Génesis

36 Jacob anaepana Labánjawabelia, nej̈ata jumaitsi: “¿Dej̈ua nej̈ata katoitsitsi? ¿Dej̈uajitsia nej̈ata nepübarajiname? 37 Tanetoyobikujinaemü daj̈ita takobekowüjawanü, ¿kaj̈itajarabame nej̈ata nekobekowüjawa? Tsitajüre nijamonae tajamonae ata, peyapütaenej̈a depajiwi pepakuene j̈aniajai. 38 Taponaponaekujinae 20 pawaibeje j̈amüjawata, itsakuenejawa apokatoitsitsi. Takatoewetsij̈ae nijaoveja, nijacabra aponakoj̈ipenetsi, kaeto ata pejananü ata pakatoj̈aetsi. 39 Itsa newütjü katobeyaj̈uababiaba nekobedajubinü kaenü apokatokaponabiabitsi, j̈anü matamotabiabajü daj̈ita bajaraj̈ua. Itsa itsajiwi katonakobetoj̈otabiaba j̈amü nejumaitsimü tsabiabi takamatamotabiabinej̈a. 40 Matakabita atajunü tsabiabi, merawi pijinia bitso akenü tsabiabi. J̈aniawaetsia apomajitabiabinü. 41 Bajarapakuenia nakuenebaponaponajü 20 pawaibeje j̈amünej̈a, 14 pawaibeje nej̈ünatoyobeje yabara, 6 pawaibeje pijinia takobedajubi yabara. J̈amü itsiata neyamaj̈üitojorobiabame 10 patobeje. 42 Itsa taj̈a, tamobeje pijaDioso, itsa aponeyajawa tsipae j̈amü nitorobijitsipame ajibinejewa tajanakuayabelia. Itsiata pakuenia Dioso yapütane tabejiobijawa, bajaraj̈uata kabijatane kaniwi merawi”. 43 Nej̈ata Labán jumekanawiata ikatsia: “Papetiriawi j̈anü taj̈i, bajarapapejewaj̈i j̈anü tamomoj̈i, bajarapadajubijawanü j̈anü takobekowü. Daj̈itaj̈uanü taneme takobekowü, taj̈i ata pekobekowü. ¿Depakuenia nej̈ata itsinü tsipae pibisiakuene taj̈ijawabelia, tamomoj̈ijawabelia ata? 44 Nej̈ata waj̈aitsibeje kaeliwaisi najuaj̈ainaenatsibeje pibisialiwaisi wajanatoj̈ainaeyaniwabeje. Nutsianatsibeje peneta iboto wajanakofünütsiyaniwabeje”, jai Labán Jacobjawabelia. 45 Nej̈ata Jacob pita iboto, nuta apiayakuenia. 46 Bajaraj̈uakujinae Jacob jumaitsi pijamonaejawabelia: “Pakaetuare ibo”. Nej̈ata bajarapamonae kaetuata ibo najumaeta. J̈uakujinae bajarapaibo jumajawata najuaj̈ane. 47 Bajarapaibo Labán wünüruba Jegar-Sahadutá, itsiata Jacob wünüruba Galeed. 48 Nej̈ata Labán jumatsi: “Paibotsuto yapütaeyaej̈ana wajanajuaj̈ainaejawabeje kaeliwaisi”. Bajaraj̈uata wünüruba Galeed, 49 wünüruba ata Atalaya, tsipaji Labán jumaitsi: “Jehová nakataeyabiabianabeje, itsa aponataeyabiabitsibeje. 50 Itsa bejiobiaej̈anabiabianame taj̈ünatoyobeje, itsa wekuanakojiobianame bajarapowabejewekua, itsamonae apokatae ata, baitsi jane, najamatabünapire Dioso pekataeyabiabijawa, bajarapakuenia pijinia j̈anü ata netaeyabiabiana”. 51 Ikatsia Labán jumaitsi Jacobjawabelia: “Mapaibotajebijawa nakanajamatabünapitabiabianaej̈anaena paliwaisi j̈ainatsibeje. 52 Itsa j̈anüjawaberena poname, bajarapaibo kanajamatabünapitabiabianaej̈anaena pibisiakuene taneej̈anaeyaniwamü. J̈anü pijinia bajarapakuenia, j̈amüjawabelia itsa ponajü, bajarapaibo nenajamatabünapitabiabianaej̈anaena itsakuene takaej̈anaeyaniwa. 53 Nej̈ata Abrahán pijaDioso, Nacor pijaDioso ata, bajarapaDioso nakakuenetaenabeje”, jai Labán Jacobjawabelia. Nej̈ata Dioso pewünüta bajarapaliwaisi Jacob najumekapanepaeya jumaitsi. Jacob paj̈a bajarapaDioso yaiyatane. 54 Bajaraj̈uakujinae petsutojumata Jacob tajuita dajubikuene perajutsinej̈a Dioso. Nej̈ata junata Labán pijiwi ata pebarüj̈aenej̈a. Nej̈ata bajarapamonae nabane, j̈uakujinae bajarapamerawi majitanubena pinijitsutojawata. 55 Labán nej̈ata namatakota bajayakunua. Tsutsuba asiwayakuenia pemomoj̈i, pej̈anialiwaisi rajuta pej̈ünatoyobeje, pemomoj̈i ata. J̈uakujinae baja nej̈ata nawiata pijaboyabelia.