Jahechaukákena ñañembosakoʼimaha

‘Pehechaukáke peñembosakoʼimaha, peimoʼãʼỹve jave oúta pe Yvypóra Raʼy.’ (MAT. 24:44, NM)

1, 2. a) Mbaʼérepa ikatu ñambojoja pe jaguarete ojapovaʼekue? b) Mbaʼépa jajapovaʼerã jajesalva hag̃ua Cristo ohundi vove opa hénte añáme?

OĨ PETEĨ karai famóso osẽva sirkoháre umi jaguarete imboʼepyréva ndive. Heta áñorema ombaʼapo péicha ha umi mymba ndojapóiva hese mbaʼeve. Pe karai heʼi: “Umi mymba iñeʼẽrendu ha rojepokuaaiterei ojuehe. Upéva ningo tuichaiterei mbaʼe chéve g̃uarã”. Péro 3 de octubre de 2003, peteĩ jaguarete haʼe omboʼepyréva, orekóva 170 kílo rupi, reiete opo hese ha oisuʼu chupe. Upépe oikuaa ndaikatuiha ojeroviaiterei ojepokuaa haguérente ojuehe. Pe mymba opo pe karaíre ohaʼarõʼỹve jave ha haʼe noĩrikuri oñedefende hag̃uáicha.

² Upe oikovaʼekue ikatu oñembojoja pe ‘mymba ñarõ’ ojapótavare koʼẽrõite ha ñande ñañembosakoʼimavaʼerã ñahaʼarõ aja oiko upéva (elee Revelación 17:15-18). Mávarepa opuʼãta ko mymba ñarõ “ha umi diez hatĩ”, térã Naciones Unidas ha umi goviérno koʼag̃agua? La Biblia heʼi opuʼãtaha pe kuña rekovaíre, orrepresentáva entéro rrelihión japu, ha ohundietéta umívape. Ndajaikuaái arakaʼetépa oikóta koʼã mbaʼe (Mat. 24:36). Péro jaikuaa oikotaha oñehaʼarõʼỹve jave ha og̃uahẽmbotaitemaha (Mat. 24:44; 1 Cor. 7:29). Upe rire Cristo ohundíta umi hénte aña ha omosãsóta Ñandejára rembiguaikuéra iñeʼẽrendúvape. Opa umívare tekotevẽterei jahechauka ñañembosakoʼimaha ñahaʼarõ aja Jehová ha Jesús ojapótava (Luc. 21:28). Ymave Ñandejára rembiguaikuéra ohechavaʼekue mbaʼéichapa Jehová okumpli iñeʼẽ ojesareko porã ha oñembosakoʼi rupi. Jahechamína mbaʼépa ojapo Noé, hogayguakuéra ha Moisés, ha mbaʼéichapa ikatu ñahaʼanga chupekuéra.

Ñañembosakoʼíkena Noé ojapo haguéicha

3. Mbaʼérepa ijetuʼúneraʼe Noépe oiko hag̃ua Jehová oipotaháicha?

³ Noé tiémpope oiko hetaiterei mbaʼe ndevaipa jepéva, upéicharõ jepe haʼe oñembosakoʼivaʼekue ohaʼarõ aja Jehová okumpli iñeʼẽ. Oiméne ijetuʼuetéraʼe chupe umi mbaʼe ohasáva! Pór ehémplo, umi ánhel aña ou ko yvy ape ári oñembohete kuimbaʼéicha ha oiko kuñanguéra ndive. Chupekuéra ningo ndojejapoivaʼekue upearã ha upéicha rupi ifamiliakuéra osẽ tuichaicha. Koʼã demónio raʼykuéra imbaretetereíva ojahéi ha oñemboharái umi héntere (Gén. 6:4). Avei iñañaiterei ha ojapo sarambi opárupi. Amo ipahápe yvyporakuéra opensa ha ojapóma heta mbaʼe vai koʼã tekove aña oipotaháicha. Upévare Jehová heʼi ohundipaitetaha chupekuéra (elee Génesis 6:3, 5, 11, 12).a

4, 5. Mbaʼérepa koʼã ára ñande jaikoha ojogua Noé tiémpope?

