51 BERNABÉ
“Peteĩ oporomokyreʼỹva”
OHASA rire 3 áñorupi Saulo de Társogui oiko hague kristiáno, haʼe oho Jerusalénpe umi kristiáno rendápe (Gál. 1:15-19). Chupe g̃uarã umi kristiáno haʼéma iñermáno ha iñermána, péro haʼekuéra okyhyjepáiti chugui pórke imanduʼa mbaʼeichaitépa haʼe yma iñaña hendivekuéra. Por lo vísto oĩ vaʼekue heta ndoikuaáiva Saulo okambiaitéma hague. Upéicharõ jepe, oĩ vaʼekue peteĩ kuimbaʼe ndokyhyjéiva imbaʼeporã hag̃ua Sáulondi. Haʼe hína Bernabé, upéicha ojekuaa vaʼekue chupe.
Umi ermáno Jerusalengua okyhyje kuri oñemboja hag̃ua Saulo de Társore, péro Bernabé pyʼaguasúpe oho oipytyvõ chupe
La Biblia heʼi haʼe héra hague José, péro ermanokuéra ohenói vaʼekue chupe Bernabé, heʼiséva “peteĩ oporomokyreʼỹva”. Oñehenói chupe upéicha pórke haʼe imbaʼeporãiterei ha siémpre omokyreʼỹ ha oipytyvõ umi ótrope. Por ehémplo, pe Pentekostés riremi áño 33-pe, haʼe ovende peteĩ iterréno ha omeʼẽ la hepykue oñepytyvõ hag̃ua umi ermáno imboriahúvape. Upéi áño 36-pe Saulo oúrõ guare Jerusalénpe, Bernabé oñemboja hese ha imbaʼeporã hendive. La Biblia heʼi: “Bernabé oho oipytyvõ Sáulope, ha ogueraha chupe umi apóstol rendápe”. Upe guive, Bernabé ha Saulo opytáma oñoamigoite.
Saulo opredika kyreʼỹ kuri oĩ aja Jerusalénpe. Upéva ndogustaieterei umi judíope ha ojukase hikuái chupe. Upémarõ ermanokuéra omondómante chupe ivállepe Társope. Ohasa rire 9 áñorupi oiko hague koʼã mbaʼe, Bernabépe oñemondo Antioquía de Síriape omokyreʼỹ hag̃ua umi ermáno pyahúpe. Upe asignasión hoʼaiterei vaʼekue Bernabére pórke haʼe ‘ivuéno, ijerovia mbarete ha henyhẽ espíritu sántogui’. Péro haʼe oikotevẽma kuri ótro oipytyvõva chupe, pórke hetaiterei oĩ la ohendu porãva umi notísia porã Antioquíape. Upémarõ Bernabé oho Társope oheka hag̃ua iñamígo Sáulope. Mokõivéva oñopytyvõ porãiterei vaʼekue opredika hag̃ua umi héntepe. Ha umi kristiáno Judeagua ojecha vaírõ guare, Bernabé ha Saulo oorganisa la tekotevẽva oñepytyvõ hag̃ua chupekuéra.
Kon el tiémpo Sáulope oñehenóima Pablo. Upéi, Bernabé ha Pablo oñepyrũ opredika hetaiterei lugárupi, ojapoháicha umi misionéro. Mokõivévante tekotevẽ vaʼekue ipyʼaguasu ojapo hag̃ua upéva. Por ehémplo, Icóniope unos kuánto judío ojapise kuri chupekuéra itápe omano meve. Upémarõ haʼekuéra oho Lístrape. Ñepyrũrã umi hénte upepegua omombaʼeguasuse Pablo ha Bernabépe omombaʼeháicha idioskuérape, péro upéi unos kuánto judío oúva Antioquía ha Icóniogui oñepyrũ oñeʼẽ vai hesekuéra. Umi hénte Listragua oguerovia koʼã judíope. Upémarõ ojagarra ojapi vaipaite hikuái Páblope itápe ha tyryryhápe onohẽ chupe pe siudágui openságui omanomaha. Upéi umi kristiáno oho ojerepa Páblore ohecha hag̃ua mbaʼéichapa oĩ. Upépe Pablo oñemboʼy ha oho jey pe siudápe. ¡Oiméne ovyʼaite raʼe Bernabé ohechávo Pablo nomanoiha! Upe rire oho hikuái ótra siudápe. Pablo ha Bernabé ohasárõ jepe entéro koʼã mbaʼe, tiémpo riremi ou jey hikuái Lístrape omokyreʼỹ hag̃ua umi ermánope. ¡Ajépa ipyʼaguasuete mokõivéva!
Pablo ha Bernabé ohasa vaʼekue heta mbaʼe ijetuʼuetereíva, péro ohasa avei hikuái heta mbaʼe iporãitereíva. Upéicharõ jepe, peteĩ jey haʼekuéra voi oumi oñaprovlema. Pablo ha Bernabé omoñepyrũ jeýtama hína kuri ótro viáhe de predikasión. Bernabé oguerahase katuete iprímo Márcospe, péro Pablo nahániri. ¿Mbaʼérepa? Pórke pe ótra vuéltape Marcos ofalláma voi kuri chupekuéra. Mokõivévante oñemohatã la opensávape, upévare “tuicha oiko vai ha ojesepara hikuái”.
