La Bíbliape oñeñeʼẽ meme Ñandejára Rréinore, ha upéva haʼe hína pe mensáhe iñimportantevéva oĩva pype. Jehová oipurúta upe Rréino ojapo jey hag̃ua ko yvýgui peteĩ paraíso. ¿Mbaʼépa hína upe Rréino? ¿Mbaʼéichapa jaikuaa ogovernamaha koʼág̃a? ¿Mbaʼe mbaʼépa ojapóma, ha mbaʼépa ojapóta amo gotyove? Ko leksiónpe ha avei leksión 32 ha 33-pe ñarrespondéta koʼã porandu.

1. ¿Mbaʼépa hína Ñandejára Rréino, ha mávapa Irréi?

Ñandejára Rréino haʼe hína peteĩ goviérno Jehová voi omoñepyrũ vaʼekue. Ha Irréi katu haʼe Jesucristo, ogovernáva yvága guive (Mateo 4:17; Juan 18:36). La Biblia heʼi voi Jesús rehe: “Haʼe ogovernáta [...] opa ára g̃uarã” (Lucas 1:32, 33). Upéicharõ, Ñandejára Rréino rupive Jesús ogovernáta entéro umi oĩvare ko yvy ape ári.

2. ¿Mávapa ogovernáta Jesúsndi?

Jesús nogovernamoʼãi haʼeño, síno omoirũta chupe heta persóna oúva opaichagua trívu, puévlo ha tetãgui, ha oñeʼẽva diferénte idióma. Ha haʼekuéra ogovernáta ko yvy (Apocalipsis 5:9, 10). ¿Mboy piko umi ogovernátava Cristo ndive? Jesús ou guive ko yvy ape ári, hetaiterei hénteguima oiko isegidór. ¿Sera piko enterovéva ogovernáta hendive? Nahániri. Umíva apytégui ojeporavo 144.000 añónte ohótava yvágape ogoverna hag̃ua Jesús ndive (elee Apocalipsis 14:1-4). Entéro umi ótro kristiáno oikóta ko yvy ape ári, ha oĩta Ñandejára Rréino poguýpe (Salmo 37:29).

3. ¿Mbaʼérepa Ñandejára Rréino iporãve umi goviérno umánogui?

Umi goviérno umáno oñehaʼãramo jepe ojapo iporãva, haʼekuéra ndoguerekói la podér osolusiona hag̃ua opa mbaʼe. Avei koʼã goviérno oñekambia jave, heta vése umi opytáva hekovia opensa ijehénte ha noipytyvõséi la héntepe. Péro Jesús, upe ogovernáva Ñandejára Rréino, ndahaʼeiete upéicha. Ha ndaipóri ótro ikatu vaʼerã oipeʼa chugui ilugár. La Biblia heʼi voi Ñandejára omoĩ hague “peteĩ rréino núnka noñehundimoʼãiva” (Daniel 2:44). Jesús ogovernáta ko yvy tuichakuére, ha otratáta enterovépe peteĩchante. Haʼe ningo ñanderayhu, imbaʼeporã ha ihústo, ha ñanemboʼéta enterovépe jasegi hag̃ua iñehémplo (elee Isaías 11:9).

4. Peteĩ goviérno iporãitereíva ogovernáta ko yvy tuichakuére

Jesucristo ipoderosove oimeraẽ governánte umánogui. Elee Mateo 28:18, ha upéi erresponde ko porandu:

• Según ko téxto, ¿mbaʼérepa jaʼekuaa Jesús orekoha hetave autorida oimeraẽ governánte umánogui?

Umi goviérno umáno ningo pyʼỹi okambia ha káda uno ogoverna peteĩ paíspente. ¿Ha mbaʼépa ikatu jaʼe Ñandejára Rréinore? Elee Daniel 7:14, ha upéi erresponde koʼã porandu:

• Ñandejára Rréino ningo “noñehundimoʼãi arakaʼeve”, ¿mbaʼérepa iporãite upéva?

• Ñandejára Rréino ogovernáta ko yvy tuichakuére, ¿mbaʼérepa iporãitereíta upéva?