⁴ Jesús heʼivaʼekue koʼã ára ñande jaikoha ojoguataha Noé tiémpope (Mat. 24:37). Avei ñande jahechakuaa koʼág̃a mbaʼéichapa demoniokuéra ojapouka umi héntepe haʼekuéra oipotáva (Rev. 12:7-9, 12). Ndaikatuvéiramo jepe oñembohete kuimbaʼéicha, oñehaʼãmbaite hikuái ipuʼaka mitã ha kakuaa opensávare. Avei koʼã tekove tieʼỹ ovyʼajoa ohechávo mbaʼéichapa heta yvypóra oñemeʼẽ tekovaípe ha oñemboharái hapicháre (Efe. 6:11, 12).

⁵ Ñandejára Ñeʼẽ heʼi pe Aña Ruvicha ‘ikatuha oporojuka’ (Juan 8:44; Heb. 2:14). Mbaʼépa heʼise upéva? Satanás ndaikatúiramo jepe ojuka ojukasévape, ombotavy ha ojapouka yvypórape heta mbaʼe vai térã omomýi chupekuéra ojuka hag̃ua hapichápe. Koʼág̃a rupi heta hetave umi ipyʼahatãva, pór ehémplo Estados Unídospente, 142 mitã onasévagui, peteĩme katuete hapicha ojukáne. Jehovápe oipyʼapyeterei umi mbaʼe vai ojejapóva, oipyʼapy haguéicha chupe Noé tiémpope ha haʼe ndohejareichéne upéva.

6, 7. Mbaʼéichapa Noé ha hogayguakuéra ohechauka ojeroviaha Jehováre ha ndojaposeiha mbaʼeve ombopochýtava chupe?

⁶ Jehová, voi reheve omomaranduvaʼekue Noépe oguerutaha peteĩ ama guasu ohundi hag̃ua “opaite tekove oĩva guive” (Gén. 6:13, 17). Heʼi avei chupe ojapo hag̃ua peteĩ árka, térã peteĩ káha guasu. Noé ha hogayguakuéra iñeʼẽrendu ha pyaʼe oñepyrũ ojapo pe árka. Upéicha ohechauka hikuái oñembosakoʼiha ohaʼarõ aja pe ára Jehová okastigataha umi hénte añáme. Mbaʼépa omomýi chupekuéra iñeʼẽrendu hag̃ua?

⁷ Ojerovia mbarete hikuái Jehováre ha ndojaposéi mbaʼeve ombopochýtava chupe (Gén. 6:22; Heb. 11:7). Noé omoakã porã ifamília ha akóinte ojesareko Jehová heʼívare. Ndojoguái umi oikóvape ijerére (Gén. 6:9). Oikuaa avei ifamiliakuéra ndoikoivaʼerãha umi hénte aña ha oñorairõséva oikoháicha ha ndovaleiha omotenonde haʼekuéra ojaposévante. Iñimportanteterei ningo pe tembiapo Ñandejára omeʼẽva chupekuéra ha ojapovaʼerã katuete ojesalva hag̃ua (elee Génesis 6:14, 18).

Noé ha hogayguakuéra ohechauka oñembosakoʼiha

8. Mbaʼéichapa jaikuaa Noé familiakuéra iñeʼẽrendu hague Jehovápe?

⁸ La Bíbliape oñeñeʼẽve Noé rehe, péro jahechakuaa hembireko, itaʼyrakuéra ha umi itaʼýra rembireko avei iñeʼẽrendu hague Jehovápe. Upévare Ezequiel opensáneraʼe mbaʼépa oikovaʼerãmoʼã Noé raʼykuéra oĩrire itiémpope. Haʼe ohechauka haʼekuéra ndojesalvái hague itúva iñeʼẽrendu rupínte. Mbaʼérepa? Okakuaapáma rupi hikuái ha ikatúgui odesidi mbaʼépa ojapóta. Upévare jaʼekuaa Noé familiakuéra ojesalva hague iñeʼẽrendu rupi ha péicha ohechauka ohayhuha Jehovápe ha omombaʼeha iñeʼẽ (Eze. 14:19, 20). Haʼekuéra ojerovia Ñandejárare, ohendu Noé heʼíva ha mbaʼeve ndojokói chupekuéra ojapo hag̃ua Jehová rembipota.

