1-3. ¿Mbaʼépa jaikuaase jepi enterovéva, ha mbaʼépa omboʼe heta rrelihión?

LA Bíbliape Ñandejára opromete ñandéve og̃uahẽtaha peteĩ día ndaiporimoʼãveimahápe omanóva (Apocalipsis 21:4). Kapítulo 5-pe jahecha kuri Jesús omano rupi ñanderehehápe jarekoha oportunida jaikovévo opa árare. Péro koʼag̃aite peve la hénte omano (Eclesiastés 9:5). Ha enterovénte oikuaase mbaʼépa oiko umi omano vaʼekuégui.

² Koʼýte jaikuaase upéva jarekóramo ñane hénte térã ñane amígo omano vaʼekue. Jaikuaase voi ikatúpa ñanderecha, ñanepytyvõ, ha jahecha jeýnepa chupekuéra algún día.

³ Umi rrelihión ombohovái heta hendáicha koʼã mbaʼe jaikuaaséva. Oĩ rrelihión omboʼéva umi ivuénova ohoha yvágape ha umi iñaña téra hembiapo vaíva ohoha osufri infiérnope peteĩ tatarendýpe. Oĩ avei heʼíva ñamano vove ñane álma térã ñande espíritu ohoha oiko umi ñane hénte omanóma vaʼekuéndi. Ótro katu heʼi umi omanóva onase jeyha peteĩ animál térã ótra persónaicha.

4. ¿Mbaʼépa omboʼe heta rrelihión umi omano vaʼekuégui?

⁴ Umi rrelihión omboʼe heta mbaʼe, péro enterove lénto omboʼe peteĩ persóna omanóramo, ijespíritu térã hiʼálma osẽha chugui ha osegiha oikove algún ládo. ¿Péro siértopa upe omboʼéva hikuái?

UMI OMANO VAʼEKUE NDAIKATUVÉIMA OJAPO MBAʼEVE

5, 6. ¿Mbaʼépa oiko umi omano vaʼekuégui?

⁵ Jehová oikuaa porã mbaʼépa oiko umi omano vaʼekuégui ha haʼe heʼi ñandéve umi omanóva opaitemaha. Upéicharõ umi omanóva noñanduvéima ni ndoikuaavéima mbaʼeve, ni ndosegíri oikove ótro ládo.a Ñamano vove ndaikatuvéima jahecha, ñahendu ni ñapensa.

⁶ Rréi Salomón heʼi vaʼekue ‘umi omanóva ndoikuaaveimaha mbaʼevete asy’. Umi omanóva ningo ndaikatuvéima ipochy ñanendive ni ñanderayhu, “pe Sepultúrape avave ndaikatúi ombaʼapo, ni oplanea mbaʼeve. Ndaikatúi avei oaprende ni ontende mbaʼeve” (elee Eclesiastés 9:5, 6, 10). Salmo 146:4-pe la Biblia heʼi peteĩ persóna omano vove nopensaveimaha mbaʼeve.

MBAʼÉPA HEʼI VAʼEKUE JESÚS UMI OMANÓVARE

7. ¿Mbaʼe rehepa Jesús okompara vaʼekue pe ñemano?

⁷ Iñamígo Lázaro omanórõ guare, Jesús heʼi idisipulokuérape: “Ñane amígo Lázaro oke hína”. Péro upéi omombeʼu porã chupekuéra: “Lázaro omanóma” (Juan 11:11-14). Jahechaháicha Jesús okompara peteĩ persóna omanóvape peteĩ okévare. Haʼe ndeʼíri kuri Lázaro ohoha yvágape térã oĩmaha umi ihentekuéra omano vaʼekuéndi. Jesús ndeʼíri avei Lázaro osufriha hína infiérnope tatarendýpe. Upéva rangue haʼe heʼi Lázaro okenteha. Ótra pártepe avei la Biblia heʼi umi omanóvare okenteha hína. Por ehémplo, Jesús omoingove jey mboyvemi peteĩ mitãkuñáme, heʼi: “Pe mitãkuñaʼi ningo nomanói, okénte hína” (Mateo 9:24). Apóstol Pablo heʼi vaʼekue avei heta kristiáno omano vaʼekuére okenteha hína (1 Corintios 15:6, nóta).

