J̈ua jumaitsi aponajumekapanepae

Jehová jumaitsi Moisésjawabelia: “Junaimina mapatsutojumabetsinaje, bajarajota newetsianame, tsipaji karajutsijitsiatsi tayakinaeibopanajawabeje taitorobiliwaisianü”. Moisés junaya, ponapona ibotsutojumajawatatsia 40 pamatakabibeje, 40 pamerawibeje ata. Moisés peponaponaejawata, Jehová toyakinatsi Diez Papitorobiliwaisibeje anijaibopanajawatabeje, j̈uakujinae rajutatsi.

Bej̈üakujinae, israelitawi jamatabüjumaitsi: “Moisés meta baja aponawiatsi tsane”. Bajaraj̈uata jumaitsi Aarónjawabelia: “¡Pajitsipajü patanematakaponaenü! ¡Panetoitsimüre patajadiosonü!”. Aarón nej̈ata jumepita: “Panetokaponarenamüre panijaorojawanü”. Nej̈ata bajaraponü seta bajarapaorojawanü isotota peitsinej̈a becerrojumapekataenü. Israelitawi jumaitsi: “¡Pabecerronüje patajadiosonü, ponü panewekuakapitsapa Egipto nakuawekua!”. Nej̈ata fiestajawa ej̈ana peyaiyataenej̈a bajarapabecerronüjawabelia. ¿Abeje meta bajaraj̈ua? Jãjã, tsipaji israelitawi najumekapanepa üpeyaiyataenej̈a Jehovájawabelia. Itsiata aekonoj̈aeta aponajumekapanepae j̈ua bajarapamonae jumaitsi.

Jehová tane j̈ua bajarapamonae itsi, nej̈ata jumaitsi Moisésjawabelia: “Runaremeka tomarabereka, tsipaji bajarapamonae aponejumekowünütsi. Yaiyatane jemadiosonüjawabelia”. Moisés kobenarunaika anijaibopanayobeje ibotsutojawawetsika.

Moisés itsa naimoj̈oyotanajetaruka pijataj̈unaebonüjawata, jumetane jiwi penaj̈üanaejawa. Itsa baja pata, tane peyawajibijawa, peyaiyataejawanua becerrojumapekataenü. Moisés bitso anaepana, bij̈anaj̈uaba anijaibopanayobeje irajawawereka, nej̈ata toj̈otoj̈okabeje. Kaekueneta nej̈ata bijiana pejumapekataenü yajawa yanijoba Aarónjawabelia: “¿Dej̈ua pijakatoej̈anae pibisiakuene nej̈anaenej̈a Jehovájawabelia?”. Aarón nej̈ata jumekanawiata: “Pütsa nebaraanaepaname, j̈amü baja yapütaneme bajarapamonae jitsipabiaba pibisiakuene pej̈anaenej̈a. Jitsipa kaedioso, nej̈ata bajaraj̈uata oronanitota ej̈anajü bajarapabecerronü”. Aarón bajaraj̈ua pikani apobeitsi. Moisés ikatsia junaya bajaraibotsutojumajawabetsia Jehovájawabelia wajüka pitaj̈utobejiobiataenej̈a bajarapamonae.

Jehová siwajamatabükuenekaewa paisraelitawiyajuwünüwi jitsipa pejumekowünütsijawatsi. Bajaraj̈uata israelitawi bejumekowünüta Jehová, Moisés yajawa, ¿tsikaena jane?