43 JOSÉ
Haʼe okuida porãiterei vaʼekue ifamíliare
PETEĨ kuimbaʼe oñehaʼãmbaite vaʼerã okuida hag̃ua hembireko ha ifamiliakuérare, ha ipyʼaguasu vaʼerã oprotehe hag̃ua chupekuéra. José, haʼéva peteĩ karpintéro Nazaretgua, ojapose vaʼekue upéva. Péro omenda mboyve jepe, haʼe ombohováima vaʼekue heta mbaʼe tekotevẽ haguépe ohechauka ipyʼaguasuha. Haʼe oñekompromete kuri omenda hag̃ua Maríare, péro upéi oikuaami María hyeguasumaha ha upe mitã ndahaʼéi imbaʼe. María omombeʼu Josépe mbaʼéichapa opyta hyeguasu, péro ijetuʼu chupe oguerovia hag̃ua upéva. ¿Mbaʼépa ojapóta upéicharõ?
La Biblia heʼi José “ihústo” hague. Haʼe siémpre iñeʼẽrendu vaʼekue Jehovápe, ivuéno ha oiporiahuvereko enterovépe. Upéicha rupi oikuaárõ guare María hyeguasuha, haʼe opensa porã la ojapótavare. José ndoipotái kuri oñemotĩ Maríape, upévare opensa ojedivorsiávo chugui kañyháme. Upe tiémpope, umi oñekomprometévare ojeʼe vaʼekue omendamaha voi, upévare ojedeha hag̃ua ojuehegui ojedivorsiámante vaʼerã. Péro Jehová ojoko Josépe omondóvo peteĩ ánhelpe oñeʼẽ hag̃ua chupe iképe. Pe ánhel heʼi chupe: “Ani rekyhyje regueraha hag̃ua ne rembireko Maríape nde rógape”. Haʼe oasegura Josépe siertoha la María heʼíva. Pe mitã onasétava haʼéta kuri Ñandejára Raʼy, pe Mesías oñepromete vaʼekue.
José oreko vaʼekue peteĩ rresponsavilida tuichaitereíva: Okuida vaʼerã Ñandejára Raʼýre
José “ojapo Jehová ánhel heʼi hagueichaite chupe”. Haʼe ipyʼaguasu ha oasepta pe rresponsavilida Jehová omeʼẽva chupe. José oñehaʼãmbaite vaʼekue okuida porã hag̃ua hembirekóre ha avei pe mitã iñimportantevéva onase vaʼekuére ko yvy ape ári. Ha legálmente ojapo hag̃ua upéva tekotevẽta kuri ipyʼaguasueterei.
Unos kuánto mése haguépe, César Augusto omanda enterovéva oho vaʼerãha ivállepe oñeanota hag̃ua peteĩ sénsope. Upévare José oviaha vaʼerã Belénpe. Ndajaikuaái oimépa pe léi ohupyty avei raʼe Maríape ha ohómante vaʼerã, upéicharõ jepe haʼe oho iménandi. Posívlemente José oraha chupe, openságui péicha okuida porãvetaha hese. Upémarõ ojapo hikuái pe viáhe ipukuetéva, jepe María hyeguasuetéma kuri. Og̃uahẽ rire hikuái Belénpe, og̃uahẽ avei pe tiémpo María imemby hag̃ua. Péicha Jesús onase peteĩ lugár oñemongehápe umi animálpe.
José omyendy vaʼekue hese la itraváhope okuida porã hag̃ua ifamíliare, péro ndaiplatahetái vaʼekue hikuái. Upéicha rupi haʼe ha María ohórõ guare pe témplope Jerusalénpe, omeʼẽ vaʼekue pe sakrifísio oñemandáva umi imboriahúvape g̃uarã. Tiémpo riremi, oikórõ guare hikuái peteĩ ógape Belénpe, ovisita chupekuéra unos kuánto astrólogo. Provávlemente koʼãva ou kuri Babilóniagui ha osegi oúvo hikuái álgo ojoguáva peteĩ estréllape. Haʼekuéra omeʼẽ pe famíliape unos kuánto rregálo hepyetereíva. Péro upe riremínte, Jehová ánhel oavisa Josépe pe rréi Herodes iñañaitéva ojukaseha Jesúspe. Upévare pe ánhel heʼi Josépe ogueraha hag̃ua ifamíliape Egíptope.
