Oñeporandúva jepi

¿Mávapa hína umi orresusitátava ko yvy ape ári, ha mbaʼeichagua rresurreksiónpa orekóta hikuái?

Jahechamína koʼág̃a mbaʼépa heʼi la Biblia ko témare.

Hechos 24:15-pe heʼi “oñemoingove jeytaha umi ihústova ha umi iñinhústovape”. Umi ihústova ningo haʼe hína umi iñeʼẽrendu vaʼekue Ñandejárape omano mboyve. Upévare herakuéra ojeskrivi pe lívro de la vídape (Mal. 3:16). Umi iñinhústova ningo haʼe hína umi ndoguerekói vaʼekue la oportunida oikuaávo Jehovápe. Ha upévare herakuéra noĩri pe lívro de la vídape.

Juan 5:28, 29 oñeʼẽ avei umi mokõi grúpo oñemensionávare Hechos 24:15-pe. Jesús heʼi vaʼekue voi: “Umi ojapo vaʼekue iporãva orresusitáta oikove hag̃ua ha umi ojapo vaʼekue ivaíva katu orresusitáta ojehusga hag̃ua”. Umi ihústova ningo ojapo kuri umi mbaʼe iporãva omano mboyve. Upévare haʼekuéra orresusitáta oikove hag̃ua, pórke herakuéra oĩta gueteri pe lívro de la vídape. Umi iñinhústova katu ojapo kuri umi mbaʼe ivaíva omano mboyve. Upévare orresusitáta hikuái ojehusga hag̃ua, pórke herakuéra ndaipóri gueteri pe lívro de la vídape. Upéva haʼéta hína peteĩ oportunida ohechauka hag̃ua hikuái oservisépa Jehovápe térã nahániri. Pórke pe tiémpope haʼekuéra oguerekóta la oportunida oaprende hag̃ua Jehovágui ha ikatu hag̃uáicha herakuéra ojeskrivi avei pe lívro de la vídape.

Apocalipsis 20:12, 13-pe heʼi entéro umi orresusitáva tekotevẽtaha okumpli ‘umi mbaʼe ojeskrivíva umi rróllope’. Upéva haʼe hína umi léi pyahu Jehová omeʼẽtava ñandéve pe múndo pyahúpe. Ha umi naiñeʼẽrendúivape katu oñehundíta (Is. 65:20).

Daniel 12:2-pe heʼi umi hénte omanóva opaytaha. “Algúno opáyta oiko hag̃ua pára siémpre ha ótro katu oñemotĩ ha ojedespresia hag̃ua opa ára g̃uarã”. Ko versíkulo oñeʼẽ hína umi mbaʼe oikótavare orresusita rire umi hénte. Haʼekuéra orresusitáta “oiko hag̃ua pára siémpre”, térã “oñemotĩ ha ojedespresia hag̃ua opa ára g̃uarã”. Upéicharõ opávo umi 1.000 áño, oĩta hína umi oikovétava pára siémpre ha oĩta avei umi oñehundítava opa ára g̃uarã (Apoc. 20:15; 21:3, 4).

Ñamoĩmína peteĩ ehémplo. Koʼã mokõi grúpo orresusitátava ikatu ñakompara umi extranhéro oikosévare ótro paíspe. Umi ihústova ojogua hína umi oñemeʼẽvape chupe peteĩ permíso ombaʼapo térã oiko hag̃ua upe paíspe, ha ikatu hag̃uáicha oguereko liverta ojapo hag̃ua hetave mbaʼe. Umi iñinhústova ojogua umi extranhéro oñemeʼẽvape peteĩ permíso temporál. Upe tiémpope umi extranhéro ohechauka vaʼerã omeresépa osegi oiko upe paíspe. Upéicha avei umi iñinhústova orresusitátava tekotevẽ iñeʼẽrendu umi Jehová leikuérape, ha ohechauka vaʼerã ihustoha osegi hag̃ua oiko pe paraísope. Noimportái hína mbaʼeichagua permísopa ñepyrũrã oñemeʼẽ kuri umi extranhérope oike hag̃ua upe paíspe, pórke ikatu oĩ umi orresivíva permíso oiko hag̃ua upe paíspe ha ótrope katu oñemondo jey hetãme. Upéva odepende hína haʼekuérapa okumpli hína umi léi ha oñekomporta oñehaʼarõháicha chuguikuéra pe país pyahúpe. Upéicha avei entéro umi orresusitátava tekotevẽta ifiél Jehovápe ha oñekomporta oñehaʼarõháicha chuguikuéra pe múndo pyahúpe.

Jehová ningo ndahaʼéi peteĩ Dios oporohayhúnteva, síno haʼe avei peteĩ Dios ihústova ha hekojojáva (Deut. 32:4; Sal. 33:5). Haʼe ningo ohechaukáta pe imborayhu omoingove jeývo umi ihústova ha umi iñinhústovape. Upéicharõ jepe, Jehová ohaʼarõ entéro umi orresusitáva iñeʼẽrendu chupe opa mbaʼépe. Umi ohayhúva Jehovápe ha iñeʼẽrendúva chupe entéro mbaʼépe, osegíta oiko pe múndo pyahúpe.