5. Oñekambiámante vaʼerã umi goviérno umáno

¿Mbaʼérepa Ñandejára Rréino opytámante vaʼerã umi goviérno umáno rekovia? Ehecha pe VIDÉO, ha upéi erresponde ko porandu:

VIDÉO: ¿Mbaʼépa hína Ñandejára Rréino? (Vidéo mbykyvéva) (1:41)

• ¿Mbaʼe mbaʼépa oiko umi goviérno umáno káusare?

Elee Eclesiastés 8:9, ha upéi erresponde koʼã porandu:

• ¿Ndépa ere iporãvetaha Ñandejára Rréino opytáramo umi goviérno umáno rekovia? ¿Mbaʼérepa repensa upéicha?

6. Umi ogovernátava Ñandejára Rréino ñanentende porã

Ñande Rréi Jesús ou vaʼekue ko yvy ári ha oiko peteĩ umánoicha, upévare ikatu “ñanentende ñanekangy jave” (Hebreos 4:15). Jehová oiporavo 144.000 kuimbaʼe ha kuña iñeʼẽrendúvape ogoverna hag̃ua Jesús ndive. Ha haʼekuéra “ou opaichagua trívu, puévlo ha tetãgui, ha oñeʼẽ diferénte idióma” (Apocalipsis 5:9).

• ¿Ndévepa nekonsola reikuaávo Jesús ha umi ogovernátava hendive ontendeha umi mbaʼe ñañandu ha jahasáva? ¿Mbaʼérepa reñeñandu upéicha?

7. Umi léi orekóva Ñandejára Rréino iporãiterei

Umi goviérno omoĩ heta léi opensáva oipytyvõtaha ha oprotehetaha la héntepe. Ñandejára Rréino avei oreko umi léi tekotevẽva okumpli entéro umi oikoséva ipoguýpe. Elee 1 Corintios 6:9-11, ha upéi erresponde koʼã porandu:

• ¿Mbaʼéichapa jaiko vaʼerãmoʼã enterovéva okumplírire Ñandejára léi?a

• Jehová oipota umi oikótava Irréino poguýpe okumpli koʼã léi, ¿ndépa ere haʼe orekoha derécho ojerurévo upéva? ¿Mbaʼérepa repensa upéicha?

• ¿Mbaʼérepa ikatu jaʼe umi nokumplíriva koʼág̃a Ñandejára léi ikatuha okambia? (Ehecha jey versíkulo 11).

RRESÚMEN

Ñandejára Rréino haʼe peteĩ goviérno oĩva yvágape ha ogovernátava ko yvy tuichakuére.

Rrepáso

• ¿Máva mávapa umi ogovernátava Ñandejára Rréinope?

• ¿Mbaʼérepa Ñandejára Rréino iporãve oimeraẽ goviérno umánogui?

• ¿Mbaʼe mbaʼépa Jehová oipota ojapo umi oikótava Irréino poguýpe?

EINVESTIGA HAG̃UA

¿Heʼípa raʼe Jesús moõpa oĩ Ñandejára Rréino?

“¿Ñandejára Rréino piko peteĩ mbaʼe jarekóva ñane korasõmente?” (Artíkulo oĩva jw-pe)

¿Mbaʼérepa umi testígo de Jehová opensa iñimportanteveha ifiél Ñandejára Rréinope umi goviérno umánope rangue?

Rojepytaso Ñandejára Rréino ykére (1:43)

Ehecha mbaʼépa heʼi la Biblia umi 144.000 Jehová oiporavo vaʼekuére ogoverna hag̃ua Jesús ndive.

“¿Máva mávapa ohóta yvágape?” (Artíkulo oĩva jw-pe)

¿Mbaʼérepa peteĩ kuñakarai oho vaʼekue kárselpe oĩ segúra Ñandejára añoite oguerutaha hustísia ko múndope?

“Hasypeve aikuaa mbaʼéichapa opáta umi inhustísia” (¡Despertad! Noviembre de 2011)

Áño 1914 guive Ñandejára Rréino oñepyrũma ogoverna yvágape, ha upe tiémpo guive saʼipaitéma ofalta oñehundiete hag̃ua umi goviérno umáno. ¿Mbaʼéichapa jaikuaa upéva? Jahechamína mbohapy mbaʼe: umi profesía oĩva la Bíbliape, mbaʼe mbaʼépa oiko ko múndope ha mbaʼéichapa oñekomporta la hénte áño 1914 guive.

