Heta hénte ndohovéi ijiglésiape pórke noipytyvõi chupekuéra oñemoag̃uive hag̃ua Ñandejárare ha noñemeʼẽi chupekuéra konsuélo. Upéicharõ, ¿mbaʼére reho vaʼerã umi rreunión ojapóvape umi testígo de Jehová? ¿Mbaʼépa rehechakuaáta upépe?

Revyʼáta umi hénte ojoayhúva ha iñamávleva apytépe. Síglo primérope umi kristiáno oñembyaty vaʼekue por kongregasión. Haʼekuéra oho rreunionhápe oadora hag̃ua Ñandejárape, ostudia hag̃ua Ñandejára Ñeʼẽ ha oñomokyreʼỹ hag̃ua (Hebreos 10:24, 25). Haʼekuéra oñembyaty iñermanokuérandi ha ojoayhu rupi hikuái oñandu oĩha iñamigokuéra apytépe (2 Tesalonicenses 1:3; 3 Juan 14). Koʼág̃a jajapóvo haʼekuéra ojapo haguéicha javyʼaiterei.

Rehechakuaáta la Biblia omboʼéva ikatuha nepytyvõ. La Biblia heʼi ymaite guive kuimbaʼe, kuña, ha mitãnguéra oñembyaty hague oñondivepa. Umi Testígo koʼág̃a ojapo avei upéicha. Oĩ kuimbaʼe ikatupyrýva oporomboʼe hag̃ua ha oipurúva la Biblia ohechauka hag̃ua mbaʼéicha ikatu jasegi umi konsého káda día (Deuteronomio 31:12; Nehemías 8:8). Enterove ohóva rreunionhápe ikatu ohechauka mbaʼeichaitépa ojerovia, okontestávo umi pregúnta ha opurahéivo umi kántiko (Hebreos 10:23).

Ikatu remombarete nde jerovia Ñandejárare. Apóstol Pablo heʼi vaʼekue peteĩ kongregasión itiémpope guarépe: “Hiʼãite chéve pohechami, [...] ikatu hag̃uáicha káda uno ñañomokyreʼỹ ñande jerovia rupive, peẽ ha che avei” (Romanos 1:11, 12). Jajeheʼávo ñane ermanokuérare rreunionhápe ñamombareteve ñande jerovia ha ñanekyreʼỹve jaiko hag̃ua la Biblia heʼiháicha.

Nde reñeinvita reho hag̃ua rreunionhápe, péicha ndete rehecháta siertoha umi mbaʼe jahecha vaʼekue ko leksiónpe. Enterove ovyʼaitereíta reho haguére. Upépe ndojejeruréi pláta ha ndojejapói kolékta.

• ¿Máva ehémplopa osegi umi Testígo ojapo hag̃ua irreunionkuéra?

• ¿Mbaʼéichapa umi rreunionkuéra ikatu ñanepytyvõ?

Umi testígo de Jehová siémpre oho rreunionhápe opytáramo jepe mombyry térã tiémpo vaírõ jepe. Avése heta ñaneprovléma térã ñanekaneʼõ traváho rire, péro lomímonte ñañehaʼãmbaite ñañembyaty ñane ermanokuéra ndive, ¿mbaʼére piko jajapo upéva?

Ñanepytyvõ rupi ñambohovái hag̃ua umi provléma. Apóstol Pablo heʼírõ guare tekotevẽha ñañembyaty heʼi avei: “Ñañeinteresákena ojuehe” (Hebreos 10:24). Upéva heʼise jajokuaa porãve vaʼerãha. Péicha apóstol Pablo ñanemokyreʼỹ jajepyʼapy ha ñañeinteresa hag̃ua ojuehe ñande pyʼaite guive. Jaikuaa porãvévo ñane ermanokuéra oĩvape kongregasiónpe jahechakuaáta oaguantaha hikuái heta mbaʼe ijetuʼúva ñande jahasáva avei. Haʼekuéra ikatu ñanepytyvõ jasegi hag̃ua ñaaguanta.

