mbaʼe. Otoka jave chupekuéra ojapo umi párte kongregasiónpe omombarete ñande jerovia, ha odirihívo pe predikasión ñanemokyreʼỹeterei hikuái. Umi siérvo ministeriál oapoja umi ansiánope ha péicha oipytyvõ pe kongregasión ovyʼa ha iñunído hag̃ua (Efesios 4:16). Kon el tiémpo haʼekuéra ikatúta avei oservi de ansiáno.

• ¿Mbaʼeichagua persónapa umi siérvo ministeriál?

• ¿Mbaʼéichapa umi siérvo oipytyvõ oñembaʼapo porã hag̃ua kongregasiónpe?

Umi Escrituras Griégaspe pyʼỹinte oñeñeʼẽ Bernabé ha Páblore. Haʼekuéra haʼe vaʼekue superintendénte oviaháva, oho vaʼekue ovisita umi primera kongregasiónpe. ¿Mbaʼérepa ojapo upéva? Ojepyʼapýgui iñermanokuérare ha oipotágui oĩ porã hikuái Ñandejárandi. Pablo heʼi vaʼekue ‘ohose jeyha ovisita umi ermanokuérape’ ohecha hag̃ua mbaʼéichapa oĩ. Haʼe naiprovlémai oviaha hag̃ua mombyry omombarete hag̃ua iñermanokuérape (Hechos 15:36). Koʼág̃a peve umi superintendénte ojapo avei upéva.

Haʼekuéra ou ñanemokyreʼỹ hag̃ua. Káda superintendénte ovisita jepi 20 kongregasión rupi, ha opyta peteĩ kongregasiónpe una semána, 2 vése al áño. Koʼã ermáno heta iñexperiénsia upévare tuicha ñanemokyreʼỹ ivisíta, ha oiméramo omenda, hembireko avei ikatu ñanepytyvõ. Haʼekuéra oñehaʼã oikuaa entéro ermánope tahaʼe imitãva ha ijedáva, ha vyʼápe ñanemoirũ japredika térã jajapo hag̃ua estúdio bíblico. Umi superintendénte oho umi ansiáno ndive ojapo visíta de pastoréo, ha umi rreunionhápe ha asambleahápe katu ojapo umi diskúrso ñanemokyreʼỹva (Hechos 15:35).

Haʼekuéra oñeinteresa enterovére. Umi superintendénte de sirkuíto ojepyʼapy umi kongregasión rehe ha oipota oĩ porã hikuái Ñandejára renondépe. Haʼekuéra oñerreuni umi ansiáno ha siérvo ministeriál ndive ohecha hag̃ua mbaʼéichapa oho hese pe kongregasión ha omeʼẽ chupekuéra konsého ojapo porãve hag̃ua hembiapo kongregasiónpe. Umi superintendénte oipytyvõ avei umi prekursórpe ikatupyryve hag̃ua oporomboʼévo. Haʼekuéra oikuaase umi estudiánte oho ramóvape rreunionhápe, ha ovyʼa ohendúvo umi kámbio ojapóva hikuái oñemoag̃uive hag̃ua Jehováre. Koʼã ermáno oñemeʼẽmbaite ñanderehehápe, haʼekuéra ñanemoirũ ha ombaʼapo ñande favórpe (2 Corintios 8:23). Ojerovia mbarete hikuái ha orrespeta Ñandejárape. Ñande jasegi vaʼerã iñehémplo (Hebreos 13:7).

• ¿Maʼerãpa umi superintendénte ovisita umi kongregasión?

• ¿Mbaʼépa ikatu rejapo ideprovechove hag̃ua ndéve ivisíta?

Oiko jave peteĩ torménta vai, terremóto, térã ótro desástre naturál, umi testígo de Jehová pyaʼe oñeorganisa oipytyvõ hag̃ua umi ermáno oĩvape upe lugárpe. Péicha ojehecha mbaʼéichapa ojoayhu hikuái (Juan 13:34, 35; 1 Juan 3:17, 18). ¿Mbaʼéichapa ikatu ñaipytyvõ péicha jave?

Ñameʼẽ ñane kontrivusión. Oikórõ guare peteĩ ñembyahýi guasu Judéape, umi kristiáno oĩva Antioquíape omondo pláta iñermanokuérape g̃uarã (Hechos 11:27-30). Umi Testígo avei oikuaa vove oĩha ermáno ohasáva peichagua situasión ijetuʼúva, omondo pláta umi kongregasión rupive ikatu hag̃uáicha oñepytyvõ chupekuéra, tahaʼe haʼehápe (2 Corintios 8:13-15).