José ipyʼaguasu vaʼerã kuri ojapo hag̃ua pe ánhel omandáva chupe. Haʼe opuʼã ha heʼi hembirekópe oho vaʼerãha hikuái Beléngui. Upe pyharépe voi José, María ha Jesús, osẽ oho peteĩ país opytávape mombyry chuguikuéra. ¿Mbaʼéicha piko José okuidáta hesekuéra Egíptope? Katuete ideprovechoitereíne raʼe chupekuéra umi rregálo orresivi vaʼekue umi astrólogogui. Unos kuánto tiémpo rire, Jehová omanda Josépe ou jey hag̃ua hikuái ivállepe. Péro Belénpe oĩ vaʼekue peteĩ governánte iñañaitereíva, upéicha rupi José ndohói upépe. Upéva rangue, Jehová omanda chupe ohónte hag̃ua Nazarétpe.
Upépe José ha María oguereko vaʼekue 6 térã hetave mitã Jesús rire. Ha upéicha rupi José ombaʼapo jejopy vaʼekue karpinteríape omantene hag̃ua chupekuéra. Péro José ojapo vaʼekue avei la iñimportantevéva, haʼe oipytyvõ ifamíliape oadora hag̃ua hikuái Jehovápe oñondivepa. Haʼekuéra ojepokuaa vaʼekue voi siémpre oho pe sinagógape oaprende hag̃ua Jehovágui, ha umi fiésta ojejapóvape Jerusalénpe. La Biblia oñeʼẽ José rehe última ves peteĩva koʼã fiésta oikórõ guare. Upérõ guare Jesús oreko 12 áño ha okañymi chuguikuéra. ¡Eñeimahinamíntena mbaʼeichaitépa oiméne ojepyʼapy raʼe José! Péro Jesús oĩ hína kuri pe témplope ha mbaʼevete ndojehúi chupe. La Biblia heʼi upéi oho jey hague hikuái hógape, ha Jesús osegi iñeʼẽrendu ituakuérape.
La Biblia nomombeʼúi arakaʼépa omano vaʼekue José, péro si jaikuaa upe mboyve Jesús ombaʼapóma hague hendive karpinteríape. Upévare voi oñehenói vaʼekue chupe “pe karpintéro raʼy”. Péro ndahaʼéi upévante, japilla avei José omboʼe hague Jesúspe iprofesión. Upévare Jesús rehe voi ojeʼéma vaʼekue haʼeha “karpintéro”. Jehová oipota entéro tuakuéra osegi José ehémplo, ¿mbaʼérepa? Pórke haʼe ipyʼaguasu vaʼekue oprotehe hag̃ua ifamíliape, ombaʼapo omeʼẽ hag̃ua chupekuéra la oikotevẽva ha okumpli porã pe rresponsavilida Jehová omeʼẽva chupe omboʼévo ifamíliape oadora hag̃ua Jehovápe.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa José ipyʼaguasu hague?
Einvestigamína
1. María túa haʼe vaʼekue Helí, ¿mbaʼérepa upéicharõ Lucas 3:23-pe ojeʼe avei Helí haʼeha José túa? (w17.08 32 párr. 4).
2. ¿Mbaʼérepa oiméne José ndorekói raʼe rrelasión sexuál Maríandi Jesús onase mboyve? (w03 15/12 5 párr. 5-wcgr).
3. ¿Mbaʼépa ohechauka José iguapoiterei hague itravahohápe? (ia 191, 192 párr. 15-18). A
Taʼanga A
4. ¿Mbaʼérepa ikatu jaʼe José omano hague Jesús imitãitirõ guare? (w17.07 13 párr. 8, nóta).
Ejepyʼamongetamína ndejehe
José ojapo vaʼekue la Jehová omandáva chupe ijetuʼúramo jepe, ¿mbaʼépa ikatu oaprende chugui umi omoakãva hogapy? (Mat. 1:20, 24; 2:13-15, 19-21).
¿Mbaʼéichapa José ehémplo ohechauka iñimportanteha ñamotenonde Jehovápe ñande rogapýpe? (Luc. 2:41). B
Taʼanga B
¿Mbaʼéicha javépa ikatu avei rehechauka ndepyʼaguasuha José ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Josépe Jehová omoingove jey vove chupe?
Reikuaave hag̃ua
Ehechamína ko vidéope mbaʼeichaitépa José iñeʼẽrendu vaʼekue Jehovápe.
¿Mbaʼéichapa ikatu jasegi José ha María ehémplo umi governánte onohẽ jave umi léi nokonveníriva ñandéve térã iñinhústova?
¿Ñanekyreʼỹpa ñaneñeʼẽrendu hag̃ua? (w23.10 8-10 párr. 9-14).