Ñanepytyvõ rupi jareko hag̃ua amígo verdadéro. Umi ermáno oñembyatýva rreunionhápe ñanendive ndahaʼéi extráño síno ñane amígo. Heta vése jahasa tiémpo oñondivepa jajediverti hag̃ua. ¿Mbaʼépepa ñanepytyvõ ñaime ñane ermanokuéra ndive? Ñanepytyvõ jajoayhuve ha jajovalora hag̃ua éntre ermáno. Ha peteĩva ohasárõ peteĩ mbaʼe ijetuʼúva ñande ñaĩma ñaipytyvõ hag̃uáicha chupe pyaʼe porã (Proverbios 17:17). Jajeheʼa memérõ entéro ermanokuérare oĩva kongregasiónpe, jahechauka ‘jajepyʼapyha umi ótrore’ (1 Corintios 12:25, 26).

Hiʼãite reelehi ne amigorã umi ojapóva Ñandejára oipotáva. Retopakuaa umichagua amígo umi testígo de Jehová apytépe. Aníkena reheja mbaʼeve ndejoko reñembyaty hag̃ua hendivekuéra.

• ¿Mbaʼérepa iñimportánte jaha rreunionhápe?

• ¿Arakaʼépa ikatu reho reikuaa hag̃ua pe kongregasión?

Yma umi kristiáno ypykue oñembyatýrõ guare, opurahéi, oñemboʼe, olee ha ohesaʼỹijo Ñandejára Ñeʼẽ. Umi rreunión isensíllo vaʼekue (1 Corintios 14:26). Reho vove umi rreunionhápe rehecháta ojejapoha avei upéicha.

Umi enseñánsa oñeguenohẽ la Bíbliagui ha ñanepytyvõ. Káda fin de semána umi kongregasión oñembyaty ohendu hag̃ua peteĩ diskúrso bíblico ipukúva 30 minúto. Koʼã diskúrsope oñemombeʼu mbaʼéichapa la Biblia ñanepytyvõ ko tiémpope. Avei oñemokyreʼỹ káda únope olee hag̃ua umi téxto ibíbliape. Upe rire, ojejapo pe Ñemañaha Ñehesaʼỹijo, ipukúva una óra. Upépe ojestudia peteĩ artíkulo oĩva pe rrevísta Ñemañahápe ha enterove ikatu okontesta ojejapo jave umi pregúnta. Upe estúdio ñanepytyvõ jajapo hag̃ua umi mbaʼe ñaaprendéva la Bíbliagui. Ko yvy tuichakuére oĩ 120.000 kongregasiónrupi, ha káda únope ojestudia la mísma informasión.

Ñanembokatupyry ñaporomboʼe hag̃ua. Éntre semanakue oĩ peteĩ rreunión orekóva 3 párte hérava Mbaʼéichapa Jaiko ha Japredika vaʼerã. Ko rreuniónpe ojepuru pe prográma rreuniónpe g̃uarã osẽva káda mes. Pe primera párte héra Tesóro oĩva Ñandejára Ñeʼẽme. Ko párte ñanepytyvõ ñantende porãve hag̃ua umi téxto oĩva pe lektúra semanálpe. Upéi ojejapo pe párte hérava Ñamboʼe porãve hag̃ua. Upépe ojejapo demostrasión ohechaukáva mbaʼéichapa ikatu ñañemongeta la héntendi la Bíbliare. Upéi pe odirihíva heʼi umi opartisipávape mbaʼépepa ikatu omehora oporomboʼe jave (1 Timoteo 4:13). Ha pe última rreunión héra Jahechaukákena jaserviha Jehovápe. Ko pártepe oñeanalisa mbaʼéichapa umi konsého oĩva la Bíbliape ikatu ñanepytyvõ. Ha ojejapo jepi avei pregúnta ikatu hag̃uáicha oñekontesta. Umíva ñanepytyvõ ñantende porãve hag̃ua la Biblia.

Reho vove rreunionhápe, rehecháta mbaʼeichaitépa oñemboʼe porã upépe la Biblia, ha upéva katuete nesorprendéta (Isaías 54:13).

