Mbaʼérepa ijetuʼuete hesakã porã hag̃ua?
MBAʼÉPA Ñandejára pytu marangatu térã espíritu sánto? Heta mbaʼe ningo ojeʼe péro ijetuʼueterei oñemyesakã porã hag̃ua. Pápa Benedicto XVI heʼi peteĩ diskúrsope ojapovaʼekue Austráliape: “Haʼete ku ndaikatumoʼãiva arakaʼeve oñemyesakã porã mbaʼépa pe pytu marangatu”.
Hasyeterei rupi ko téma heta oĩ ojehesareapáva. Umi ikatupyrýva jepe ndaikatúi omyesakã porã ha nog̃uahẽi peteĩ ñeʼẽme hikuái. Oĩ heʼíva pe pytu marangatu haʼeha:
• Peteĩnte Ñandejára ha Jesús ndive.
• Pe puʼaka Ñandejára oiporúva oikuaa hag̃ua mbaʼépa oiko ko múndope.
• Peteĩ puʼaka oĩva Jesús remimboʼekuéra pyʼapýpe.
Mbaʼéicha rupípa heta hénte nog̃uahẽi peteĩ ñeʼẽme? Cuatrocientos áño rupi Jesús ou rire, umi teólogo oñepyrũ omboʼe pe pytu marangatu haʼeha peteĩ tekove ha ojoguaha Ñandejárape. Péro La Biblia ni Jesús remimboʼekuéra ypykue nomboʼéi upéva. Peteĩ Diccionario de la Biblia ojapóva Serafín de Ausejo heʼi :“Antiguo Testaméntope pytu marangatu heʼise Yahvéh puʼaka ha Nuevo Testaméntope heʼise avei peteĩ mbaʼe oporopytyvõva, ndahaʼéi peteĩ tekove”. Ñandejára Ñeʼẽme “puʼaka ha pytu marangatu” ojeporu peteĩchaite.
Heta hénte heʼi: “Mbaʼéicha piko aipo peteĩ puʼaka oñandu ha opensáta?” Estados Unídospe ojejapórõ guare peteĩ enkuésta oĩ hetaiterei opensáva pe pytu marangatu, Ñandejára ha Jesús peteĩnteha. Péro oĩ teólogo heʼíva “pe pytu marangatu oikoveha ha ndahaʼeiha peteĩnte Ñandejára ha Jesús ndive”. Mávapepa jagueroviavaʼerã?
La Biblia añoite ikatu omyesakã porã ñandéve upéva. Heʼi haguéicha Apóstol Pablo: ‘Opaichagua Ñeʼẽ ojehaiuka Ñandejára espíritu rupi ha iporã ñaporomboʼe ha oporopytyvõ hag̃ua’ (2 Timoteo 3:16, ÑÑB).
La Biblia heʼi Ñandejára pytu marangatu ñanepytyvõha heta mbaʼépe. Ha jaikuaa porãramo mbaʼépa heʼise, ikatúta jajerure Ñandejárape ñañemboʼekuévo chupe. Pór ehémplo, sapyʼánte ñandeforsa ñane provlemakuéra ha haʼete ndajaropuʼakavéimava. Mbaʼépa jajapokuaa upéicha jave? Jajapovaʼerã Jesús heʼivaʼekue hemimboʼekuérape: ‘Pejerure jey jeýkena, ha oñemeʼẽta peẽme. Peẽ pemeʼẽ heta mbaʼe porã pende raʼykuérape, mbaʼégui piko upéicharõ, ñande Ru yvagapegua nomeʼẽmoʼãi ipytu marangatu umi ojerurévape chupe?’ (Lucas 11:9, 13, NM.)
Koʼág̃a jahecháta mbaʼéichapa Ñandejára Ñeʼẽ omyesakã mbaʼépa hína pe pytu marangatu ha mbaʼéichapa ñanepytyvõkuaa.
[Komentário oĩva páhina 3-pe]
Ñandejára Ñeʼẽ omyesakã mbaʼépa hína pe pytu marangatu