9. Máva mávapa oñehaʼã avei ojapo Noé ojapo haguéicha?

⁹ Ajépa javyʼaite jahechávo heta ermáno oñehaʼãha Noé ojapo haguéicha ha omoakã hekopete hogapy. Haʼekuéra oikuaa porã omoĩvaʼerãha ifamíliape hemikotevẽ, peteĩ lugár oiko hag̃ua ha omondo eskuélape, péro avei oipytyvõvaʼerã chupekuéra oĩ porã hag̃ua Jehovándi. Tuvakuéra ojapóramo koʼã mbaʼe ohechaukáta oñembosakoʼimaha ou mboyve Jehová ára guasu.

10, 11. a) Mbaʼéichapa oñeñandúneraʼe Noé ha hogayguakuéra pe árkape? b) Mbaʼépa iporã ñañeporandu?

¹⁰ Noé ha hogayguakuéra hiʼare cincuenta áño rupi ojapopa hag̃ua pe árka. Epensamíntena mbaʼeichaitépa oiméne ombaʼapo hikuái! Mboy vése piko oike ha osẽneraʼe pype, opinta jey jey vléke joguahápe ani hag̃ua oike hese y, omoinge pype heta hiʼupy ha upe rire umi mymba. Año 2.370-pe, Jesús ou mboyve, segundo més, día 17 og̃uahẽ sapyʼa pe ára Ñandejára heʼivaʼekue. Noé ha hogayguakuéra oikepa árkape ha Jehová omboty hesevekuéra pe okẽ. Upéi oñepyrũ oky tuichaiterei opárupi ko yvy ape ári, haʼete voi ku ojehykuavóva pe yvága ha pe árka oñepyrũma ovevýi y ári (Gén. 7:11, 16). Okápe umi hénte ojahogapa, péro umi oĩva árkape ojesalva. Mbaʼépa nde ere? Mbaʼéichapa oiméne oñeñandu Noé ha ifamiliakuéra árka ryepýpe? Katuete ningo oagradeséne hikuái Jehovápe ha heʼi: “Haʼetépe ñaneñeʼẽrendúraʼe Ñandejárape ha ñañehaʼãmbaite ñañembosakoʼi!” (Gén. 6:9). Koʼág̃a epensami ko mbaʼére: ñamoĩ chupe ohasamaha Armagedón ha nde rejesalva. Mbaʼéichapa reñeñandúta? Ajépa revyʼaitereíta ha reagradeséta Jehovápe nde pyʼaite guive upévare.

¹¹ Ñandejára Ipuʼakapáva heʼi ñandéve ohunditaha ko múndo aña oĩva Satanás poguýpe ha avave ndojokomoʼãi chupe. Upévare iporã ñañeporandumi: “Ajeroviápa Ñandejára okumplipaitetaha opa mbaʼe heʼíva guive ha ojapotaha itiempoitépe?”. Oimérõ upéicha, jahechaukavaʼerã ñañembosakoʼimaha ha ani ñanderesarái ‘Jehová ára’ hiʼag̃uimbaitemaha (2 Ped. 3:12).

Moisés akóinte ojesarekovaʼekue

12. Mbaʼépa orekovaʼekue Moisés ikatúva ombyesarái chupe Ñandejáragui?

¹² Jahechamína koʼág̃a Moisés ehémplo. Haʼe oiko porãiterei vaʼekue Egíptope ha katuete opavave omombaʼenerakaʼe chupe. Mbaʼérepa? Faraón rajy oreko chupe imembýramo, ikatu hoʼu umi tembiʼu hevéva, oreko umi ao iporã porãvéva ha hetave mbaʼe. Avei omboʼe chupe umi mboʼehára ikatupyryvéva upe tiémpope (elee Hechos 7:20-22). Ha oĩ rupi faraón famíliape katuete oñemoĩneraʼe iñakãre heta mbaʼe opyta hag̃ua chupe.