• ¿Mbaʼe mbaʼépa ojejapo umi rreuniónpe?

• Umi rreunión ojejapóvagui káda semána, ¿mavaitévapepa rehose primeroite?

¿Rehechakuaápa ko follétope umi testígo de Jehová oñemonde porãha oho hag̃ua rreunionhápe? ¿Mbaʼérepa oñatende hikuái ipíntare ha oñemonde lájare?

Péicha jahechauka jarrespetaha Ñandejárape. Añetehápe ningo Ñandejára nomañái ñane píntarente (1 Samuel 16:7). Péro ñañembyaty jave jaadora hag̃ua Ñandejárape, jahechaukase jarrespetaha chupe ha umi ermánope. Por ehémplo, jahátaramo trivunálpe ha ñañepresenta peteĩ hués renondépe, katuete ñañemonde porãta jarrespetágui chupe. Upéicha avei ñañemonde porãvo jaha hag̃ua rreunionhápe jahechauka hína jarrespetaha Ñandejára Jehovápe, haʼéva “pe Hués ohusgáva ko yvy kompletoite”. Avei jahechauka jarrespetaha pe lugár jaipurúva ñañembyaty hag̃ua (Génesis 18:25).

Péicha jahechauka jaikoha la Biblia heʼiháicha. La Biblia heʼi umi kristiáno oñemonde jave ohechauka vaʼerãha “opororrespetaha ha iñakãguapyha” (1 Timoteo 2:9, 10). Ikatu jahechauka ‘japororrespetaha’ ñamondévo ao isensíllova, ani umi ao ñandejopýva térã oñemañamba hag̃uáicha ñanderehe. Ha ‘ñaneakãguapýramo’ jaelehi porãta ñande ao, ani umi ichalaipáva térã ikachafáva. Ko konsého ndeʼiséi ñañemonde vaʼerãha peteĩchapa, káda uno ikatu oelehi umi ao ogustáva chupe ha ombovyʼáva Ñandejárape. Upéicha jaʼeʼỹre mbaʼeve ñañemonde lája omoporãvéta pe enseñánsa oúva Ñandejáragui ha avei ‘ombotuicháta Ñandejárape’ (Tito 2:10; 1 Pedro 2:12). Umi hénte ohechávo mbaʼéichapa ñañemonde oñeʼẽ porãta Jehová organisasión rehe.

Aníkena nderehói rreunionhápe ndereguerekói rupi ao hepy ha iporãitereíva. La iñimportánteva hína ñande ao ipotĩ ha idesénte.

• ¿Mbaʼérepa iñimportánte ñañemonde porã jaadora hag̃ua Ñandejárape?

• ¿Mbaʼe konséhopa ñanepytyvõ jaelehi porã hag̃ua ñande ao?

Oimérõ restudia hína la Biblia peteĩ testígo de Jehovándi, katuete restudia neañohápe pe leksión otokáva peẽme. Ideprovechove hag̃ua ndéve umi rreunión, iporãta avei restudiárõ reho mboyve. Reguerekóramo peteĩ prográma de estúdio ifasilvéta ndéve rejeprepara porã hag̃ua.

Mbaʼe lugár ha mbaʼe moménto opyta porãve ndéve. ¿Mbaʼe moméntopepa ikatu reñekonsentrave restudia hag̃ua? ¿Pyharevete rembaʼapo mboyve, térãpa pyhare umi mitã okepa rire? Ndaikatúiramo jepe remboyke hetaiterei tiémpo restudia hag̃ua iporãta redesidi mboy tiémpopa reipurúta upearã. Ani reheja mbaʼeve oipeʼa ndehegui pe tiémpo remboyke vaʼekue. Rehecha vaʼerã peteĩ lugár ikatutahápe reime trankílo, ha eipeʼa opa mbaʼe ikatúva ndedistrae, por ehémplo embogue pe rrádio, téle ha nde selulár. Reñepyrũ mboyve iporãta reñemboʼe Ñandejárape, upéva nepytyvõta reñekonsentra hag̃ua Ñandejára Ñeʼẽre ha pono repensaiterei umi mbaʼe ndepyʼapývare (Filipenses 4:6, 7).

