¿Mbaʼépa heʼise adorasión?

Jaadora heʼise “jajapoha peteĩ mbaʼe jahechauka hag̃ua jarrespeta ha jahayhuha peteĩ dióspe”. Umi idióma orihinál ojeskrivi haguépe la Biblia, ojepuru jave pe palávra “adorasión” ikatu heʼise ojerrespetaiterei térã oñemoĩha peteĩ persóna poguýpe (Mat. 28:9). Ikatu avei heʼise ojejapoha peteĩ seremónia rrelihiósa oñemombaʼe hag̃ua Ñandejára teetépe térã peteĩ dios fálsope (Juan 4:23, 24). Oñentende hag̃ua mbaʼépa heʼise upe palávra odepende upe heʼívare upe mboyve térã upe rire.

Jehová hína upe ojapo vaʼekue entéro mbaʼe ha ogovernáva opa mbaʼe, ha haʼe añoite omerese ojeadora chupe (Apoc. 4:10, 11). Ñande jaadora Jehovápe ñañemoĩ jave igoviérno poguýpe ha ñamombaʼeguasu héra (Sal. 86:9; Mat. 6:9, 10). Lívro de Ezequiélpe oñeñeʼẽ meme Jehová goviérnore ha hérare. Ezequiélpe ojepuru pe fráse “Ñandejára Jehová ogovernáva opa mbaʼe” 217 vése, ha pe fráse “peikuaáta che haʼeha Jehová” 55 vése (Ezeq. 2:4; 6:7).

Pe adorasión ndahaʼéi peteĩ mbaʼe ñañandúnteva, síno heʼise jajapoha peteĩ mbaʼe jahechauka hag̃ua upéva (Sant. 2:26). Ñañemeʼẽ jave Jehovápe, ñapromete ñañemoĩtaha igoviérno poguýpe opa mbaʼe jajapóvape ha jarrespetataha héra ñane korasõite guive. Avei ñanemanduʼáramo Jesús heʼívare ombohováirõ guare pe tercera tentasión, jahechakuaa jaadora Ñandejárape heʼiseha ‘jaserviha’ chupe añoite (Mat. 4:10). Ha ñande jaadoráva Jehovápe ñanekyreʼỹ voi jaservi hag̃ua chupea (Deut. 10:12). Ñande jaservi Jehovápe jajesakrifika jave jajapo hag̃ua umi mbaʼe haʼe ojeruréva ñandehegui. ¿Mbaʼe mbaʼépa hína umíva?

Ñande jaservi Jehovápe heta hendáicha, ha haʼe omombaʼeterei umi mbaʼe jajapóva. Jaservi hína chupe japredika jave, jahávo rreunionhápe ha japartisipa umívape, ñamopuʼã ha ñañangarekóvo umi konstruksión ojejapóvare Jehovápe g̃uarã. Avei jaservi hína chupe jajapo jave estúdio de família, jaapoja pe traváho oñepytyvõ hag̃ua umi ermáno ohasa asývape, jaservi voluntárioramo umi asambleahápe, térã Betélpe (Heb. 13:16; Sant. 1:27). Oiméramo pe adorasión verdadéra haʼe hína pe iñimportantevéva ñandéve g̃uarã, jaservíta Jehovápe “ára ha pyhare”. ¡Ajépa javyʼaite jaadorávo Ñandejára Jehovápe! (Apoc. 7:15).