8. ¿Mbaʼérepa jaʼekuaa Jehová ñandeapo hague jaikove hag̃ua opa árare?

⁸ Jehová ndojapói vaʼekue Adán ha Évape oikove hag̃ua peteĩ tiémporente. Upéva rangue, Jehová okrea chupekuéra oiko hag̃ua vyʼápe opa árare ha hesãi hag̃ua hikuái. Ñandejára omoĩ voi upe deséo yvyporakuéra korasõme (Eclesiastés 3:11). Ndaipóri ningo túa oipotáva ifamília ituja, hasy ni omano, ha Jehová upeichaiténte avei, haʼe ndoipotái ñamano. ¿Mbaʼérepa upéicharõ koʼág̃a peve oĩ omanóva?

¿MBAʼÉREPA YVYPORAKUÉRA OMANO?

9. ¿Mbaʼérepa jaʼekuaa ndahasyiete hague la Jehová ojerure vaʼekue Adán ha Évape?

⁹ Pe hardín de Edénpe Jehová heʼi Adánpe: “Entéro yvyramáta hiʼávagui oĩva pe hardínpe ikatu reʼu reʼuseha peve. Péro ndereʼúi vaʼerã pe yva orekóva pe yvyramáta opermitíva ojekuaa mbaʼépa iporã ha mbaʼépa ivai, pórke reʼuha díape katuete remanóta” (Génesis 2:9, 16, 17). Ndahasyiete ningo la Jehová ojeruréva chupekuéra, ha Jehová oreko voi derécho heʼívo Adán ha Évape mbaʼépa iporã ha mbaʼépa ivai. Haʼekuéra iñeʼẽrendúrire Ñandejárape, ohechaukáta kuri orrespetaha Jehová autorida. Ha ndahaʼéi upévante, ohechaukáta avei hikuái oagradeseha Jehovápe opaite mbaʼe omeʼẽvare chupekuéra.

10, 11. a) ¿Mbaʼépa ojapo Satanás ikatu hag̃uáicha Adán ha Eva odesovedese Ñandejárape? b) ¿Mbaʼérepa Adán ha Eva ndaikatúi heʼi ndoikuaáiguinte odesovedese hague Jehovápe?

¹⁰ Ñambyasýramo jepe, Adán ha Eva naiñeʼẽrendúi kuri Jehovápe. Satanás heʼi vaʼekue Évape: “¿Añetéiko Ñandejára heʼi peẽme ndovaleiha peʼu umi yvyramáta hiʼávagui oĩva guive ko hardínpe?”. Ha Eva heʼi chupe: “Umi yva orekóva umi yvyramáta oĩva guive ko hardínpe ningo ore ikatu roʼu. Péro pe yvyramáta oĩvare hardín mbytépe, Ñandejára heʼíma oréve: ‘Aníke peʼu hiʼa, ha animoʼãke pepoko hese, cháke pejapóramo upéva, pemanóta’” (Génesis 3:1-3).

¹¹ Upéi Satanás heʼi jey chupe: “Peẽ ningo ni mbaʼevéicharõ napemanomoʼãi. Ñandejára oikuaa porã peʼuha árape pe yva pejesapeʼataha, ha pejoguáta Ñandejárape ha peikuaáta mbaʼépa iporã ha mbaʼépa ivai” (Génesis 3:4-6). Satanás oipota Eva opensa ijeheguínte ikatuha odesidi mbaʼépa oĩ porã ha mbaʼépa oĩ vai. Ha ijapuvéntema heʼívo chupe ndoikomoʼãiha hese mbaʼeve hoʼúramo pe yva. Upémarõ Eva hoʼu pe yva ha upéi omeʼẽ avei iménape hoʼu hag̃ua. Adán ha Eva oikuaa porã kuri Jehová oproivi hague chuguikuéra upéva, upéicharõ jepe hoʼu hikuái pe yva ha odesovedese Ñandejárape. Péicha haʼekuéra ohechauka ndorrespetaiha Jehovápe. Ha ndaikatúi heʼi hikuái ndoikuaáiguinte ojapo hague upéva.

12. ¿Mbaʼérepa ñambyasyete la Adán ha Eva ojapo vaʼekue Jehováre?