Jajapo umi mbaʼe oñekotevẽva. Umi ansiáno oĩva upe lugár oiko haguépe pe desástre naturál oñehaʼã oñekomunika káda ermáno oĩvandi ikongregasiónpe. Haʼekuéra ojasegura ojetopamaha enterovépe ha ohecha oĩ porãpa hikuái. Pe komite de sokórro oorganisa jepi ojerreparti hag̃ua umi mbaʼe oñekotevẽva, por ehémplo tembiʼu, y ha ao. Avei ohecha moõpa ikatu opyta umi ermáno, ha oñekotevẽpa doktór térã pohã. Oĩ testígo ikatupyrýva ojeofreséva oipytyvõ hag̃ua. Haʼekuéra opagapa iviáhere ha oho umi lugárpe oipytyvõ hag̃ua térã oarregla hag̃ua umi óga ha Salón del Reino oñembyai vaʼekue. Umi Testígo iñunído ha oaprendéma heta mbaʼe ombaʼapóvo oñondivepa, upévare ikatu pyaʼe porã okuʼe oipytyvõ hag̃ua umi ermáno ohasa asývape. Haʼekuéra oñehaʼã oipytyvõ raẽ ‘iñermáno ha ermanakuérape’, péro ikatu jave oipytyvõ avei umi ótro héntepe, tahaʼe haʼéva irrelihión (Gálatas 6:10).

Ñakonsola la Biblia rupive. Umi ohasa asýva hína umi desástre naturál káusare oikotevẽterei oñekonsola chupekuéra. Oiko jave koʼã mbaʼe Jehová ñanemombarete, haʼe ningo “peteĩ Dios omeʼẽva konsuélo” (2 Corintios 1:3, 4). Umi Testígo omombeʼu vyʼápe umi hénte osufrívape umi promésa oĩva la Bíbliape. Ohechauka chupekuéra Ñandejára Rréino koʼẽrõite oipeʼaitetaha umi mbaʼe vai ombosufríva umi héntepe (Apocalipsis 21:4).

• ¿Mbaʼérepa umi testígo de Jehová pyaʼe ikatu oipytyvõ umi ermánope?

• ¿Mbaʼéichapa ikatu ñakonsola umi héntepe?

Omano mboyve Jesús oñemongeta 4 idisípulondi, koʼãva hína Pedro, Santiago, Juan ha Andrés. Jesús omombeʼu chupekuéra umi mbaʼe oikótava umi ára pahápe, ha upéi heʼi peteĩ mbaʼe iñimportantetereíva: “¿Mávapa añetehápe pe esklávo de konfiánsa ha iñarandúva? Ijára onombra vaʼekue chupe oñangareko hag̃ua umi ótro isiérvo rehe, omeʼẽ hag̃ua chupekuéra aliménto hiʼoraitépe” (Mateo 24:3, 45; Marcos 13:3, 4). Jesús ningo pe ‘Jára’ oñeñeʼẽha koʼápe, ha haʼe oasegura idisipulokuérape onombrataha pe esklávo omeʼẽtavape chupekuéra aliménto umi ára pahápe. ¿Mávapa hína upe esklávo?

Peteĩ grúpo michĩva oĩháme kristiáno unhído. Pe “esklávo” haʼe hína pe Kuérpo Governánte orekóva umi testígo de Jehová. Ko esklávo omeʼẽ hína aliménto hiʼoraitépe umi oadorávape Jehovápe. Ñande ñaikotevẽ ko grúpore omeʼẽ hag̃ua ñandéve ñane ‘rembiʼu hiʼoraitépe’ (Lucas 12:42).

Oñangareko Ñandejára kongregasión rehe (1 Timoteo 3:15). Jesús omeʼẽ peteĩ rresponsavilida tuichaitereíva pe esklávope. Oñatende vaʼerã umi traváho ojapóvare Jehová organisasión, pe párte oĩva ko yvy ape ári. Por ehémplo, oñangareko vaʼerã umi mbaʼerepýre, odirihi vaʼerã pe predikasión ha ñanemboʼe vaʼerã umi kongregasión rupive. Omeʼẽ hag̃ua ñandéve opa mbaʼe ñaikotevẽva ha itiempoitépe, pe “esklávo de konfiánsa ha iñarandúva” omeʼẽ ñandéve pe aliménto oúva Ñandejára Ñeʼẽgui umi puvlikasión, umi rreunión ha umi asambléa rupive.

