Job

2 Nej̈ata baja tokopiapatatsi Pepo Dioso pej̈i penubenaenej̈a Jehová pitabarata. Dowatji ata yajawajunua bajarapamonae penanukaenej̈a Jehová pitabarata. 2 Nej̈ata Jehová jumaitsi Dowatjijawabelia: “¿Dewerena najetarukame?”, jai. Dowatji nej̈ata jumekanawiata: “irajawawetsina najetarukajü”, jai Dowatji. 3 Jehová nej̈ata jumekanawiata: “¿Naükotame baja kajena tajajiwitonü Job? Tsipaji ajibi baja kajena itsajiwiyo bajaraponükuenia. Bajaraponü jamatabükuenej̈anepanaeya ponapona, anekonijibianua. Taneyaiyataej̈ae wekuanatsatsiaponapona pibisiakuenejawawekua. J̈amü nejamatabükueneitorobi atamü tabeyaj̈uabinej̈a bajaraponü, itsiata baja tsitekaeya nejumekowünüta”, jai Jehová. 4 Dowatji nej̈ata jumekanawiata Jehová: “Jiwi saya baja übajarapamonae nasiwanajamatabüj̈aina, itsi tsane daj̈itakuene piasaütsawanapaenej̈a. 5 Bajaraj̈uata aperabütaneej̈anare, nej̈ata taename pakuenia pibisiakuene kajumaitsi tsane nitabarata”, jai Dowatji. 6 Nej̈ata Jehová jumaitsi Dowatjijawabelia: “¡Taema! Itsimüre j̈ua itsimüjitsia bajaraponüjawabelia, itsiata baitsi jane pütsa beyaj̈uabame”, jai. 7 Dowatji nej̈ata pitsapa Jehová pitabarawekua. Nej̈ata awitaneej̈ana Job, pitsapaeyaej̈ana furatomonae, daj̈itapetaj̈uupiwetsinakujinae pematabokotojawabetsia. 8 Job nej̈ata pita kanalitomuj̈upayo penaperabütij̈otsinej̈a, nej̈ata ipumanamuj̈unenetanua eka. 9 J̈uakujinae pijawa jumaitsitsi: “¿Abaj̈ü kajena tsitekaeya jumekowünütame Dioso? ¡Pibisialiwaisi jumaitsimüre Dioso, nej̈ata tüpare!”, jaitsi. 10 Itsiata Job jumekanawiata: “Bejemapetiriawi kuaikuaijamü jemaliwaisianü. Itsa siwabarüyatsi papej̈aniakuene nakarajuta Dioso, nej̈ata besiwabarüyatsi itsa pibisiakuenejawa nakatokopiapatsi ata”, jai Job. Jumaitsi ata daj̈ita bajaraj̈ua, Job aponanekonitsi Diosojawabelia.