¹² Ajépa ñambyasyete la Adán ha Eva ojapo vaʼekue Jehováre. Epensamíntena mbaʼéichapa nde reñeñandúta reñehaʼãramo remongakuaa porã ne famíliape ha upéi oúramo naiñeʼẽrenduvéi ha opuʼã nderehe. Katuete ningo hasy asýta ndéve upéva.

13. ¿Mbaʼérepa Jehová heʼi Adánpe oiko jeytaha chugui yvy?

¹³ Adán ha Eva odesovedesérõ guare Ñandejárape, operde pe posivilida oreko vaʼekue oikovévo opa árare. Jehová heʼi Adánpe: “Ndéngo yvýguinte voi rejejapo vaʼekue ha yvy jey oikóta ndehegui” (elee Génesis 3:19). Upéva heʼise Adán omano ha opa reitaha ku arakaʼeve oikoveʼỹrõguáicha (Génesis 2:7). Adán opeka kuri ha upéi kon el tiémpo omano ha opaite.

14. ¿Mbaʼérepa omano yvyporakuéra?

¹⁴ Adán ha Eva iñeʼẽrendúrire Ñandejárape oikovéiti vaʼerãmoʼã koʼag̃aite peve. Péro haʼekuéra tuichaiterei opeka odesovedesérõ guare Ñandejárape ha upévare kon el tiémpo omano. Pe pekádo ningo haʼete peteĩ mbaʼasy jagueronaséva ñande tuakuéra oreko rupi. Entéro Adán familiare ningo ñanaséma pekadór ha upéicha rupi kon el tiémpo ñamano avei (Romanos 5:12). Péro Jehová ningo ndoipotái upéva ñandéve g̃uarã. La Biblia heʼi voi la muérte haʼeha “ñane enemígo” (1 Corintios 15:26).

MBAʼÉPA HEʼI LA BIBLIA

15. ¿Mbaʼéguipa jajelivra jaikuaávo mbaʼépa añetehápe oiko umi omano vaʼekuégui?

¹⁵ Jaikuaávo mbaʼépa añetehápe oiko umi omano vaʼekuégui, jajelivra heta mbaʼégui. La Biblia heʼi porã ñandéve umi omanóva noñanduveimaha mbaʼevete. Upévare ndaikatuvéima ñañeʼẽ hendivekuéra. Ndaikatuvéima avei ñaipytyvõ chupekuéra ni haʼekuéra ñandéve. Umi omano vaʼekue ndaikatúi avei ojapo ñanderehe mbaʼeve ivaíva, upévare ndaipóri jakyhyje hag̃ua chuguikuéra. Péro heta rrelihión omboʼe umi omanóva espíritu osegiha oikove algún ládo, ha ojepagáramo umi rrelihión omoakãvape ikatuha oipytyvõ chupekuéra. Péro jaikuaa rupi mbaʼépa añetehápe oiko umi omano vaʼekuégui, nañanembotavyvéima koʼã japu ojeʼéva.

16. ¿Mbaʼépa omboʼe heta rrelihión?

¹⁶ Satanás oipuru umi rrelihión fálsa omboʼe hag̃ua la héntepe umi omano vaʼekue osegiha oikove algún ládo. ¿Ne rrelihiónpa omboʼe avei upéva térãpa nemboʼe la Biblia heʼíva? Satanás ningo omboʼe koʼã mbaʼe omomombyry hag̃ua la héntepe Jehovágui.

17. Heta rrelihión omboʼe umi iñañáva ohoha osufri infiérnope, ¿mbaʼérepa ndogustái upéva Jehovápe?

¹⁷ Heta mbaʼe omboʼéva umi rrelihión fálsa ningo ivaieterei. Por ehémplo, oĩ rrelihión omboʼéva umi hénte iñañáva térã hembiapo vaíva omanóramo ohoha osufri infiérnope tatarendýpe. Koʼã mbaʼe oñemboʼéva ombopochyeterei Jehovápe. Haʼe ningo arakaʼeve nombosufrimoʼãi péicha la héntepe (elee 1 Juan 4:8). ¿Mbaʼépa nde repensáta oñemombeʼúramo ndéve peteĩ karai ojagarra hague itaʼýra po omoinge tatápe okastiga hag̃ua chupe ofalla haguére? Ipyʼahatãhámante eréta upe karaíre ha ni ndereikuaasemoʼãi chugui mbaʼeve. Ha upéicha la Satanás oipota ñapensa Jehováre.