1. ¿Mbaʼépa ojeprofetisa vaʼekue la Bíbliape?

Lívro de Daniélpe oñeñeʼẽ “7 áño” térã ‘7 tiémpore’ ha ohechauka opa vove upéva oñepyrũta hague ogoverna Ñandejára Rréino (Daniel 4:16, 17, nóta). Heta tiémpo rire, Jesús ohechauka vaʼekue “pe tiémpo oñemeʼẽva umi nasiónpe” ndopáiti hague, ha upérõ haʼe oñeʼẽ kuri pe profesía Daniel heʼi vaʼekuére (Lucas 21:24). Ha jahechataháicha, umi 7 tiémpo opa áño 1914-pe.

2. ¿Mbaʼe mbaʼépa oiko ko múndope ha mbaʼéichapa oñekomporta la hénte áño 1914 guive?

Jesús disipulokuéra oporandu vaʼekue chupe: ‘¿Mbaʼe señálpa oĩta ropilla hag̃ua nde reimemaha orendive, ha pe fin ou potaitemaha?’ (Mateo 24:3). Upémarõ Jesús oprofetisa umi mbaʼe oikótava haʼe oñepyrũ vove ogoverna yvágape Ñandejára Rréino. Por ehémplo, heʼi oĩtaha gérra, ñembyahýi ha yvyryrýi (elee Mateo 24:7). La Biblia oprofetisa avei ‘umi ára pahápe pe situasión ijetuʼu ha ipeligrosotaha’, ha omombeʼu avei mbaʼéichapa oñekomportáta la hénte (2 Timoteo 3:1-5). Ha áño 1914 guive entéro koʼã mbaʼe oñekumplipaite.

3. ¿Mbaʼérepa ko múndo situasión ivaiete oñepyrũ guive ogoverna Ñandejára Rréino?

Jesús oñepyrũmíre ogoverna Ñandejára Rréino, omoñepyrũ peteĩ gérra Satanás ha idemoniokuéra kóntrape. Satanás operde upe gérra ha upévare “oñemombo chupe ko yvýpe ha hiʼanhelkuérape avei oñemombo hendive” (Apocalipsis 12:9, 10, 12). Satanás ningo ipochyeterei pórke oikuaa oñehunditaha, ha upévare haʼe oiko ombosufri la héntepe ko yvy ape ári. ¡Ndareíri ivaiete la situasión ko múndope! Péro ñanembovyʼa jaikuaávo Ñandejára Rréino osolusionambaitetaha koʼã provléma.

EJEPYʼAMONGETAMÍNA

4. Pe profesía ohechaukáva Ñandejára Rréino ogovernamaha áño 1914 guive

VIDÉO: Ñandejára Rréino oñepyrũ ogoverna 1914 guive (5:02)

Ñandejára ohechauka vaʼekue iképe Nabucodonosórpe mbaʼépa oikóta kuri amo gotyove. Proféta Daniel oexplika vaʼekue chupe mbaʼépa heʼise umi mbaʼe ohecháva, ha upe explikasión ñanepytyvõ ñantende hag̃ua oñekumplíta hague Nabucodonosor rehe ha avei Ñandejára Rréinore (elee Daniel 4:17).a

Elee Daniel 4:20-26, ha upéi eipuru pe rrekuádro hérava “Pe yvyramáta guasu ha Ñandejára Rréino” erresponde hag̃ua koʼã porandu:

• A) ¿Mbaʼépa ohecha vaʼekue Nabucodonosor iképe? (Ehecha jey versíkulo 20 ha 21).

• B) ¿Mbaʼépa oiko pe yvyramátare? (Ehecha jey versíkulo 23).

• C) ¿Mbaʼépa oiko vaʼerã kuri opávo umi “7 tiémpo”? (Ehecha jey versíkulo 26 ).

