Restudia rupi umi testígo de Jehovándi, koʼág̃a reikuaáma mbaʼépa añetehápe omboʼe la Biblia. Upéicha rupi koʼág̃a ikatu reguereko peteĩ amista Ñandejára ndive. Koʼág̃a reikuaa ikatutaha reiko vyʼápe peteĩ paraísope Ñandejára Rréino poguýpe. Umi mbaʼe reaprendéva rupive rejeroviave Ñandejára Ñeʼẽre, ha reĩ rupi pe kongregasiónpe hetaiterei vendisión rehupyty. Avei revaloraiterei mbaʼéichapa Jehová otrata porã ipuévlope (Zac. 8:23).

Rejevautisa mboyve, umi ansiáno oñembyatýta nendive peanalisa hag̃ua umi enseñánsa kristianokuéra ogueroviáva (Heb. 6:1-3). Roipotaite Jehová tanevendesi reñehaʼã haguére reikuaa porã chupe, ha amo gotyove tomeʼẽ ndéve pe rregálo porãite oprometéva ñandéve (Juan 17:3).

1. ¿Mbaʼérepa rejevautisase?

2. ¿Mávapa hína Jehová?

• ‘Jehová haʼe Ñandejára tee ko yvy ape ári ha amo yvágape avei, ha ndaipóri ótro dios’ (Deut. 4:39).

• ‘Nde nderérava Jehová, nde añoite hína Ñandejára Ndaijojaháiva ko yvy ape ári’ (Sal. 83:18).

3. ¿Mbaʼérepa iñimportánte ndéve g̃uarã reipuru Ñandejára réra?

• “Peẽ peñemboʼe vaʼerã péicha: ‘Ore Ru reiméva yvágape, toñembotuicha nde réra’” (Mat. 6:9).

• “Entéro ojeroviáva Jehová rérare ojesalváta” (Rom. 10:13).

4. ¿Mbaʼe títulopa ojepuru la Bíbliape oñeñeʼẽ hag̃ua Jehováre?

• “Jehová ningo ko yvy Apohare, haʼe ojapo opa mbaʼe oĩva pype. Haʼe hína Ñandejára opa ára g̃uarã” (Is. 40:28).

• “Ore Ru reiméva yvágape” (Mat. 6:9).

• “Ñandejára ningo mborayhu” (1 Juan 4:8).

5. ¿Mbaʼépa nde ikatu remeʼẽ Ñandejára Jehovápe?

• “Rehayhu vaʼerã Jehová nde Járape nde pyʼaite guive, nde rekove kompletoite reheve, entéro ne pensamiénto reheve, ha ne mbaretekue omeʼẽmíva reheve” (Mar. 12:30).

• “Ñandejára Jehovápe readora vaʼerã ha chupe añoite reservi vaʼerã” (Luc. 4:8).

6. ¿Mbaʼérepa neñeʼẽrenduse Jehovápe?

• “Nearandúkena che raʼy, ha embovyʼa che korasõ, péicha ikatúta ambohovái upe chedesafiávape” (Prov. 27:11).

7. ¿Mávapepa nde reñemboʼe? ¿Máva rérapepa reñemboʼe?

• “Añetehápe haʼe peẽme: pe Túa omeʼẽta peẽme oimeraẽ mbaʼe pejeruréva chupe che rérape” (Juan 16:23).

8. ¿Mbaʼe mbaʼe rehepa nde ikatu reñemboʼe?

• “Peẽ peñemboʼe vaʼerã péicha: ‘Ore Ru reiméva yvágape, toñembotuicha nde réra. Tou ne Rréino, tojejapo ne volunta ko yvy ape ári ojejapoháicha yvágape. Emeʼẽna oréve ore rembiʼurã koestediarã. Oreperdonamína ropeka haguére ore roperdonaháicha avei umi opekávape ore kóntrape. Ani reheja roʼa ñuhãme, síno oresalva Satanásgui’” (Mat. 6:9-13).

• “Jajeroviakuaa ko mbaʼére: oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta” (1 Juan 5:14).

9. ¿Mbaʼérepa ikatu nohendúi Jehová peteĩ persóna ñemboʼe?

• “Peẽ pejerure asýta ajúda Jehovápe, péro haʼe nopenamoʼãi penderehe [...] pórke peẽ penerembiapo vai” (Miq. 3:4).

• “Jehová omaña umi hembiapo porãvare, ha ohendu chupekuéra ojerure asy jave. Péro Jehová oñemoĩ umi iñañáva kóntrape” (1 Ped. 3:12).

10. ¿Mávapa hína Jesucristo?

• “Simón Pedro okontesta chupe: ‘Nde hína pe Cristo, Ñandejára oikovéva Raʼy’” (Mat. 16:16).

11. ¿Maʼerãpa Jesús ou ko yvy ape ári?

• “Che, pe Yvypóra Raʼy, ajapoháicha, che ndajúi ótro cheservi hag̃ua, síno aservi hag̃ua ótrope. Aju ameʼẽ hag̃ua che rekove, ha péicha apaga pe rreskáte aguenohẽ hag̃ua heta héntepe pekádo poguýgui” (Mat. 20:28).

