¿Mbaʼéichapa ñamombeʼu vaʼerã pe añetegua?

1. ¿Mbaʼépa jajapo vaʼerã ñaime hag̃ua Jehová famíliape?

JAIKUAA ramo jave peteĩ ermáno térã ermánape katuete ñaporandu jepi chupe: “¿Mbaʼéicha nde reikuaa vaʼekue pe añetegua?”. Péicha jave oĩ jepi orrespondéva: “Che chemichĩete guive aikuaa pe añetegua”. Ha oiméramo ostudia ramo hína ikatu heʼi: “Che ramónte aikuaa hague pe añetegua”. Ñande ñarresponde jepi péicha pórke pe añetegua iñimportanteterei ñandéve g̃uarã. Jaikuaaháicha, ñaime hag̃ua Jehová famíliape jahayhúmante vaʼerã pe añetegua ha upéva ojekuaa vaʼerã ñanderehe entéro mbaʼe jaʼe ha jajapóvape. Upévare nañandejapúi ha ñakumpli la jaʼéva (Sal. 15:​1-3).

2. a) ¿Mbaʼépa oikuaa vaʼekue la hénte Jesús ojapotaha? b) ¿Mbaʼépa Jesús oikuaa vaʼekue oikotaha umi hénte ohendu rire chupe?

² Jesús siémpre heʼi vaʼekue pe añetegua. Iñenemigokuéra jepe orrekonose vaʼekue Jesús heʼitaha pe añetegua oĩtarõ jepe ipochýva upe haguére (Mat. 22:16). Jesús oikuaa vaʼekue umi mbaʼe haʼe omboʼéva omoingovaipataha la héntepe, upévare heʼi: “Che aju umi hénte oiko vai hag̃ua, taʼýra opuʼãta itúare, ha isýre opuʼãta imembykuña, ha nuéra opuʼãta isuégra rehe” (Mat. 10:35). Jesús ndoipotái vaʼekue umi hénte oiko vaipa ohendu rire chupe, péro oikuaa vaʼekue upéva oikotanteha voi (Mat. 23:37). Jesús oikuaa vaʼekue ko múndope oĩtaha umi ohayhúva Ñandejára Ñeʼẽ, péro oĩtaha avei la ndoikuaaséiva mbaʼeve (2 Tes. 2:​9-11).

3. ¿Mbaʼépa jahecháta ko artíkulope?

³ Jesúicha avei siémpre jaʼe vaʼerã pe añetegua, ndogustáiramo jepe enterovévape. Ha japredika jave jajapo vaʼerã avei upéva. Ñamombeʼu vaʼerã pe añetegua oĩva Ñandejára Ñeʼẽme oĩtarõ jepe ipochýva upe haguére. Oimérõ péichante voi orreaksionáta la hénte, ¿heʼisépa upéva noimportaiha mbaʼéichapa ñañeʼẽ chupekuéra pe añeteguáre? Ndahaʼéi upéicha. Primerorã, ko artíkulope jahecháta mbaʼéichapa ikatu jaikuaa pe añetegua. Upe rire jahecháta mbaʼérepa ñamombeʼuse pe añetegua, mbaʼéichapa jajapo vaʼerã upéva ha mbaʼéicha javépa. Hesakã rire ñandéve koʼã mbaʼe, jaikuaátama mbaʼéichapa ikatu ñañeʼẽ pe añeteguáre ñanerenduse hag̃uáicha la hénte.

¿MBAʼÉICHAPA IKATU JAIKUAA PE AÑETEGUA?

4. ¿Mbaʼérepa ikatu jaʼe Jehovágui ‘ouha pe añetegua’?

⁴ Entéro mbaʼe Jehová heʼíva siertoite. Haʼe heʼi jave peteĩ mbaʼe ivaiha térã iporãha, ikatu jajerovia hese pórke haʼe ndojavýi (Sal. 19:9; 119:​142, 151). Avei entéro mbaʼe haʼe heʼíva oikotaha amo gotyove, katuete oiko (Is. 55:​10, 11). Haʼe siémpre okumpli la oprometéva (Núm. 23:19). La Biblia heʼi voi Jehová ndaikatuiha ijapu (Heb. 6:18). Ndareíri Salmo 31:​5-pe ojeʼe Jehovágui ‘ouha pe añetegua’.

5. ¿Ijetuʼúpa jaikuaa hag̃ua Ñandejárape? (Hechos 17:27).

