Génesis

12 Isaac nej̈ata uba bajarajota, bajaraj̈uakujinae kaetuata daj̈itawiria naekuai, tsipaji Jehová yawenonatsi. 13 Bajaraj̈uata nej̈ata bajaraponü bitso pej̈ainaenü, nej̈ata j̈ainanajetaruka dajubimonae, 14 pakuenia ovejabitsaütonü, vacabitsaütonünua, j̈ainanua ayaibitsaüto pijajiwi petonakuenebinej̈atsi. Nej̈ata filisteomonae kuenekaübatsi pekobekowü yabara. 15 Bajaraj̈uata filisteomonae akaba pameramütjü Abrahán pijajiwi bajayata toej̈anatsi. 16 Nej̈ata Abimélec jumaitsi Isaacjawabelia: “Paponare paj̈anüwekua, tsipaji j̈amü ayaijamatabükuenenümü paj̈anüwekua”, jai. 17 Nej̈ata Isaac wekuapona Guerartusatojawabelia. 18 Pakujinae Isaac paj̈a Abrahán ponapona, bajaraponü kua meramütjüanü. Itsiata baitsi jane, filisteomonae akaba bajarapamütjüanü Abrahán petüpaekujinae. Nej̈ata Isaac j̈aneba ikatsia bajarapameramütjüanü; ikatsia wünüruba pakuenia paj̈a wünüruba. 19 Pakujinae Isaac pijajiwi kuewanapa meramütjüanünej̈a, kaj̈itajaraba pej̈aniamera. 20 Itsiata Guerar nakuapijiwi nabarünabijatane Isaac pijajiwi. Guerar nakuapijiwi jumaitsi: “¡Pameraje patajamera!”, jai. Bajaraj̈uata Isaac wünüruba bajarapameramütjü Ések, tsipaji nabijatane bajarajota. 21 Bajaraj̈uakujinae ikatsia kuewanapa, itsiata ikatsia nej̈ata nabijatane. Bajaraj̈uata bajaraponü wünüruba Sitná. 22 J̈uakujinae bajarajota wekuapona, ikatsia nej̈ata kua. Itsiata nej̈ata bajarapameramütjü yabara aponabijatae. Bajaraj̈uata nej̈ata wünüruba Reobot, nej̈ata jumaitsi: “Pej̈aniajamatabükuene rajutajü Jehová, patanerajutsij̈ae ayaitusato j̈aniawaetsiakuenia patajinawanapaenej̈a”, jai Isaac. 23 Bajarajotakujinae barüpona Beer-Sebajawabelia. 24 Bajarapamerawi Jehová tsitanaitajütatsi: “J̈anü raja aj̈a Abrahán pijaDiosonü. Pütsa junawame, tsipaji kayajawatsi. Tajajiwitonü Abrahán yabara kayawenonaenatsi. J̈ainaename ayaibitsaüto nej̈i, nemomoj̈i ata”, jai Jehová Isaacjawabelia.