Ko situasiónpe Bernabé ohechauka vaʼerã kuri ipyʼaguasuha ojapo hag̃ua pe oĩ porãva. ¿Mbaʼérepa jaʼe upéva? Ndaikatúi jave ñañontende peteĩ ermánondi ifasileterei japyta hag̃ua ñandepochy, ñañeʼẽ vai hese ha ndajajeheʼavéi pe kongregasiónre. Péro pe añetehápe ipyʼaguasúva ndojapói pe ifasilvévante chupe. Upéva rangue, pe ipyʼaguasúva oñehaʼãmbaite oiko hag̃ua pyʼaguapýpe Ñandejárandi ha ermanokuérandi.
Pablo ha Bernabé noñontendéiramo jepe upérõ guare, ndohejái upéva ojoko chupekuéra osegi hag̃ua oservi Jehovápe. Bernabé ha Marcos osẽ oho Chíprepe opredika hag̃ua. Pablo katu oviaha Sílasndi ha ohupyty avei hikuái heta mbaʼe predikasiónpe Jehová rupive.
¿Pablo ha Bernabé piko opyta raʼe ipochyete oñondive? Nahániri. ¿Mbaʼérepa jaʼe upéva? Pórke Pablo oñeʼẽ porã kuri hese umi kárta oskrivi vaʼekuépe upe rire. Peteĩvape por ehémplo heʼi Bernabé ombaʼapo hague oñemantene hag̃ua ikatu hag̃uáicha osegi opredika (1 Cor. 9:6). Ótrope katu imanduʼa porã Márcosre, “haʼéva Bernabé prímo” (Col. 4:10, 11). Ndajaikuaái ningo upe rirépa Pablo ha Bernabé opredika jey raʼe oñondive, péro la jaikuaáva haʼekuéra osegi hague oñoamigoite. Katuete Bernabé osegíne raʼe opredika ha oporomokyreʼỹ. Oservívo Márcosndi, oiméne omboʼe raʼe chupe heta mbaʼe. ¿Mbaʼéichapa Marcos ohechauka vaʼekue avei ipyʼaguasuha? Upéva jahecháta pe kapítulo oúvape.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Bernabé ipyʼaguasu hague?
Einvestigamína
1. Según pe léi, yma umi levítape noñemeʼẽi vaʼekue ijyvyrã Israélpe. ¿Mbaʼéichapa upéicharõ Bernabé okonsegi raʼe ijyvyrã? (Núm. 18:20; Hech. 4:36, 37; w98 15/4 20 párr. 4, nóta-wcgr).
2. ¿Mbaʼérepa Bernabére ojeʼe vaʼekue avei haʼeha apóstol? (Hech. 14:14; it “Bernabé” párr. 3-wcgr).
3. Bernabé ha Pablo opredika vaʼekue peteĩ kuimbaʼe héravape Sergio Paulo. ¿Ndojavýipa raʼe Lucas heʼívo ko kuimbaʼe haʼeha “prokónsul”? (Hech. 13:7, 12; w14 1/1 8 párr. 4, 5). A
Bank of Cyprus Cultural Foundation Collection
Taʼanga A: Peteĩ monéda emperadór Claudio tiémpope guare. Upe tiémpope Bernabé ha Pablo opredika Chíprepe. Ko monéda oñeʼẽ pe “prokónsul” rehe, haʼéva pe ogovernáva ísla de Chíprepe
4. Bernabé ha Pablo ohórõ guare Lístrape, umi hénte ojapose vaʼekue chupekuéra sakrifísio. ¿Mbaʼérepa nañanesorprendéi upéva? (bt 109, rrekuádro).
Ejepyʼamongetamína ndejehe
¿Mbaʼe mbaʼépa ikatu jajapo ñanembaʼeporã hag̃ua Bernabéicha?
Posívlemente Bernabé oorganisa vaʼekue pe primer viáhe de predikasión ojapo vaʼekue Páblondi, péro upéi Páblope oñemeʼẽma hetave rresponsavilida. Upéicharõ jepe haʼe naiñenvidiósoi. ¿Mbaʼéicha javépa ikatu jasegi Bernabé ehémplo? B
Taʼanga B
¿Mbaʼéichapa ikatu ndepyʼaguasu Bernabé ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼérepa reagradese Jehovápe oiporavo haguére Bernabépe ogoverna hag̃ua Jesúsndi yvágape?
Reikuaave hag̃ua
¿Mbaʼéichapa Bernabé ha Pablo ehémplo ohechauka umi persóna idiferentetéva ojuehegui ikatuha ombaʼapo porã oñondive?
Ñasolusiona umi provléma jarekóva ótrondi ha jaiko pyʼaguapýpe (w17.06 16-20).
¿Mbaʼéichapa Bernabé ha Pablo ehémplo ikatu ñanepytyvõ jaiko vaíramo ótro ermánondi?