• Jesús heʼi: “Aha vaʼerã ótro siudápe apredika hag̃ua umi notísia porã oñeʼẽva Ñandejára Rréinore, pórke upearã Ñandejára chembou vaʼekue” (Luc. 4:43).

12. ¿Mbaʼéichapa ikatu rehechauka reagrasedeseha Jesús sakrifísio?

• “Cristo omano enterove rehehápe ikatu hag̃uáicha umi oikovéva ndojapovéima haʼekuéra oipotávante síno ojapo hag̃ua Cristo oipotáva, haʼe omano kuri hesehapekuéra ha oñemopuʼã jey chupe” (2 Cor. 5:15).

13. ¿Mbaʼeichagua autoridápa oreko Jesús?

• “Ñandejára omoĩ che poguýpe entéro mbaʼe oĩva yvágape ha ko yvy ape ári” (Mat. 28:18).

• “Ñandejára ombotuicha Jesúspe ha omeʼẽ chupe peteĩ puésto ijyvatevéva, avei pyʼaporãme omeʼẽ chupe pe téra iporãvéva entéro umi ótro téragui” (Filip. 2:9).

14. ¿Ndépa reguerovia pe Kuérpo Governánte odirihíva testígo de Jehovápe haʼeha “pe esklávo de konfiánsa ha iñarandúva” Jesús onombra vaʼekue?

• “¿Mávapa añetehápe pe esklávo de konfiánsa ha iñarandúva? Ijára onombra vaʼekue chupe oñangareko hag̃ua umi ótro isiérvo rehe, omeʼẽ hag̃ua chupekuéra aliménto hiʼoraitépe” (Mat. 24:45).

15. ¿Pe espíritu sánto piko peteĩ persóna?

• “Pe ánhel okontesta chupe: ‘Espíritu sánto oúta nde ári ha Ñandejára Ndaijojaháiva podér nemoʼãta. Upévare pe mitã onaséta sin pekádo ha oñehenóita Ñandejára Raʼy’” (Luc. 1:35).

• “Peẽ ningo pekadór, upéicharõ jepe pemeʼẽ rregálo iporãva pende raʼykuérape. ¡Upéicharõ ningo koʼytevéntema pende Ru oĩva yvágape omeʼẽta espíritu sánto umi ojerurévape chupe!” (Luc. 11:13).

16. ¿Mbaʼéichapa Jehová oipuru ijespíritu sánto?

• “Jehová heʼi rupi ojejapo pe yvága, haʼe oipejúnte ijurúpe [nóta: ijuru espíritu rupive] ha oñepyrũ oexisti entéro mbaʼe oĩva yvágape” (Sal. 33:6).

• “Péro oñemeʼẽta peẽme podér pe espíritu sánto ou vove pende ári, ha oikóta pendehegui che testígo [...] umi lugár mombyryvehápe jepe ko yvy ape ári” (Hech. 1:8).

• ‘Ni peteĩ profesía oĩva Ñandejára Ñeʼẽme ndoúi yvyporakuéra opensávagui. Pórke umi profesía arakaʼeve noñemombeʼúi kuimbaʼekuéra oipotágui, síno pe espíritu sánto ogia umi kuimbaʼépe omombeʼu hag̃ua umi mbaʼe oúva Ñandejáragui’ (2 Ped. 1:20, 21).

17. ¿Mbaʼépa hína Ñandejára Rréino?

• “Ñandejára omoĩta peteĩ rréino núnka noñehundimoʼãiva. Ko rréino ndopytamoʼãi ótro puévlo poguýpe. Omonguʼíta ha ohundíta enterove koʼã rréino, ha ko rréino añoite opytáta opa ára g̃uarã” (Dan. 2:44).

18. ¿Mbaʼe iporãvapa ojapóta Ñandejára Rréino nderehehápe?

• “Ñandejára omokãmbaitéta umi hénte resay, ha ndaiporimoʼãvéima omanóva, oñelamentáva, hasẽva ni hasýva. Umi mbaʼe oiko vaʼekue yma opáma” (Apoc. 21:4).

19. ¿Mbaʼérepa reime segúro koʼẽrõitéma pe Rréino okumplitaha Ñandejára promesakuéra?

• “Idisipulokuéra oñemboja hendápe haʼeñoháme ha heʼi chupe: ‘Eremína oréve, ¿arakaʼe piko oikóta koʼã mbaʼe? ¿Ha mbaʼe señálpa oĩta ropilla hag̃ua nde reimemaha orendive, ha pe fin ou potaitemaha?’. Jesús okontesta chupekuéra: ‘[...] Peteĩ país opuʼãta ótro país rehe, ha umi goviérno opuʼãta ojuehe. Avei oĩta ñembyahýi, ha yvyryrýi ápe ha pépe. Ha umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin’” (Mat. 24:3, 4, 7, 14).

• “Umi ára pahápe pe situasión ijetuʼúta ha ipeligrósota. Pórke umi hénte ojepyʼapýta ijehénte, iplatarayhúta, oñembotuicháta, oñemombaʼeguasúta, oñeʼẽ vaíta Ñandejárare ha hapicháre, naiñeʼẽrendumoʼãi ituakuérape, imalagradesídota, oheja reíta hapichápe, ndohayhumoʼãi ihéntepe, ndoikoporãsemoʼãi avavéndi, oñeʼẽ reíta ótrore, ndojejokokuaamoʼãi, isalváheta, ndaijaʼemoʼãi mbaʼeve iporãvare, itraisionérota, ikaprichósota, ijorgullósota, ojapóta chupekuéra ogustávante ohayhu rangue Ñandejárape, haʼetétavaicha oservíva Ñandejárape, péro hekovére ohechaukáta ndoikoiha upéicha” (2 Tim. 3:1-5).