Pe esklávo ningo de konfiánsa pórke omboʼe oĩhaichaite la Bíbliape ha opredika rupi umi notísia porã oñemanda haguéicha chupe. Ha iñarandu pórke oñangareko porã umi mbaʼe Cristo orekóvare ko yvy ape ári (Hechos 10:42). Koʼág̃arupi hetave hénte oñemoag̃ui Jehováre ha jareko heta aliménto oúva Ñandejáragui, upéva ohechauka Jehová ovendesiha ko esklávo ojapóva (Isaías 60:22; 65:13).

• ¿Mávapepa onombra Jesús omeʼẽ hag̃ua idisipulokuérape pe aliménto?

• ¿Mbaʼérepa jaʼekuaa pe esklávo haʼeha de konfiánsa ha iñaranduha?

Síglo primérope, Jerusalénpe oĩ vaʼekue peteĩ grúpo michĩva de ‘apóstol ha ansiáno’. Haʼekuéra haʼe vaʼekue pe Kuérpo Governánte, ha odesidi heta mbaʼe iñimportánteva oipytyvõva umi kongregasión kristiána kompletoitépe (Hechos 15:2). Odesidi mboyve peteĩ mbaʼe haʼekuéra ohecha mbaʼépa heʼi Ñandejára Ñeʼẽ ha oheja pe espíritu sánto ogia chupekuéra, péicha og̃uahẽ peteĩ ñeʼẽme (Hechos 15:25). Peichaite ojejapo koʼág̃a avei.

Ñandejára oipuru chupekuéra ojapo hag̃ua ivolunta. Umi ermáno unhído oĩva pe Kuérpo Governántepe omombaʼeterei Ñandejára Ñeʼẽ. Haʼekuéra iñarandu odesidi hag̃ua mbaʼéichapa ojejapo vaʼerã umi traváho Ñandejára organisasiónpe ha oporogia ojejapo hag̃ua opa mbaʼe la Biblia heʼiháicha. Oñembyaty hikuái káda semána ohecha hag̃ua mbaʼépa oikotevẽ umi ermáno oĩva ko yvy tuichakuére. Primer síglope ojejapo haguéicha, haʼekuéra omeʼẽ instruksión oñeguenohẽva la Bíbliagui, ha ojapo upéva umi kárta rupive ha avei umi superintendénte de sirkuíto térã ótro ermáno rupive. Upéva ñanepytyvõ ñaneunído hag̃ua umi mbaʼe jajapóva ha ñapensávape (Hechos 16:4, 5). Avei pe Kuérpo Governánte oprepara umi puvlikasión haʼéva aliménto oúva Ñandejáragui, haʼekuéra omokyreʼỹ kristianokuérape osegi hag̃ua opredika ha onombra umi ermáno orekóvape hetave rresponsavilida pe organisasiónpe.

Oheja ogia chupekuéra Ñandejára espíritu. Pe Kuérpo Governánte ojerure ogia hag̃ua chupekuéra Jehová, pe Governánte Ndaijojaháiva, ha avei Jesús pe omoakãva pe kongregasión (1 Corintios 11:3; Efesios 5:23). Umi ermáno oĩva pe Kuérpo Governántepe nopensái haʼekuéra haʼeha líder omandapáva Ñandejára puévlore, síno umi ótro kristianokuéraicha avei, “osegi hikuái pe Ovecha Raʼýpe toho ohohápe” (Apocalipsis 14:4). Haʼekuéra ovyʼaiterei ñanemanduʼáramo hesekuéra ñane ñemboʼépe.

• ¿Mávapa oĩ vaʼekue pe Kuérpo Governántepe síglo primérope?

• ¿Mbaʼéichapa koʼág̃a pe Kuérpo Governánte oheka Ñandejára gía?

Idióma hebréope Betel heʼise “Ñandejára róga” (Génesis 28:17, 19, nóta). Opyta porã oñehenói péicha koʼã lugár oĩva ko múndo tuichakuére, pórke upe guive umi testígo de Jehová oorganisa ha odirihi pe predikasión. Pe Kuérpo Governánte oĩ pe séde sentrálpe oĩva pe Estádo de Nueva Yórkpe (Estados Unidos), ha upe guive odirihi umi traváho ojejapóva umi sukursálpe oĩva heta paíspe. Umi oikóvape Betélpe oñehenói família Betel. Peteĩ famíliaicha avei haʼekuéra ojapo heta mbaʼe oñondivepa: okaru, ombaʼapo ha ostudia la Biblia (Salmo 133:1).