13. Mbaʼépa oipytyvõ Moiséspe ani hag̃ua hesarái Jehová oprometevaʼekuégui?

¹³ Ikatu jaʼe ituvakuéra omboʼe porã hague Moiséspe imitãme, upéicha rupi haʼe ohechakuaa naiporãiha oñemombaʼeguasu taʼanga ojapoháicha umi Egiptoygua (Éxo. 32:8). Ni umi estúdio yvate ni umi mbaʼeta orekóva nomomombyrýi chupe Ñandejáragui. Katuete ningo haʼe ojepyʼamongeta porã Jehová oprometevaʼekuére hembiguaikuérape ha ohechaukase oñembosakoʼimaha ojapo hag̃ua Ñandejára rembipota. Upévare, ohórõ guare umi isrraelíta rendápe, heʼi chupekuéra: ‘Jehová, Abrahán Jára, Isaac Jára ha Jacob Jára, chembou pene rendápe’ (elee Éxodo 3:15-17).

14. Mbaʼe mbaʼépa ohasavaʼekue Moisés?

¹⁴ Moiséspe g̃uarã Ñandejára Jehová oikove, ndahaʼeiete umi taʼanga rei Egíptope oñemombaʼeguasúvaicha. Upévare akóinte oikovaʼekue ‘ohecharõguáicha Ñandejárape’ ha ojeroviaiterei hese. Haʼe oikuaa porã Jehová oguenohẽtaha hembiguaikuérape Egíptogui ndoikuaáiramo jepe arakaʼetépa (Heb. 11:24, 25, 27). Moisés ndohechasevéima umi isrraelíta oikoha tembiguáiramo ha ohechárõ guare mbaʼéichapa ojejahéi peteĩre, ojuka pe ehípsiope (Éxo. 2:11, 12). Péro neʼĩra gueteri og̃uahẽ pe ára Jehová omosãso hag̃ua chupekuéra ha upévare tekotevẽvaʼekue Moisés okañy upégui ha oho mombyry tetã ambuépe. Oiméne heta ohasa asýraʼe, oiko porãhágui faraón rógape oho oiko pe desiértore. Upéicharõ jepe ohechauka oñembosakoʼimaha. Mbaʼéichapa ojapo upéva? Haʼe ojesareko porã opa mbaʼe Ñandejára heʼívare ha upeichaite ojapo. Upévare cuarenta áño rire Jehová oiporu chupe oguenohẽ hag̃ua umi isrraelítape Egíptogui. Moisés iñeʼẽrendu, osẽ Madiángui ha oho jey Egíptope. Upépe ae og̃uahẽ pe tiémpo Jehová omosãso hag̃ua ipuévlope ha oiporu chupe ojapo hag̃ua upéva (Éxo. 3:2, 7, 8, 10). Moisés tekotevẽvaʼekue ojerovia ha ipyʼaguasu oñemboja hag̃ua faraón rendápe. La Biblia heʼi hese ‘ndaipóri hague haʼeichagua ipyʼaporãva yvy ári’ (Núm. 12:3). Upéicharõ jepe oho heta vése ombohovái pe mburuvichápe, koʼýte Jehová omboúrõ guare umi plága Egíptope.

15. Mbaʼérepa Moisés pyʼỹinte oagradese Jehovápe ohasáramo jepe heta mbaʼe ijetuʼúva?

¹⁵ Moisés ohasa avei heta mbaʼe ijetuʼúva oikórõ guare cuarenta áño pe desiértore umi isrraelítandi. Haʼekuéra heta vése ojapo oñehaʼarõʼỹva chuguikuéra. Upéicharamo jepe, Moisés pyʼỹinte oagradese Jehovápe opa mbaʼe ojapóvare hesehapekuéra ha omokyreʼỹ umi isrraelítape ojapo hag̃ua avei péicha (Deu. 31:1-8). Mbaʼépa omomýi chupe omombaʼe hag̃ua Jehovápe? Haʼe ohayhueterei chupe ha ndoipotái oñeñeʼẽ vai hese. Omombaʼe ha odefende Ñandejára goviérno (Éxo. 32:10-13; Núm. 14:11-16). Ñande avei jahasáramo jepe heta mbaʼe ipohýiva térã ñahaʼarõʼỹva akóinte ñañemoĩvaʼerã Jehová ykére ha ñadefende Irréino. Jajeroviavaʼerã Ñandejárare jaikuaágui hekojoja, iñarandu ha ojapoha opa mbaʼe hekópe (Isa. 55:8-11; Jer. 10:23). Jajapópa ñande upéicha?

‘Peñatende porãke’

16, 17. Mbaʼérepa iñimportánte ndéve g̃uarã heʼíva Marcos 13:35-37?