20. ¿Mbaʼéichapa nde rehechauka pe Rréino iñimportanteha ndéve g̃uarã?

• “Pemotenonde meméke Ñandejára Rréino ha umi mbaʼe haʼe heʼíva iporãha” (Mat. 6:33).

• “Jesús heʼi idisipulokuérape: ‘Oĩramo chemoirũséva, toñembyesarái ijehegui, toasepta umi sufrimiénto, ha tachemoirũ meme’” (Mat. 16:24).

21. ¿Mávapa Satanás ha umi demónio?

• “Pende ru hína pe Diablo [...]. Haʼe oñepyrũrõ guare oñeʼẽ vai Ñandejárare oiko chugui peteĩ asesíno” (Juan 8:44).

• “Oñemombo ko yvýpe pe dragón guasúpe, haʼéva hína pe mbói ypykue oñehenóiva Diablo ha Satanás. Haʼe ombotavy ko múndo kompletoitépe. Oñemombo chupe ko yvýpe ha hiʼanhelkuérape avei oñemombo hendive” (Apoc. 12:9).

22. ¿Mbaʼépa Satanás heʼi Jehová kóntrape ha avei isiervokuéra kóntrape?

• “Pe kuña heʼi pe mbóipe: ‘Umi yva orekóva umi yvyramáta oĩva guive ko hardínpe ningo ore ikatu roʼu. Péro pe yvyramáta oĩvare hardín mbytépe, Ñandejára heʼíma oréve: “Aníke peʼu hiʼa, ha animoʼãke pepoko hese, cháke pejapóramo upéva, pemanóta”’. Upépe pe mbói heʼi pe kuñáme: ‘Peẽ ningo ni mbaʼevéicharõ napemanomoʼãi. Ñandejára oikuaa porã peʼuha árape pe yva pejesapeʼataha, ha pejoguáta Ñandejárape ha peikuaáta mbaʼépa iporã ha mbaʼépa ivai’” (Gén. 3:2-5).

• “Satanás heʼi Jehovápe: ‘Peteĩ persóna oĩramo omano hag̃uáicha, omeʼẽta entéro mbaʼe orekóva osalva hag̃ua hekove’” (Job 2:4).

23. ¿Mbaʼéichapa nde ikatu rehechauka japuha umi mbaʼe heʼíva Satanás?

• ‘Eservi Ñandejárape nde pyʼaite guive’ (1 Crón. 28:9).

• “Amano meve asegíta cheñeʼẽrendu” (Job 27:5).

24. ¿Mbaʼérepa ñamano?

• “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro persónape pórke enterovéva opeka” (Rom. 5:12).

25. ¿Mbaʼépa oiko umi omano vaʼekuégui?

• “Umi oikovéva oikuaa omanotaha, péro umi omanómava ndoikuaavéima mbaʼevete asy” (Ecl. 9:5).

26. ¿Mbaʼépa la Biblia opromete oikotaha umi omanóvagui?

• ‘Oñemoingove jeýta umi ihústova ha iñinhústovape’ (Hech. 24:15).

27. ¿Mboy persónapa ohóta yvágape ogoverna hag̃ua Jesús ndive?

• “Ahecha pe Ovecha Raʼy oñemboʼýva pe Sérro Siónpe, ha hendive 144.000 orekóva isyváre pe Ovecha Raʼy réra ha avei Itúa réra” (Apoc. 14:1).

Restudiávo la Biblia reikuaáma mbaʼépa Jehová ohaʼarõ ndehegui ha mbaʼépa rejapo vaʼerã rekumpli hag̃ua haʼe oipotáva. Upévare rehejáma heta mbaʼe yma rejapo vaʼekue ha nerepensavéima yma guaréicha. Koʼág̃a rejedesidíma reikotaha Jehová léi heʼiháicha, upévare ikatúma reservi iñorganisasión ndive ha repredika umi notísia porã. Umi pregúnta jahechátava koʼág̃a nepytyvõta siémpre ereko hag̃ua enkuénta Jehová mandamiénto. Avei nemomanduʼáta umi mbaʼe rejapo vaʼerã reservi hag̃ua chupe haʼe ndeguerohory hag̃ua. Ko informasión nepytyvõta rehechakuaa hag̃ua iñimportanteha jaservi Jehovápe konsiénsia potĩ reheve ha tekotevẽha jajapo entéro mbaʼe ñamombaʼeguasu hag̃ua chupe (2 Cor. 1:12; 1 Tim. 1:19; 1 Ped. 3:16, 21). Nde ningo hetáma reprogresa restudia rupi la Biblia. Upévare oime vaʼerã rejapose voi Jehová ojeruréva ha reĩse iñorganisasiónpe. Koʼã pregúnta ha umi téxto bíblico nepytyvõta rentende porãve hag̃ua mbaʼépa rejapo vaʼerã reñemoĩ hag̃ua Jehová poguýpe, tahaʼe kongregasiónpe, ne famíliape térã neñeʼẽrendúvo umi goviérnope. Katuete remombaʼevéta umi mbaʼe Jehová ojapóva omombarete ha ombokatupyry hag̃ua ipuévlope, umíva apytépe umi rreunión. Oiméne nde rehoseterei voi upépe ha repartisipase. Ko párte nepytyvõta avei rehechakuaa hag̃ua iñimportanteha siémpre repredika umi notísia porã. Péicha reipytyvõta ótrope oikuaa hag̃ua Jehovápe ha oikuaa hag̃ua mbaʼépa haʼe ojapo yvyporakuéra rehehápe (Mat. 24:14; 28:19, 20). Avei ko párte nepytyvõta rehechakuaa hag̃ua iñimportantetereiha pe desisión reñemeʼẽvo Jehovápe ha rejevautisa. Jehová ningo ohechaukáma imbaʼeporãitereiha nendive, ha upéva nemomýi reservise hag̃ua chupe. Reĩ vaʼerã segúro Jehová omombaʼeha la rejapóva.