Pe família Betel oñemeʼẽmbaite iservísiope. Betélpe oĩ ermáno ha ermána oñehaʼãva ojapo Ñandejára rembipota ha oipurupaitéva itiémpo omotenonde hag̃ua Irréino (Mateo 6:33). Ni peteĩva ndaisuéldoi, péro oñemeʼẽ chupekuéra oiko hag̃ua, hoʼu vaʼerã ha avei plataʼimi ojogua hag̃ua umi mbaʼe oikotevẽva. Káda únope oñeasigna itravahorã, tahaʼe peteĩ ofisínape, kosináme térã komedórpe. Oĩ ombaʼapóva oñeimprimihápe umi puvlikasión térã enkuadernasiónpe, oĩ avei omopotĩva umi koty, ombaʼapóva lavanderíape, mantenimiéntope ha hetave mbaʼépe.

Betel guive ojeapoja pe predikasión. Betélpe ojejapo ikatúva guive oñemog̃uahẽ hag̃ua heta héntepe pe añetegua omboʼéva la Biblia. Ko folléto ohechauka upéva siertoha. Pe Kuérpo Governánte oorganisa ojejapo hag̃ua ko folléto, upéi oñemondo Internét rupive hetaiterei grúpo de traduksiónpe oĩvape ko múndo tuichakuére, upéi umi folléto oñeimprimi umi impresóra ipyaʼetereívape oĩva heta sukursálpe, ha upe rire oñemondo mas de 120.000 kongregasiónpe. Péicha pe família Betel oñehaʼãmbaite oapoja pe traváho iñimportantevéva oĩva koʼág̃a, upéva hína pe predikasión (Marcos 13:10).

• ¿Mávapa oservi Betélpe, ha mbaʼe mbaʼépa oñemeʼẽ chupekuéra?

• ¿Mbaʼéichapa ojeapoja pe predikasión Betel guive?

Umi oikóva Betélpe oreko diferénte traváho, péicha káda Betel oipytyvõ pe predikasión ojejapóvape peteĩ tetãme térã hetavépe. Oĩ ombaʼapóva peteĩ ekípo de traduksiónpe, oĩ oimprimíva umi rrevísta, oenkuadernáva umi lívro, omohenda ha omondóva umi puvlikasión. Oĩ avei ombaʼapóva departaménto de áudio ha vidéope, térã oñenkargáva ótro tembiapo iñimportántevare.

Peteĩ Komite de Sukursál odirihi umi traváho. Pe Kuérpo Governánte onombra mbohapy térã hetave ansiáno ikatupyrývape oĩ hag̃ua pe Komite de Sukursálpe, ha onkarga chupekuéra oñangareko hag̃ua upe sukursál rehe. Pe Komite de Sukursál omombeʼu pe Kuérpo Governántepe mbaʼéichapa oho hese umi traváho ojejapóva upe tetãme, térã umi tetã oĩvape avei ikárgope. Omombeʼu avei umi provléma ermanokuéra ohasáva jepi. Umichagua informasión oipytyvõ pe Kuérpo Governántepe odesidi hag̃ua mbaʼe téma ikatu oñeanalisa umi puvlikasión osẽtavape ha avei umi ojestudiátava umi rreunión ha asambleahápe. Oñemondo jepi avei umi Rrepresentánte del Kuérpo Governántepe ovisita hag̃ua umi sukursál ha omeʼẽ hag̃ua konsého pe Komite de Sukursálpe okumpli porãve hag̃ua iñasignasión (Proverbios 11:14). Péicha jave ojejapo jepi peteĩ rreunión espesiál ha pe rrepresentánte de la sentrál mundiál ojapo peteĩ diskúrso oporomokyreʼỹ hag̃ua.