18. ¿Mbaʼérepa ndajakyhyjéi vaʼerã umi omano vaʼekuégui?

¹⁸ Oĩ rrelihión omboʼéva umi omanóvagui oikoha espíritu. Ha umi espíritu ikatuha ojapo ñanderehe mbaʼe vai, péro jarrespetáramo chupekuéra ikatuha oñangareko ñanderehe. Heta hénte oguerovia koʼã mbaʼe. Upévare oĩ okyhyjéva umi omano vaʼekuégui ha oadora voi chupekuéra Jehovápe rangue. Péro nemanduʼákena umi omanóva ndaikatuveimaha opensa ni ojapo mbaʼeve. Ndaipóri jakyhyje hag̃ua chuguikuéra. Jehová ningo ñande Kreadór ha haʼe hína pe Dios verdadéro, upévare chupe añoite jaadora vaʼerã (Apocalipsis 4:11).

19. ¿Mbaʼéichapa ñanepytyvõ jaikuaávo mbaʼépa añetehápe oiko umi omano vaʼekuégui?

¹⁹ Jaikuaávo mbaʼépa añetehápe oiko umi omano vaʼekuégui, jajelivra umi rrelihión fálsa omboʼévagui, ha ñantende porãve umi mbaʼe porãita Ñandejára ojapótava amo gotyove.

20. ¿Mbaʼépa jahecháta pe kapítulo oúvape?

²⁰ Ojapóma hína heta tiémpo, peteĩ kuimbaʼe iñeʼẽrendúva, hérava Job, oporandu hague Ñandejárape: “Peteĩ persóna omanóramo, ¿ikatu piko oikove jey?” (Job 14:14). ¿Ikatúnepa añete oikove jey umi omano vaʼekue? La Biblia okontesta upe pregúnta ha katuete nembovyʼaitereíta reikuaávo mbaʼépa heʼi upévare. Jahechamína upéva pe kapítulo oúvape.

1-3. ¿Mbaʼéguipa avave ndaikatúi jajesalva, ha mbaʼépa opromete ñandéve Jehová?

EPENSAMÍNA rehoha préso ótro káusare ha reñekondenaha remano hag̃ua. Nde ndaikatuvéima rejapo mbaʼeve ha reperdetéma voi la esperánsa. Péro upe javete reikuaa oĩha peteĩ persóna orekóva tuicha autorida ha ikatúva neguenohẽ pe kárselgui, ha ndahaʼéi upévante, opromete voi katu ndéve nepytyvõtaha. ¡Ajépa revyʼaiténe!

² Ñande ningo enterove ñaime kondenádo ñamano hag̃ua ha ñandejehegui reínte ndaikatúi jajesalva upévagui. Péro Jehová oreko podér ñaneguenohẽ hag̃ua pe ñemano poguýgui. Haʼe opromete pe ‘ñane enemígo ultimoite oñehundítava haʼeha hína pe ñemano’ (1 Corintios 15:26).

³ Epensamíntena mbaʼeichaitépa ñandepyʼaguapýta ndaiporivéi vove pe ñemano. Péro ndahaʼemoʼãi pe ñemano añónte Jehová oipeʼátava, síno haʼe opromete avei omoingove jeytaha umi omano vaʼekuépe. ¡Ajépa ñanembovyʼaite upéva! (Isaías 26:19).

OMANÓRAMO ÑANE HÉNTE TÉRÃ ÑANE AMÍGO

4. a) ¿Mbaʼépa ikatu ñanekonsola omanóramo ñane hénte térã ñane amígo? b) ¿Máva mávapa Jesús amigoite vaʼekue?

⁴ Omanóramo ñandehegui peteĩ ñane hénte térã ñane amígo ningo ñañeñandu vaieterei ha yvýre voi japyta. Ñande jaikuaa porã ndaikatuiha jajapo mbaʼeve pe persóna oikove jey hag̃ua. Péro la Bíbliape heʼi oĩha peteĩ esperánsa iporãitereíva (elee 2 Corintios 1:3, 4). Jahechamína peteĩ ehémplo ohechaukáva Jehová ha Jesús omoingovese jeyha umi omano vaʼekuépe. Jesús oĩrõ guare ko yvy ape ári, ovisitámi vaʼekue Lázaro ha iñermanakuéra Marta ha Maríape. Haʼekuéra ningo oñoamigoite vaʼekue. La Biblia heʼi voi: “Jesús ningo ohayhu Marta, María ha Lázarope” (Juan 11:3-5).