Emarka umi idéa iñimportantevéva repartisipa hag̃ua. Primeroite ehecha mbaʼe rehepa oñeʼẽ pe informasión. Emaña pe título orekóvare pe artíkulo térã kapítulo, upéi ikatu rehecha umi subtítulo ha epensa mbaʼéichapa oho pe témare. Emaña avei umi fóto ha divúhore, ha umi pregúnta de rrepásore, koʼãva ningo ñanemomanduʼa umi idéa iñimportantevévare. Upéi elee umi pregúnta ha eleekuévo umi párrafo eñehaʼã etopa umi rrespuésta. Eheka umi téxto ha epensa mbaʼéichapa umíva oho pe témare (Hechos 17:11). Retopa vove umi rrespuésta, ikatu remarka algúna palávra térã fráse nepytyvõtava nemanduʼa hag̃ua umi rrespuéstare. Nde reipotáramo ikatu rehupi nde po ha ejapo peteĩ komentário mbykymíva rreunionhápe. Iporãta ndete voi reprepara la erétava ani hag̃ua releénte oĩháicha pe párrafope.

Restudiávo umi diferénte téma oñeanalisáva káda semána umi rreunionhápe, katuete reikuaavéta umi mbaʼe omboʼéva la Biblia, ha péicha rembohetavéta umi ‘tesóro’ rekonsegíva releévo Ñandejára Ñeʼẽ (Mateo 13:51, 52).

• ¿Mbaʼéichapa ikatu restudia umi rreuniónpe g̃uarã?

• ¿Mbaʼéichapa ikatu rejeprepara rekomenta hag̃ua rreunionhápe?

Ymaite guivéma Jehová omanda umi famíliape ohasa hag̃ua tiémpo oñondive ikatu hag̃uáicha omombarete hikuái ijerovia ha oĩve hag̃ua unído (Deuteronomio 6:6, 7). Upévare umi testígo de Jehová káda semána omboyke tiémpo ostudia hag̃ua ha péicha oadora hikuái oñondivepa Jehovápe. Ojestudia peteĩ téma ou porãtava pe famíliape, ha ojejapo enterovépe igústo hag̃uáicha. Umi oikóva haʼeño ikatu avei oinvestiga peteĩ téma ogustáva chupe ha péicha oñemoag̃uive Ñandejárare.

Pe estúdio de família ñanemoag̃uive Jehováre. La Biblia heʼi: “Peñemoag̃uíkena Ñandejárare, ha haʼe oñemoag̃uíta penderehe” (Santiago 4:8). Jaleéramo la Biblia jaikuaa porãve Jehovápe ha umi mbaʼe haʼe ojapóva, ha péicha ñañemoag̃uive hese. Peñepyrũ hag̃ua pejapo pe estúdio de família, ikatu pelee la Biblia oñondive en vos álta ha pesegi pe prográma oĩva rreuniónpe g̃uarã, pe párte héravape Mbaʼéichapa Jaiko ha Japredika vaʼerã. Ikatu káda uno olee peteĩ párte, ha upéi peñemongeta umi mbaʼe peaprendévare.

Pe estúdio de família ñanemoag̃uive ojuehe. Umi ména ha tembireko, umi túa ha ifamília ikatu oñemoag̃uive ojuehe ojapóvo pe estúdio de família. Upéva ojejapo vaʼerã vyʼa ha pyʼaguapýpe, ha enterove ohaʼarõma vaʼerã og̃uahẽ upe moménto pórke igustoiterei. Ereko vaʼerã enkuénta mboy áñopa oreko ne família reelehi porã hag̃ua mbaʼépa pestudiáta. Ikatu petopa heta téma rrevísta ¡Despertad!, ha Ñemañaháme, térã pe sítio oĩvape Internétpe, jw.org. Ikatu peñemongeta umi provléma ne família oguerekóvare eskuélape ha mbaʼéichapa ikatu oaguanta. Pehechakuaa peteĩ prográma osẽva JW Broadcasting-pe (tv.jw.org), ha upéi peñemongeta hese. Ikatu avei pepurahéi umi kántiko ojepurahéitava rreunionhápe, ha peʼu álgo opa rire pe estúdio.