Oñepytyvõ umi kongregasiónpe. Pe sukursálpe ojeaprova oñemoñepyrũ hag̃ua peteĩ kongregasión pyahu. Umi ermáno ogia pe tembiapo ojapóva umi prekursór, misionéro ha superintendénte de sirkuíto oĩva pe sukursál kárgope. Haʼekuéra oorganisa umi asambléa, ohecha moõpa oñemopuʼãta umi Salón del Reino ha avei omondo umi puvlikasión oikotevẽva umi kongregasión. Entéro mbaʼe ojejapóva umi sukursálpe oipytyvõ ojejapo porã hag̃ua pe predikasión (1 Corintios 14:33, 40).

• ¿Mbaʼéichapa umi Komite de Sukursál oipytyvõ pe Kuérpo Governántepe?

• ¿Mbaʼe traváhopa ojejapo umi sukursálpe?

Ikatu hag̃uáicha oñemombeʼu umi “notísia porã” “entéro tetã, trívu, puévlo ha umi oñeʼẽvape diferénte idióma”, ojejapo puvlikasión mas de 900 idiómape (Apocalipsis 14:6). ¿Mbaʼéichapa ojejapo ko traváho tuichaitéva? Ojejapo oĩ rupi ko múndo tuichakuére peteĩ grúpo oskrivíva umi puvlikasión ha avei umi otradusíva. Umi oĩva koʼã grúpope haʼe hína testígo de Jehová.

Pe téxto orihinál ojejapo ingléspe. Pe Kuérpo Governánte odirihi pe traváho ojejapóva Departaménto de Rredaksiónpe oĩva pe séde mundiálpe. Ko departaménto ohecha umi traváho ojapótava umi oskrivíva umi puvlikasión, ijapytepekuéra oĩ ombaʼapóva pe séde mundiálpe, ha algúno ótra sukursálpe. Umi oskrivíva umi puvlikasión oĩ diferénte paíspe, upéicha rupi umi puvlikasiónpe osẽ informasión ou porãtava umi hénte de diferénte kultúrape.

Pe téxto oñembohasa umi traduktórpe. Pe informasión ojejapopa rire, ojehecha oĩ porãmbápa ha ojeaprova. Upe rire oñemondo Internét rupive umi ekípo de traduksión oĩvape ko múndo tuichakuére. Upéi haʼekuéra otradusi pe informasión ha orrevisa heta vése ohecha hag̃ua oĩ porãpa. Haʼekuéra otradusi jave iñidiómape nokambiái ni michĩmi pe mensáhe oĩva ingléspe, péicha ojasegura otradusi umi mbaʼe ‘siertogua memetéva’ (Eclesiastés 12:10).

Umi komputadóra rupive ojejapo pyaʼeve umi traváho. Peteĩ komputadóra ndaikatúi ojapo la traváho ojapóva peteĩ oskrivíva umi puvlikasión térã peteĩ otradusíva. Péro umi komputadóra oipytyvõ ojejapo pyaʼeve hag̃ua umi traváho. Por ehémplo oreko umi diksionário ha hetave mbaʼe oñeinvestiga hag̃ua. Oĩ ótro prográma umi testígo de Jehová ojapo vaʼekue, hérava Sistema Electrónico de Edición Plurilingüe (MEPS, ingléspe). Ko prográma rupive ikatu ojeskrivi diferénte idiómape, oñemoĩ umi fóto ha divúho, ha ojepreparapaite oñeimprimi hag̃ua.

Umi testígo de Jehová oñehaʼãmbaite otradusi heta idiómape. Sapyʼánte oĩ saʼi oñeʼẽva peteĩ idióma, péro lomímonte ojetradusi chupekuéra. ¿Mbaʼérepa ojejapo upéva? Pórke Jehová oipota “opaichagua persóna ojesalva ha oikuaa porã pe añetegua” (1 Timoteo 2:3, 4).

• ¿Mbaʼéichapa ojeprepara umi puvlikasión?

• ¿Mbaʼérepa ojetradusi umi puvlikasión hetaiterei idiómape?

Umi Testígo organisasión káda áño ojapo hetaiterei Biblia ha puvlikasión omeʼẽ hag̃ua la héntepe okovraʼỹre mbaʼeve. Avei omopuʼã umi Salón del Reino ha umi sukursál, ha upéi ojejapo mantenimiénto koʼãvape. Oñepytyvõ avei oñemantene hag̃ua umi betelita ha misionérope, ha oiko jave desástre naturál oñepytyvõ umi ermánope. Péro, ¿mbaʼéichapa ojepagapa koʼã gástore?

