Kárta omboúva Kuérpo Governánte
“Oikóma vaʼerã [...] pendehegui mboʼehára” (Heb. 5:12). ¡Eñeimahinamína! Jehová, pe Mboʼehára ikatupyryvéva ko univérsope ñaneinvita ñamboʼe hag̃ua ótrope chugui. Ñamboʼe pe añetegua ñande rogapýpe, kongregasiónpe ha predikasiónpe haʼe peteĩ priviléhio ha peteĩ rresponsavilida iñimportantetereíva. Péro, ¿mbaʼépa ikatu ñanepytyvõ oiko hag̃ua ñandehegui peteĩ mboʼehára ikatupyrýva?
Jaikuaa hag̃ua upéva, jahechamína mbaʼépa heʼi vaʼekue apóstol Pablo Timotéope, haʼe heʼi: “Reñehaʼã meme vaʼerã relee opavave renondépe, emokyreʼỹ ótrope ojapo hag̃ua iporãva ha eporomboʼe”. Ha upéi osegi heʼi chupe: “Péicha rejesalváta nde ha avei umi nerendúva” (1 Tim. 4:13, 16). Pe mensáhe ñamombeʼúva umi héntepe ikatu osalva chupekuéra. Upévare ñañehaʼãmbaite vaʼerã jalee ha ñamboʼe porãve, ha ko folléto ñanepytyvõta upearã. Jahechamína mbaʼe mbaʼépa oguereko.
Téxto orekóva peteĩ konsého oĩva la Bíbliape térã peteĩ ehémplo ojogueraháva pe leksión rehe.
Jehová ningo haʼe pe “Mboʼehára Ijojahaʼỹva” (Isa. 30:20). Ko folléto nepytyvõta ndekatupyryve hag̃ua relee ha remboʼe jave, péro ani nderesarái umi mbaʼe ñamboʼéva ouha Jehovágui, haʼe ningo la omoag̃uíva umi héntepe ijehe (Juan 6:44). Upévare ejerure meme vaʼerã chupe ijespíritu ha eñehaʼã pyʼỹinte reipuru Iñeʼẽ. Eñehaʼã vaʼerã umi nerendúva toñekonsentra Jehováre, ani nderehe. Ha ejapo ikatúva guive umi nerendúva ohayhuve hag̃ua Jehovápe ipyʼaite guive.
Jehová neinvita emombeʼu hag̃ua ótrope pe mensáhe iñimportantevéva oĩva ko yvy ape ári. Ha roime segúro rejeroviáramo “pe fuérsa Ñandejára omeʼẽvare” katuete rejapo porãtaha ko tembiapo (1 Ped. 4:11).
Pene ermáno ombaʼapo meméva penendive,
Cuerpo Gobernante de los Testigos de Jehová