⁵ Heta oĩ heʼíva Ñandejára ndoexistiriha. Ha oexistíramo jepe, heʼi hikuái ijetuʼuha jaikuaa hag̃ua chupe. Péro ndaupeichaiete hína. Ñande jerére jareko hetaiterei mbaʼe ohechaukáva Ñandejára oexistiha (Rom. 1:20). Ha ndahaʼéi voi oexistínteva, haʼe oipota ñañemoag̃ui hese. Pablo ohechauka vaʼekue upéva oñeʼẽrõ guare unos kuánto griégope oĩrõ guare Aténaspe. Haʼe heʼi vaʼekue Ñandejára oipotaha ‘jatopa hese’ ha ‘noĩriha voi mombyry ñandehegui’ (elee Hechos 17:27). Upéva siertoite. Jehová omoag̃ui hína ijehe umi hénte iñumíldevape ha oñehaʼãva oikuaa chupe (Juan 6:44).

6. a)¿Mbaʼe mbaʼépa omboʼe la Biblia? b) ¿Mbaʼérepa remombaʼete koʼã mbaʼe reikuaáva?

⁶ La Biblia tuichaiterei ikatu ñanepytyvõ jaikuaa porã hag̃ua Ñandejárape. Kuimbaʼénte legálmente la oskrivi vaʼekue la Biblia, péro Ñandejára oipuru ijespíritu sánto ojeskrivi hag̃ua umi mbaʼe haʼe oipotáva (2 Ped. 1:​20, 21). Upévare entéro mbaʼe la Biblia omboʼéva siertogua memete ha ikatu jajerovia hese. ¿Mbaʼe mbaʼépa omboʼe la Biblia? Upépe oñemombeʼu mbaʼéichapa oñepyrũ vaʼekue ko univérso ha entéro mbaʼe oĩva pype (Gén. 1:​1, 26). Oñemombeʼu avei mbaʼérepa enterovéva japeka, jasufri ha ñamano (Rom. 5:12; 6:23). Heʼi avei Jehová ojevaletaha Itaʼýrare ohundipaite hag̃ua umi mbaʼe vai ojapo vaʼekue pe Satanás, pe “japu ruvicha” (Juan 8:44; Rom. 16:20). La Biblia heʼi avei koʼẽrõitéma Jesucristo ohunditaha umi iñañávape, omoingovetaha umi omanóvape, omoporã jeytaha ñane planéta ha ñanepytyvõtaha ñandeperfékto hag̃ua (Juan 11:​25, 26; 1 Juan 3:8). Jahechaháicha Jehová ojekuaauka ñandéve Iñeʼẽ rupive ha opermiti ñandéve ñañeʼẽ hese. ¡Ajépa tuichaite mbaʼe upéva! (Mat. 28:​19, 20).

¿MBAʼÉREPA ÑAMOMBEʼUSE PE AÑETEGUA?

7, 8. ¿Iñimportántepa Jehovápe g̃uarã mbaʼérepa ñamombeʼu pe añetegua? Emombeʼu peteĩ ehémplo. (Marcos 3:​11, 12). (Ehecha pe taʼanga).

⁷ Jaʼéma haguéicha, ñaime hag̃ua Jehová famíliape jaʼe vaʼerã siertoguávante. Péro Jehová ñandeguerohory hag̃ua ndahaʼéi upévante la jajapo vaʼerã. Haʼe orahaiterei avei enkuénta mbaʼérepa jaʼe la jaʼéva. Jahechamína peteĩ mbaʼe oiko vaʼekue Jesús oĩrõ guare ko yvy ape ári (elee Marcos 3:​11, 12). Jesús opredikárõ guare pe Mar de Galilea ypýpe, hetaiterei hénte oñembyaty ohendu hag̃ua chupe. Koʼã hénte apytépe oĩ kuri unos kuánto oñendemoniáva. Haʼekuéra oho oñesũ Jesús renondépe ha osapukái: “¡Nde hína Ñandejára Raʼy!”. ¿Siértopa raʼe la heʼíva koʼã demónio? Si. Péro naiporãiete kuri la ohupytyséva hikuái. Haʼekuéra oiméne oipota raʼe umi hénte okonfia hesekuéra, ikatu hag̃uáicha mbeguekatúpe oraha vai chupekuéra. Péro koʼã demónio nombotavýi Jesúspe. Chupe ndogustaieterei la ojapóva hikuái, upévare omanda umi demóniope anivéma hag̃ua oñeʼẽ hese.

⁸ ¿Mbaʼépa ñaaprende ko rrelátogui? Jehovápe g̃uarã iñimportantetereiha mbaʼérepa ñañeʼẽ pe añeteguáre. Haʼe orahaiterei enkuénta mbaʼépa la jahupytyséva. Siértoramo jepe la jaʼéva, jaʼe vaʼerã upéva jahayhúgui chupe. Ha oĩramo ñanemombaʼéva, ñaipytyvõ vaʼerã pe persónape Jehovápente omombaʼe hag̃ua (Mat. 5:16; ekompara Hechos 14:​12-15 heʼívare).