Ndojejeruréi diésmo ha ndojejapói kolékta. Pe organisasiónpe oĩramo jepe heta gásto ndojejeruréi pláta. Ojapóma mas de 100 áño pe segunda rrevísta Ñemañaha osẽ hague, ha upérõ pe rrevísta heʼi vaʼekue umi Testígo ogueroviaha Jehová oapojaha pe traváho ojejapóva ha núnka ndoikomoʼãiha orroga hikuái ni ojerure peteĩ umánope oapoja hag̃ua chupekuéra. Ha upéicha oiko koʼág̃a peve (Mateo 10:8).

Umi gásto ojepaga donasión voluntária rupive. Heta hénte omombaʼeterei pe traváho ojapóva umi Testígo omboʼe hag̃ua la Biblia. Umi testígo de Jehová vyʼápe omeʼẽ itiémpo, imbaretekue, ipláta ha hetave mbaʼe orekóva ojejapo hag̃ua Ñandejára volunta ko yvy tuichakuére (1 Crónicas 29:9). Umi Salón del Réinope ha umi lugár ojejapohápe umi asambléa oĩ káha de kontrivusión ikatuhápe ñamoĩ ñane donasión. Umi kontrivusión ikatu ojejapo avei Internét rupive, upearã ojepuru pe páhina jw.org. Hetaiterei umi omeʼẽva ikontrivusión ndaiplatahetái. Haʼekuéra ojogua pe viúda mboriahumíme omoĩ vaʼekue umi káha de kontrivusiónpe “mokõi monedaʼi saʼieterei ovaléva”. Jesús imanduʼa porãiterei vaʼekue ko viúdare (Lucas 21:1-4). Ojaposéva guive ikatu ‘omboyke álgo la orekóvagui’ ha omeʼẽ “odesidiháicha ikorasõme” (1 Corintios 16:2; 2 Corintios 9:7).

Umi Testígo oĩ segúro Jehová osegitaha omomýi entéro omombaʼeguasusévape chupe omeʼẽ hag̃ua ipyʼaite guive ‘umi mbaʼe iporãvéva orekóva’ pe Rréino rehehápe, ha péicha oiko hag̃ua Ñandejára volunta (Proverbios 3:9).

• ¿Mbaʼépepa idiferénte Jehová organisasión umi ótro rrelihióngui?

• ¿Mbaʼéichapa ojepuru umi kontrivusión oñemeʼẽva?

Pe lugár oñembyatyhápe umi Testígo héra Salón del Reino, ha upe téra opyta porã hese pórke upépe oñeñeʼẽ Ñandejára Rréinore. Jesús heta oñeʼẽ vaʼekue ko Rréinore (Lucas 8:1).

Umi Salón ojepuru ojeadora hag̃ua pe Dios verdadérope. Upe guive oñeorganisa pe predikasión ojejapóva upe territóriope (Mateo 24:14). Umi Salón del Reino ndahaʼéi peteĩchapa, oĩ michĩvéva ha tuichavéva, péro enterove isensíllo. Sapyʼánte mokõi térã hetave kongregasión oipuru peteĩ Salón. Umi áño ohasa vaʼekuépe oñemopuʼã térã oñemyatyrõ hetaiterei Salón del Reino (5 rupi káda día), péicha oñepytyvõ umi kongregasiónpe pórke káda áño hetave ohóvo. ¿Mbaʼéichapa ojehupyty upéva? (Mateo 19:26).

Umi Salón ojejapo umi kontrivusión voluntária rupive. Umi kontrivusión oñemondo pe sukursálpe. Upépe ojehecha mbaʼe kongregasiónpepa tekotevẽ oñepytyvõ omopuʼã térã omyatyrõ hag̃ua peteĩ Salón del Reino.

Umi Salón omopuʼã heta voluntário okovraʼỹre mbaʼeve. Heta lugárpe oñeforma umi Grúpo de Konstruksión. Umi grúpope oĩ ombaʼapóva de tiémpo kompléto ha avei umi ombaʼapóva peteĩ tiémporente. Opa rire peteĩ traváho, haʼekuéra ova ótro lugár oñekotevẽhápe peteĩ Salón upe paíspe. Ko grúpo oho umi lugár mombyryvehápe jepe oipytyvõ hag̃ua umi ermánope ojapo hag̃ua isalonrã. Ótro lugárpe oñenombra algúno ermáno ikatupyrývape oorganisa hag̃ua umi traváho oñemopuʼã térã oñemyatyrõ hag̃ua umi Salón. Koʼã sónape oĩ ermáno profesionál ojeofreséva oipytyvõ hag̃ua de voluntário, péro la majoría ombaʼapóva upépe haʼe hína umi ermáno upe kongregasionpegua oipurútava upe Salón. Koʼã mbaʼe ningo ojejapo Jehová espíritu rupive, ha umi ermáno oñemeʼẽmbaite rupi (Salmo 127:1; Colosenses 3:23).

