Job

1 Bajayata ponapona Uz tomarata Jobwününü; bajaraponü jamatabükuenej̈anepanaeya ponapona, anekonijibianua. Bajaraponü yaiyatane Dioso, bajaraj̈uata wekuanatsatsiaponapona pibisiakuenejawawekua. 6 Nej̈ata baja tokopiapatatsi Pepo Dioso pej̈i penubenaenej̈a Jehová pitabarata. Dowatji ata yajawajunua bajarapamonae. 7 Nej̈ata Jehová jumaitsi Dowatjijawabelia: “¿Dewerena najetarukame?”, jai. Dowatji nej̈ata jumekanawiata: “Irajawawetsina najetarukajü”, jai Dowatji. 8 Jehová nej̈ata jumekanawiata: “¿Naükotame baja kajena tajajiwitonü Job? Tsipaji ajibi baja kajena itsajiwiyo bajaraponükuenia. Bajaraponü jamatabükuenej̈anepanaeya ponapona, anekonijibianua. Taneyaiyataej̈ae wekuanatsatsiaponapona pibisiakuenejawawekua”, jai. 9 Dowatji nej̈ata ikatsia jumekanawiata Jehová: “¿Job meta saya baja jemakuenia kayaiyatane? 10 Bajaraponü saya baja newetabiabij̈ae pijabo pijiwi, daj̈ita pekobekowü atanua. J̈amü kobekowüj̈anepanaeyaej̈anabiabame, toayaijawa ej̈anamenua pekobedajubimonae. 11 Itsiata baitsi jane itsakuenejawa juya itsimüre, bijianare daj̈ita pijakuenejawanü, nej̈ata taename pakuenia pibisiakuene kajumaitsi tsane nitabarata”, jai Dowatji Diosojawabelia. 12 Nej̈ata Jehová jumaitsi Dowatjijawabelia: “¡Taema! Katokopatatsi Job nekobekowübijianaenej̈a. ¡Itsiata pütsa pibisiakuene ej̈aname Job!”, jai Jehová. Dowatji nej̈ata pitsapa Jehová pitabarawekua. 13 J̈uakujinae, Job pej̈i nakaetuana pematapijinü pijabojawata penabaninej̈a, piapaenej̈anua vinora. 14 Nej̈ata patajopa liwaisikaponaenü Jobjawaberena, nej̈ata jumaitsitsi: “Nijatoroj̈i ira nakueneba, nijaburroj̈i pijinia j̈aenubena ponatoj̈i, 15 j̈ua jemata Sabeomonae pata, nej̈ata nijadajubimonae katokapona, pekatonakuenebiwi ata beyejebatsi. J̈anü kaenünü panepajü takatsipaebinej̈a paliwaisi”, jaitsi. 16 J̈ua abaj̈ü bajaraponü kuaikuaijaitsanukae, pata itsanü, nej̈ata jumaitsi: “¡Dioso itorobika atjübüwetsika pinijiisotoj̈anetonü. Bajarapaisoto tajuitatsi nijaovejaj̈i, pekatonakuenebiwi ata! J̈anü kaenünü panepajü takatsipaebinej̈a paliwaisi”, jai. 17 J̈ua abaj̈ü bajaraponü kuaikuaijaitsanukae, pata itsanü, nej̈ata jumaitsi: “Caldeomonae akueyabibitsaütonü pata, nej̈ata katonakobetoj̈ota nijacamellomonae; pekatonakuenebiwi ata beyejebatsi. J̈anü kaenünü panepajü takatsipaebinej̈a paliwaisi”, jai. 18 J̈ua abaj̈ü bajaraponü kuaikuaijaitsanukae, pata pekotokaewinü, nej̈ata jumaitsi: “Nej̈i nakaetuana pematapijinü pijabojawata penabaninej̈a piapaenej̈anua vinora. 19 Jemata pinijijowiboj̈aneto najetaruka petsewitusatojawaberena, bajarapajowibo boj̈uabaya. Botsimatakünübayatsi nej̈i nej̈ata katotüpa. J̈anü kaenünü panepajü takatsipaebinej̈a paliwaisi”, jai. 20 Itsiata nej̈ata Job nonotapüna, najumaese titinaj̈uaba, namatalibotanua; nej̈ata jopajunua irata, nukajunua pematabakabüta, 21 Job nej̈ata jumaitisi: “Jumasa naej̈anajü taena pekototojawaberena, ikatsia nawiatsianajü jumasa kaewüalia. Jehová rajutabiaba, Jehová wekuapitsipanua. Itsiata pej̈anialiwaisi bewünüakuaikuaijaitsi Jehová yabara”, jai Job. 22 Jumaitsi ata daj̈ita bajaraj̈ua, Job aponanekonitsi Diosojawabelia, pibisialiwaisi apokuaikuaijai Dioso yabara.