1. ¿Mbaʼépa heʼi la Biblia pe matrimóniore? Asegún la Biblia, ¿mbaʼe káso añoitépepa peteĩ persóna ikatu ojedivorsia?

• “¿Ndapeleéiva piko Ñandejára ojapórõ guare iñepyrũme umi persónape, ojapo hague kuimbaʼe ha kuña? Haʼe heʼi vaʼekue: ‘Upévare pe kuimbaʼe ohejáta itúa ha isýpe, opytáta hembirekóndi, ha mokõivégui oikóta peteĩntema’. Upéicha rupi, haʼekuéra ndahaʼevéima mokõi, síno peteĩntema. Upévare, ani avave osepara ojuehegui Ñandejára ombojoaju vaʼekue. [...] Oimeraẽ ojedivorsiáva hembirekógui, ndahaʼéiramo pe kuña hekovai haguére, ha upéi omenda jey ótrare, pe kuimbaʼe oporomoakãratĩ hína” (Mat. 19:4-6, 9).

2. ¿Mbaʼérepa peteĩ kuña ha peteĩ kuimbaʼe oikóva oñondive omenda vaʼerã pe léi heʼiháicha? Oiméramo nde remenda, ¿reimépa segúro ne matrimónio oĩha rrehistrádo pe léi heʼiháicha?

• “Esegíkena emomanduʼa umi ermánope iñeʼẽrendu ha oñemoĩ vaʼerãha umi goviérno ha autoridakuéra poguýpe” (Tito 3:1).

• “Enterovéva orrespeta vaʼerã pe matrimónio. Ha ména ha tembireko ni mbaʼevéicharõ ndovaléi oñomoakãratĩ, pórke Ñandejára okondenáta umi hekovaívape ha umi oporomoakãratĩvape” (Heb. 13:4).

3. ¿Mbaʼeichagua rresponsavilidápa nde ereko ne famíliape?

• “Che raʼy, ehendúke nde túape ndekorrehi jave, ha ani remboyke umi konsého nde sy omeʼẽva ndéve” (Prov. 1:8).

• “Pórke pe ména ningo omoakã hína hembirekópe, Cristo omoakãháicha pe kongregasión. [...] Menakuéra, pesegíkena pehayhu pene rembirekópe, Cristo ohayhu haguéicha pe kongregasión” (Efes. 5:23, 25).

• “Peẽ tuakuéra, ani pedesahusia pene famíliape, síno pesegi pemongakuaa, pekorrehi ha peñemoñeʼẽ chupekuéra Jehová heʼiháicha” (Efes. 6:4).

• “Mitãnguéra, peneñeʼẽrendúkena pende tuakuérape entéro mbaʼépe, pórke upéva ogusta ñande Ruvichápe” (Col. 3:20).

• “Peẽ tembirekokuéra peñemoĩ vaʼerã pene ména poguýpe” (1 Ped. 3:1).

4. ¿Mbaʼérepa ñamombaʼe vaʼerã ñande rekove?

• “[Ñandejára] haʼe hína upe omeʼẽva enterovépe hekove, pe áire jarrespira hag̃ua ha entéro mbaʼe. [...] Haʼe rupive ningo jaikove, jakuʼe ha jaexisti” (Hech. 17:25, 28).

5. ¿Mbaʼérepa ndovaléi japorojuka, ni peteĩ mitã nonaséivape gueteri?

• “Oĩramo kuimbaʼe oñorairõva ha upeichahápe olastima hikuái peteĩ hyeguasúvape [...] omanóramo pe mitã térã isy, upéicharõ ojejuka vaʼerã avei pe oporojuka vaʼekuépe” (Éx. 21:22, 23).

• “Nde ningo cherecháma kuri che sy retepýpe. Nde lívrope oĩma vaʼekue opaite mbaʼe che rete oñeforma mboyve jepe, nde lívrope oĩma vaʼekue mbaʼéichapa che rete okakuaáta ohóvo” (Sal. 139:16).

• ‘Jehovápe ombojeguaru umi ojukáva hénte inoséntepe’ (Prov. 6:16, 17).

6. ¿Mbaʼépa Ñandejára heʼi pe tuguýre?