Péva ningo peteĩ moménto iporãitereíva umi família orekóva káda semána, umícha jave haʼekuéra oadora Jehovápe ha ovyʼa ostudiávo la Biblia. Ha Ñandejára katuete nevendesíta nde rejapóramo avei upéicha (Salmo 1:1-3).

• ¿Mbaʼérepa umi Testígo oipuru itiémpo ojapo hag̃ua pe estúdio de família?

• ¿Mbaʼépa ikatu ojapo tuakuéra igústo hag̃ua pe estúdio de família?

¿Mbaʼérepa ovyʼaite umi hénte rehecháva koʼã fótope? Pórke haʼekuéra oĩ umi aty guasúpe. Ñandejára ningo omanda vaʼekue isiervokuéra yma guarépe oñembyaty hag̃ua 3 vése al áño, upéicha avei koʼág̃arupi umi Testígo ovyʼaiterei oñembyaty jave umi grúpo tuichávape (Deuteronomio 16:16). Káda áño ojejapo 3 aty guasu. Dos vése ojejapo pe aty guasu un diagua ha una ves ojejapo pe aty guasu tres diagua. ¿Mbaʼéichapa koʼã aty guasu ñanepytyvõ?

Ñanemoag̃uive ñane ermanokuérare. Umi israelita ovyʼa vaʼekue ikatu haguére oadora Jehovápe umi “aty guasúpe”, upéicha avei javyʼa ñañembyatývo jaadora hag̃ua Ñandejárape (Salmo 26:12; 111:1). Koʼã aty guasúpe ñañembyaty ñane ermanokuéra oĩvandi ótro kongregasiónpe, ha oĩ avei ermáno oúva ótro paísgui. Ojejerure umi ohóvape ogueraha hag̃ua hembiʼurã, péicha pe asaje ojekaru oñondivepa upe lugár ojejapohápe pe asambléa. Koʼã mbaʼe ñanemoag̃uive ojuehe pórke jahasa porã ñane amigokuérandi (Hechos 2:42). Upépe jahechakuaa mbaʼéichapa pe mborayhu ñanepytyvõ ñaneunído hag̃ua ‘enterove ermanokuérandi oĩva ko múndope’ (1 Pedro 2:17).

Ñanemoag̃uive Ñandejárare. Umi aty guasu oipytyvõ vaʼekue umi israelítape, upépe ‘ontende hikuái umi mbaʼe oñemyesakãva chupekuéra’ Ñandejára Ñeʼẽgui (Nehemías 8:8, 12). Ñande avei javaloraiterei umi enseñánsa jarresivíva umi aty guasúpe. Káda asambléape oñeanalisa peteĩ téma oñeguenohẽva la Bíbliagui. Ojejapo heta diskúrso ha demostrasión, ha umíva ñanepytyvõ jajapo hag̃ua Ñandejára volunta. Ñanemokyreʼỹeterei avei ñahendúvo mbaʼéichapa umi ermáno ombohovái heta mbaʼe ijetuʼúva oservi hag̃ua Ñandejárape. Umi aty guasu tres diaguápe ojehechauka avei pelíkula bíblica, ha umíva tuicha ñanepytyvõ. Káda asambléape oĩ ojevautisáva ohechauka hag̃ua oñemeʼẽma hague Ñandejárape.

• ¿Mbaʼérepa javyʼaite umi aty guasuhápe?

• ¿Mbaʼéichapa nepytyvõta rehóramo peteĩ aty guasuhápe?

Omano mboyve Jesús heʼi vaʼekue: “Ha umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mateo 24:14). ¿Mbaʼéicha ikatúta ojepredika oparupiete ko yvýpe? Ojejapóvo Jesús ojapo haguéicha oĩrõ guare ko yvy ape ári (Lucas 8:1).

