¿Depatsa meta Job?

Uz nakuajawata ponapona peyaiyataebiabinü Jehová. Bajaraponü pewünü Job, pej̈ainaenü ayaikuenejawanü, j̈ainanua ayaibitsaüto pijamonae. Bajarapijinia pejamatabükuenej̈anepanaenü, bayawenonabiaba bepejiobiwi, petiriawi pewekuatüpaewitsi pamona, paj̈a apoj̈ainaewi ata. Job pej̈aniakuenejawanü itsi tsabiabi. ¿Bajaraponü meta kaeto ata apoj̈ainae piayapübejeliwaisijawanü?, ¿dejumaitsimü tsipae?

Dowatji naitaj̈utokaewetabiaba Jobjawabelia, itsiata bajaraponü apoyapütae. Jehová nej̈ata jumaitsi Satanásjawabelia: “¡Naükotame baja kajena tajiwitonü Job! Ajibi baja kajena itsajiwiyo bajaraponükuenia. Bajaraponü jamatabükuenej̈anepanaeya ponapona”. Satanás nej̈ata jumekanawiata: “Job saya baja jemakuenia kayaiyatane tsipaji j̈amü ewetabiabame pijabo, pijajiwi, daj̈ita pekobekowünua. Itsiata tobijianare daj̈ita pijakuenejawanü, taename nej̈ata pakuenia pibisiakuene kajumaitsitsi tsane nitabarata”. Jehová jumaitsi: “Katokopatatsi Job pekobekowü nebijianaenej̈a, itsiata pütsa beyaj̈uabame”. Nej̈ata Jehová tokopata Satanás pejamatabükueneüjübinej̈a Jobjawabelia, ¿yapütaneme dej̈uajitsia itsi bajaraj̈ua Jehová? Tsipaji bajaraponü yapütane Job tsitekaeya pejumekowünütsijawatsi toayapübeje atatsi tsane.

Satanás jamatabükueneüjüba ayaikuenia Job pebejiobiaej̈anaenej̈a. Kopiaya tsiitoroba sabeomonae petonakobetoj̈otsinej̈atsi daj̈ita pijavacamonae, pijatoromonae, pijaburromonae ata. J̈uakujinae nej̈ata atjübüwetsika totajuitatsi daj̈ita pijaovejabitsaüto. Bajarapijinia caldeomonae, tonakobetoj̈ota Job pijacamellomonae. Yajawa totüpatsi pamonae toewetabiabatsi pijadajubimonae. J̈uakujinae pepo piayaikuenejawa: daj̈ita pej̈i Job totüpatsi pakujinae pijabo matakünübatsi. Job bitso najamatabüj̈aina, itsiata apokopatsi peyaiyataejawa Jehová.

Tsitekaeya Satanás jitsipa pebejiobiaej̈anaejawa Job, bajaraj̈uata daj̈ita peperabüjawata perabütsabanaeej̈anatsi. Bajaraj̈ua kajena bitso toatanetsi. Bajaraponü apoyapütae j̈ua yabara tokopiapatatsi bajarapapibisiakuenejawanü, itsiata tsitekaeya yaiyatane Jehová. Dioso itsa tane pakuenia itsi Job, jamatabükuenebarüya bitso.

J̈uakujinae, Satanás itoroba akueyabi papebibeje pejamatabükueneüjübinej̈a Job. Bajarapamonae jumaitsi Jobjawabelia: “J̈amü meta kajena nanekonitame, aekonoj̈aeta jitsipame kajena nenanekonimatayatsijawa. Bajaraj̈uata Dioso kabejiobiaej̈ana”. Job nej̈ata jumepita: “J̈anü pibisiakuene apoej̈anaenü”. Itsiata bajaraj̈uakujinae Job taj̈uj̈uaba pejumej̈aniataejawa Jehová pejamatabükueneta jamatabükueneüjübatsi bajaraj̈uata daj̈ita bajarapapibisiakuenejawanü tokopiapatatsi, nej̈ata Job jumaitsi: “Dioso apopejamatabükuenej̈anepanaenü j̈anüjawaberena”.

Pewüjüatonü pewünü Elihú ajumejibia namuj̈unaeweta j̈ua jumaitsi bajarapamonae, itsiata itsakuene apojumaitsi. Nej̈ata najamatabükuenewereta pebarükuaikuainej̈a, jumaitsi: “Daj̈ita paj̈amü panajumetsünütame. Jehová ayaijamatabükuenenü, paj̈amü apopayapütaemü, bajaraponü kaeto ata pibisiakuene apoitsi tsane. Tane daj̈itakuene, yawenonanua daj̈itajiwi itsa j̈aina ayailiwaisianü”.

Jehová barükuaikuaijai Job, nej̈ata jumaitsi: “¿Dejota j̈amü nukame pakujinae ej̈anajü itaboj̈opijikuene, irapijikuene yajawa? ¿Dej̈uajitsia nesiwanajamatabüj̈ainame taakuenebejenüjawa? Kuaikuaijamü saya daj̈ita apoyapütaenejewamü”. Job najamatabükueneyapütane pibisiakuene pejumaitsijawa, bajaraj̈uata jumaitsi: “Aponajamatabüj̈ainaenejewanü kuaikuaijanü. Nitaj̈utobejiobiataema j̈ua jumaitsinü. Bajumetanejü j̈amü yabara, itsiata aekonoj̈aeta baja kayapütanetsi j̈aniawaetsia, j̈amünej̈a daj̈itakuene kakuenekaüjüpa”.

Pakujinae bajarapamatakabianü tokopiaweretatsi pejamatabükueneüjübijawatsi, Jehová jumeyaba Job, rajuta matatoj̈enetsia pakueniami bajayata baj̈aina. Bajaraj̈uakujinae Job barüyaya ponapona. Jehová rajuta pej̈aniakuenejawanü tsipaji bajaraponü jumekowünütabiabatsi, itsajawata apotoyapüj̈anepanae atatsi. ¿Deitsimü tsipae? ¿Jumekowünütabiabianame Jehová daj̈itamatakabijawabelia katoayapübeje ata pakuenia Job itsi?