Génesis

13 Nej̈ata bajarajota Jacob majitajopa. J̈uakujinae kaetuata pekobedajubijawanü perajutsinej̈a pematapijinü Esaü. 14 Toitapeta 200 pacabrabeje pesorowawi, 20 ponübeje pewitonü, 200 ponübeje oveja, 20 ponübeje pewitonü, 15 30 ponübeje camello pesorowawi pej̈i yajawa, 40 ponübeje vaca, 10 ponübeje toro, 20 paburrobeje pesorowawi, 10 ponübeje burro. 16 Nej̈ata baja rajuta kaebitsaüto kanakujitsia pijajiwi. Jacob jumaitsi: “Paponare tawajünaeya kaebitsaüto kanakujitsia panawekuaponare tajüyo”, jai. 17 Nej̈ata jumaitsi ponü kopiaya ponaejitsia: “Itsa tamatapijinü Esaú kakaj̈itajarabiana, itsa kayanijobiana ‘¿Deponü nijatuj̈anenü? ¿Debelia poname? ¿Depatsa nej̈ata pijadajubi?, itsa kajai tsane, 18 nej̈ata jumaitsimü tsane ‘Daj̈ita bajaraj̈ua pekobekowü Jacob. Bajaraponü itoroba j̈amünej̈a, tajatuj̈anenümü. Jacob raja kotokaewanajetaruka’, jamü tsane”, jai Jacob. 19 Bajarapijinia pakuenia najumerajuta pekotokaewanajetarubenaewijawabelia. 20 Jacob ikatsia jumaitsi: “Bajarapijinia pakuenia pajumaitsimü tsane ata Esaújawabelia ‘Jacob ra kotokaewanajetaruka’, pajamü tsane”. Jacob itoroba bajaraj̈ua tsipaji jamatabüjumaitsi: “Itsa kopiaya rajutsianajü pej̈aniakuenejawanü, nej̈ata jamatabükuenej̈anepanaeyaej̈anaenajü, nej̈ata pakujinae itsa kaj̈itajarabianajü, nekopiapitsiana barüyaya”, jamatabüjai Jacob.