9. ¿Mbaʼépa ñañatende vaʼerã ani hag̃ua jajapo ha mbaʼérepa?

⁹ ¿Mbaʼérepa tekotevẽ ñañatende ñamombeʼu jave pe añetegua? Pórke sapyʼánte ikatu hína jajapo upéva jaipotáguinte ótro ñanemombaʼe. Epensamína ko ehémplore. Jaʼe chupe peteĩ ansiáno omombeʼuha ndéve peteĩ mbaʼe naentéroi oikuaáva. ¿Mbaʼépa oikóta nde emombeʼúramo upéva ótrope, natekotevẽiramo jepe oikuaa? Umi ermáno ohechakuaáramo siérto hague la eréva, ikatúma hína oñepyrũ opensa neimportantetereiha reikuaa haguére heta mbaʼe. Upéva oikóramo, ikatu mbaʼe ermanokuéra nemombaʼeve, péro Jehová nahániri (Prov. 11:13). ¿Mbaʼérepa? Primeroite voi pórke remombeʼu peteĩ mbaʼe ndovaléiva entéro oikuaa. Ha segundo, pórke naiporãi kuri la rehupytyséva, siértoramo jepe upe ere vaʼekue.

¿MBAʼÉICHAPA ÑAMOMBEʼU VAʼERÃ PE AÑETEGUA?

10. ¿Mbaʼépa hína la Pablo ontendekase vaʼekue? (Colosenses 4:6).

¹⁰ (Elee Colosenses 4:6). Apóstol Pablo heʼi vaʼekue umi kristiáno Colosasguápe: ‘Umi mbaʼe pejéva siémpre iporã vaʼerã’. ¿Mbaʼépa la ontendekase vaʼekue? Idióma griégope ko fráse ontendeka umi mbaʼe jaʼéva ideprovécho vaʼerãha umi ñanerendúvape. Ha avei heʼise jaʼe porãnte vaʼerãha la jaʼeséva ñanerenduse hag̃uáicha umi hénte.

11, 12. Siértoramo jepe la jaʼéva, ¿mbaʼérepa ñañatende vaʼerã? Emombeʼu peteĩ ehémplo. (Ehecha pe taʼanga).

¹¹ Umi mbaʼe jaʼéva siémpre iporã vaʼerã ñamboʼe jave pe añetegua. La Biblia ningo heʼi voi Ñandejára Ñeʼẽ haimbeveha “peteĩ espáda haimbe jováivagui, pórke oike ñanderehe odividi peve ñane álma ha ñande espíritu”. Upéva heʼise ikatuha ohechauka mbaʼépa oipota térã oñandu peteĩ persóna (Heb. 4:12). Upévare ndajaipuruporãirõ la Biblia ikatu hína ñambopochy reiete pe persónape ha opa vai la konversasión. ¿Mbaʼéichapa ikatu oiko upéva?

¹² Jaʼe chupe predikasiónpe retopaha peteĩ karai nerendu porãva. Haʼe omombeʼu ndéve pyʼỹinte oñemboʼeha umi sántope, ha igustoha chupe ofesteha Navidad ifamíliandi. Upe moméntope nde ikatu reipuru la Biblia rehechauka hag̃ua chupe naisentidoiha ñañemboʼe umi sántope térã taʼangápe. Ikatu avei rehechauka chupe Ñandejárape ndogustaiha jafesteha Navidad (Is. 44:​14-20; 2 Cor. 6:​14-17). ¿Iporãtapa rejapóramo upéva pe primera konversasiónpema voi? Rejapóramo upéicha ndereipuruporãmoʼãi hína Ñandejára Ñeʼẽ, siértoramo jepe la eréva.

13. ¿Mbaʼépa heʼise umi mbaʼe jaʼéva ijuky vaʼerãha?

¹³ Pablo heʼi vaʼekue avei umi mbaʼe jaʼéva ijuky vaʼerãha. Upéva ndeʼiséi ñamokañytaha pe añetegua térã vai vaínte jaexplikataha ikatu hag̃uáicha pe persóna ontende ótra kosaite. Pablo ontendekase vaʼekue ñañeʼẽ vaʼerãha pe añeteguáre umi hénte ñanerenduse hag̃uáicha (Job 12:11). Péro sapyʼánte ikatu hína ijetuʼu jajapo hag̃ua upéva. Epensamína ko ehémplore. Ñande ñakosina jave, ikatu hína ñapensa enterovévape ogustataha ñande ñamoheʼẽ lája ñane rembiʼu. Upéicha avei ikatu hína ñapensa enterovévape ogustataha ñande ñañeʼẽ lája. Péro ndahaʼéi hína upéicha. Por ehémplo algúno lugárpe la hénte naiprovlémai direktoite heʼi hag̃ua ojupe la opensáva, péro ótro lugárupi la hénte ikatu hína ndojagarraporãi upéva térã ipochy voi. Upévare Pablo heʼi vaʼekue jaikuaa vaʼerãha mbaʼéichapa ‘ñambohováita káda persónape’. Upéva heʼise jarekotaha enkuénta mbaʼépa ogusta pe persóna ñanerendúvape, ndahaʼéi mbaʼéichapa ñandegusta ñandéve ni mbaʼéichapa ñande jajepokuaa ñañeʼẽ.

