Dioso ej̈ana itaboj̈o, ira yajawa

Jehová Dioso raja wajanakaej̈anaenü. Bajaraponü daj̈itakuenejawanü ej̈ana: j̈uajawanü tanetsi, j̈uajawanü apotaetsi ata. Dioso daj̈itakuenepewajünaeya, ej̈ana ayaibitsaüto ángelmonae. ¿Yapütaneme pamonaekuene ángelewi? Jehová ej̈ana ángelmonae bajaraponükuenia, jinawanapa atjübütatsia. Bajaraj̈uata waj̈aitsi aponakakuenekaüjüpae wajataejawa Jehová, ángelmonae ata. Jehová kopiaya ej̈ana ángelnü peyawenonaenünej̈atsi. Bajaraponü yawenonatsi Jehová pej̈anaenej̈a tuluputuanü, daj̈itaplanetakuenejawanü, daj̈itakuenejawanü ata. Waj̈aitsi jinawanapatsi planetayajuwünüjawata, baitsi pairataje.

J̈uakujinae, Jehová nakueneba pairajawata pejinawanapaenej̈a dajubimonae, jiwimonae ata. Jehová ej̈ana pinijijuametokotia pitayotsinej̈a daj̈ita ira. Ej̈ananua petsutojawanü, manuamene, menejawanü ata.

¿Deitsi nej̈ata j̈uakujinae? Jehová jumaitsi: “Nakuenebijitsianü daj̈itawiriaponajawanü, daj̈itawirianaejawanü ata”. Ira nej̈ata kapitsapa daj̈itawiria pej̈u pekapitsapaejawanü, naekuaitonü, pematonüjawanü ata. Jehová ej̈ana daj̈itawiria dajubimonae: pepunaewi, menejawata pejinawanapaewi, pebobenaponaewi, itsawiria ata. Jehová ej̈ana tsikiridajubij̈i pakuenia ikulimonae, yajawa ej̈ana ayaidajubij̈anetonü, pakuenia elefantemonae. ¿Depadajubi katsitapej̈anianü?

Nej̈ata Jehová jumaitsi kopiaya ángelnüjawabelia: “Ej̈anaenatsibeje jiwitonü”. Jiwi apoyajawanajüpae tsane dajubi, tsipaji jiwi kuenekaüjüpatsi pekapitsapaenej̈a itsakuenejawanü, pekuaikuaijaijawa, pejüajüajaijawa, penawajütsijawa Diosojawabelia ata. Ewetsipa pairataje, dajubimonae ata. ¿Yapütaneme meta kopiaya pajiwiyo naej̈ana? Nej̈ata yapütaenatsi.