LEKSIÓN 47
¿Reimémapa preparádo rejevautisa hag̃ua?
Nde ningo reaprendéma hetaiterei mbaʼe Jehovágui restudiávo la Biblia. Ha katuete rekambiáma heta mbaʼépe rejapo hag̃ua umi mbaʼe reaprendéva rehóvo. Péro ikatu oime reñandu nereimeitiha preparádo reñemeʼẽ hag̃ua Jehovápe ha rejevautisa. Upévare ko leksiónpe jahecháta mbaʼe mbaʼépa ikatu hína ndejoko, péro avei jahecháta mbaʼépa ikatu rejapo resupera hag̃ua umíva.
1. ¿Tekotevẽpa reikuaa opa mbaʼe oĩva la Bíbliape rejevautisa hag̃ua?
Rejevautisa hag̃ua tekotevẽ ‘eikuaa porã pe añetegua’ (1 Timoteo 2:4). Péro upéva ndeʼiséi eikuaa vaʼerãha káda detálle oĩva la Bíbliape ejevautisa mboyve. ¿Mbaʼérepa jaʼe upéva? Pórke entéro kristiáno osegi oaprende, umi ojapómava heta áño ojevautisa hague jepe (Colosenses 1:9, 10). Péro si reaprende vaʼerã umi mbaʼe iñimportantevéva oĩva la Bíbliape. Umi ansiáno oĩva kongregasiónpe ikatu nepytyvõ reikuaa hag̃ua ovalémapa umi mbaʼe reaprendéva rejevautisa hag̃uáicha.
2. ¿Mbaʼe mbaʼépa rejapo vaʼerã rejevautisa mboyve?
Ejevautisa mboyve tekotevẽ ‘eñarrepenti ha ejevy nde rape vaígui’ (elee Hechos 3:19). Upéva heʼise rembyasyha nde pyʼaite guive umi mbaʼe vai rejapo vaʼekue anteve, ha ejerureha Jehovápe taneperdona umívare. Heʼise avei emboyketetaha umi mbaʼe Ñandejára heʼíva oĩ vaiha, ha ejedesidimaha ejapo umi mbaʼe chupe ogustávante. Avei eho meméma vaʼerã rreunionhápe ha oikóma vaʼerã ndehegui puvlikadór no vautisádo.
3. ¿Mbaʼérepa nderekyhyjéi vaʼerã rejevautisa hag̃ua?
Oĩ okyhyjéva ofalláramo g̃uarã ha ndaikatúiramo g̃uarã okumpli la opromete vaʼekue Jehovápe. Ha legálmente ningo rejavýtante voi, oiko haguéicha heta Ñandejára siervokuéra yma guare rehe. Péro nemanduʼa vaʼerã Jehová ndojerureiha isiervokuérape iperfékto opa mbaʼépe (elee Salmo 103:13, 14). ¡Nde reñehaʼãmbaitéma guive rejapo haʼe oipotáva, haʼe ovyʼaitereítama ndereheve! Jehová katuete nepytyvõta. La Biblia oasegura voi ñandéve mbaʼeve ni avave ndaikatumoʼãiha “ñandepeʼa Ñandejára mborayhúgui” (elee Romanos 8:38, 39).
EJEPYʼAMONGETAMÍNA
Jahechamína mbaʼéichapa ikatu eikuaa porãve Jehovápe ha easepta pe ajúda haʼe omeʼẽva. Koʼã mbaʼe nepytyvõta esupera hag̃ua oimeraẽ mbaʼe ikatúva ndejoko pono rejevautisa.
4. Eikuaa porãkena Jehovápe
¿Mbaʼeichaite pevépa reikuaa vaʼerã Jehovápe rejevautisa mboyve? Eikuaa vaʼerã tekotevẽva guive ikatu hag̃uáicha ehayhu chupe, ha eikose hag̃ua haʼe oipotaháicha. Ehecha pe VIDÉO eikuaa hag̃ua mbaʼéichapa ojapo upéva heta estudiánte de la Biblia oikóva ko múndo tuichakuére. Upéi erresponde ko porandu:
Ohechaukaháicha pe vidéo, ¿mbaʼépa oipytyvõ koʼã estudiántepe ojeprepara hag̃ua ojevautisa mboyve?
Elee Romanos 12:2, ha upéi erresponde koʼã porandu:
¿Ndépa reduda algúna enseñánsa oĩvagui la Bíbliape? ¿Redudápa umi testígo de Jehová haʼeha pe rrelihión verdadéra?
Oiméramo upéicha, ¿mbaʼépa ikatu rejapo?
