Umi mbaʼe jaikuaaséva
◼ Ojeheja mboyve peteĩ maranduhárape ojevautisa, ¿mbaʼépa ojekuaa vaʼerã hese oho jave rreunionhápe ha predikasiónpe?
Pe mbaʼe iñimportantevéva ikatúva jadesidi ñande rekovépe haʼe hína jajevautisa. Upévare umi ansiáno oheja mboyve peteĩ maranduhára ojevautisa, ohecha vaʼerã ontende porãpa umi mbaʼe Ñandejára ohaʼarõva chugui ha ohechaukápa hína oikoseha la Biblia heʼiháicha.
La Biblia ningo heʼi porã ñande kristiáno ñañembyaty vaʼerãha, upévare pe maranduhára ojevautisaséva oho meme vaʼerã rreunionhápe (Heb. 10:24, 25). Ha okomenta vaʼerã rreunionhápe. Oiméne oñeanotáma avei pe Eskuéla Jaiporukuaa hag̃ua la Bíbliape, ndahaʼéiramo jepe peteĩ mbaʼe tekotevẽtereíva ojapo ojevautisa hag̃ua.
Ñande kristianokuéra ñamombeʼu vaʼerã umi notísia porã ha ñaipytyvõ ñande rapichápe oiko hag̃ua chugui Jesús remimboʼe, upéicha avei peteĩ maranduhára ojevautisaséva osẽ meme vaʼerã predikasiónpe (Mat. 24:14; 28:19, 20). ¿Mboy mésepa tekotevẽ opredika peteĩ maranduhára ojevautisa mboyve? Ohechauka hag̃ua omombaʼeha pe predikasión osẽ meme vaʼerã opredika káda mes, ha tekotevẽ ojapo upéva peteĩ tiémpore (Sal. 78:37). Upéicharõ jepe, natekotevẽi ohasa hetaiterei mése upearã. ¿Mboy órapa oinforma vaʼerã káda mes? Ndaipóri ni peteĩ informasión heʼíva upéva, péro umi ansiáno tekotevẽ ohechakuaa káda maranduhára situasión ha ndovaléi ojopyeterei hendivekuéra (Luc. 21:1-4).
Umi ansiáno térã siérvo ministeriál (umi kongregasión oĩhápe saʼi ansiáno) oñembyaty jave umi ojevautisasévandi ohechakuaa vaʼerã káda persóna idiferenteha, ha tekotevẽ opensa porã odesidíta jave ikatútapa pe maranduhára ojevautisa. Oñehaʼarõ avei ojekuaa pe maranduhárare oikoseha testígo de Jehováramo, avei tuichaiterei mbaʼeha chupe g̃uarã opredika ha oñembyaty ermanokuérandi. Ansianokuéra nohaʼarõi vaʼerã chuguikuéra ikatupyry ha ijerovia mbarete umi maranduhára aréma ojevautisa vaʼekuéicha. Péro ohecháramo ndaikatumoʼãitiha ojevautisa, tekotevẽ ohechauka chupe la Biblia rupive mbaʼérepa ndaikatúi gueteri, ha oipytyvõ vaʼerã chupe ojapo hag̃ua umi mbaʼe oñehaʼarõva chugui.