¹⁶ ‘Peñatende porãke, ndapeikuaái mbaʼe día ha mbaʼe órapa oikóta koʼã mbaʼe’ (Mar. 13:33, NM). Péicha heʼivaʼekue Jesús omombeʼúrõ guare mbaʼépa oikóta oñehundipota vove ko múndo aña. Ha omohuʼãvo umi profesía heʼi: ‘Peñatende porãke, ndapeikuaaihína mbaʼe órapa oúta pe óga jára. Ndapeikuaái oútapa kaʼarupytũ, térã pyharepyte, térã gállo otokoroʼóvo, térãpa koʼẽmbotávo. Ani ág̃a peimoʼãʼỹve jave og̃uahẽ ha pendetopa pekejoa peína. Ko haʼéva peẽme, enterovépe haʼe: “Peñatende porãke”’ (Mar. 13:35-37, NM).

¹⁷ Jajepyʼamongetavaʼerã umi mbaʼe Jesús heʼivaʼekuére. Upérõ haʼe oñeʼẽ cuatro túrno ojapóvare umi guárdia pyharekue. Pe último túrno oñepyrũ koʼẽ mboyve lás tres ha oho hese osẽ meve kuarahy. Umi órape ijetuʼuve soldadokuérape oñatende porã hag̃ua okeseterei rupi. Upévare militarkuéra opensa umi órape ndahasyiveha oataka hag̃ua iñenemigokuérape ikatúgui otopa hesekuéra okehápe. Ko múndo avei haʼete ku oketéva ndohechakuaáigui Ñandejára ojapótava, ha ñande ñañehaʼãmbaitevaʼerã ani jake haʼekuéraicha. Jesús heʼi voi: ‘Peñatende porãke’. Añetehápe akóinte jaikovaʼerã upéicha og̃uahẽ meve Jehová ára guasu, ñanemosãsótava ko múndo añágui.

18. Mbaʼe neporãvapa ikatu jajapo ñande testígo de Jehová?

¹⁸ Oiméne nemanduʼa pe karai famóso rehe, ijaguarete oisuʼuvaʼekue chupe. Haʼe ningo ojesalvákuri. Péro la Biblia heʼi porã og̃uahẽ vove Jehová ára guasu, ndojesalvamoʼãiha mbaʼeveichagua rrelihión japu ni umi hénte aña (Rev. 18:4-8). Enterove jaservíva Jehovápe, tahaʼe imitãva térã kakuaa, jahechakuaavaʼerã mbaʼe tiémpopepa ñaimeñaína ha ñañehaʼãmbaite ñañembosakoʼi ñahaʼarõ aja upe ára. Jahechauka jaikoha Noé ha hogayguakuéra oiko haguéicha. Ko múndope hetaiterei tapicha omongyʼa Ñandejára réra. Umi rrelihión omoakãva, umi ndojeroviáiva Ñandejárare térã ndogueroviáiva voi Haʼe oĩha, oñembohory ñande Apoharére. Aníke jaheja umíva ñanembotavy. Jajepyʼamongetákena Noé ha Moisés ehémplore, ha jajesareko ikatu hag̃uáicha ñadefende ha ñambotuicha Jehovápe. Haʼe ‘tuicha ha imbareteve opa ñandejarakuéragui ha tekotevẽ ñaneñeʼẽrendu chupe’ (Deu. 10:17).

[Nóta]

Nemanduʼápa?

• Mbaʼérepa Noé tekotevẽvaʼekue oipytyvõ ifamíliape oĩ porã hag̃ua Ñandejára ndive?

• Mbaʼérepa ikatu jaʼe koʼã ára jaikoha ojoguaha Noé tiémpope?

• Mbaʼérepa Moisés akóinte ojerovia Jehová oprometevaʼekuére oikóramo jepe heta mbaʼe ohaʼarõʼỹva?

• Mbaʼe profesíapa nepytyvõ rejesareko ha reime porã hag̃ua Jehovándi?

[Nóta oĩva taʼanga ndive páhina 25]

Noé ha hogayguakuéra oñemeʼẽmbaite ojapo hag̃ua pe tembiapo Jehová ohejáva chupekuéra

[Nóta oĩva taʼanga ndive páhina 26]

Moisés ojeroviaiterei Jehová promésare ha upéicha rupi ojesareko porã vaʼekue