Pe yvyramáta guasu ha Ñandejára Rréino

PROFESÍA (Daniel 4:20-36)

Ogoverna

A) Peteĩ yvyramáta tuichaitereíva

Nogovernavéi

B) ‘Ojeity pe yvyramáta’ ha ohasa “7 tiémpo”

Ogoverna jey

C) “Oñemeʼẽ jeýta ndéve ne rréino”

Primer kumplimiénto

• D) ¿Mávapepa orrepresenta pe yvyramáta? (Ehecha jey versíkulo 22).

• E) ¿Arakaʼe guivépa nogovernavéi? (Elee Daniel 4:29-33).

• F) ¿Mbaʼépa oiko Nabucodonosor rehe opa rire umi “7 tiémpo”? (Elee Daniel 4:34-36).

PRIMER KUMPLIMIÉNTO

Ogoverna

D) Nabucodonosor, rréi de Babilonia

Nogovernavéi

E) Áño 606 ántes de Cristo (a.C.) guive Nabucodonosor operde ihuísio ha ndaikatuvéi ogoverna 7 áñore

Ogoverna jey

F) Nabucodonosor ihuísio porã ha oñepyrũ jey ogoverna

Segundo kumplimiénto

• G) ¿Máva mávapepa orrepresenta pe yvyramáta? (Elee 1 Crónicas 29:23).

• H) ¿Arakaʼe guivépa nogovernavéi hikuái? ¿Mbaʼérepa jaʼekuaa nogovernái hague hikuái Jesús oĩha tiémpope ko yvy ape ári? (Elee Lucas 21:24).

• I) ¿Arakaʼe ha moõpa oñepyrũ jeýta kuri pe goviérno?

SEGUNDO KUMPLIMIÉNTO

Ogoverna

G) Umi rréi oĩ vaʼekue Israélpe orrepresentáva Ñandejára goviérnope

Nogovernavéi

H) Jerusalén oñehundi, ha 2.520 áñore ndaiporivéi vaʼekue peteĩ rréi israelita ogovernáva

Ogoverna jey

I) Jesúsgui oiko Rréi ha oñepyrũ ogoverna Ñandejára Rréino yvágape

5. Ko múndo tuichaiterei okambia áño 1914 guive

Ehecha pe VIDÉO.

VIDÉO: Ko múndo okambiaite 1914 guive (1:10)

Jesús oprofetisa mbaʼe mbaʼépa oikóta kuri haʼe oñepyrũ guive ogoverna. Elee Lucas 21:9-11, ha upéi erresponde ko porandu:

• Koʼã profesía apytégui, ¿mavaitévapa nde rehendu térã rehecha oñekumpliha?

Apóstol Pablo omombeʼu vaʼekue mbaʼéichapa la hénte oñekomportáta kuri umi ára pahápe, oñehundi mboyvemi umi goviérno umáno. Elee 2 Timoteo 3:1-5, ha upéi erresponde ko porandu:

• ¿Ndépa ere la hénte oñekomportaha péicha koʼág̃arupi?

6. ¿Mbaʼépa jajapokuaa jaikuaávo Ñandejára Rréino ogovernamaha?

Elee Mateo 24:3, 14, ha upéi erresponde koʼã porandu:

• ¿Mbaʼe traváho iñimportantetévapa ojejapo hína ohechaukáva Ñandejára Rréino ogovernamaha?

• ¿Mbaʼéichapa nde ikatu avei repartisipa ko traváhope?

Ñandejára Rréino oñepyrũma ogoverna ha koʼẽrõitéma omandáta avei ko yvy ape ári. Elee Hebreos 10:24, 25, ha upéi erresponde ko porandu:

• ¿Mbaʼépa káda uno tekotevẽ jajapo “jahechávo Ñandejára día hiʼag̃uimbaitemaha”?

RRESÚMEN

Umi profesía oĩva la Bíbliape ha umi mbaʼe oikóva ko múndope ohechauka Ñandejára Rréino ogovernamaha koʼág̃a. Ñande jahechauka jagueroviaha upéva ñasẽvo japredika ha jahávo rreunionhápe.