Umi Testígo oñehaʼã oñeʼẽ umi héntendi hógape. Jesús oprepara vaʼekue idisipulokuérape opredika hag̃ua umi notísia porã ogahárupi (Mateo 10:11-13; Hechos 5:42; 20:20). Umi opredika vaʼekue síglo primérope oñemeʼẽ unos kuánto território oho hag̃ua opredika (Mateo 10:5, 6; 2 Corintios 10:13). Koʼág̃a avei péicha oñeorganisa pe predikasión. Káda kongregasión oreko peteĩ território okuvri hag̃ua. Upéva oipytyvõ oñekumpli hag̃ua la Jesús omanda vaʼekue, haʼe heʼi ‘ojepredika hag̃ua umi héntepe’ (Hechos 10:42).

Umi Testígo oñeʼẽ umi héntendi tahaʼe haʼehápe. Jesús omoĩ vaʼekue ehémplo iporãitereíva opredikárõ guare oĩháme guive hénte, opredika vaʼekue mar oríllape ha peteĩ póso ypýpe ijatyhápe jepi hénte (Marcos 4:1; Juan 4:5-15). Umi Testígo avei oñeʼẽ umi héntendi la Bíbliare tahaʼe haʼehápe, por ehémplo kállepe, negósiope, plasahárupi térã teléfonorupi. Avei opyta porã jave opredika ivesínope, ikompañéro de traváhope térã de koléhio, ha ihentekuérape. Enterovetéva oñehaʼã rupi ojapo upéicha hetaiterei hénte oĩva ko yvy jerére ohendúma umi “notísia porã” heʼíva Ñandejára oporosalvaha (Salmo 96:2).

¿Remombeʼusépa algúnope ko notísia porã oñeʼẽva Ñandejára Rréinore ha ohechaukáva mbaʼépa oikóta amo gotyove? Ani reheja nembaʼerãnte ko esperánsa porãite, síno ekomparti ikatu vovéntema.

• ¿Mbaʼe ‘notísia iporãvapa’ oñemombeʼu vaʼerã?

• ¿Mbaʼéichapa umi Testígo osegi Jesús ehémplo opredika jave?

Ko palávra heʼise peteĩ persóna ohóva primeroite oavri hag̃ua peteĩ tape ikatu hag̃uáicha ótro osegi chupe. Jesús haʼe vaʼekue peteĩ prekursór pórke oñembou chupe ko yvy ape ári ojapo hag̃ua peteĩ tembiapo iporãitereíva ha oavri pe tape oipytyvõtava umi héntepe ojesalva hag̃ua (Mateo 20:28). Koʼág̃arupi kristianokuéra osegi Jesús ehémplo ha oipuru itiémpo ikatuha peve oipytyvõ hag̃ua umi héntepe ‘oiko hag̃ua chuguikuéra Jesús disípulo’ (Mateo 28:19, 20). Péicha rupi heta kristiáno oservi de prekursór.

Peteĩ prekursór oipurupaite itiémpo opredika hag̃ua. Entéro umi testígo de Jehová omboʼe umi notísia porã. Péro oĩ umi oñeorganisa porãva oservi hag̃ua de prekursór rregulár. Koʼãva oporomboʼe 70 óra káda mes, ha upearã heta oĩ ombaʼapóva mediodíante. Oĩ avei ojeelehíva oservi hag̃ua de prekursór espesiál umi lugár oñekotevẽvehápe opredikáva. Haʼekuéra opredika 130 óra térã hetave voi káda mes. Umi prekursór oiko sensillomínte ha ovyʼa hikuái pórke ojerovia Jehová omeʼẽtaha chupekuéra opa mbaʼe oikotevẽva (Mateo 6:31-33; 1 Timoteo 6:6-8). Umi ndaikatúiva ojapo upéva, oservi jepi de prekursór auxiliár ikatu jave ha opredika 30 térã 50 óra upe méspe.

