Génesis

41 Pakuenia Jacob paj̈a pej̈anialiwaisi tsipaebatsi, Esaú nej̈ata anaepanaeya tane Jacobjawabelia. Esaú jamatabüjumaitsi: “Kaeepatoyokujinae itsa taj̈a tüpaena, nej̈ata beyaj̈uabianajü tajuyapijinü”, jamatabüjai Esaú. 42 Itsa Rebeca nej̈ata yapütane Esaú penajamatabüj̈ainaejawa pebeyaj̈uabinej̈a pejuyapijinü, nej̈ata bajarapowa jumaitsi Jacobjawabelia: “¡Nejumetaema! Nematapijinü jitsipa pekabeyaj̈uabijawa. 43 Nej̈ata nejumetaema taj̈ünatomü. Ponare baja Harán nakuajawabelia, bajarajota ponapona tamatapijinü Labán. 44 Nej̈ata ponaponare bajarajotalia bajayajebinej̈a nematapijinü pianaepanaekopatsijawabelia, 45 bajarapakuenia bajaraponü nakofünütsiana j̈ua itsimü. J̈uakujinae nej̈ata kajunatsianatsi nepatsinej̈a ikatsia, tsipaji apojitsipaenü panetüpaejawabeje paj̈amübeje kaematakabita”, jai Rebeca Jacobjawabelia. 46 Bajaraj̈uakujinae jumaitsi Rebeca Isaacjawabelia: “Apojitsipaenü baja tataejawa Het pej̈ünatowaj̈i. Nej̈ata itsa Jacob jitsipa bajarapowanüyajuwünüwi, netsitaj̈anepanaejitsipa nej̈ata tatüpaenej̈a”, jai Rebeca.