5. ¿Mbaʼéichapa resuperakuaa umi mbaʼe ikatúva ndejoko pono rejevautisa?
Enterovéva ningo ñambohovái heta mbaʼe ijetuʼúva jadesidi rire ñañemeʼẽtaha Jehovápe ha jajevautisa. Emañamína peteĩ experiénsia ohechaukáva upéva, ehecha pe VIDÉO, ha upéi erresponde koʼã porandu:
Ohechaukaháicha pe vidéo, ¿mbaʼe ijetuʼúvapa tekotevẽ vaʼekue Narangerel osupera oservi hag̃ua Jehovápe?
Haʼe ningo ohayhueterei Jehovápe, ¿mbaʼéichapa upéva oipytyvõ chupe osupera hag̃ua umi provléma?
Elee Proverbios 29:25 ha 2 Timoteo 1:7, ha upéi erresponde ko porandu:
¿Mbaʼépa ñanembopyʼaguasúta jasupera hag̃ua oimeraẽ mbaʼe ikatúva ñandejoko?
6. Ejeroviákena Jehová nepytyvõtaha
Jehová siémpre oĩta nepytyvõ hag̃uáicha. Ehecha pe VIDÉO, ha upéi erresponde koʼã porandu:
Ohechaukaháicha pe vidéo, ¿mbaʼérepa pe estudiánte okyhyje kuri ojevautisa hag̃ua?
¿Mbaʼépa oipytyvõ chupe ojeroviave hag̃ua Jehováre?
Elee Isaías 41:10, 13, ha upéi erresponde ko porandu:
¿Mbaʼérepa reimekuaa segúro ikatuha rekumpli pe promésa rejapóva reñemeʼẽvo Jehovápe?
7. Eagradesékena Jehovápe nderayhueterei haguére
Amáske rejepyʼamongeta mbaʼeichaitépa Jehová nderayhu, reagradesevéta chupe ha koʼýte reserviséta chupe pára siémpre. Elee Salmo 40:5, ha upéi erresponde koʼã porandu:
¿Mbaʼéichapa Jehová nevendesi koʼág̃a peve? ¿Máva mávapa umíva apytégui nde remombaʼeve?
Proféta Jeremías ohayhueterei vaʼekue Jehovápe ha Iñeʼẽ. Upévare omombaʼeterei vaʼekue ikatu haguére orrepresenta chupe. Haʼe heʼi: “Ne ñeʼẽ chembovyʼa ha chembopyʼarory, pórke che agueraha nde réra Jehová” (Jeremías 15:16). Ekontestamína koʼág̃a koʼã porandu:
¿Mbaʼérepa haʼe peteĩ priviléhio tuichaitereíva oiko ndehegui peteĩ testígo de Jehová?
¿Ndépa rejevautisase oiko hag̃ua ndehegui peteĩ testígo de Jehová?
¿Oĩpa álgo ndejokóva ani hag̃ua rejapo upéva?
¿Mbaʼépa repensa tekotevẽitiha rejapo rejevautisa hag̃ua?
OĨRAMO HEʼÍVA: “Che akyhyje afallárõ g̃uarã ajevautisa rire ha ndaikatuvéi akumpli la apromete vaʼekue Jehovápe”.
¿Ndépa reñeñandu upéicha?
RRESÚMEN
Oĩramo jepe heta mbaʼe ikatúva ndejoko pono rejevautisa, Jehová katuete nepytyvõta resupera hag̃ua umíva.
Rrepáso
¿Tekotevẽpa reikuaa opa mbaʼe oĩva la Bíbliape rejevautisa hag̃ua?
¿Mbaʼe mbaʼépa rejapo vaʼerã rejevautisa mboyve?
¿Mbaʼérepa nderekyhyjéi vaʼerã rejevautisa hag̃ua?
EINVESTIGA HAG̃UA
Ehecha mbaʼe mbaʼépa nemomýi vaʼerã rejevautisa hag̃ua.
“¿Reimémapa preparádo rejevautisa hag̃ua?” (Ñemañaha marzo de 2020)
Ehecha mbaʼéichapa resuperakuaa umi mbaʼe ikatúva ndejoko pono rejevautisa.
“¿Mbaʼéiko chejoko ajevautisa hag̃ua?” (Ñemañaha marzo de 2019)
Ehecha mbaʼéichapa peteĩ karai osupera unos kuánto provléma ijetuʼuetereíva ojevautisa hag̃ua.
Ñepyrũrã peteĩ karai hérava Ataa oduda lénto ojevautisa hag̃ua. Ehecha mbaʼépa okonvense chupe odesidi hag̃ua ko mbaʼe iñimportantetéva.