5, 6. a) ¿Mbaʼépa ojapo Jesús ohechávo Lázaro ermanakuéra ha iñamigokuéra hasẽ joa? b) ¿Mbaʼérepa ñandepyʼaguapy jaikuaávo mbaʼéichapa Jesús oñeñandu oĩramo omanóva?

⁵ Peteĩ día Lázaro omano, ha Jesús oikuaávo upéva oho María ha Marta rendápe. Marta oikuaávo Jesús ouha hína, oho ohug̃uaitĩ chupe. Haʼe ovyʼa ohechávo Jesúspe, péro upéi heʼi chupe: “Reimérire koʼápe, che ermáno nomanomoʼãi kuri”. Marta opensa Jesús ndaikatuveimaha ojapo mbaʼeve Lázaro rehehápe. Jesús ohechávo mbaʼéichapa María ha Marta hasẽ, oguapyeterei hese ha hasẽ avei (Juan 11:21, 33, 35). Upévare ikatu jaʼe haʼe oikuaa porãitereiha mbaʼeichaitépa ñambyasy omanóramo ñandehegui peteĩ persóna jahayhúva.

⁶ Jesús ningo ojoguaiterei Itúape opa mbaʼépe, ha Jesús ombyasyeterei kuri Lázaro omanórõ guare. Upéva ohechauka ñandéve mbaʼéichapa oñeñandu avei Jehová oĩ jave omanóva (Juan 14:9). Jehová ningo oreko podér oipeʼaite hag̃ua la muérte ha koʼẽrõitéma voi ojapóta upéva.

JESÚS OMOINGOVE JEY LÁZAROPE

7, 8. ¿Mbaʼérepa Marta ndoipotái vaʼekue ojeavri pe sepultúra, ha mbaʼépa ojapo Jesús?

⁷ Jesús oho pe sepultúra oñemoĩ haguépe Lázaro retekue. Péro pe sepultúra rokẽ oñemboty kuri peteĩ ita guasúpe. Upéi Jesús heʼi: “Peipeʼa pe ita guasu”. Péro Marta ndoipotái ojeavri pe sepultúra rokẽ pórke ojapóma 4 día Lázaro omano hague ha oiméne inéma (Juan 11:39). Haʼe ndoikuaaiete kuri mbaʼépa Jesús ojapóta hína Lázaro rehehápe.

⁸ Jesús heʼi Lázarope: “¡Lázaro, esẽ!”. Ha upéi oiko peteĩ mbaʼe Marta ha María ni noimoʼãiva. Lázaro, ‘pe kuimbaʼe omano vaʼekue, osẽ okápe, ha ipy ha ipo ojelia peteĩ télape’ (Juan 11:43, 44). Lázaro oikove jey ha ikatu jeýma ohasa porã iñermána ha iñamigokuérandi. Haʼekuéra vyʼapópe oañuã chupe ha oñemongeta hendive. ¡Ajépa tuichaite mbaʼe pe oiko vaʼekue! Jesús omoingove jey Lázarope.

JESÚS OMOINGOVE JEY PETEĨ MITÃKUÑÁME

9, 10. a) ¿Mávapa omeʼẽ podér Jesúspe omoingove jey hag̃ua umi omanóvape? b) ¿Mbaʼérepa ñanemokyreʼỹ jaleévo umi istória oñeʼẽva pe ñemoingove jeýre?