¿MBAʼÉICHA JAVÉPA ÑAÑEʼẼ VAʼERÃ PE AÑETEGUÁRE?

14. Jesús oĩrõ guare ko yvy ape ári, ¿omboʼépa raʼe idisipulokuérape entéro mbaʼe oikuaáva?

¹⁴ Jesús siémpre oñeʼẽ vaʼekue idisipulokuérape mborayhúpe ha ohenduse hag̃uáicha chupe hikuái (Mar. 6:34). Jesús oikuaa vaʼekue idisipulokuérape ofaltaitiha oaprende heta mbaʼe, péro ndahaʼéi upe haguére oñemoĩva oexplikapaite chupekuéra entéro mbaʼe haʼe oikuaáva. Jesús imbaʼerechakuaa vaʼekue. Haʼe oikuaa vaʼekue ohaʼarõve vaʼerãha omboʼe hag̃ua chupekuéra itiempoitépe umi mbaʼe hypyʼũva oĩva Ñandejára Ñeʼẽme. Haʼe ndojapóirire upéva, idisipulokuéra nontendemoʼãi kuri umi mbaʼe haʼe omboʼéva (Juan 16:12). ¿Mbaʼépa ñaaprende?

15. Ñamboʼe jave ñane estudiántepe, ¿tekotevẽpa una vetépe voi ñamombeʼupaitéma chupe la jaikuaáva? (Proverbios 25:11). (Ehecha pe taʼanga).

¹⁵ Jesús ehémplo ohechauka ñandéve natekotevẽiha una vetépe voi ñamombeʼupaite la jaikuaáva la Bíbliagui. ¿Mbaʼéichapa ikatu jajogua chupe? Upearã ñanembaʼerechakuaa vaʼerã umi héntendi. Ñanemanduʼami jeýna pe karai ñañeʼẽ haguére ajeʼi. Jaʼe kuri chupe ogustaitereiha ofesteha Navidad ifamiliakuérandi. Ñande jaikuaa porã Ñandejárape ndogustaiha pe Navidad. Péro eñeimahinamína nde reñepyrũha restudia ko karaíndi 8 térã 15 día Navidad mboyve. Ensegídama voi eréramo chupe Ñandejárape ndogustaiha pe Navidad ha ndofestehavéima vaʼerãha, ¿mbaʼéichapa ojagarráne ndehegui? Oĩ ningo legálmente estudiánte pyaʼe voi ojapóva la oaprendéva, péro algúnope orahave tiémpo okambia hag̃ua. Ikatu hag̃uáicha ñaipytyvõ ñane estudiantekuérape oprogresa hag̃ua jaʼe vaʼerã chupekuéra la tekotevẽva oikuaa, péro jajapo vaʼerã upéva itiempoitépe (elee Proverbios 25:11).

16. ¿Mbaʼéichapa ikatu ñaipytyvõ ñane estudiantekuérape osegi hag̃ua “oiko pe añetegua rapére”?

¹⁶ Javyʼaiterei ningo ñaipytyvõ jave peteĩ persónape oikuaa hag̃ua Jehovápe. Ndaipóri voi ótra kósa ikatúva peichaite peve ñanembovyʼa (3 Juan 3, 4). ¿Mbaʼéichapa ikatu ñaipytyvõ ñane estudiántepe osegi hag̃ua “oiko pe añetegua rapére”? Ñamoĩ vaʼerã chupekuéra ehémplo porã. Tojekuaákena pe jaiko lájare añetehápe jagueroviaha umi mbaʼe oprometéva la Biblia. Ñañeʼẽtaramo pe añeteguáre, jajapókena upéva jahayhúgui Jehovápe. Jaipurúkena umi palávra iporãva ha ijukýva. Jajapókena upéva itiempoitépe ha hendápe porã. Ñaipytyvõkena umi ñanerendúvape omombaʼeguasu hag̃ua Jehovápente, ani ñandéve. Jajapóramo koʼã mbaʼe, jahechaukáta añetehápe jaserviha Jehovápe. Ñanemanduʼákena chugui ‘ouha pe añetegua’.