Oñeporandúva jepi

Segunda a los Tesalonicenses 3:14 heʼi oñemarka vaʼerãha algúnope kongregasiónpe, ¿upévapa odesidi vaʼerã umi ansiáno térã káda únonte?

Apóstol Pablo heʼi vaʼekue umi kristiáno Tesalonicaguápe: “Oĩramo ndojapóiva umi mbaʼe roʼéva ko kárta rupive, pemarka chupe” (2 Tes. 3:14). Ymave ñapensa vaʼekue ko instruksión haʼeha umi ansiánope g̃uarãnte. Upévare haʼekuéra ojapómi vaʼerã peteĩ diskúrso de adverténsia térã de señalamiénto oĩramo kongregasiónpe peteĩ osegíva omboyke umi konsého oĩva la Bíbliape. Upe guive umi puvlikadorkuéra ndojeheʼavéima pe ermáno oñemarkávare, sólamente oĩ hendive predikasiónpe ha rreunionhápe.

Péro tekotevẽ ojejapo peteĩ kámbio. Koʼág̃a ñantende la Pablo heʼi vaʼekue haʼeha peteĩ mbaʼe káda uno odesidi vaʼerã kongregasiónpe asegún pe situasión. Upévare natekotevẽvéima umi ansiáno ojapo peteĩ diskúrso de señalamiénto. ¿Mbaʼérepa ojejapo ko kámbio? Jahechamína mbaʼe rehepa oñeʼẽ vaʼekue Pablo omeʼẽrõ guare upe konsého.

Apóstol Pablo ohechakuaa vaʼekue kongregasiónpe oĩha umi ermáno “naiñeʼẽrendúiva”. Koʼãvape oñemeʼẽma vaʼekue konsého la Biblia rupive, péro haʼekuéra nopenái umívare. Pablo ovisitárõ guare umi ermánope heʼíma vaʼekue: “Oĩramo peteĩ nombaʼaposéiva, ani avei okaru”. Upéicharamo jepe oĩ vaʼekue umi osegíva nombaʼaposéi oñemantene hag̃ua, jepe oĩ hína iposivilidápe ombaʼapo. Avei haʼekuéra oñentremete vaʼekue ótro ojapóvare. ¿Mbaʼéichapa umi kristiáno otrata vaʼerã peichagua ermáno naiñeʼẽrendúivape? (2 Tes. 3:​6, 10-12).

Pablo heʼi vaʼekue: “Pemarka chupe”. Pe palávra griega ontendeka japillaha mávapa hína pe persóna ha upéi jajekuida chugui. Pablo omeʼẽ vaʼekue ko instruksión entéro umi oĩvape pe kongregasiónpe, ndahaʼéi umi ansiánope añónte (2 Tes. 1:1; 3:6). Upéicharõ káda kristiáno ohechakuaáva oĩha peteĩ ermáno naiñeʼẽrendúiva odesidíta kuri ndojeheʼamoʼãveimaha pe ermáno naiñeʼẽrendúivare.

¿Upévapa heʼise pe ermánope ojetrata hague ku oñenohẽrõguáicha chupe kongregasióngui? Nahániri. Pablo heʼi vaʼekue: “Pesegi peñemoñeʼẽ chupe peteĩ ermánoicha”. Upéicharõ umi kristiáno osegíta oĩ pe ermáno oñemarka vaʼekuéndi rreunionhápe ha predikasiónpe añoiténte. Péro ndohasamoʼãi tiémpo hendive ojediverti hag̃ua. ¿Mbaʼérepa? Pablo heʼi vaʼekue ojejapo hag̃ua upéva ‘jahecha hag̃ua notĩripa’. Jahechaháicha, oñemarka rupi pe ermáno naiñeʼẽrendúi vaʼekuépe, upéi haʼe ikatu otĩ ha okambia (2 Tes. 3:​14, 15).

¿Mbaʼéichapa ñande koʼág̃a ikatu jajapo la Pablo heʼíva? Primero tekotevẽ jajasegura porã pe ermáno ohechaukaha umi mbaʼe ojapóvare añetehápe ‘naiñeʼẽrenduiha’, Pablo heʼi haguéicha. Pablo noñeʼẽi vaʼekue peteĩ persóna ojapo jave álgo ñandéve g̃uarã oĩ vaíva, péro legálmente ndohóiva hína la Biblia kóntrape. Ha noñeʼẽi avei umi ermáno ojapóvare álgo ñanemoñeñandu vaívante. Upéva rangue Pablo oñeʼẽ umi ermáno orresivíma vaʼekuére konsého Ñandejára Ñeʼẽgui péro upéicharamo jepe odesidi naiñeʼẽrendumoʼãiha.

Koʼág̃arupi ikatu oime jahechakuaa oĩha peteĩ ermáno ohechaukáva osegiha naiñeʼẽrendúi umi konsého oĩvape Ñandejára Ñeʼẽme.a Péicha jave káda uno jadesidíta ndajajeheʼamoʼãveimaha pe persónare, tahaʼe jahasánte hag̃ua tiémpo térã jajediverti hag̃ua hendive. Upéva haʼe rupi peteĩ mbaʼe káda uno tekotevẽva jadesidi, ndajaikomoʼãi ñañeʼẽ upe témare umi ndahaʼéivandi ñande rogaygua. Avei jasegíta jajeheʼa pe persónare rreunionhápe ha predikasiónpe. Upéi ág̃a haʼe okambia vove pe oiko lája, ikatúta jajeheʼa jey hese trankílo anteve guaréicha.