⁹ ¿Omoingove jeýpa Jesús ipodér rupive umi omano vaʼekuépe? Nahániri. Jesús oñemboʼe vaʼekue Jehovápe ha haʼe omeʼẽ chupe podér omoingove jey hag̃ua Lázarope (elee Juan 11:41, 42). Péro ndahaʼéi Lázarope añónte la omoingove jey vaʼekue. La Biblia omombeʼu peteĩ mitãkuña orekóva 12 áño hasyete hague. Itúa Jairo ojedesespera ha ojerure asy Jesúspe omongueramínte hag̃ua itajýra peteĩmíme. Péro upe javete og̃uahẽ unos kuánto kuimbaʼe ha heʼi Jáirope: “Nde rajy ningo omanóma. ¿Maʼerã piko remolestavéta Jesúspe?”. Péro Jesús heʼi Jáirope: “Ani rejepyʼapy, ejeroviánte vaʼerã ha haʼe ojesalváta”. Upéi oho Jairo ndive hógape ha og̃uahẽ mbotávo hikuái, Jesús ohecha ha ohendu mbaʼéichapa umi hénte ojaheʼo joa. Upéi haʼe heʼi chupekuéra: “Anivéna penerasẽ, haʼe ningo nomanói, okénte hína”. Oiméne Jairo ha hembireko nontendéi mbaʼérepa Jesús heʼi upéva. Upéi Jesús ojerure umi héntepe osẽ hag̃ua pe kotýgui ha heʼi Jairo ha hembirekópe oike hag̃ua hendive pe mitãkuña oĩháme. Jesús ojagarra pe mitãkuñáme ipógui ha heʼi chupe: “Mitãkuña, ndéve haʼe: ‘¡Epuʼã!’”. Epensamíntena mbaʼeichaitépa oiméne ovyʼa itúa ha isy ohechávo ifamília oikove jeyha ha oguatáma katu oikóvo pérupi (Marcos 5:22-24, 35-42; Lucas 8:49-56). Oiméne upe guive Jairo ha hembireko omañávo ifamíliare siémpre imanduʼa pe Jehová ojapo vaʼekuére hesehapekuéra Jesús rupive.a

¹⁰ Umi hénte Jesús omoingove jey vaʼekue kon el tiémpo omano jey kuri. Péro jaleévo koʼã istória tuichaiterei ñanemokyreʼỹ omeʼẽgui ñandéve esperánsa. Jehová omoingovese jey umi omano vaʼekuépe, ha katuete ojapóta upéva.

¿MBAʼÉPA ÑAAPRENDE UMI ISTÓRIAGUI?

11. ¿Mbaʼépa ñanemboʼe Eclesiastés 9:5?

¹¹ La Biblia heʼi porã umi omano vaʼekue ndoikuaaveimaha “mbaʼevete asy”. Ha upeichaite oiko vaʼekue Lázaro rehe (Eclesiastés 9:5). Jesús heʼi haguéicha, Lázaro haʼete vaʼekue okénteva (Juan 11:11). Haʼe oĩ aja pe sepultúrape ndoikuaái kuri mbaʼépa oiko.

12. ¿Mbaʼéichapa jaikuaa Lázaro añetehápe oikove jey hague?

¹² Heta hénte ohecha vaʼekue Jesús omoingove jeýrõ guare Lázarope. Umi ndochaʼéiva Jesúsre jepe ohechakuaa haʼe ojapo hague upe milágro, ¡ndaipóri onega vaʼerã oñemoingove jey hague Lázarope! (Juan 11:47). Heta hénte oho ovisita Lázarope ha enterove lénto oñepyrũ oguerovia Ñandejára ombou hague Jesúspe. Upéva ndogustaiete Jesús enemigokuérape ha oñepyrũ ohecha hikuái mbaʼéichapa ojukáta Jesús ha Lázarope (Juan 11:53; 12:9-11).

13. ¿Mbaʼérepa ikatu jaguerovia Jehová omoingove jeytaha umi omano vaʼekuépe?

¹³ Jesús heʼi vaʼekue “enterove umi oĩva pe sepultúrape” oikove jeytaha (Juan 5:28). Jehová omoingove jeýta umi omano vaʼekuépe. Péro upearã tekotevẽ imanduʼa porã mbaʼeichagua persónapa rakaʼe káda uno. ¿Ikatútapa imanduʼapa enterovére? Jehová ningo ojapo vaʼekue entéro umi estrélla ha la Biblia heʼi haʼe oikuaaha káda estréllape hérarupi (elee Isaías 40:26). Jehová ikatúramo imanduʼapa umi estrélla rérare, ifasilvétantema chupe imanduʼa hag̃ua mbaʼeichagua persónapa rakaʼe umi omano vaʼekue, ha upeichaite omoingove jeýta chupekuéra. Jaikuaa avei Jehová ojapo hague opaite mbaʼe ha upévare ikatu jajerovia haʼe orekoha podér omoingove jey hag̃ua umi omano vaʼekuépe.