Peteĩ prekursór oporopytyvõ ohayhu rupi Ñandejárape ha umi héntepe. Jesús ohechakuaa vaʼekue umi hénte oikotevẽha oikuaa Ñandejárape ha ivolunta, ha ñande koʼág̃a jahechakuaa avei upéva (Marcos 6:34). Ha ñande jaikuaa heta mbaʼe ikatúva oipytyvõ chupekuéra oreko hag̃ua esperánsa. Umi prekursór ohayhu hapichakuérape upévare ovyʼa oipurúvo itiémpo ha imbaretekue oipytyvõ hag̃ua umi héntepe oikuaa hag̃ua umi notísia porã (Mateo 22:39; 1 Tesalonicenses 2:8). Ojapo rupi koʼã mbaʼe umi prekursór ijerovia mbareteve, oñemoag̃uive Ñandejárare ha ovyʼaiterei (Hechos 20:35).

• ¿Mbaʼépa hína peteĩ prekursór?

• ¿Mbaʼépa omomýi umi prekursórpe oporopytyvõ hag̃ua?

Ymaite guive oñembokatupyry umi testígo de Jehovápe. Umi oipurupaitéva itiémpo opredika hag̃ua ikatu oho umi eskuélape ‘ojapo porã hag̃ua hembiapo Ñandejára servísiope’ (2 Timoteo 4:5).

Eskuéla de Prekursór. Umi prekursór ohupytývo un áño de servísio ikatu oho 6 díare ko eskuélape, ojejapóva jepi peteĩ Salón del Reino hiʼag̃uivévape. Ko eskuéla ojejapo oipytyvõ hag̃ua umi prekursórpe oñemoag̃uive hag̃ua Jehováre, ikatupyryve hag̃ua ha osegi hag̃ua iservísiope.

Eskuéla de Evanhelisadór. Ko eskuéla ipuku 2 mése ha ojejapo oñembokatupyryve hag̃ua umi prekursór oservímavape heta tiémpore. Haʼekuéra oĩ dispuésto oheja pe lugár oikoha oho hag̃ua oservi oĩvehápe nesesida ojepredika hag̃ua. Haʼekuéra heʼi: “¡Ápe ningo aĩ che! ¡Chemondóna chéve!”, péicha osegi Jesucristo ehémplo, haʼe ningo pe predikadór iñimportantevéva oĩ vaʼekue ko yvy ape ári (Isaías 6:8; Juan 7:29). Umi oñemondóvape mombyry tekotevẽ jepi oiko sensillove. Heta mbaʼe ikatu ipyahu chupekuéra, por ehémplo pe kultúra, umi tembiʼu, pe klíma ha tekotevẽ jepi oaprende ótro idióma. Ko eskuélape ikatu oho umi ermána ha ermáno soltéro ha avei umi omendáva, orekóva éntre 23 ha 65 áño. Ojeprepara umi prekursórpe oreko hag̃ua umi kualida oikotevẽtava iñasignasiónpe, ha oñembokatupyry chupekuéra ideprovechove hag̃ua Jehovápe ha iñorganisasiónpe.

Eskuéla Bíblica de Galaad. Oñepyrũ vaʼekue áño 1943-pe ha mas de 8.000 estudiánte ohóma ko eskuélape ha oñemondo oservi hag̃ua de misionéro “umi lugár mombyryvehápe ko yvy ape ári” (Hechos 13:47). Umi misionéro ojapo porãiterei hembiapo. Por ehémplo Perúpe og̃uahẽrõ guare umi primer misionéro ndaipóri vaʼekue ni peteĩ kongregasión, koʼág̃a katu oĩma mas de 1.000 kongregasión. Japónpe og̃uahẽrõ guare umi primer misionéro ndaipóri vaʼekue ni 10 testígo, koʼág̃a katu oĩ mas de 200.000. Umi ohóva pe eskuéla de Galaádpe ostudia porã la Biblia 5 mésere. Ko eskuélape ikatu oho umi prekursór espesiál, umi misionéro, umi betelita ha umi superintendénte de sirkuíto. Péicha oñembokatupyry chupekuéra oipytyvõ porãve hag̃ua pe tembiapo ojejapóvape ko múndo tuichakuére.

• ¿Maʼerãpa ojejapo pe Eskuéla de Prekursór?

• ¿Mávapa ikatu oho pe Eskuéla de Evanhelisadórpe?