Beyaj̈uaba pejuyapijinü pebaraanaepanaej̈ae

Adán, Evabeje pejutsikujinaetsi Edénwekua, pej̈i j̈ainabeje. Matapijinü pewünü Caín, bajaraponü nakuenebabiaba pijapabijawata. Pejuyapijinü pewünü Abel, bajaraponü ovejaj̈i pewetsinü.

Itsamatakabi Caín, Abelbeje rajutabeje ofrendakuenia Diosojawabelia. ¿Yapütaneme meta ofrendakuene? Ofrendakuene yabara jumaitsi pakujinae pepo pej̈aniakuenejawanü rajutatsi Diosojawabelia. Jehová bitso tsitaj̈anepanatsi Abel pijaofrenda, itsiata Caín pijaofrenda apotsitaj̈anepanaetsi. Bajaraj̈uata, Caín bitso anaepana, Jehová nej̈ata jumaitsitsi: “Tsitekaeya itsa anaepaname, pibisiakuene ej̈anaename”. Itsiata Caín apojumekowünütsi Jehová.

Itsamatakabi, Caín jumaitsi Abeljawabelia: “Ponatsibeje petusatojawabelia”. Nej̈ata baja itsa najetarukabeje petusatojawata, Caín beyaj̈uaba pejuyapinü. ¿Deitsi nej̈ata Jehová? Bajaraponü jumaitsi Caínjawabelia: “Nanekonitsiaya ponaponaename, pitsapaenamenua nijamonaewekua”. Caín kaeto ata baja aponawiatsi tsane.

¿Dej̈ua nakayapütaeyaej̈ana bajarapaliwaisi? Itsa daj̈itakuene j̈aniawaetsia aponakatoj̈anepanae wajajitsipaekuenia, bianaepanatsi meta. Bajaraj̈uata, benajamatabükuenej̈anetatsi itsa matatoj̈enetsia bitso anaepanatsi, itsamonae ata itsa nakatane wajaanaepanabiabijawa. Itsa pibisiakuene najamatabüj̈ainabiabatsi wajajamatabüütjütojawawetsina, bepijiayo benajamatabükuenekataitatsi pibisiakuene wajaitsiyaniwa.

Abel bitso baasiwa tsabiabi Jehová yajawa jumekowünütabiaba. Bajaraj̈uata, Jehová kaeto ata aponakofünütsi tsane Abel. Dioso ikatsia asaüyaej̈anaenatsi pakujinae pairaje pepo pej̈aniaira tsane.