Génesis

33 Nej̈ata Jacob tane Esaú tajüyo pebarünajetarukaejawa 400 ponübeje. Nej̈ata tsana pej̈i petoewetsinej̈atsi Lea, Raquel pijajiwitowabeje ata. 2 Kopiaya itoroba pijajiwitowabeje pej̈i yajawa, j̈uakujinae Lea pej̈i yajawa, j̈uakujinae baja Raquel, José yajawa. 3 Nej̈ata Jacob namataj̈aina pekopiapitsinej̈a Esaú, ekajunua pematabakabüta siete j̈uabeje. 4 Nej̈ata Esaú kujinaepona pekaj̈itarabinej̈a, waetabalia naitabaratsutsubiaya nakopiapitabeje. Najuanuabeje. 5 Esaú nej̈ata pakujinae tane petiriawi, pejewaj̈i ata, yanijoba: “¿Depamonae nej̈ata najetarubena j̈amü yajawa?”. Jacob nej̈ata jumekanawiata: “Taj̈i raja, pamonae Dioso nerajuta”. 6 Nej̈ata pijajiwitowabeje imoj̈oyota pej̈i yajawa ekajunuabeje pematabakabüta. 7 Bajarapakuenia pijinia itsi Lea pej̈i yajawa, j̈uakujinae baja nej̈ata pata José, Raquel bajarapakuenia pijinia itsibeje. 8 Esaú nej̈ata yanijoba Jacobjawabelia: “¿Dej̈uajitsia nej̈ata itorobame mapabitsaütoj̈anetoje?”. Jacob jumekanawiata: “J̈amünej̈a tanebarajamatabükuenej̈anepanaenej̈amü”. 9 Esaú nej̈ata ikatsia jumekanawiata: “Tajamonaenü, j̈anü bitso ayaikuenejawanü j̈ainajü. Bajaraj̈ua rabaja, j̈amünej̈a”. 10 Itsiata ikatsia Jacob jumaitsi: “Itsa nebarajamatabükuenej̈anepaname, newekuapire tsipaji j̈amünej̈a. Pakuenia barüyanü tataej̈ae Dioso, bajarapakuenia itsinü takataej̈ae j̈amü, tsipaji nekopiapitame barüyayakuenia. 11 Pej̈aniakuene nej̈anare, newekuapire, tsipaji Dioso nerajuta j̈ua namatawenonajü”. Bajarapakuenia Jacob jumai tsanajetarukae. Esaú baja nej̈ata jejai.