Rrepáso

• ¿Mbaʼépa oiko raʼe opávo umi 7 tiémpo ojeprofetisa vaʼekue lívro de Daniélpe?

• ¿Mbaʼérepa nde reime segúro Ñandejára Rréino ogovernamaha áño 1914 guive?

• ¿Mbaʼéichapa nde ikatu rehechauka regueroviaha Ñandejára Rréino ogovernamaha?

EINVESTIGA HAG̃UA

¿Mbaʼeichaitépa okambia ko múndo áño 1914 guive? Ehechamína mbaʼépa heʼi unos kuánto istoriadór ha hetave persóna.

“Arakaʼe guivépa ko múndo oho vaive hese” (¡Despertad! Abril de 2007)

Ehecha mbaʼéichapa ou okambia peteĩ karai oikuaa rire mbaʼépa heʼi Mateo 24:14.

“Chegustaiterei vaʼekue la béisbol” (Ñemañaha número 3 de 2017)

¿Mbaʼérepa jaʼekuaa pe profesía oĩva Daniel kapítulo 4-pe oñeʼẽha Ñandejára Rréinore?

“¿Arakaʼe guivépa oñepyrũ ogoverna Ñandejára Rréino? (Párte 1)” (Ñemañaha 1 de octubre de 2014)

¿Mbaʼéichapa jaikuaa umi “7 tiémpo” oñeñeʼẽha Daniel kapítulo 4-pe opa hague áño 1914-pe?

“¿Arakaʼe guivépa oñepyrũ ogoverna Ñandejára Rréino? (Párte 2)” (Ñemañaha 1 de noviembre de 2014)

Ñandejára Rréino ningo ogovernáma, ha koʼẽrõite okambiáta hetaiterei mbaʼe ko yvy ape ári. Jahechamína unas kuánta kósa iporãitereíva nde ikatútava rehupyty jaiko vove upe Rréino poguýpe.

1. ¿Mbaʼépa ojapóta Ñandejára Rréino oĩ jey hag̃ua hustísia ha pyʼaguapy ko múndope?

Jesús, pe Rréi ogovernáva Ñandejára Rréino, ohundietéta umi hénte aña ha umi goviérno umánope pe gérra de Armagedónpe (Apocalipsis 16:14, 16). Upe tiémpope, ko múndo tuichakuére oñekumplíta ko profesía oĩva la Bíbliape: “Koʼẽrõitéma opáta umi hénte iñañáva” (Salmo 37:10). Ñandejára Rréino rupive Jesús ojapóta tekotevẽva guive oĩ jey hag̃ua hustísia ha pyʼaguapy ko múndope (elee Isaías 11:4).

2. ¿Mbaʼéichapa jaikóta ojejapo vove Ñandejára volunta ko yvy ape ári?

Ñandejára Rréino poguýpe, “umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29). ¡Eñeimahinamína mbaʼeichaitépa javyʼáta peteĩ lugár oĩháme hénte hembiapo porãvante ha ohayhúva Jehovápe ha hapichakuérape! Upépe ndaiporimoʼãvéima hasýva ha enterovéva oikóta pára siémpre.

3. ¿Mbaʼépa ojapóta Ñandejára Rréino oñehundipa rire umi hénte añáme?

Oñehundi rire umi hénte añáme, Jesús ogovernáta 1.000 áñore. Upe aja haʼe ha 144.000 ogovernáva hendive oipytyvõta umi oikóvape ko yvy ape ári haʼe hag̃ua perfékto. Ko yvýgui oiko jeýta peteĩ paraíso, ha opávo umi 1.000 áño oikóta pype vyʼápe sólamente umi iñeʼẽrendúva Jehovápe. Upéi Jesús omeʼẽ jeýta pe Rréino Itúa Jehovápe. Ha upérõ hasypeve ko yvy tuichakuére oñembotuicháta Jehová réra (Mateo 6:9, 10). Avei ojehechaukátama Jehová haʼeha peteĩ governánte imbaʼeporãva ha oñeinteresáva umi oĩvare ipoguýpe. Haʼe ohundíta Satanáspe, idemoniokuérape, ha oimeraẽ ótro opuʼãvape igoviérno kóntrare (Apocalipsis 20:7-10). Ha entéro mbaʼe porã oguerútava Ñandejára Rréino oduráta pára siémpre.