14, 15. ¿Mbaʼépa ñanemboʼe Job heʼi vaʼekue?

¹⁴ Job ningo ojerovia vaʼekue Jehová omoingove jeytaha umi omano vaʼekuépe. Haʼe oporandu: “Peteĩ persóna omanóramo, ¿ikatu piko oikove jey?”. Upéi haʼete orresponde Jehovápe heʼívo: “Nde cherenóita ha che akontestáta. Nde katuete rehechaseterei jeýta upe ne rembiapokuemi”. Job oikuaa porã vaʼekue Jehová ohaʼarõitereimaha og̃uahẽ pe día omoingove jey hag̃ua umi omano vaʼekuépe (Job 14:13-15).

¹⁵ ¿Revyʼápa reikuaávo Jehová omoingove jeytaha umi omano vaʼekuépe? Ikatu oime reñeporandu hína: “¿Mbaʼépa oikóta umi che hénte ha che amígo omano vaʼekuégui? ¿Oñemoingove jeýtapa avei chupekuéra?”. Tuichaiterei ñanekonsola jaikuaávo Jehová añetehápe omoingovese jeyha umi omano vaʼekuépe. La Biblia omombeʼu ñandéve mbaʼeichagua persónapepa oñemoingove jeýta ha moõpa oikóta hikuái.

UMI OMANO VAʼEKUE OHENDÚTA IÑEʼẼ HA OSẼTA

16. ¿Mbaʼépa ikatu ohupyty umi oikove jeýva ha mbaʼéichatapa ko múndo upérõ g̃uarã?

¹⁶ Yma, umi orresusitáva oiko jey vaʼekue ko yvy ape ári ihénte ha iñamigokuéra apytépe. Péicha avei oikóta umi oñemoingove jeýtava amo gotyove, péro haʼekuéra orekótama oportunida oikovévo pára siémpre. Haʼekuéra oikove jey vove, ko múndope ndaiporimoʼãvéima gérra, mbaʼasy ni hénte ojapóva mbaʼe vai.

17. ¿Mbaʼeichagua persónapepa oñemoingove jeýta?

¹⁷ ¿Mbaʼeichagua persónapepa oñemoingove jeýta? Jesús heʼi vaʼekue “enterove umi oĩva pe sepultúrape ohendutaha iñeʼẽ ha osẽta” (Juan 5:28, 29). Ha Apocalipsis 20:13 heʼi: “Pe mar omeʼẽ umi omanóva oĩva pype, ha pe ñemano ha pe Sepultúra omeʼẽ umi omanóva oĩva ipypekuéra”. Jahechaháicha, hetaiterei persónape oñemoingove jeýta. Apóstol Pablo heʼi vaʼekue avei “oñemoingove jeytaha umi ihústova ha iñinhústovape” (elee Hechos 24:15). ¿Mbaʼépa heʼise upéva?

18. ¿Máva mávapa hína “umi ihústova” oikove jeýtava?

¹⁸ “Umi ihústova” oikove jeýtava apytépe oĩ hína Jehová siervokuéra yma guare. Por ehémplo umi oiko vaʼekue Jesús ou mboyve ko yvy ape ári. Umíva apytépe oĩ Noé, Abrahán, Sara, Moisés, Rut, Ester ha hetave persóna. Chupekuéra oñemoingove jeýta oiko hag̃ua ko yvy ape ári. Reikuaave hag̃ua koʼã persónape, ikatu relee la Bíbliape Hebreos kapítulo 11. ¿Péro mbaʼépa oikóta Jehová siervokuéra omanóvagui koʼág̃arupi? Haʼekuéra oĩ avei “umi ihústova” apytépe ha katuete oñemoingove jeýta chupekuéra.

19. ¿Máva mávapa hína ‘umi iñinhústova’ oikove jeýtava, ha mbaʼe oportunidápa omeʼẽta chupekuéra Jehová?

¹⁹ Umi ‘iñinhústova’ oikove jeýtava haʼe hína umi persóna ndoikuaajepéi vaʼekue Jehovápe. Haʼekuéra omanóramo jepe, Jehová ndahesaráiri chuguikuéra. Haʼe omoingove jeýta umívape ha omeʼẽta chupekuéra oportunida oikuaa ha oservi hag̃ua chupe.