• “Pemboykete pe tuguy, ani peʼu umi animál ojejuvy vaʼekue roʼokue” (Hech. 15:29).

7. ¿Mbaʼérepa jahayhu vaʼerã ñane ermáno ha ermanakuéra oservívape Jehovápe?

• “Ameʼẽ peẽme peteĩ mandamiénto pyahu: pejoayhu vaʼerã. Che pohayhu haguéicha, peẽ pejoayhu vaʼerã avei. Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:34, 35).

8. Ani hag̃ua ova ótrore peteĩ mbaʼasy ikontahiósova ha ikatúva oporojuka: a) ¿Mbaʼérepa pe persóna hasýva ojekuida vaʼerã ani hag̃ua oporoañuã ni oporohetũ? b) ¿Mbaʼérepa pe persóna ndaipochýi vaʼerã oĩramo noinvitaséiva chupe hógape? c) Oiméramo peteĩ persóna oikuaa ikatu hague ova hese peteĩ mbaʼasy ivaíva, ¿mbaʼérepa iporãta haʼe voi odesidi ojapoka análisis de sángre oñemoĩ mboyve de nóvio? d) Oĩramo algúno orekóva peteĩ mbaʼasy ikatúva ova ótrore, ¿mbaʼérepa omombeʼu vaʼerã pe koordinadór del kuérpo de ansiánope ojevautisa mboyve?

• “Aníke peike déudape. Péro si pereko ko ovligasión: pejoayhu vaʼerã. [...] ‘Rehayhu vaʼerã nde rapichápe nde voi rejehayhuháicha’. Pe persóna oporohayhúva ndojapói mbaʼeve ivaíva hapicháre” (Rom. 13:8-10).

• “Ani pejepyʼapy umi mbaʼe peẽme okonvenívarente, síno pejepyʼapy vaʼerã avei umi ótrore” (Filip. 2:4).

9. ¿Mbaʼérepa Jehová oipota ñaperdona ñande rapichápe?

• “Pesegíkena peñoaguanta ha peñoperdona pende pyʼaite guive, oĩramo jepe penembopochýva peteĩ mbaʼére. Jehová peneperdona haguéicha ipyʼaite guive, peẽ pejapo vaʼerã avei upéicha” (Col. 3:13).

10. ¿Mbaʼépa rejapo vaʼerã oĩramo oñeʼẽ vaíva nderehe térã nekalumniáva, térã oĩramo nedesepsionáva?

• “Upéicharõ ne ermáno opekáramo ne kóntrape, tereho ha peneañoháme ehechauka chupe mbaʼépepa ofalla. Nerendúramo, reipytyvõ ne ermánope oho jey hag̃ua tape porãre. Péro nanerendúiramo katu egueraha nendive peteĩ térã mokõi testígo, ikatu hag̃uáicha mokõi térã mbohapy persóna heʼíva rupive, ojekuaa siértopa entéro mbaʼe ojeʼéva. Ha nohendúiramo chupekuéra, emombeʼu kongregasiónpe. Ha nohendúiramo ni kongregasiónpe katu, etrata chupe peteĩ ojeroviaʼỹvaicha ha peteĩ impuésto kovraháramo” (Mat. 18:15-17).

11. ¿Mbaʼépa Jehová opensa koʼã pekádore?

▪ Tekovai

▪ Ojeadora umi taʼangápe

▪ Kuimbaʼe orekóva rrelasión sexuál kuimbaʼéndi, ha kuña kuñándi

▪ Ñemonda

▪ Ojapóva apuésta ha ohugáva plátare

▪ Ikaʼúva

• “Ani peñembotavy pendejupe. Umi hekovaíva, oadoráva taʼanga, oporomoakãratĩva, kuimbaʼe oikóva kuñáramo, kuimbaʼe orekóva rrelasión sexuál kuimbaʼéndi, omondáva, noñekontentáiva ha oipota potavéva, ikaʼúva, heʼíva japu hapicháre, ha ombotavýva hapichápe, ni peteĩva koʼãichagua persóna ndoikemoʼãi Ñandejára Rréinope” (1 Cor. 6:9, 10).

12. Pe tekovaípe ningo oike heta lája rrelasión sexuál noĩporãiva, upévare ¿mbaʼépa nde redesidi rejapotaha?

• “Pediparáke oimeraẽ mbaʼe ikatúvagui pendegueraha tekovaípe” (1 Cor. 6:18).

13. ¿Mbaʼérepa ndovaléi reipuru mbaʼeveichagua sustánsia neenvisiáva térã oafektátava ne ménte, ndahaʼéiramo omandágui ndéve peteĩ doktór?

• ‘Pemeʼẽ chupe pende rete ha pende rekove pemeʼẽrõguáicha peteĩ ofrénda sagráda, Ñandejára oaseptátava. Ha peipuru pene akã ha pene pensamiénto peservi hag̃ua chupe. Anive pejoguase umi hénte oĩvape ko múndope, síno pekambia pepensa lája, péicha peẽ voi pekambiaitéta. Ha ikatúta peikuaa porã Ñandejára volunta iporãva, haʼe oguerohorýva ha ndorekóiva defékto’ (Rom. 12:1, 2).

14. ¿Mbaʼeichagua práktika oúva umi demónioguipa Ñandejára oproivi?