EJEPYʼAMONGETAMÍNA

4. Ñandejára Rréino ohundíta umi goviérno umáno

La Biblia heʼi: “Yvypóra omanda hapicháre operhudika hag̃uánte chupe” (Eclesiastés 8:9). Upéicha rupi ko múndope oĩ hetaiterei inhustísia, péro Jehová oipurúta Irréino osolusionaite hag̃ua upéva.

Elee Daniel 2:44 ha 2 Tesalonicenses 1:6-8, ha upéi erresponde koʼã porandu:

• ¿Mbaʼépa ojapóta Jehová ha Itaʼýra Jesús umi goviérno umánore ha umi oapojávare koʼã goviérno?

• Koʼág̃a reikuaa porãvémarõ Jehová ha Jesúspe, ¿mbaʼérepa reimekuaa segúro haʼekuéra ihustotaha katuete?

5. Jesús haʼe pe ñanegoverna porãvétava

Ogoverna aja Ñandejára Rréinope, Jesús ojapóta hetaiterei mbaʼe oipytyvõ hag̃ua umi oikóvape ko yvy ape ári. Oĩrõ guare ko yvy ape ári, haʼe ohechaukáma vaʼekue oipytyvõseha la héntepe ha Ñandejára omeʼẽ hague chupe pe podér upearã. Eikuaa hag̃ua mbaʼérepa jaʼe upéva ehecha pe VIDÉO.

VIDÉO: Jesús ohechauka vaʼekue mbaʼépa ojapóta Ñandejára Rréino (1:13)

Oĩ aja ko yvy ape ári Jesús ohechauka vaʼekue michĩmi mbaʼe mbaʼépa ojapóta Ñandejára Rréino rupive. Emañamína pe lístape umi promésa porãite jatopáva la Bíbliape. ¿Mavaitévapa ndegustave? Elee umi téxto bíblico oĩva káda vendisión rire nepytyvõtava rentende porãve hag̃ua káda uno.

6. Ñandejára Rréino poguýpe añetehápe jaiko porãta

VIDÉO: Jareko peteĩ futúro iporãitereíva (4:38)

Elee Salmo 145:16, ha upéi erresponde ko porandu:

• ¿Mbaʼéichapa reñeñandu reikuaávo Jehová omeʼẽtaha “entérope opa mbaʼe oipotáva”?

RRESÚMEN

Ñandejára Rréino rupive oñekumplíta Jehová volunta. Ko yvy kompletoitégui oikóta peteĩ paraíso oĩtahápe sólamente umi hénte ivuénova oadoráva Jehovápe pára siémpre.

Rrepáso

• ¿Mbaʼéichapa Ñandejára Rréino ombotuicháta Jehová réra?

• ¿Mbaʼérepa ikatu jaguerovia Ñandejára Rréino rupive oñekumplitaha umi promésa oĩva la Bíbliape?

• Ñandejára Rréino ojapóta heta mbaʼe iporãitereíva, ¿mbaʼépa la nde rehechasevéva umíva apytégui?

EINVESTIGA HAG̃UA

Ehecha mbaʼépa heʼise Armagedón.

“¿Mbaʼépa hína pe gérra de Armagedón?” (Artíkulo oĩva jw-pe)

Jesús oñeʼẽ vaʼekue pe “jehasa asy guasu” rehe, ehechamína mbaʼépa oikóta upe vove (Mateo 24:21).

“¿Mbaʼépa pe jehasa asy guasu?” (Artíkulo oĩva jw-pe)

Ehecha mbaʼéichapa umi família ikatu oñeimahina umi mbaʼe porã ohupytýtava pe paraísope.

Eñeimahina reimemaha pe paraísope (1:50)

Pe experiénsia héravape “Oĩ vaʼekue heta mbaʼe nantendéiva”, ehecha mbaʼépa oipytyvõ peteĩ karaípe otopa hag̃ua la rrespuésta umi mbaʼe oikuaasévape.

“La Biblia okambia chupekuéra” (La Atalaya 1 de enero de 2012)