• ¿Mbaʼérepa oñehenói Salón del Reino umi lugár oñembyatyhápe umi Testígo?

• ¿Mbaʼéicha rupípa ikatu oñemopuʼã umi Salón del Reino ko múndo tuichakuére?

Entéro umi Salón del Reino oguereko Ñandejára réra porãite. Upévare siémpre ipotĩ ha iporã vaʼerã, ha oñembyaíramo álgo ensegída oñemyatyrõ vaʼerã. Ñande jajapo vyʼápe umi traváho jaikuaágui péicha ñambotuichaha hína Jehovápe. Enterovéva ikatu ñaipytyvõ.

Opa rire umi rreunión ikatu jajeofrese ñamopotĩ hag̃ua. Káda rreunión opa rire oĩ ermáno ha ermána vyʼápe omopotĩʼimíva pe Salón del Reino. Una ves por semána, ojejapo peteĩ limpiésa kompléta. Peteĩ ansiáno térã siérvo ministeriál oorganisa umi traváho ojejapo vaʼerã, ha upearã osegi jepi peteĩ lísta. Asegún la oñekotevẽva, oĩ ermáno oitypeíva, orrepasáva, oipeʼáva pe yvytimbo, omohendáva umi sílla, omopotĩva váño, ventána ha espého. Oĩ avei omombóva pe yty ha omopotĩva korapy. Una ves al áño térã hetave, oñeorganisa jepi peteĩ limpiésa henerál. Ñameʼẽramo umi mitãme hembiaporã, ñamboʼe hína chupekuéra orrespeta hag̃ua pe lugár jaadorahápe Ñandejárape (Eclesiastés 5:1).

Ñaipytyvõkena tekotevẽ jave ojearregla álgo. Káda áño ojejapo peteĩ inspeksión, ojerrevisapaite mbaʼéichapa oĩ pe Salón del Reino, hyepýpe ha okápe. Ojejapo rire pe inspeksión ojehecha mbaʼeichagua traváho de mantenimiéntopa tekotevẽ ojejapo pono ojegasta hetave upe rire (2 Crónicas 24:13; 34:10). Ñandejára omerese ojeadora chupe peteĩ Salón del Reino ipotĩ ha iporãvape. Ñaipytyvõramo umi traváhope, jahechauka hína jahayhuha Jehovápe ha javaloraha pe lugár jaadorahápe chupe (Salmo 122:1). Avei umi hénte oĩva ñane Salón jerére, oñeʼẽ porãta ñanderehe (2 Corintios 6:3).

• ¿Mbaʼérepa ñañangareko vaʼerã pe Salón del Réinore?

• ¿Mbaʼe mbaʼépa ojejapo ipotĩ hag̃ua pe Salón del Reino?

¿Ndépa restudiaseve peteĩ mbaʼe oĩva la Bíbliape? ¿Reinvestigasépa peteĩ téxto, peteĩ lugár térã peteĩ persóna oñeñeʼẽha la Bíbliape? ¿Repensápa la Biblia ikatuha nepytyvõ rembohovái hag̃ua peteĩ mbaʼe ndepyʼapýva? Upéicharõ ikatu reipuru pe vivliotéka oĩva Salón del Réinope.

Oreko heta mbaʼe ikatúva nepytyvõ restudia hag̃ua. Ikatu oime ndereguerekopái umi puvlikasión ojapóva umi testígo de Jehová. Péro pe vivliotéka oĩva Salónpe oĩ umi puvlikasión ipyahuvéva ha ikatu avei oĩ heta traduksión de la Biblia, diksionário ha hetave lívro. Ikatu reipuru pe vivliotéka oñepyrũ mboyve umi rreunión térã opa rire. Oiméramo pe vivliotékape oĩ peteĩ komputadóra, katuete orekóta Watchtower Library. Péva hína peteĩ prográma orekóva hetaiterei informasión onohẽva umi testígo de Jehová ha ndahasyiete reheka hag̃ua peteĩ téma, palávra térã téxto neinteresáva.