• “Ndaipóri vaʼerã [...] avave ojapóva adivinasión, máhia, opredesíva mbaʼépa oikóta, ni pajeséro, ni peteĩ ojapóva malefísio, ni ohóva oporandu espiritístape térã peteĩ adivínope, ni ombaʼeporandúva umi omano vaʼekuépe” (Deut. 18:10, 11).

15. Peteĩ persóna opeka vaíramo, ¿mbaʼépa ojapo vaʼerã pyaʼe oñemoĩ porã jey hag̃ua Jehová ndive?

• “Amombeʼu che pekádo, ha namokañyvéi la che rembiapo vaikue. Haʼe chejupe: ‘Amombeʼúta Jehovápe che rembiapo vaikue’” (Sal. 32:5).

• “¿Oĩpa hasýva pende apytépe? Tohenói umi ansiáno kongregasionpeguápe, ha haʼekuéra oñemboʼéta hese ha omonáta hese aséite Jehová rérape. Ha pe ñemboʼe ojejapóva jeroviápe omongueráta pe hasývape, ha Jehová omopuʼãta chupe. Avei oiméramo opeka raʼe, Ñandejára operdonáta chupe” (Sant. 5:14, 15).

16. Nde reikuaáramo peteĩ persóna kongregasionpegua opeka vaiha, ¿mbaʼépa rejapo vaʼerã?

• “Oĩramo ohecháva térã oikuaáva ojejapo hague peteĩ pekádo, upéicharõ haʼe peteĩ testígo hína. Ha upéi oñehenóiramo umi testígope omombeʼu hag̃ua umi mbaʼe ojapo vaʼekue pe hembiapo vaíva, péro haʼe nomombeʼúi la oikuaáva, upéicharõ haʼe opeka hína. Haʼe oĩta rresponsávle upe mbaʼe vai ojapo vaʼekuére” (Lev. 5:1).

17. Oñeanunsiáramo peteĩ persóna ndahaʼeveimaha testígo de Jehová, ¿mbaʼéichapa retrata vaʼerã chupe?

• “Peteĩ ermáno oikóramo hekovai, noñekontentái ha oipota potave, oadora taʼanga, heʼi japu hapicháre, ikaʼu, térã imonda, anive pejeheʼa hese ha ani voi ni pekaru umichaguándi” (1 Cor. 5:11).

• “Oĩramo oúva pene rendápe ha nomboʼéi Cristo omboʼe vaʼekue, aníke arakaʼeve perresivi chupe pende rógape ni pesaluda chupe” (2 Juan 10).

18. ¿Mbaʼérepa reiporavo vaʼerã ne amigorã umi ohayhúvape Jehovápe?

• “Pe oiko meméva umi iñarandúvandi iñarandúta avei, péro pe oiko meméva umi itavývandi osẽ vaíta” (Prov. 13:20).

• “Aníke peheja ótro penembotavy. Penejúnta vaírõ ndapejapomoʼãvéima umi mbaʼe porã pejepokuaáva pejapo” (1 Cor. 15:33).

19. ¿Mbaʼérepa umi testígo de Jehová ndoikéi polítikape?

• Jesús heʼi: “Che ndaikói umi hénte ko mundopegua oikoháicha, upéicha avei haʼekuéra ndoikói umi hénte ko mundopegua oikoháicha” (Juan 17:16).

20. ¿Mbaʼérepa neñeʼẽrendu vaʼerã umi goviérnope?

• “Entéro persóna ojapo vaʼerã umi autorida omandáva, pórke Ñandejára omeʼẽ chupekuéra pe podér. Haʼekuéra káda uno oĩ ipuéstope Ñandejára oipotáguinte” (Rom. 13:1).

21. Pe goviérno omoĩramo peteĩ léi oñemoĩva Ñandejára léi rehe, ¿mbaʼépa nde rejapo vaʼerã?

• “Ore ningo oreñeʼẽrendu vaʼerã Ñandejárape ore governánteramo, yvypórape rangue” (Hech. 5:29).

22. Reiporavóta jave nde travahorã, ¿mbaʼe téxto bíblicopa nepytyvõta reñemomombyry hag̃ua ivaívagui?

• “Umi tetã ndohupimoʼãvéima ijespáda ótro tetã kóntrape, ha noñemboʼemoʼãvéima chupekuéra mbaʼéichapa oñorairõ vaʼerã” (Miq. 4:3).

• “Peẽ che puévlo, pesẽke [Babilonia Guasúgui] ani hag̃ua pemoirũ chupe ipekadokuérape ha ndapeipotáiramo penderupyty umi kastígo oútava chupe” (Apoc. 18:4).

23. ¿Mbaʼeichagua entretenimiénto ha diversiónpa reiporavo vaʼerã, ha mbaʼeichaguápa remboyke vaʼerã?

• “Jehová [...] ndochaʼeiete voi umi hénte ohayhúvare pe violénsia” (Sal. 11:5).

• “Ndapechaʼéi vaʼerã umi mbaʼe vaíre, ha pehayhu vaʼerã iporãva” (Rom. 12:9).

• “Pesegíkena pejepyʼamongeta entéro mbaʼe siertoguávare, iñimportántevare, ihústovare, ipotĩvare, umi mbaʼe ñanemomýivare japorohayhu hag̃ua, umi mbaʼe oñeñeʼẽ porãvare, entéro mbaʼe iporãvare ha entéro mbaʼe omeresévare ojeguerohory” (Filip. 4:8).