20. ¿Oñemoingove jeýtapa enterove umi omano vaʼekuépe?

²⁰ ¿Upéicharõ piko oñemoingove jeýta enterove umi omano vaʼekuépe? Nahániri. Jesús heʼi vaʼekue naentéroi umi omano vaʼekue oikove jeytaha (Lucas 12:5). ¿Mávapa odesidíta mávapepa oñemoingove jeýta? Jehová, pe Hués tuichavéva, omeʼẽ Jesúspe autorida “ohusga hag̃ua oikovéva ha omanóvape” (Hechos 10:42). Umi persóna nokambiaséiva ha Jesús heʼíva iñañaha, ndorresusitamoʼãi (ehecha nóta 19).

UMI OÑEMOINGOVE JEÝVA OIKO HAG̃UA YVÁGAPE

21, 22. a) ¿Mbaʼeichagua kuérpopa orekóta umi oñemoingove jeýva oiko hag̃ua yvágape? b) ¿Mávape raẽpa oñemoingove jey vaʼekue oiko hag̃ua yvágape?

²¹ La Biblia heʼi oĩtaha oñemoingove jeýva oiko hag̃ua yvágape. Péro umi orresusitáva oho hag̃ua yvágape ndorekomoʼãi peteĩ kuérpo ñande yvypóra jarekovaichagua, síno orekóta peteĩ kuérpo espirituál.

²² Jesúspe raẽvete ningo oñemoingove jey vaʼekue péicha (Juan 3:13). Tres día Jesús omano haguépe, Jehová omoingove jey kuri chupe (Salmo 16:10; Hechos 13:34, 35). Jesús ndorresusitavéima kuri peteĩ yvypóraicha. Apóstol Pedro heʼi Jesús ‘omano hague yvypóraicha, péro Ñandejára omoingove jeyha chupe peteĩ espírituicha’ (1 Pedro 3:18). Péicha Jesúsgui oiko jey peteĩ ánhel ipoderosoitereíva (1 Corintios 15:3-6). Péro la Biblia heʼi ndahaʼemoʼãiha Jesús añónte la ohótava kuri yvágape.

23, 24. ¿Mávapa hína umi “ovecha mbovymíva” oñeʼẽha Jesús, ha mboýpa oĩ hikuái?

²³ Omano mboyvemi, Jesús heʼi ijapostolkuéra iñeʼẽrendúvape: “Aháta aprepara peẽme pene rendag̃ua” (Juan 14:2). Upéva heʼise oĩtaha idisípulo oñemoingove jeýtava oiko hag̃ua hendive yvágape. ¿Mboýpa oĩ la ohótava yvágape? Jesús oñeʼẽvo hesekuéra heʼi: “Peẽ che ovecha mbovymíva”. Upéva heʼise saʼitaha la ohótava (Lucas 12:32). Apóstol Juan omombeʼu porã mboýpa la ohótava yvágape heʼírõ guare ohechaha Jesúspe oñemboʼyha yvágape pe Sérro Siónpe, ha hendive oĩha 144.000 (Apocalipsis 14:1).

²⁴ ¿Arakaʼépa oñemoingove jeýta umi 144.000-pe? La Biblia heʼi oñemoingove jeytaha chupekuéra Jesús oñepyrũ rire ogoverna yvágape (1 Corintios 15:23). Ha koʼág̃a Jesús ogovernáma, upéicha rupi umi omanóma vaʼekue umi 144.000 apytégui, oñemoingove jeýma ha oikóma hikuái yvágape. Ñane tiémpope, umi ohótava yvágape, omanóre voi oñemoingove jeýma chupekuéra yvágape. Péro hetaitereive persónape oñemoingove jeýta oiko hag̃ua ko yvy ape ári peteĩ hardín iporãitereívape.

25. ¿Mbaʼépa jahecháta kapítulo 8-pe?

²⁵ Koʼẽrõitéma Jehová ñandepeʼaitéta ñemano poguýgui ha ndaiporimoʼãvéima omanóva (elee Apocalipsis 21:4). ¿Ha mbaʼépa ojapóta umi oñemoingove jeýva yvágape? La Biblia omombeʼu ñandéve ogovernataha hikuái Jesús ndive Ñandejára Rréino. Kapítulo 8-pe oñeñeʼẽvéta upe goviérnore.