Ideprovécho umi oñeanotávape pe rreunión héravape Mbaʼéichapa Jaiko ha Japredika vaʼerã. Repreparáta vove umi párte otokáva ndéve ko rreuniónpe, ideprovéchota ndéve pe vivliotéka. Pe ansiáno omoakãva pe rreunión Mbaʼéichapa Jaiko ha Japredika vaʼerã oñenkarga pe vivliotékare. Haʼe ojeasegura vaʼerã orekópa hína umi puvlikasión ipyahuvéva ha oĩpa ordenádo. Haʼe térã upe nembostudiáva ikatu ohechauka ndéve mbaʼéichapa retopakuaa pe informasión reikotevẽva. Ndovaléi ojegueraha pe vivliotékagui ni peteĩ puvlikasión ni jaskrivi hese, ha siémpre jaipuru porã vaʼerã umíva.

La Biblia heʼi ‘reikuaa porã hag̃ua Ñandejárape’ tekotevẽha reñehaʼã “rehekarõguáicha umi pláta yvyguy” (Proverbios 2:1-5). Pe vivliotéka oĩva Salón del Réinope ikatu nepytyvõ upearã.

• ¿Mbaʼe mbaʼépa oreko pe vivliotéka oĩva Salónpe?

• ¿Mávapa ikatu nepytyvõ reipurukuaa hag̃ua pe vivliotéka?

Jesucristo heʼi vaʼekue: “Peẽ pehesape vaʼerã umi hénte renondépe, ikatu hag̃uáicha haʼekuéra ohecha umi mbaʼe porã pejapóva ha ombotuicha pende Ru oĩva yvágape” (Mateo 5:16). Upearã umi Testígo oipuru porã pe teknolohía, por ehémplo Internét. Pe páhina de Internét héra jw.org, ha upépe oĩ heta informasión oexplikáva mbaʼépa oguerovia ha ojapo umi testígo de Jehová. ¿Mbaʼépa retopáta pe páhina de Internétpe?

Oñekontesta umi pregúnta ointeresavéva la héntepe. Ikatu retopa informasión okontestáva umi pregúnta iñimportánteva. Por ehémplo umi tratádo ¿Opánepa umi sufrimiénto?, ha ¿Ikatu piko oikove jey umi omano vaʼekue?, oĩma pe páhinape mas de 900 idiómape. Avei retopáta la Biblia Traducción del Nuevo Mundo mas de 160 idiómape ha heta informasión nepytyvõkuaáva restudia hag̃ua la Biblia. Por ehémplo pe lívro ¿Mbaʼépa ñanemboʼe la Biblia?, ha umi rrevísta osẽ meméva Ñemañaha ha ¡Despertad! Heta koʼã puvlikasión ikatu relee térã rehendu Internétpe voi, térã remboguejy koʼã formátope: MP3, PDF ha EPUB. Ikatu avei reimprimi álgo ndegustáva rekomparti hag̃ua ótra persónandi iñidiómape. Oĩ avei vidéo heta lenguaje de séñaspe, audiodráma, dráma bíblico ha músika igustoitereíva.

Oĩ informasión oñeʼẽva umi testígo de Jehováre. Pe sítio de Internétpe ikatu retopa umi notísia ipyahuvéva ha vidéo ohechaukáva mbaʼépa ojapo umi testígo de Jehová ko múndo tuichakuére. Oñemombeʼu avei mbaʼépa ohasa umi ermáno oikóva diferénte lugárpe, ha mbaʼépa ojejapo oñepytyvõ hag̃ua umi ermáno ohasa asývape. Retopáta avei mbaʼe asambléapa ojejapóta ha umi informasión oñeʼẽva umi sukursál rehe.

Péicha umi enseñánsa oporohesapéva og̃uahẽ mombyryveha peve ko yvy ape ári. Umi hénte oikóva oparupiete, Antártidape jepe oñevenefisia hína koʼã mbaʼégui. Roñemboʼe “ikatu hag̃uáicha Jehová ñeʼẽ osegi iñasãi pyaʼe” opárupi, ha péicha toñemombaʼeguasu chupe (2 Tesalonicenses 3:1).

• ¿Mbaʼéichapa jw.org oipytyvõ heta héntepe oaprende hag̃ua la Biblia heʼíva?

• ¿Mbaʼe informasiónpa rehekase pe páhina de Internétpe?