24. ¿Mbaʼérepa umi testígo de Jehová noñeuníri ótro grúpo rrelihiósondi oadora hag̃ua Ñandejárape?

• “Ndaikatúi pekaru ‘Jehová meságui’ ha demoniokuéra meságui” (1 Cor. 10:21).

• “Jehová heʼi voi: ‘Upévare, pesẽke ijapyteguikuéra, ha pejeíke chuguikuéra, ha anivéke pepoko pe mbaʼe kyʼa rehe’, ‘ha che porresivíta’” (2 Cor. 6:17).

25. ¿Mbaʼe téxto bíblicopa nepytyvõta redesidi hag̃ua repartisipátapa peteĩ festéhope?

• ‘Ojeheʼa hikuái umi tetãre ha ojapo avei la haʼekuéra ojapóva. Osegínte oadora hikuái umi idioskuéra raʼanga ha upéva omoñuhã chupekuéra’ (Sal. 106:35, 36).

• “Umi omanómava ndoikuaavéima mbaʼevete asy” (Ecl. 9:5).

• “Che ndaikói umi hénte ko mundopegua oikoháicha, upéicha avei haʼekuéra ndoikói umi hénte ko mundopegua oikoháicha” (Juan 17:16).

• “Yma ningo peẽ hetaiterei tiémpore pejapo umi hénte ko mundopegua ojapóva, por ehémplo napetĩri vaʼekue penerembiapo vai hag̃ua, pendetarovaite pejapose ivaíva, pemokõ rasa, pefarrea itarovávaicha, pejapo fiésta pekaʼu hag̃ua ha peadora umi taʼanga oporombojeguarúva” (1 Ped. 4:3).

26. ¿Mbaʼéichapa umi ehémplo oĩva la Bíbliape nepytyvõta redesidi hag̃ua refestehátapa umi kumpleáño?

• “Upéi 3 día haguépe faraón ikumpleáño, ha ojapo peteĩ fiésta entéro isiervokuérape g̃uarã. Ha umi isiervokuéra renondépe faraón oguenohẽka kárselgui umi kopéro héfepe ha umi panaderokuéra héfepe. Ha faraón omoĩ jey umi kopéro héfepe ipuésto de kopérope [...]. Ha faraón omosaingoka umi panaderokuéra héfepe” (Gén. 40:20-22).

• “Upéi Herodes kumpleañohápe, Herodías membykuña ojeroky enterove renondépe, ha Heródespe ogustaiterei la haʼe ojeroky lája. Upévare opromete ha ohura voi pe mitãkuñáme omeʼẽtaha chupe oimeraẽ mbaʼe ojeruréva. Upéi isy heʼi pe mitãkuñáme mbaʼépa ojerure vaʼerã. Ha pe mitãkuña oho heʼi: ‘Aipota regueru chéve koʼápe peteĩ vandéhape Juan el Bautista akã’. Upémarõ haʼe omondo peteĩ soldádope oñakãʼo hag̃ua Juánpe upe kárselpe” (Mat. 14:6-8, 10).

27. ¿Mbaʼérepa reipota umi ansiáno ndegia?

• “Peneñeʼẽrendúkena umi pendegiávape ha peñemoĩ ipoguypekuéra. Pórke haʼekuéra siémpre oñangareko penderehe ha Ñandejára ohusgáta chupekuéra la ojapóvare. Péicha pejapóramo, haʼekuéra vyʼápe ojapóta itraváho ha ndoikomoʼãi oñembyasy, péro ndapejapóiramo upéicha, ivaietereíta peẽme g̃uarã” (Heb. 13:17).

28. ¿Mbaʼérepa iñimportánte nde ha ne família siémpre pemboyke tiémpo pelee ha pestudia hag̃ua la Biblia?

• “Haʼe ohayhueterei voi Jehová léi, ára ha pyhare olee ha ojepyʼamongeta hese. Peichagua persóna ojogua peteĩ yvyramáta oñeñotỹvape arrójo ykére, hiʼáva itiempoitépe ha siémpre hogue vérde asýva. Ha opa mbaʼe ojapóva osẽ porã chupe” (Sal. 1:2, 3).

29. ¿Mbaʼérepa rehoseterei voi rreunionhápe ha repartisipase upépe?

• “Aikuaaukáta nde réra che ermanokuérape, kongregasión apytépe che rombotuicháta” (Sal. 22:22).

• “Ñañeinteresákena ojuehe ñande pyʼaite guive, ha ñañomokyreʼỹ japorohayhu hag̃ua ha jajapo hag̃ua iporãva. Oĩramo jepe ojepokuaáva ofalta meme rreunionhápe, ani ñande jaiko jafalta, síno ñañomokyreʼỹ vaʼerã. Jajapo vaʼerã koʼã mbaʼe koʼýte koʼág̃a jahechávo Ñandejára día hiʼag̃uimbaitemaha” (Heb. 10:24, 25).

30. ¿Mbaʼépa hína pe traváho iñimportantevéva Jesús omanda vaʼekue jajapo hag̃ua?

• “Upévare, tapeho pemboʼe umi hénte entéro paisguápe oiko hag̃ua chuguikuéra che disípulo, ha pevautisa chupekuéra [...]. Ha pemboʼe chupekuéra ojapo hag̃ua entéro mbaʼe amanda vaʼekue peẽme” (Mat. 28:19, 20).

31. Jehová ñandeguerohory hag̃ua, ¿mbaʼépa ñanemomýi vaʼerã ñaipytyvõ hag̃ua ñane ermanokuérape ha ñameʼẽ hag̃ua ñane kontrivusión?

• “Emombaʼeguasu Jehovápe ha emeʼẽ chupe umi mbaʼe iporãvéva erekóva” (Prov. 3:9).

• “Káda uno tomeʼẽ odesidiháicha ikorasõme, ndovaléi omeʼẽ tovapukúpe ni ojeovligágui chupe, pórke Ñandejára ohayhu pe persóna vyʼápe omeʼẽvape” (2 Cor. 9:7).

32. ¿Mbaʼe situasión ijetuʼúvapa ohasáta umi kristiáno?

• “Ovyʼa umi ojepersegíva ojapo haguére iporãva, pórke chupekuéra oñemeʼẽta pe Rréino yvagapegua. Peẽ pevyʼa vaʼerã oĩramo oñeʼẽ vaíva penderehe, pendepersegíva, ha oikóva ijapu ha heʼi penderehe opaichagua mbaʼe vai che káusare. Pendepyʼarory ha pevyʼaitereíkena péicha jave, pórke yvágape oĩ hína peteĩ rregálo tuichaitereíva peẽme g̃uarã. Penemanduʼa yma upéicha ojepersegi hague umi profétape” (Mat. 5:10-12).

33. ¿Mbaʼérepa jaʼe haʼeha peteĩ priviléhio iporãitereíva jajevautisa ha oiko ñandehegui peteĩ testígo de Jehová?

• “Ne ñeʼẽ chembovyʼa ha chembopyʼarory, pórke che agueraha nde réra Jehová, umi ehérsito yvagapegua ruvicha” (Jer. 15:16).

Umi vautísmo ojejapo jepi umi testígo de Jehová aty guasuhápe. Opávo pe diskúrso, pe diskursánte ojeruréta umi ojevautisátavape toñemboʼymi ha tokontesta hatã porã koʼã mokõi porandu:

1. ¿Reñarrepentímapa nde pekadokuéragui, reñemeʼẽmapa Jehovápe ha rejeroviápa haʼe oipuruha Jesúspe ñandesalva hag̃ua?

2. ¿Rentendépa rejevautisávo rehechaukaha nde haʼemaha testígo de Jehová ha koʼág̃a guive reikemaha Ñandejára organisasiónpe?

Okontestávo “si”, umi ojevautisátava omombeʼu umi hénte renondépe ojeroviaha Jesús sakrifísiore ha oñemeʼẽma hague Jehovápe (Rom. 10:9, 10). Péro okontesta hag̃ua ipyʼaite guive umi porandu, umi ojevautisátava tekotevẽ oñemboʼe ha ojepyʼamongeta raẽ umívare.

¿Reñemeʼẽmapa Jehovápe ñemboʼe rupive ha reprometépa readorataha chupe añoite, ha remotenondetaha siémpre haʼe oipotáva?

¿Reimépa konvensído rejevautisa vaʼerãha oñepresenta vovéntema la primera oportunida?

¿Mbaʼeichagua aópa ikatu reipuru rejevautisa hag̃ua? (1 Tim. 2:9, 10; Juan 15:19; Filip. 1:10).

Ñañemonde jave ‘jahechauka vaʼerã japororrespetaha ha ñaneakãguapyha’, péicha ‘ñamombaʼeguasúta Ñandejárape’. Pe vautísmo ningo iñimportanteterei, upévare umi ojevautisátava oipuru vaʼerã ao idesénteva, ndoipurúi vaʼerã tráhe de váño saʼieterei okuvríva chupe, térã ao orekóva létra ha propagánda. Upéva rangue, oipuru vaʼerã ao ipotĩva, noofendéiva avavépe, isensíllova ha opyta porãtava upe okasiónpe g̃uarã.

¿Mbaʼéichapa reñekomporta vaʼerã nde vautísmo aja? (Luc. 3:21, 22).

Jesús vautísmo haʼe hína pe ehémplo enterove kristiáno osegi vaʼerã. Chupe g̃uarã upéva tuicha mbaʼe ha oñekomporta lájare ohechauka vaʼekue orrespetaha upe moménto. Upévare pe vautísmo aja ndovaléi ñañembojaru, jayta pe pisínape ni jajapo ótra kósa ikatúva ombyai pe okasión. Naiporãmoʼãi avei pe ojevautisáva ofesteha oganaramoguáicha peteĩ prémio. Añetehápe javyʼa pe vautísmo díape, ha jahechauka vaʼerã upéva hendápe porã.

¿Mbaʼéichapa reñemoag̃uíramo kongregasión rehe ha reho meméramo rreunionhápe nepytyvõta rekumpli hag̃ua upe repromete vaʼekue Jehovápe?

Rejevautisa rire, ¿mbaʼérepa iñimportánte resegi remoĩ mbaʼe día ha mbaʼe órapa restudiáta ha resẽta predikasiónpe?